Bæjarráð Ísafjarðarbæjar hyggst ekki nýta forkaupsrétt sveitarfélagsins að landinu og leggur það til við bæjarstjórn að falla frá forkaupsrétti að landi og mannvirkjum Fagrahvamms, í þetta skipti, vegna fyrirhugaðrar sölu þess.

Landið var selt 1952 til erfðafestu og til ræktunar með forkaupsrétti sveitarfélagsins vilji erfðafestuhafi selja erfðafesturétt sinn.

Upphaflega var landið liðlega 35 þúsund fermetrar, en síðar var tekin sneið af því og færð undir Góustaði, í stað lands sem bærinn fékk þá úr þeirri jörð. Eftir standa um 20.000 fermetrar. Um 4.000 fermetrar gætu verið í óð undir mannvirki sem eru á landinu svo mögulega gæti sveitarfélagið nýtt um 16.000 fermetra
fari það svo að Ísafjarðarbær hyggist skipuleggja byggð á landinu.

Kjósi sveitarfélagið að innkalla landið þarf að greiða 25 aura fyrir hvern fermetra á verðlagi samningsins, sem er um13,24 kr í dag.

Í dag kl 17 hefst fyrsti fundur nýkjörinnar bæjarstjórnar í sameinuðu sveitarfélagi Vesturbyggðar og Tálknafjarðar. Ekki er komin niðurstaða í ráðningu bæjarstjóra og verður Gerði Björk Sveinsdóttur veitt umboð sem staðgengill bæjarstjóra. Páll Vilhjálmsson, oddviti N -lista vildi ekkert segja um það hvernig staðan væri.

Kosið verður í fastanefndir og rætt um nafn á nýja sveitarfélagið. Miðað er við að leggja tillögur að nafni fyrir íbúa sveitarfélagsins.

Bátasmiðjan á Suðureyri hefur fest kaup á stóru húsnæði Hafnarbakka 5 á Flateyri og segir Þórður Bragason, eigandi að fyrirhugað sé að flytja starfsemina þangað. Húsnæðið sé mun stærra en núverandi aðstaða í áhaldahúsinu við höfnina á Suðureyri og það sé auk þess leiguhúsnæði.

Seljandi er athafnamaðurinn Elías Guðmundsson á Suðureyri sem gerir út sjóstangveiðibáta á báðum þessum stöðum og mun Bátasmiðjan þjónustan bátana.

Bátasmiðjan hefur verið starfrækt síðustu þrjú árin og annast einkum viðgerðir á plastbátum. Þórður segir að nýja húsnæðið gefi fleiri möguleika og áformað er að bjóða bátaeigendum að koma með báta sína til viðgerðar þannig að það verði nokkurs konar bátahótel.

Þórður Bragason.

Franski lista­mað­urinn Henri Patrick Stein, sem er Patreks­firð­ingum kunnur fyrir verk hans til minn­ingar um franska sjómenn, er vænt­an­legur til Patreks­fjarðar á ný að kvöldi 17. júní næst­kom­andi. Stein ætlar að vinna listaverk í stein nálægt höfninni með slípirokk og meitlum, áætluð verklok eru 25. júní. Verkefnið hlaut styrk frá menningar- og ferðamálaráði Vesturbyggðar.

Óskar eftir aðstoðarfólki

Hann óskar eftir að fá aðstoðarfólk í sjálfboðaliðastarfi, sem hefur áhuga á að læra réttu handtökin við steinsmíði og fleira. Engin krafa er gerð um þekkingu á steinsmíði, einungis áhugi á að fegra bæinn og að kynnast listgreininni. Starfið er ólaunað. Nauðsynleg verkfæri verða á staðnum. Gisting verður útveguð sjálfboðaliðum sem koma annars staðar frá. Þá væri vel þegið ef heimamenn gætu lánað herbergi og/eða annað húsnæði fyrir þá.

Henri Patrick Stein er franskur högglistamaður sem hannaði og reisti minnisvarðann um franska sjómenn á Patreksfirði árið 2002. Upphaflega stóð til að hann kæmi og reisti nýja verkið 20 árum seinna, það er árið 2022, en Covid faraldurinn setti strik í reikninginn. Hann hefur komið víða við og hefur meðal annars unnið skúlptúra og ufsagrýlur nýverið fyrir endurreisn Notre Dame kirkjunnar í París. Hjónin María Óskarsdóttir og Halldór Árnason eru hvata- og umsjónarmenn verkefnisins, þau hafa lengi vel staðið að sýningu í tengslum við franska sjómenn á heimili þeirra að Mýrum 8 á Patreksfirði og gefið út bækur um efnið.

Áhugasamir vinsamlega hafið samband við Maríu í síma 892 5059, auk þess veitir menningar- og ferðamálafulltrúi nánari upplýsingar í tölvupósti og síma. Heimamenn sem geta lánað húsnæði hafið samband við Maríu.

Nýjum póstboxum fjölgar stöðugt. Í tilkynningu frá Póstinum kemur fram að í næsta mánuði verða þau orðin alls 100 talsins og að þau eru vinsælasti kosturinn hjá Póstinum.

„Fólk kann vel að meta að geta sótt pakka og póstlagt í póstbox hvenær sem er, árið um kring,“ segir Ósk Heiða Sveinsdóttir, framkvæmdastjóri viðskiptavina.

Nýlega bættust við póstbox í Búðardal, Súðavík og á Suðureyri.

„Uppsetning hefur gengið vonum framar og við höldum áfram að finna nýja staði fyrir póstbox og koma þeim fyrir á stöðum þar sem þörfin er hvað mest. Við hvetjum alla til að prófa að nota póstbox. Þetta ein þægilegasta og hagkvæmasta leiðin til þess að sækja og senda sendingar í dag,“ segir Ósk Heiða.

Stefnt er að því að nýi gervigrasvöllurinn á Torfnesi, Kerecis völlurinn, verði tilbúinn til notkunar 14. júní næstkomandi. Jóhann Birkir Helgason, eftirlitsmaður Ísafjarðarbæjar segir að beðið sé eftir verktakanum Metatron. Starfsmenn fyrirtækisins séu á Akureyri og fari svo til Sauðárkróks til viðgerða á gervigrasvelli en Jóhann vonast til þess að þeir verði á Ísafirði á fimmtudaginn.

Þá verði hafist handa við að steypa niður púðana og áætlað er að það taki fjóra daga. Síðan þurfi tíu daga til þess að leggja gervigrasið. Framgangur verksins sé hins vegar háður veðráttunni. Það þurfi að vera þurrt þegar púðarnir verða steyptir og hitastig a.m.k. 8 gráður á celsíus og hitinn má ekki fara niður fyrir 5 gráður við niðurlagningu gervigrassins. Haldist veðráttan hagstæðin verður völlurinn tilbúinn 14. júní.

Samúel Samúelsson, formaður meistarflokksráðs Vestra í knattspyrnu sagði í samtali við Bæjarins besta að miðað við þessa áætlun verði fyrsti leikur Vestra á Kerecisvellinum í Bestu deildinni gagn Val þann 22. júní og fyrsti leikurinn verður strax 15. júní þar sem kvennalið Vestra leikur í annarri deildinni.

Ekkert verður af því að fyrsti leikurinn verði á sjómannadaginn 2. júní eins og áður var að stefnt og verður sá leikur, sem er gegn Stjörnunni, spilaður í Laugardalnum í Reykjavík á leikvelli Þróttar en mun teljast sem heimaleikur Vestra. Samúel sagði mikinn kostnað fylgja hverjum leik sem þyrfti að færa suður.

Drumbur er stuttvaxinn og þunnvaxinn fiskur með stuttan og ávalan haus. Augu eru stór. Neðri skoltur er aðeins styttri en sá efri. Tennur eru smáar og hvassar. Plógbein og gómbein eru tennt. Bakuggi byrjar rétt aftan við haus og er samvaxinn sporði og raufarugga. Ekki vottar fyrir sporði. Eyruggar eru stórir og bogadregnir og ná aftur fyrir fremri rætur bakugga. Kviðuggar eru tveir stuttir geislar hvor uggi og er innri geislinn lengri. Hreistur vantar og rák er tvöföld. Hér við land hefur veiðst 40 cm drumbur og gæti hann verið sá stærsti sem fengist hefur.

Litur er blágrár, stundum brúnleitur og uggar eru dökkir.

Drumbur fannst í fyrsta skipti á um 700 m dýpi sunnan Georgsbanka undan austurströnd Bandaríkjanna árið 1962. Síðan hefur hann m.a. veiðst suðaustur af Hvarfi við Grænland, við Ísland, Norðvestur-Írland og í Gíneuflóa við vestanverða Afríku.

Hér veiddist drumbur fyrst í maímánuði árið 1983 en þá fékkst einn 26,5 cm langur í humarvörpu á 178 – 212 m dýpi í Háfadjúpi. 1 júlí sama ár veiddist annar, 21 cm langur, einnig í humarvörpu, í Breiðamerkurdjúpi. Sá þriðji veiddist ekki fyrr en árið 1992 en síðan hafa einn eða fleiri veiðst árlega allt frá suðausturmiðum (Berufjarðarálshorn) vestur með suðurströndinni og norður á grálúðuslóð vestan Víkuráls og árið 1998 bárust 10 til rannsóknar á Hafrannsóknastofnun. Drumbar hafa veiðst hér við land á 183-824 m dýpi (en hann hefur veiðst niður á meira en 1000 m dýpi) og ýmist í flotvörpu eða botnvörpu. Þeir voru 22- 40 cm langir, sá lengsti veiddist á 192 m dýpi í mars árið 1997 við Berufjarðarálshorn.

Drumbur er miðsævis- og djúpfiskur sem er sennilega í slagtogi með stórum marglyttum. Hann gýtur seiðum.

Af vefsíðunni hafogvatn.is