Mikið var um að vera í góðviðrinu í Ísafjarðarhöfn í gær. Þrjú erlend skemmtiferðaskip voru í höfn og með þeim um 4.000 farþegar, að mestu Bandarríkjamenn. Ætla má að höfnin hafi fengið um 20 m.kr. í kassann í hafnagjöld þennan daginn.

Minnst skipanna var franska lúxusskipið Le Bellot, sem var með 96 Bandaríkjamenn sem sigldi fyrst inn í Ísafjarðardjúp og kom við í Vigur áður en það lagðist að kanti í Sundahöfn.

Viking Star hóf ferð sína í Björgvin í Noregi 27.maí og Ísafjörður var fyrsta höfnin á Íslandi. Það hldur svo áfram um landið og siglir héðan til Grænlands. Með því voru um 750 farþegar. Skipið er feikna langt 228 metrar.

Stærst var þó Caribbean Princess sem er 290 metra langt og með því voru um 3.000 farþegar. Ferðalagið sem Caribbean Princess er á núna hófst í Southampton í Englandi 31. maí, en þaðan var siglt á þrjár norskar hafnir, síðan til Lerwick á Hjaltlandi og svo yfir til Reykjavíkur. Eftir stoppið á Ísafirði liggur leiðin til Akureyrar og þaðan beint aftur til Southampton.

Le Bellot í Sundahöfn. Myndir: Kristinn H. Gunnarsson.

Evrópski fjárfestingasjóðurinn hefur undirritað samning um bakábyrgðir við Byggðastofnun vegna lána til lítilla og meðalstórra fyrirtækja í landsbyggðunum.

Ábyrgðir EIF, sem njóta stuðnings InvestEU áætlunar Evrópusambandsins, munu gera Byggðastofnun kleift að veita allt að 3,2 milljarða króna í formi nýrra útlána með sveigjanlegri skilmálum. Fjármagninu er einkum ætlað að styðja við unga bændur, viðkvæm byggðarlög og konur í frumkvöðlastarfsemi. Gert er ráð fyrir að styðja við að minnsta kosti 50 lítil og meðalstór fyrirtæki á Íslandi. 

Við undirritun samkomulagsins á Sauðárkróki sagði Arnar Már Elíasson, forstjóri Byggðastofnunar: “Ísland er eitt af dreifbýlustu löndum heims með aðeins 4 íbúa á hvern ferkílómeter. Því til viðbótar býr um 80% þjóðarinnar á höfuðborgarsvæðinu sem leiðir af sér víðfeðm svæði þar sem fáir eða enginn býr. Innviðauppbygging í dreifðum byggðum er krefjandi og kostnaðarsöm. Ábyrgðakerfi InvestEU veitir Byggðastofnun nauðsynleg úrræði til að veita mikilvæga og hagkvæma lánamöguleika í landsbyggðunum til að jafna lífskjör allra landsmanna”.

Thomas Östros, varaforseti EIB Group, tók undir þetta:

“Eitt af markmiðum EIB Group er að styðja við lítil og meðalstór fyrirtæki. Með því að útvíkka InvestEU áætlun Evrópusambandsins til EFTA ríkja er EIF að útvíkka ábyrgðakerfið til Íslands. Frumkvöðlar í landbyggðunum standa frammi fyrir áskorunum, bæði umhverfis og fjárhagslegum og því erum við ánægð að styðja við Byggðastofnun í að efla lánamöguleikana.”

Samkomulagið við Byggðastofnun er fyrsta ábyrgðasamkomulagið á Íslandi sem er stutt af InvestEU áætluninni.

Lucie Samcová – Hall Allen, sendiherra ESB á Íslandi sagði að: “Í nú um þrjá áratugi hafa íslensk fyrirtæki, háskólar, rannsóknarstofnanir og aðrir tekið þátt í mismunandi áætlunum á vegum Evrópusambandsins. Árangurshlutfall þessara aðila er mjög hátt og eru þeir mikils metnir af alþjóðlegum samstarfsaðilum. Ábyrgðasamkomulagið sem við skrifum undir við Byggðastofnun í dag er fyrsta samkomulagið um bakábyrgðir InvestEU áætlunarinnar á Íslandi. Ég hlakka til að sjá hvernig það mun hjálpa litlum fyrirtækjum í landsbyggðunum að vaxa og dafna”.

Þetta er annað ábyrgðasamkomulag Byggðastofnunar og EIF.  Fyrra samkomulagið (COSME Loan Guarantee Facility) bætti aðgengi íslenskra fyrirtækja í landsbyggðunum að fjármagni með um 100 lánum að fjárhæð 4,3 milljörðum króna á árunum 2021-2023.

Evrópski fjárfestingasjóðurinn (EIF) er hluti samstæðu Fjárfestingarbanka Evrópu (EIB). Markmið hans er að styðja lítil og meðalstór fyrirtæki með aðgengi að fjármagni.  EIF hannar og þróar fjármögnunarleiðir og ábyrgðir sem eru sérstaklega sniðin að þörfum þessara fyrirtækja.  Í þessu hlutverki sínu endurspeglar sjóðurinn markmið Evrópusambandsins um stuðning við nýsköpun, rannsóknir og þróun, frumkvöðlastarfsemi, vöxt og sköpun starfa. 

Hafnarstjórn Ísafjarðarhafna hefur falið Hilmari Lyngmó, hafnarstjóra að undangengnu útboði að semja við Verkhaf ehf í Súgandafirði um gerð bílastæða og rútustæða við Hrafnatanga/Kríutanga á Suðurtanga á Ísafirði.

Um er að ræða um 3.500 fermetra stæði fyrir rútur og leigubíla. Áætlaður kostnaður er um 120 m.kr. og malbik því til viðbótar er um 20 m.kr.

Að sögn Hilmars Lyngmó eru framkvæmdir hafnar og er búist við því að þeim ljúki með malbikun í lok ágúst.

Samið verður við verktaka á einingarverðum útboðs síðasta árs, að teknu tilliti til vísitöluhækkunar. Áætlaður heildarkostnaður er undir útboðsmörkum segir í fundargerð hafnarstjórnar.

Merkingar eru mikilvæg aðferð við rannsóknir á fuglum. Með merkingum má fá upplýsingar um ferðir fugla innanlands og ferðalög milli landa. Þá eru merkingar á ungum oft eina leiðin til að komast að því hve fuglar ná háum aldri eða hvenær þeir verða kynþroska og fara að verpa. Loks geta merkingar gefið ýmsar aðrar stofnvistfræðilegar upplýsingar, svo sem um dánartíðni, dánarorsakir, aldursdreifingu í stofni, stofnstærð og fleira.

Ef þú finnur merktan fugl vinsamlega tilkynntu það til Náttúrufræðistofnunar Íslands í tölvupósti á netfangið fuglamerki@ni.is eða í síma 5900500. Þeim sem tilkynna um merktan fugl eru sendar um hæl upplýsingar um hvar og hvenær fuglinn var merktur, aldur hans og fjarlægð frá merkingastað.

Upplýsingar sem þurfa að koma fram:
– Númer á merkinu (og merkingastöð)
– Hvaða fuglategund (ekki nauðsynlegt, ef þú ert ekki viss)
– Hvar fannst fuglinn
– Hvenær fannst fuglinn
– Hvernig var fuglinn (t.d. nýdauður, bara fótur með merki fannst o.s.frv.)
– Finnandi (nafn, netfang, heimilisfang, sími)

Næstkomandi helgi dagana 7.-9. júní verður Prjónagleðin haldin í áttunda sinn í Húnabyggð. Í nýjasta tbl. Feykis birtum við viðtal við Ernu Jónmundsdóttur sem uppalin er í Bolungarvík en hefur búið á Blönduósi í 19 ár með eiginmanni sínum, Róberti Daníel Jónssyni, og þremurbörnum. „Handavinna var sennilega það fag í grunnskóla sem mér fannst leiðinlegast og náði t.d. aldrei tökum á prjónaskap. Tókst með herkjum að prjóna einn nálapúða og svo orm sem var 20 cm langur, byrjaði í 20 lykkjum en endaði í 37! Var sem sagt í laginu eins og kaffipoki áður en hann var saumaður saman.

Það var ekki fyrr en ég flutti norður sem áhuginn kviknaði á að prjóna og nú þarf ég helst alltaf að vera með einhver verkefni í takinu, “ segir Erna.

„Öðru hvoru megin við áramótin 2015/2016 bað Arnar Þór Sævarsson, sem þá var bæjarstjóri á Blönduósi, mig um að taka sæti sem varamaður í stjórn Textilsetursins. Beiðninni fylgdi að það væri lítið sem ekkert um forföll og ég yrði þarna nánast bara að nafninu til. Bað mig þó um að mæta á næsta fund stjórnar. Á þeim fundi lagði Jóhanna Erla Pálmadóttir þáverandi framkvæmdarstjóri Textilsetursins fram þessa hugmynd um að koma á fót árlegri prjónahátíð í bænum að fyrirmynd Strykkefestival í Fanø í Danmörku. Stutta útgáfan er sú að stjórn og varamenn voru skipaðir í undirbúningsnefnd og vikulegir fundir fram í júní,“ segir Erna.

„Það var algjört ævintýri að fá að taka þátt í að byggja þessa hátíð upp undir dyggri stjórn Jóhönnu sem bar hitann og þungann af öllu verkefninu. Fyrsta árið voru Norðurlandabúar í meirihluta gesta og heimamenn sáust varla. Það hefur þó heldur betur breyst og nú hefur Íslendingum fjölgað mjög og hátíðin stækkað og vaxið með hverju árinu.“

„Það eru algjör forréttindi að fá alla þessa flottu kennara til okkar, bæði innlenda og erlenda. Á síðasta ári kom t.d. prjónahönnuðurinn Lene Holme, sem er hálfgerð „rokkstjarna” í prjónaheiminum. Námskeiðin og fyrirlestrarnir hafa verið mjög fjölbreytt og skemmtileg. Fyrstu árin var eingöngu stílað inn á námskeið í prjónaskap en síðar bættust við önnur námskeið, svo sem í hekli og fjöldi námskeiða í TextilLabinu á Blönduósi. Sama á við um söluaðila sem mæta með allt milli himins og jarðar sem tengist prjónaskap og handavinnu.“

Svona stór viðburður hefur líka gríðarlega góð áhrif á samfélagið, bæði gott umtal og eins kaup gesta á vörum og þjónustu heimafólks.

Þegar Erna er spurð um uppáhalds viðburð tengdan prjónagleðinni á hún rosalega erfitt að gera upp á milli viðburða. Erna reynir alltaf að fara á 1-2 námskeið og þau hafa öll farið fram úr væntingum. Að labba um á Garntorgi, skoða og snerta garn, það er mjög ljúft. „Tala nú ekki um að sjá allt þetta fallega handverk sem fólk klæðist, það eitt og sér er mjög skemmtilegt. Svo er bara ótrúlega notalegt að sitja og spjalla í kaffisölunni.“

„Ef ég á að velja einn uppáhaldsviðburð þá var það prjónagjörningurinn Own your own time VI á Prjónagleðinni 2017 en þá stóðu 82 prjónarar í hring og prjónuðu saman í eina klukkustund. Veðrið hafði verið hálf leiðinlegt þessa helgi en rétt áður en viðburðurinn hófst stytti upp og sólin fór að skína, “ segir Erna.

Hvað stendur upp úr á svona hátíð? „Gleðin. Nafn hátíðarinnar Prjónagleði á svo sannarlega við. Þarna koma saman hundruðir manna með sama áhugamál og markmið allra er að njóta þess saman.

Þó að það sé alltaf gaman að sjá ný andlit þykir mér líka mjög vænt um að sjá andlit kennara, söluaðila og gesta sem hafa fylgt okkur frá upphafi og mætt ár hvert, “ segir Erna að lokum. 

Af vefsíðunni feykir.is

Íslenska lýðveldið var stofnað á Þingvöllum þann 17. júní 1944 og fagnar því 80 ára afmæli á árinu. Af því tilefni skipaði Katrín Jakobsdóttir þáverandi forsætisráðherra nefnd sem unnið hefur að undirbúningi viðburða til að halda upp á tímamótin. Nefndin er skipuð fulltrúum forsætisráðuneytisins, menningar- og viðskiptaráðuneytisins, skrifstofu Alþingis, skrifstofu forseta Íslands og Þingvallaþjóðgarðs.

Íslendingar höfðu á seinni hluta 19. aldar og snemma á 20. öld smám saman fengið aukið sjálfstæði með stjórnarskrá árið 1874 sem veitti Alþingi löggjafarvald, heimastjórn árið 1904 og loks fullveldi árið 1918. Með stofnun lýðveldis hér á landi árið 1944 lauk sambandi Íslands og Danmerkur sem staðið hafði yfir í aldir og var því stjórnarfari sem við þekkjum í dag komið á.

Sérstök hátíðardagskrá í tilefni af 80 ára afmæli lýðveldisins hefur þannig verið sett upp með fjölda viðburða. Á þessu vefsvæði er að finna yfirlit með upplýsingum um viðburði og verkefni sem munu fara fram í tilefni af lýðveldisafmælinu en þar má meðal annars nefna útgáfu bókar um þjóðhátíðarljóð, hátíð á Hrafnseyri, þjóðhátíð á Þingvöllum, gönguferðir um þjóðlendur, opið hús á Bessastöðum og Alþingi auk menningarviðburða um allt land. Hátíðahöldin ná hámarki 17. júní, þegar 80 ár eru liðin frá stofnun lýðveldis á Íslandi, með dagskrá og kórasöng um allt land.