Samið hefur verið við verktaka um stærstan hluta fyrsta áfanga framkvæmda á skólalóð Patreksskóla.

Fyrsti áfangi saman stendur af framkvæmdum á afmörkuðu svæði lóðarinnar næst íþróttahúsinu og á svæðinu milli efri og neðri skóla. Hönnunin var unnin af Landmótun út frá hugmyndum nemenda Patreksskóla frá því í vor.

Á neðra svæðinu verða sett upp fimm leiktæki. Snúningsklifurtæki, snúningsróla, lítið trampolín og rörarennibraut. Einnig verður sett upp hreiðurróla sem keypt var með stuðningi Krúttmaganefndarinnar.

Á efra svæðinu verður bætt aðgengi að skólanum með rampi meðfram útvegg sem liggur við sal skólans. Eitt leiktæki verður sett upp á torgið við aðalinngang skólans, girðingar fyrir fótboltavöll, málaðar vallalínur og setpallar settir upp við enda fótboltavallar.

Í allri hönnuninni er unnið að því að bæta lit og fegurð skólalóðarinnar en fyrst og fremst að auka gæði skólalóðarinnar fyrir nemendur.

Styrkjum til atvinnumála kvenna hefur verið úthlutað og fengu 33 verkefni styrki samtals að fjárhæð 38.000.000 kr. 

Styrkjum til atvinnumála kvenna hefur verið úthlutað frá árinu 1991 og eru þeir ætlaðir frumkvöðlakonum eða fyrirtækjum í þeirra eigu. Skilyrði styrkveitinga eru þau að verkefnin séu í meirihlutaeigu kvenna, stjórnað af þeim og feli í sér nýnæmi eða nýsköpun af einhverju tagi. Það er félags- og vinnumarkaðsráðherra sem veitir styrkina. 

Ekki er nauðsynlegt að vera með starfandi fyrirtæki til að sækja um styrk og því er heimilt að sækja um vegna verkefna á byrjunarstigi en einnig geta þær konur sótt um styrk sem eru að þróa nýjungar í starfandi fyrirtækjum.

Unnt er að sækja um styrki vegna vinnu við gerð viðskiptaáætlunar, vegna markaðssetningar, vöruþróunar, hönnunar og vegna launakostnaðar en ekki eru veittir styrkir til framkvæmda eða vegna stofnkostnaðar.

Í ár bárust 244 umsóknir og hefur ráðgjafarnefnd metið þær á undanförnum vikum. Nefndina skipa þær Bergrún Íris Sævarsdóttir, Elín Gróa Karlsdóttir, Guðrún Stella Gissurardóttir, Hanna Dóra Björnsdóttir og Soffía Gísladóttir.

Hæsta styrkinn í ár, 2.5 milljónir króna, hlutu þær Sandra Gísladóttir fyrir verkefnið Barilli Enterprise Karaokee og Alice Sowa fyrir verkefnið Ullarkögglar.

Á Vestfjörðum fengu þær Jamie Lee á Gróustöðum í Reykhólahreppi og Harpa Lind Kristjánsdóttir á Ísafirði styrk að upphæð ein milljón hvor til vöruþróunar.

Lagður hefur verið fram ársreikningur 2023 fyrir Félagsheimilið á Þingeyri og skýrsla um starfsemi og ástand hússins.

Tekjur síðasta árs voru 796 þús kr. og útgjöld 569 þúsund krónur. Inneign var í byrjun árs 811 þúsund kr. og jókst hún í 1.038 þúsund kr. í lok ársins.

Í fyrra var tekin saman greinargerð um ástand, viðhald og nauðsynlegar endurbætur á húsnæði Félagsheimilisins á Þingeyri og komið til bæjarstjóra. Þar er rakið hvaða endurbætur er orðið verulega nauðsynlegt að ráðast í og hefur verið í mörg ár. Þegar eldhúsið var tekið í gegn var planið að a.m.k. gólf í sal og gluggar væru næst á dagskrá. Og þannig er það enn segir í ársskýrslunni.

Engar meiriháttar framkvæmdir voru í fyrra, en aukavatnshitakútur fyrir eldhús var tengdur í maí þannig að nú er nægt heitt vatn í uppvask en það var löngu orðið tímabært að laga það.

Á Dýrafjarðardögun í fyrra var haldinn dansleikur og rann aðgangseyrir til endurbóta á gólfi í salnum auk frjálsra framlaga. Um 500 þús kr. safnaðist í frjálsum framlögum “spýtum” og svo til annað eins í aðgangseyri. Þetta bíður allt á bók og mun renna óskipt í nýtt gólf þegar að því kemur.

Eldvarnareftirlitið hefur lagt fram eindregna kröfu um að brunavarnarkerfi verði sett upp í húsinu. Búið er að panta slíkt kerfi frá Bretlandi. Það bíður uppsetningar en sá kostnaður væri þá í höndum sveitarfélagsins.

Af öðrum verkefnum er að klára þarf að koma upp túðu með viftu sem tekin var niður þegar þakið á senuhluta hússins var endurnýjað, gera þarf við leka í hornum þar sem salur og sena tengjast og þakrennur á húsinu eru farnar að leka.

Göngunum undir Breiðadals og Botnsheiði verður lokað kl.17:00 í dag í hálfa klukkustund eða svo.

Búast má við umferðartöfum í göngunum í eina til tvær klukkustundir í kjölfarið.

Vegfarendur eru hvattir til að sýna tillitssemi.

Ástæða lokunarinnar er æfing allra viðbragðsaðila á norðanverðum Vestfjörðum þar sem líkt verður eftir hópslysi í Önundarfirði þar sem hópferðabifreið með tugi farþega hlekkist á og bregðast þarf við því með viðeigandi hætti.

Æfingin miðast við að samhæfa viðbrögð og vinnu viðbragðsaðila sem og heilbrigðisstarfsmanna og Vegagerðarinnar.

Vettvangsstjórn verður virkjuð á vettvangi, sem og Aðgerðastjórn almannavarna á Vestfjörðum, sem staðsett verður í nýrri aðstöðu sinni í Guðmundarbúð á Ísafirði.

Einnig verður Samhæfingamiðstöð í Skógarhlíð virkjuð eins og venjan er. Flugdeild Landhelgisgæslunnar mun einnig koma að æfingunni.

.

Slátrað var 336 tonnu af eldisfiski á Bíldudal í aprílmánuði samkvæmt upplýsingum hafnarstjóra Vesturbyggðar og í Bolungavík var landað 776 tonnum af eldisfiski. Samtals var landað til slátrunar á Vestfjörðum 1.112 tonnum af eldisfiski í aprílmánuði.

Er það óvenjulítið miðað við tölur síðustu mánaða. Í október 2023 var slátrað 2.608 tonnum á Bíldudal og 1.528 tonnum í Bolungavík eða samtals 4.136 tonnum. Nemur magnið í síðasta mánuði um 27% af októbertölunum.

Í Bolungavík var landað 1.151 tonnum af bolfiski í apríl og að viðbættum eldisfiskinum komu 1.927 tonn til löndunar í mánuðinum.

Þeim sérstöku ásþungatakmörkunum sem hafa verið í gildi á Vestfjarðarvegi (60)  yfir Dynjandisheiði var aflétt í morgun miðvikudaginn 22. maí. 2024 kl. 06:00.

Fyrir helgi voru settar á 10 tonna þungatakmarkanir á Dynjandisheiði, en .eim hefur nú verið aflétt.

Úrskurðarnefnd um umhverfis- og auðlindamál hefur hafnað kröfu samtakanna Laxinn lifi sem vildi að Háafell yrði að framkvæma sérstakt umhverfismat í Ísafjarðardjúpi fyrir því að um tveggja ára skeið yrðu tveir árgangar af eldisfiski í Seyðisfirði.

Í febrúar 2024 komst Skipulagsstofnun að þeirri niðurstöðu að Háafell þyrfti ekki að gera sérstakt umhverfismat fyrir þeirri breytingu að hafa frá vori 2024 til vorsins 2026 mismunandi árganga eldislax innan sama árgangasvæðis á eldissvæðunum Ytra-Kofradýpi og Seyðisfirði.

Háafell fékk rekstrarleyfi fyrir 6.800 tonna eldi í Ísafirði og var í aðdraganda þess unnið mat á umhverfisáhrifum á Djúpið vegna framleiðslunnar. Skipulagsstofnun telur tímabundnu breytinguna ekki líklega til þess að hafa umtalsverð umhverfisáhrif og því munu umhverfismatið sem gert var lýsa áhrifunum nægjanlega. Umhverfisstofnun benti á að nýtt umhverfismat myndi ekki varpa skýrara ljósi á áhrif eldisins en þegar lægi fyrir.

Úrskurðarnefndin segir í úrskurði sínum að „að áliti úrskurðarnefndarinnar er ákvörðun Skipulagsstofnunar um að umrædd breyting skuli ekki háð mati á umhverfisáhrifum studd haldbærum rökum. Verður og ekki annað séð en að stofnunin hafi að rannsökuðu máli lagt viðhlítandi og sjálfsætt mat á þá þætti sem máli skipti um það hvort umtalsverð umhverfisáhrif hlytust af framkvæmdinni. Verður því að hafna kröfu um ógildingu hennar.“