Kristín Össuardóttir kom færandi hendi með skírnarkjóll á húsmæðraskólasýninguna í Tónlistarskólanum á Ísafirði. Kjólinn saumaði Kristín er hún stundaði nám við Húsmæðraskólann Ósk á Ísafirði vorið 1958. 

Þrjár kynslóðir hafa verið skírðar í kjólnum og hafa yfir 60 börn borið kjólinn við skírn. Fyrsta barnið var skírt í kjólnum í 1958, Helga Guðrún Guðjónsdóttir, systurdóttir Kristínar og síðastur var Davíð Páll Jónsson 2014, yngsta barnabarn Kristínar.

Saga Húsmæðraskóla Ísafjarðar

Húsmæðraskólinn var stofnaður árið 1912 og var fyrst til húsa í Pólgötu 8. Teknar voru tvær stofur á leigu, ásamt eldhúsi og herbergi fyrir forstöðukonuna.
Aðdragandi að stofnun skólans var sá að á fundi Kvenfélagsins Ósk árið 1911 var rætt um stofnun húsmæðraskóla á Ísafirði og barst Alþingi áskorun:
„Fundurinn óskar, að húsmæðraskóli verði settur á stofn á Ísafirði og skorar á Alþingi að taka þetta mál að sér, og veita fé svo ríflega, að hægt verði að koma skólanum á fót, sem allra fyrst.”
Frumkvöðull skólans var frú Camilla Torfason sem var fædd á Ísafirði árið 1864. Camilla var fyrsti formaður Kvenfélagsins Óskar. Hún hafði lokið stúdentsprófi frá Kaupmannahöfn á þeim árum sem íslenskar konur höfðu ekki öðlast rétt til stúdentsprófs og var þar með fyrsta íslenska konan sem lauk stúdentsprófi. Hún stundaði síðar nám við Kaupmannarhafnarháskóla ásamt því að sinna kennslustörfum í Danmörku. Hefur reynsla hennar af slíkum störfum vakið áhuga hennar á menntamálum kvenna og var markmið hennar og félagsins að efla samúð og samvinnu, glæða félagslíf bæjarbúa og hafa hvetjandi og menntandi áhrif á æskulýðinn, einkum stúlkurnar.

Opinn ársfundur Orkubús Vestfjarða var haldinn í dag. Lagður var fram ársreikningur fyrir 2023. Tekjur síðasta árs voru 3.838 m.kr. og rekstrargjöld 3.022 m.kr. Að frádregnum afskriftum og viðbættum tekjum af fjármagni varð niðurstaðan hagnaður 599 m.kr. Af hagnaðinum eru greiddar 120 m.kr. í tekjuskatt til ríkissjóðs og standa þá eftir 379 m.kr. sem hagnaður fyrirtækisins.

Útgjöld vegna launa og tengdra gjalda voru 1.144 m.kr. og stöðugildin voru 61 í fyrra..

Eignir OV eru bókfærðar á 15 milljarða króna og þar af eru tæplega 11 milljarðar króna skuldlaust eigin fé. Hlutfallið er 73%.

Fjárfesting síðasta árs varð 1.091 m.kr.

Tilkynnt var um nýkjörna stjórn Ov og er hún skipuð:

Illugi Gunnarsson, sem er formaður.
Gísli Jón Kristjánsson
Unnar Hermannsson
Valgerður Árnadóttir
Viktoría Rán Ólafsdóttir

Varðskip Landhelgisgæslunnar, Þór og Freyja, hafa öfluga dráttargetu til að geta brugðist við ef skip, stór sem smá, lenda í vandræðum á hafsvæðinu umhverfis landið. Dráttarvírinn leikur þar lykilhlutverk og áhöfn varðskipanna þurfa að tryggja að hann sé í góðu standi ef á þarf að halda.

 
Á dögunum kom í ljós smávægileg skemmd á dráttarvír varðskipsins Þórs og var brugðið á það ráð að skipta um vírinn. Varðskipið fór að bryggju hjá Hampiðjunni í Neskaupstað þar sem víraskiptin fóru fram. Gamla dráttarvírnum var spólað í land á tvö kefli og nýjum vír komið fyrir. Þá var eitt kefli tekið um borð með um 480 metra varavír sem hífður var niður í lest til geymslu.

 
Þegar þessu var lokið hélt varðskipið sína leið frá Neskaupstað. Sævar Már Magnússon, bátsmaður, var með myndavél á sér við þessa vinnu og tók saman áhugavert myndband sem sýnir hvernig víraskiptin fóru fram. 

Á myndinni má sjá 10 stærstu viðskiptalönd með eldislax undanfarinn áratug og að endingu eru öll önnur lönd sett saman í einn flokk (ÖN).

Röðun landa á myndinni fer eftir útflutningsverðmæti eldislax í heild árin 2019-2023.

Hér trónir Holland á toppnum, en þar fer bæði fram áframvinnsla á laxi auk þess að honum er oft umskipað þar.

Bandaríkin koma þar á eftir en segja má að þar sé stærsti einstaki markaðurinn með eldislax frá Íslandi. Í þriðja og fjórða sæti koma Danmörk og Pólland, en rétt eins og í Hollandi fer þar oft fram áframvinnsla og umskipun. Í Póllandi eru til að mynda stærstu og afkastamestu laxavinnslur í Evrópu.

Sjá má að talsverðar sveiflur eru í útflutningi á eldislaxi til einstakra landa á milli ára, en leitnin er oftast upp á við í takti við aukið laxeldi og þar með útflutning. Áhugavert er að fylgjast með einstökum mörkuðum og er vert að nefna stöðugan uppgang í útflutningu til Frakklands undanfarin ár.

Þá var útflutningur til Úkraínu á hraðri uppleið til ársins 2021 og var það sjötta stærsta viðskiptaland Íslands með lax það ár. Í kjölfar stríðsaðstæðna þar í landi hefur útflutningur til Úkraínu verið lítill sem enginn síðan.

Alls voru 225.428 einstaklingar skráðir í þjóðkirkjuna þann 1. maí síðastliðinn samkvæmt skráningu Þjóðskrár og hefur skráðum einstaklingum í þjóðkirkjuna fækkað um 474 síðan 1. desember 2023.

Næst fjölmennasta trú- og lífsskoðunarfélag landsins er Kaþólska kirkjan með 15.408 skráða meðlimi og í þriðja sæti yfir fjölmennasta trú- og lífsskoðunarfélag er Fríkirkjan í Reykjavík með 10.006 skráða meðlimi.

Frá 1. desember 2023 hefur fjölgun meðlima í trú- og lífsskoðunarfélögum verið mest í Siðmennt eða um 106 meðlimi. Mest hlutfallsleg fjölgun var hjá Samfélagi Ahmadiyya-múslima á Íslandi , eða um 28,6%.

Alls voru 30.751 einstaklingar skráðir utan trú- og lífsskoðunarfélaga sem er 0,6% hækkun frá 1. des 2023. Ef að einstaklingur er utan trú- eða lífsskoðunarfélaga þá hefur sá einstaklingur tekið afstöðu til þeirrar skráningar sinnar.

Alls voru 86.125 einstaklingar skráðir með ótilgreinda skráningu. Ef að einstaklingur er með ótilgreinda skráningu þá hefur hann ekki tekið afstöðu til skráningar í trú- eða lífsskoðunarfélag

Í tilkynningu frá Vegagerðinni kemur fram að vegna hættu á vegaskemmdum verður ásþungi takmarkaður við 10 tonn á Vestfjarðarvegi (60) um Dynjandisheiði, milli Flókalundar og Dynjandisvogs, frá kl. 12:00 í dag, föstudaginn 17. maí.