Byggðastofnun segir að merkja megi vaxandi áhuga á lánum frá Byggðastofnun eftir undirritun samkomulags stofnunarinnar við Fjárfestingabanka Evrópusambandsins í síðustu viku.

Samningurinn tekur til bankaábyrgðar vegna lána til lítilla og meðalstórra fyrirtækja í landsbyggðunum. Samkomulagið nú tekur við af öðru samkomulagi sem gerði það að verkum að hægt var að stofna nýja lánaflokka, sér í lagi lán til kynslóðaskipta í landbúnaði en í gegnum þann lánaflokk hefur Byggðastofnun veitt 31 ungum bændum lán til að hefja búrekstur.

Nú verður auk þess hægt að veita enn frekari lán með sveigjanlegri skilmálum til stuðnings atvinnurekstri kvenna, til umhverfisvænna verkefna, auk lána til fiskvinnslu og útgerða í viðkvæmum byggðarlögum.

Gert er ráð fyr­ir að styðja við að minnsta kosti 50 lít­il og meðal­stór fyr­ir­tæki á Íslandi, en sam­komu­lagið við Byggðastofn­un er fyrsta ábyrgðarsam­komu­lagið á Íslandi sem stutt er af In­vestEU áætl­un­inni. „Innviðaupp­bygg­ing í dreifðum byggðum er krefj­andi og kostnaðar­söm. Ábyrgðar­kerfi In­vestEU veit­ir Byggðastofn­un nauðsyn­leg úrræði til að bjóða mik­il­væga og hag­kvæma láns­mögu­leika í lands­byggðunum til að jafna lífs­kjör allra lands­manna,“ sagði Arn­ar Már Elías­son, for­stjóri Byggðastofn­un­ar, við und­ir­rit­un samn­ings­ins.

Orkubú Vestfjarða hefur varað fólk við heita borholuvatninu í Tungudal. Vatnið sé um 58 gráður á Celsius en hitastigið sé breytilegt og því beri að hafa varann á sér við notkun á vatninu.

„Hitastigið á frárennslinu er aðallega háð því hversu miklu vatni er dælt upp úr borholunni en einnig því magni af köldu vatni sem dælt er niður í holuna hverju sinni. Borunin stendur enn yfir og því má einnig búast við því að hitastig heitu uppsprettunnar geti breyst.“ segir í tilkynningu Orkubúsins.

„Hitastigsbreytingar á vatninu geta verið skjótar og það borgar sig þess vegna að fara varlega í kringum frárennslið. Við biðjum því fólk að gæta sérstaklega að börnunum.“

Mikill áhugi er á borholunni og vatninu sem frá henni rennur. „Við erum ótrúlega ánægð með það heita vatn sem hefur fundist í Tungudal. Það er gaman að sjá áhugann og spenninginn hjá bæjarbúum, gestum og gangandi. Fólk stoppar og virðir fyrir sér borinn, heitu vatnsbununa, svarfið og heita lækinn sem rennur frá verkstaðnum. Það er spennandi að velta því fyrir sér hvernig best sé að nýta vatnið til framtíðar og það er líka spennandi að fá að njóta þess núna, dýfa höndunum í vatnið eða jafnvel baða sig í því.“

Línuveiðarinn Pétursey ÍS 100 var 91 tonn að stærð, smíðuð árið 1902 í Kristiansund í Noregi. Var hún eign hlutafélagsins Vísis frá Súgandafirði, en gerð út frá Ísafirði. Pétursey hafði áður verið gerð út frá Hafnarfirði en var seld þaðan árinu áður en hún fórst.

Pétursey lagði af stað þann 10. mars 1941 frá Vestmannaeyjum, en þar hafði hún tekið kol, áleiðs til Fleetwood með fiskfarm. Þegar hún átti ófarinn fimmtung leiðarinnar til Barra Head, eða 300 mílur suður af Vestmannaeyjum mætti hún vb. Dóru frá Hafnarfirði, er þá var á heimleið. Var þá komið besta veður. Síðan spurðist ekkert til hennar.

3. september sama ár var vélbáturinn Svanur frá Keflavík, staddur um 18 mílur út af Garðsskaga, og sá þá fleka í sjónum, sem merktur var íslenska fánanum. Innbyrtu þeir flakið og létu fara svo um það, að sem minnst rask yrði á því. Flutti Svanur flakið síðan til Reykjavíkur, þar sem Friðrik Ólafssyni, skólastjóra Stýrimannaskólans, og Sveini Sæmundssyni, yfirlögregluþjóni, var falið að rannsaka það. Við rannsóknina kom í ljós, að skothríð hafði dunið á stýrishúsinu, sérstaklega á bakborða. Voru víða brot úr sprengikúlum í þakinu og á þeim voru stafir. Flakið var 3 m á lengd og 1½ m á breidd.

Síðar kom í ljós að þýski kafbáturinn U-37 undir stjórn Asmus Nicolais Clausen hafði sökkt Pétursey, þann 12. mars við 59,33°N og 12,16°V. Pétursey reyndist vera síðasta skipið af 55 sem kafbáturinn sökkti, því eftir þessa ferð var hann gerður að kennslu og þjálfunarbát.

Á fyrsta fundi nýrrar bæjar­stjórnar sameinaðs sveit­ar­fé­lags Tálkna­fjarð­ar­hrepps og Vest­ur­byggðar var samþykkt að unnin verði skoð­anan­könnun meðal íbúa um nafn á nýtt sveit­ar­félag þar sem kosið verði á milli nafn­anna, Barðs­byggð, Kóps­byggð, Látra­byggð, Suður­fjarða­byggð, Tálkna­byggð og Vest­ur­byggðar

Könnunin fer fram í gegnum vefinn betraisland.is og er opin dagana 11. til 17. júní. Niðurstöðurnar verða notaðar til hliðsjónar við ákvörðun bæjarstjórnar um nafn á Sameinað sveitarfélag Tálknafjarðarhrepps og Vesturbyggðar.

Íbúar sveitarfélagsins sem verða 16 ára á árinu og eldri geta tekið þátt í könnuninni.

Hér má finna hlekk inná könnunina.

Allir bóknámsáfangar sem kenndir eru í MÍ eru  einnig í boði í fjarnámi. Í fjarnámi er notað fjarkennslukerfið Moodle en þar setja kennarar inn námsáætlanir og verkefni.

Nemendur geta skilað inn úrlausnum verkefna sinna þar sem og tekið gagnvirk próf. Fjarnámið fer því alfarið fram á netinu.

Í kennslu við Menntaskólann á Ísafirði er lögð áhersla á leiðsagnarnám sem felst í því að nemendur fá stöðugar upplýsingar um stöðu sína í námi til að geta bætt sig. 

Leiðsagnarmat (e. Formative Assessment) er kennsluaðferð þar sem nemendur eru metnir jafnt og þétt alla önnina með það að markmiði að nota niðurstöðurnar til að bæta námsárangur og kennslu. Leiðsagnarmatið er námsmat til að læra af og getur bæði verið skriflegt og munnlegt. Kennarinn gefur nemandanum leiðandi umsögn sem nýtist nemendum við áframhaldandi nám.

Hverri önn er skipt niður í þrjár námslotur. Eftir tvær fyrstu loturnar er gefið lotumat.

Þau Bjarki Hjörleifsson og Pálína Axelsdóttir Njarðvík hafa verið ráðin sem aðstoðarmenn Bjarkeyjar Olsen Gunnarsdóttur matvælaráðherra.

Bjarki er fæddur 1989 og ólst upp í Stykkishólmi. Hann vann sem sjálfstæður atvinnurekandi í matvælageiranum á árunum 2013–2018 og útskrifaðist með BA próf í stjórnmálafræði frá Háskóla Íslands 2019.

Bjarki var kosningastjóri hjá Vinstri grænum í Norðvestur kjördæmi árin 2017 og 2021. Hann var einnig skrifstofustjóri á flokksskrifstofu Vinstri grænna árin 2019–2020 og vann sem sérfræðingur hjá þingflokki Vinstri grænna frá 2020 til 2024.

Pálína er fædd árið 1991 og ólst upp í Gnúpverjahreppi. Hún útskrifaðist sem stúdent frá Kvennaskólanum árið 2011, er menntuð í sálfræði og útskifaðist með BSc gráðu frá Háskóla Íslands árið 2016 og MSc í félagssálfræði árið 2019. Á árunum frá 2020 til 2022 starfaði hún sem sérkennslustýra og vann sem ráðgjafi hjá Attentus frá 2023-2024.

Pálína hefur hefur unnið sjálfstætt við efnissköpun og miðlun á samfélagsmiðlum frá árinu 2015 en hún hefur unnið sveitastörf frá unga aldri og deilt þeirri reynslu sinni á Instagram þar sem hún hefur eignast fjölda fylgjenda síðan 2015.

Bjarkey Ol­sen Gunn­ars­dótt­ir mat­vælaráðherra hef­ur veitt Hval hf. veiðileyfi til veiða á langreyðum.

Leyfið gild­ir fyr­ir veiðitíma­bilið 2024 og verður leyfi­legt veiðimagn 99 dýr á svæðinu Græn­land/​Vest­ur-Ísland og 29 dýr á svæðinu Aust­ur-Ísland/​Fær­eyj­ar eða sam­tals 128 dýr.

Frá þessu grein­ir Stjórn­ar­ráðið í til­kynn­ingu.

Vestfjarðagöngin er lokuð. Rúta bilaði í einbreiða hluta ganganna og eru viðgerðarmenn komnir á staðinn og unnið er að því að koma rútunni af stað. Farþegar eru í rútunni og amar ekki að þeim.

Lögreglan á Vestfjörðum segir að upplýsingar verði birtar á vef Vegagerðarinnar þegar göngin opnast að nýju.