Próf í íslensku fyrir umsækjendur um íslenskan ríkisborgararétt eru haldin tvisvar á ári, að vori og hausti (Icelandic tests for applicants for Icelandic citizenship (Icelandic passport)).

Á Ísafirði verður hægt að taka próf hjá Fræðslumiðstöð Vestfjarða  miðvikudaginn 20. nóvember 2024.

Mímir sér um framkvæmd ríkisborgaraprófa fyrir Menntamálastofnun og tekur við skráningum á heimasíðu sinni. 

Skráningu lýkur mánudaginn 28. október. 

Ekki er hægt að skrá sig í próf eftir að skráningarfrestur rennur út og skráning er ekki gild nema gengið hafi verið frá greiðslu. 

Föstudaginn 11. október hittist starfsfólk svæðisstöðva íþróttahéraða á fundi á Hótel Varmalandi í Borgarfirði, í tengslum við sambandsstjórnarfund UMFÍ. Á fundinn mættu einnig fleiri úr starfsliði bæði ÍSÍ og UMFÍ, meðal annars framkvæmdastjórar beggja samtaka.
Svæðisstöðvarnar eru átta talsins um allt land og eru tvö stöðugildi á hverjum stað. Búið er að ráða í allar stöður og er starfsemi stöðvanna hafin.

Ásmundur Einar Daðason, mennta- og barnamálaráðherra mætti á fundinn og átti gott samtal við starfsfólkið. Ráðherra er ötull talsmaður verkefnisins sem tengist náið þeim markmiðum sem fram koma í lögum um farsæld barna, íþróttalögum, íþróttastefnu ríkisins og byggðaáætlun. 
Á fundinum kom fram að ráðherra bindur miklar vonir við að þetta verkefni muni efla og styðja við íþróttastarf á landvísu. 
Megin markmið svæðisstöðvanna er að efla íþróttastarf og auka þátttöku allra barna og ungmenna með áherslu á þátttöku fatlaðra barna, barna af tekjulægri heimilum og barna með fjölbreyttan tungumála- og menningarbakgrunn. 

Landskjörstjórn opnaði í gær stafrænt meðmælakerfi fyrir alþingiskosningarnar 30. nóvember og geta stjórnmálasamtök, sem hafa fengið úthlutuðum listabókstaf frá dómsmálaráðuneytinu nú stofnað stafræna meðmælasöfnun fyrir framboð sín í öllum kjördæmum.

Stafræna meðmælakerfið var unnið í samstarfi Stafræns Íslands og Þjóðskrár og var þróun þess komin áleiðis þegar ljóst varð að kosið yrði í lok nóvember.

Síðustu daga var því unnið hratt að því að ljúka þróun sem til þurfti til að geta opnað kerfið fimmtudaginn 17. október.

Vel samstilltur hópur um stafrænu lausnina frá Stafrænu Íslandi, Landskjörstjórn, Þjóðskrá og hugbúnaðarteymi frá Júní og Stefnu unnu að verkefninu og voru nýttar nokkrar af kjarnaþjónustum Stafræns Íslands, á borð við Ísland.is, innskráning fyrir alla og umsóknakerfi Stafræns Íslands.

Nú þegar hafa níu framboð opnað fyrir móttöku á skráningu meðmælenda það eru allir þeir flokkar sem sæti eiga á Alþingi og auk þess Ábyrg framtíð.

Bæjar­stjórn Vest­ur­byggðar hefur samþykkt ráðn­ingu Magnúsar Arnars Svein­björns­sonar í stöðu sviðs­stjóra fjöl­skyldu­sviðs.

Magnús hefur starfað lengst af hjá Reykjavíkurborg, þar á meðal sem skólastjóri Vinnuskóla Reykjavíkur. Síðastliðið haust tók hann við stöðu deildarstjóra rekstrar hjá Heilbrigðisstofnun Vestfjarða.

Hann er nú í diplómanámi í opinberri stjórnsýslu við Háskóla Íslands og býr yfir fjölbreyttri reynslu úr mannauðsmálum, opinberri stjórnsýslu, barna- og unglingastarfi sem og þverfaglegu samstarfi við félagsþjónustu, skóla og barnavernd.

Fram kom í ávarpi Stefáns Vagns Stefánssonar alþm. fyrsta þingmanns Norðvesturkjördæmis við upphaf Fjórðungsþings Vestfirðinga í morgun að hann hefði áhyggjur af framkvæmdum í samgöngumálum á næsta ári þar sem óraunhæft væri að ný samgönguáætlun verði samþykkt fyrir alþingiskosningarnar í lok nóvember. Hann sagði ljóst að það yrði ekki fyrr en um mitt næsta ár sem ný ríkisstjórn v´ri komin á fót og búin að leggja fram og fá afgreidda nýja samgönguáætlun. Á meðan væri í raun framkvæmdastopp í samgöngumálum.

Stefán Vagn sagði að þingmenn væru ákveðnir í því að afgreiða ný fjárlög fyrr miðjan nóvember og þar myndu vera fjárveitingar til samgöngumála, en hins vegar væri mælt fyrir um skiptu fjármagnsins á einstakar framkvæmdir í samgönguáætlun.

Fram hefði komið sú hugmynd að ákveða í fjárlögunum nokkrar framkvæmdir sem fengju fjármagn og ef það gengi eftir yrði hægt að setja þær framkvæmdir í gang strax. Þetta gæti hins vegar aðeins gengið ef fullt samkomulag yrði um þær framkvæmdir sem þannig yrðu teknar út úr.

Fjórðungsþingið er haldið að Laugarhóli í Bjarnarfirði.

Umhverfis-, orku og loftslagsráðuneytið, Landsvirkjun, Orkubú Vestfjarða og Vestfjarðastofa hafa endurnýjað samstarf sitt um Bláma til ársins 2026, en samstarfsverkefnið sem verið hefur í gangi frá  2021 styður við orkuskipti og verðmætasköpun á Vestfjörðum og landinu öllu. 

Blámi hefur á síðustu þremur árum haft frumkvæði að og stutt við fjölmörg orkuskiptaverkefni í þéttu samstarfi við fyrirtæki með sérstaka áherslu á sjávartengda starfsemi. Blámi hefur unnið náið með stærstu fiskeldisfyrirtækjum á Íslandi, sveitarfélögum, bátasmiðjum, tæknifyrirtækjum og menntastofnunum og hóf nýverið samstarf við innviðafélag Vestfjarða um að styðja við frekari innviðauppbyggingu í fjórðungnum.

Þorsteinn Másson hefur verið framkvæmdastjóri Bláma frá upphafi en auk hans hafa Tinna Rún Snorradóttir og Anna María Daníelsdóttir starfað hjá Bláma ásamt sumarstarfsmönnum. Starfsemi Bláma verður í framhaldi endurnýjunar samstarfsins efld með nýrri starfsstöð á sunnanverðum Vestfjörðum. 

Guðlaugur Þór Þórðarson, umhverfis-, orku- og loftslagsráðherra:

„Við höfum lagt áherslu á að styðja við Vestfirði á undanförnum misserum og þátttaka ráðuneytisins í Bláma gefur okkur tækifæri til að virkja það hugvit, auðlindir og þekkingu sem fyrir hendi er svo árangur náist í orkuskiptum og orkutengdri nýsköpun. Sameiginlegt átak og stuðningur öflugra aðila skiptir sköpum svo vel takist til og það er ánægjulegt að ráðuneytið geti verið slíkur bakhjarl.“

Hörður Arnarson, forstjóri Landsvirkjunar:  

„Markvist og vel skilgreint samstarf er lykillinn að árangri í orkuskiptum og orkutengdri nýsköpun. Með áframhaldandi stuðningi við Bláma væntum við þess að hægt verði að hrinda í framkvæmd enn fleiri raunhæfum verkefnum sem styðja við loftslagsmarkmið Íslands og aukna sjálfbæra verðmætasköpun á Vestfjörðum og um allt land.“

Sigríður Ó. Kristjánsdóttir, framkvæmdastjóri Vestfjarðastofu:

„Blámi hefur verið áhersluverkefni Sóknaráætlunar Vestfjarða síðustu ár og hefur reynst afar árangursríkt verkefni fyrir heildarhagsmuni Vestfjarða. Samstarf starfsmanna Vestfjarðastofu og Bláma hefur skilað fjölda árangursríkra umsókna fyrirtækja og stofnana á svæðinu í fjölmarga sjóði og þannig átt hlut í að auka fjármagn til nýsköpunarverkefna á Vestfjörðum. “

Elías Jónatansson, orkubússtjóri Orkubús Vestfjarða:

„Samstarf Bláma og Orkubúsins hefur skilað árangri sem er jafnvel umfram væntingar. Styrkleiki Bláma felst í að leiða saman hagsmunaaðila í orkuskiptum og nýsköpun á Vestfjörðum með því að setja fókusinn á hvernig megi koma hugmyndum í verk innan tiltekins tímaramma og hvaða áhrif slík verkefni geti haft fyrir samfélagið á Vestfjörðum. Við hlökkum til áframhaldandi samstarfs.“

Bæjarráð Ísafjarðarbæjar leggur til við bæjarstjórn að samþykkja byggingaáform Íslandsbanka vegna tengibyggingar á fyrstu hæð Stjórnsýsluhússins á Ísafirði. Fer málið fyrir næsta bæjarstjórnarfund til afgreiðslu.

Ætlunin er stækka rými embættis Lögreglustjórans á Vestfjörðum með tengibyggingunni og mun Íslandsbanki byggja en leigja lögregluembættinu.

Tengibygginging er afmörkuð með hringnum til hægri.

Öll landshlutaráð Viðreisnar hafa nú ákveðið að það verði uppstilling á listum Viðreisnar fyrir komandi alþingiskosningar. Fundur var í þremur landshlutaráðum Viðreisnar í fyrrakvöld, Reykjavík, Suðvesturráði og Suðurráði. Einnig var fundur í Norðausturáði og Norðvesturráði í gærkvöldi.

Í tilkynningu frá Viðreisn segir að mikil umræða hafi verið um hvort fara ætti í uppstillingu eða prófkjör og mikill hugur í ráðunum að stefna næst að prófkjöri, þegar rýmri tími gefst til að raða á lista. Landshlutaráðin  fimm hafa jafnframt kosið sér uppstillinganefndir, sem hefja strax störf.

Þau sem áhugasöm eru um að vera á lista Viðreisnar í þessum kjördæmum geta skráð sig hér. Einnig er hægt að senda tölvupósta til uppstillingarnefndar í Norðvesturkjördæmi á netfangið: nordvestur@vidreisn.is.

Óskað er að tilnefningar berist fyrir laugardag, svo að uppstillinganefndir geti lokið störfum í næstu viku. Þá verða listar bornir undir landshlutaráð til samþykktar og stjórn Viðreisnar til staðfestingar.