Í stjórnsýsluúttekt Ríkisendurskoðunar á ráðstöfun byggðakvóta sem nú er komin út kemur fram að aflamark Byggðastofnunar sé minna umdeilt en almenni byggðakvótinn og úthlutun þess feli í sér meiri fyrirsjáanleika hvað varðar úthlutun til  byggðarlaga.

Úttektin var gerð að beiðni Alþingis sem samþykkti í maí 2023 að óska eftir því við Ríkisendurskoðanda að hann gerði stjórnsýsluúttekt á ráðstöfun almenns byggðakvóta og sértæks byggðakvóta þ.e. aflamarks Byggðastofnunar. Í skýrslubeiðni Alþingis segir einnig: „Jafnframt verði athugað hvort framkvæmdin stuðli að jákvæðri byggðaþróun, hvort framkvæmdin samrýmist góðum stjórnsýsluháttum, hvort jafnræðis sé gætt við úthlutun byggðakvóta og hvort framkvæmdin samrýmist þeim markmiðum sem stefnt var að með setningu þeirra lagaákvæða sem úthlutun byggðakvóta byggir á.“

Ábending Ríkisendurskoðunar

Í niðurstöðukafla skýrslunnar kemur fram að Aflamark Byggðastofnunar sé minna umdeilt en almenni byggðakvótinn og úthlutun þess feli í sér meiri fyrirsjáanleika hvað varðar úthlutun til  byggðarlaga og ætlaða þýðingu fyrir byggðafestu. Þá metur Ríkisendurskoðun umsýslu Byggðastofnunar góða hvað varðar jafnræði og stjórnsýslu.

Í tilkynningu Byggðastofnunar um skýrsluna segir að í henni sé ábending til Byggðastofnunar og Fiskistofu um að verklagsreglur um byggðakvóta þurfi að endurspegla framkvæmd úthlutunar og eftirlit með nánari hætti. Byggðastofnun hefur þegar brugðist við þessari ábendingu og uppfært verklagsreglur stofnunarinnar í samræmi við framkomnar ábendingar þannig að þær endurspegli ítarlegar framkvæmd úthlutunar og eftirlits stofnunarinnar varðandi Aflamark Byggðastofnunar og voru þær samþykktar af stjórn stofnunarinnar þann 6. júní sl. Jafnframt því mun stofnunin fela innri endurskoðun að yfirfara verkferla og stjórnsýslu vegna Aflamarks Byggðastofnunar í sinni reglubundnu úttekt á starfsemi stofnunarinnar.  Byggðastofnun tekur fram að ráðstöfun stofnunarinnar á sértækum byggðakvóta hefur ávallt verið í samræmi við lög, reglugerð og gildandi verklagsreglur eins og m.a. þeir stjórnsýsluúrskurðir og dómar sem fallið hafa vegna verkefnisins bera með sér.  

Mat Ríkisendurskoðunar er að Byggðastofnun beri að geta í skýringum með ársreikningi um magn og verðmæti þess aflamarks sem stofnunin úthlutar hverju sinni og er þeim tilmælum beint til Byggðastofnunar að gera úrbætur á framsetningu ársreikninga hvað þetta varðar.  Það mun stofnunin gera en rétt er að  geta þess að magnið var tiltekið í skýringum með ársreikningi stofnunarinnar fyrir árið 2023 án þess að lagt hafi verið mat á verðmæti þess.

Í dag var opnaður vegurin nupp á Bolafjall. Þetta kemur fram í tilynningu frá Vegagerðinni.

Þá hefur Vegagerðin gefið út hálendiskort nr 3 og má nálgast það á hlekknum hér: https://www.vegagerdin.is/vgdata/halendi/halendi.pdf

Helstu breytingar frá síðasta korti eru:

Búið er að opna Lakaveg (F206) upp að Fagrafossi

Búið er að opna yfir Kjöl (35) (Einungis fært fjallabílum norðan Kerlingarfjalla.)

Búið er að opna Fjallabaksleið nyrðri (208) frá Sigöldu og að Landmannalaugum.

Búið er að opna Fjallabaksleið nyrðri (F208) upp að Hólaskjóli að austan.

Búið er að opna Arnarvatnsheiði (F578) milli Surtshellis og Úlfsvatns

Verkalýðsfélag Vestfirðinga hefur kannað hvort sveitarfélögin á Vestfjörðum hafi staðið við samkomulag um að að gjaldskrárhækkanir á leikskólum yrðu ekki umfram 3,5% eins og um var rætt í kjarasamningum sem gerðir voru fyrr á þessu ári.

Niðurstaða könnunar Verk Vest er að aðeins eitt sveitarfélag á Vestfjörðum er innan 3,5% markanna í gjaldskrárhækkunum, en það er Strandabyggð.

Eitt sveitarfélag rekur ekki leikskóla og eitt sveitarfélag býður ekki upp á 8,5 klst vistun og einnig er rétt að benda á að Súðavík og Reykhólahreppur er með lang lægstu leikskólagjöldin.

EM Orka hefur lagt fram umhverfismatsskýrslu vegna vindorkugarðs í Garpsdal í Reykhólahreppi.

Þar segir að til standi að byggja upp um 90 MW vindorkugarð á Garpsdalsfjalli í Reykhólasveit þar sem allt að 21 vindmyllu sem hver um sig yrði 159,5 m á hæð með spaða í efstu stöðu yrðu settar upp.

Framkvæmdaraðili er EM Orka, sem er íslenskt fyrirtæki í eigu EMP Holdings, sem er sameiginlega í eigu EMP IN og Vestas, en Vestas er einn stærsti vindmylluframleiðandi heims með um 115 GW framleiðslugetu í 81 landi.

Garpsdalur er talið vera svæði sem er vel til þess fallið að nýta fyrir vindorkugarð og er þar horft til hagstæðra vindskilyrða, nálægð í tengivirki og fjarlægðar frá byggð.

Alls er áætlað að þegar vindmyllugarðurinn verði fullbyggður fari um 445 ha landsvæði undir vindmyllur og tengdar framkvæmdir, en vindorkuframleiðslan mun ekki hafa áhrif á landbúnað innan jarðarinnar.

Engin mannvirki eru í dag á fyrirhuguðu framkvæmdasvæði.

Allir geta kynnt sé umhverfismatsskýrsluna og veitt umsögn til Skipulagsstofnunar.

Kynningarfundur um niðurstöður verður haldinn í byrjun júlí.

Nákvæm dagsetning verður auglýst síðar.

Styrkurinn fyrir tilraunaverkefnið A10 — almenningssamgöngur um land allt er nú uppurinn.

Þetta þýðir að verkefninu í gær fimmtudaginn 13. júní, þar sem fjárheimildir þess hafa verið fullnýttar.

Þær ferðir sem þegar hafa verið pantaðar verða farnar en lokað hefur verið fyrir fleiri pantanir.

Næsta skref er að vinna úr þeim gögnum sem hafa safnast saman og skila lokaskýrslu. 

Árið 2022 samdi Ísafjarðarbær við Byggðastofnun um tilraunaverkefni í almenningssamgöngum mill Flateyrar og Ísafjarðar. Verkefnið fólst í niðurgreiðslu á pöntunarakstri á leigubílum. Horft verður til reynslu af verkefninu sem fordæmisgefandi fyrir þjónustu við Suðureyri og Þingeyri.

Fiskistofa hefur tilkynnt 567 útgerðaraðilum á strandveiðum að skip þeirra hafi veitt umfram það afla hámark sem heimilt er að veiða í hverri veiðiferð strandveiða í maí.

Samkvæmt lögum um sérstakt gjald vegna ólögmæts sjávarafla er lagt á gjald vegna umframafla á strandveiðum.

Eftir 20. júní verður hægt að greiða gjaldið í heimabanka en þá munu reikningar vegna gjaldsins verða aðgengilegir í stafrænu pósthólfi á Ísland.is.

Umframafli skipa á strandveiðum var um 83 tonn.

Þá hefur Fiskistofa einnig birt áætlun um fjölda veiðidaga sem eftir eru á strandveiðum.

Áætlunin byggir á meðalveiði þeirra veiðidaga sem þegar er lokið, miðað við hana má gera ráð fyrir að strandveiðum ljúki í annarri viku júlí mánaðar eða um 10 júlí.

Ný og endurbætt Skapa.is er komin í loftið. Um er að ræða nýsköpunargátt, upplýsingaveitu og fræðsluvef fyrir frumkvöðla og aðra aðila sem eru að stíga sín fyrstu skref í nýsköpunarumhverfinu. Skapa.is er ætlað að vera einn af grunninnviðum í stuðningi við frumkvöðla til að láta hugmyndir þeirra verða að veruleika.

Skapa.is er gjaldfrjáls og opin öllum. Fræðsluhlutverk síðunnar getir öllum kleift að fræðast um nýsköpun og fá stuðning til að taka hugmyndir sínar áfram. Skapa.is var upphaflega sett á laggir í upphafi árs 2023 af Ólafi Erni Guðmundssyni en hefur nú fengið stærra hlutverk með stuðningi háskóla-, iðnaðar- og nýsköpunarráðuneytisins.

Meðal þess sem finna má á Skapa.is er nýsköpunardagatal þar sem upplýsingar er að finna um alla helstu viðburði tengda nýsköpun sem eru á döfinni. Einnig má nálgast styrkjadagatal þar sem umsóknarfrestir styrkja eru tilgreindir ásamt upplýsingum um alla þá íslensku styrki sem frumkvöðlar og sprotafyrirtæki geta sótt um.

Skapa.is sinnir einnig mikilvægu fræðsluhlutverki fyrir bæði frumkvöðla og fjárfesta. Þar má m.a. finna greinargóðar upplýsingar og gagnlega hlekki um fyrstu skrefin í nýsköpunarumhverfinu, nýsköpun á landsbyggðinni, nýsköpunar- og viðskiptahraðla, klasa, setur, ýmis verkfæri og mismunandi fjármögnunarleiðir, fjárfestingasjóði, englafjárfestingar o.fl. Þar að auki er notendum beint á leiðir til að sækja ráðgjöf, endurgjöf og aðgengi að mentorum fyrir nýsköpunarverkefni.

Nýsköpunargáttin er einnig vettvangur fyrir nýsköpunarfyrirtæki til að sjá hvort þeirra lausnir geti leyst áskoranir hins opinbera. Þar er að finna upplýsingar um opinberar stofnanir sem leita til nýsköpunar- og sprotafyrirtækja til að leysa þær áskoranir sem glímt er við og í framhaldinu mögulega semja um kaup á lausninni.