Bæjarráð Ísafjarðarbæjar hefur samþykkt að fyrirtækið Fjallasýn taki við  samningi um afnot af landi milli Ísafjarðarbæjar og Fjallabóls ehf. á Dagverðardal. Fyrirtækin eru í eigu sama aðila Friðfinns Hjartar Hinrikssonar.

Samkvæmt síðasta ársreikningi Fjallaból eru eignir fyrirtækisins, sem er fyrir 2022, 269 m.kr. en skuldir 290 m.kr. Fjallasýn ehf er ekki skrá fyrir neinum eignum og skuldum en var gert upp fyrir 2022 með 1,3 m.kr. tapi.

Samningur Fjallabóls og Ísafjarðarbæjar er frá 2022 og heimilar fyrirtækinu að reisa allt af 50 frístundahús á skipulagsreit I9 á Dagverðardal. Áætlað er að mannvirkin verði tilbúin eigi síðar en í október 2036.

Í bændablaðinu sem kom út 15. ágúst er viðtal við ung hjón Ásgeir Ósmann Valdemarsson og Karen Ósk Guðmundsdóttir sem keyptu Litlu-Ásgeirsá í Víðidal í Vestur-Húnavatnssýslu í apríl 2022 og reka þar kúabú bæði mjólkurframleiðslu og holdanaut. Láta þau vel af tekjumöguleikum.

Þau segja að það hafi verið lán að tekjur jarðarinnar af laxveiðiréttindum í Víðidalsá séu ekki miklar. Það hafi gert kaupverðið á jörðinni viðráðanlegt.

„Það er fullt af frábærum jörðum hérna allan dalinn sem er búið að leggja í eyði út af þessari laxveiðiá hérna,“ segir Ásgeir í viðtalinu. Hann segir að nóg sé til að fólki sem vilji komast í búskap.

Samband íslenskra sveitarfélaga hefur auglýst eftir umsóknum um styrki frá Evrópusambandinu vegna verkefna sem miða að því að hreinsa ár og styrkja vistkerfi þeirra.

Hægt er að sækja um styrki vegna margvíslegra verkefna sem tengjast ám og hér er hægt að sjá dæmi um verkefni sem hægt er að nýta sem innblástur eða til að endurtaka. Styrkir geta verið allt að 100.000 Evrur sem er um 15 m.kr. og er umsóknarfrestur til 16. október.

Það eru sveitarfélög eða landshlutasamtök þeirra sem geta sótt um.

Verkefnið er sprottið upp úr átaki átta Evrópusambandslanda til þess að bæta vistkerfi Dónár, sem rennur um löndin og er ærlunin að nýta þekkingu og reynslu sem þar fékkst til úrbóta í öðrum löndum. Að átakinu komu stjórnvöld landanna, háskólar og áhugasamtök segir í kynningarefni um átakið.

Fram kom á bb.is í síðustu viku að slökkvilið Ísafjarðarbæjar hefði fallist á leyfi fyrir 16 manna gististað í Læknishúsinu á Hesteyri með fyrirvara þó.

Hermann Hermannsson hjá Slökkviliði Ísafjarðarbæjar segir að tafist hafi hjá slökkviliðinu að gera sína úttekt á staðnum fyrri hluta sumar vegna anna og erfiðleika við að fá far norður. Var því ákveðið að gefa jákvæða umsögn með fyrirvara til þess að tefja ekki útgáfu rekstrarleyfisins.

Slík afgreiðsla telst til undantekninga hjá sjökkviliðinu. Eftirlitsmaður komst norður nokkrum dögum síðar. „Úttektin var án athugasemda þ.e allar eldvarnir voru í lagi.“ segir Hermann.

Vegagerðin telur hættu á skriðuföllum á Súðavíkurhlíð vegna mikillar úrkomu.

Búið er að opna veginn norður í Árneshrepp, en þar er þó áfram hætta vegna skriðufalla og grjóthruns. 

Á Snæfjallastrandarvegi frá Skjaldfönn að Unaðsdal eru talsverðar skemmdir á vegi vegna vatnavaxta.

Strandabyggð veitir foreldrum/forráðamönnum barna og ungmenna á aldrinum 6 að 18 ára, styrki vegna íþrótta- og frístundaiðkunar. Meginmarkmið íþrótta- og frístundastyrkja er að stuðla að aukinni hreyfingu og félagsþátttöku barna í sveitarfélaginu.

Styrkur er veittur vegna æfinga- og þátttökugjalda fyrir börn á aldrinum 6 að 18 ára með lögheimili í Strandabyggð.

Styrkhæft er hvers konar reglulegt íþrótta- og frístundastarf. Fjárhæð styrks er ákveðin ár hvert í sveitarstjórn að fengnum tillögum frá tómstunda- íþrótta- og menningarnefnd. Styrkur nemur aldrei hærri fjárhæð en sem nemur greiddum gjöldum.

Styrkur árið 2024 er 30.000 kr.

Umsóknir vegna æfingagjalda frá 1. september  til 31. ágúst  þurfa að berast í síðasta lagi 15. september ár hvert til skrifstofu Strandabyggðar á netfangið strandabyggd@strandabyggd.is.

Styrkir eru greiddir fyrir lok október.

Í Samgöngusáttmála ríkisins og sex sveitarfélaga á höfuðborgarsvæðinu kemur fram að gert er ráð fyrir að ríki og sveitarfélög geri samning við Strætó um niðurgreidd fargjöld (samgöngustyrki).

Miðað er við að fyrirkomulaginu sé stillt upp í tvo áfanga, annarsvegar að frá árinu 2029 þá munu 10% starfsmanna nýta sér fyrirkomulagið og í síðari áfanga árið 2031 aukist hlutfallið í 15%. Gert er ráð fyrir að fjöldi starfsmanna hjá ríki og sveitarfélögum sé um 31.000, um 17.500 hjá sveitarfélögunum á höfuðborgarsvæðinu og 13.000 sé starfsmannafjölda ríkisins sé á höfuðborgarsvæðinu.

Í fyrri áfanga fyrirkomulags er gert ráð fyrir að niðurgreiðsla tímabilskorta nemi 216 m.kr.. á ári, nýti 10% starfsmanna sér fyrirkomulagið og nemur framlag starfsmanna 180 m.kr.

En áætlun gerir ráð fyrir að útsöluverð 12 mánaða tímabilskorta til starfsmanna ríkis og sveitarfélaga muni vera 35.000 kr. í síðari áfanga fer framlag ríkis og sveitarfélaga í 324 m.kr. og framlag starfsmanna í 270 m.kr.

Áhrifin eru talin verða þau að sala á 12 mánaða kortum, almennum mánaðarkortum og stakra almennra fargjalda muni minnka og tekjur dragast saman. Á móti komar tekjur frá starfsmönnunum sem nota sér niðurgreiddu fargjöldin. Samanlagt er gert ráð fyrir aukningu tekna Strætó. Fyrst um 235 m.kr. á ári og svo um 352 m.kr. á ári.

Í gögnum kærumáls landeiganda Sandeyrar fyrir úrskurðarnefnd um umhverfis- og auðlindamál eru ýmiss gögn sem varpa ljósi á samskipti kæranda við opinbera aðila.

Eitt af því sem Katrín Oddsdóttir, lögmaður Gunnars Arnar Haukssonar, landeiganda greip til var að á landi hans Sandeyri við Snæfjallaströnd væru leiru- eða sjávarfitjasvæði sem falli þar með skýrlega undir verndarákvæði 61. gr. náttúruverndarlaga. Óvissa væri um hvort byggingarframkvæmdin ( þ.e. útsetning eldiskvíanna undan Sandeyri) hefði áhrif á leirurnar og sjávarfitin og því yrði að framkvæma vettvangsrannsókn til þess að skera út um það.

Vísaði Katrín til svara frá Náttúrufræðistofnun Íslands sem sagði að ekki væri til skráningar og því ekki hægt að útiloka þessar vistgerðir væru til staðar á Sandeyri.

Þó segir í svari stofnunarinnar: „Við getum ekki staðfest að þarna sé um að ræða leiru- eða sjávarfitjasvæði. Samkvæmt vistgerðakorti Náttúrufræðistofnunar eru ekki skráðar leirur eða sjávarfitjar á Sandeyri.“

Húsnæðis- og mannvirkjastofnunin, sem gaf svo út byggingarleyfið fyrir kvíunum, sendi erindi til Arctic Fish og spurði hvort mat hefði farið fram á því hvort vistkerfi i formi sjávarfitja eða leira séu á svæðinu sem félagið sótti um byggingarleyfi.

Arctic Fish fékk Rorum til þess að svara erindinu. Í greinargerð Rorum kemur fram að sjávarfitjar séu aðeins skráðar á tveimur stöðum við Ísafjarðardjúp utan Jökulfjarða. Annars vegar innst í Skutulsfirði og hins vegar við Nauteyri. Fitjarnar séu í 15 km og 25 km fjarlægð frá eldissvæðinu. Þá séu leirur að finna á tveimur svæðum, við Kaldalón og við Nauteyri. Fjarlægð sé a.m.k. 15 km frá eldissvæðinu. Þá beri að hafa í huga að sjávarfitjar og leirur séu við fjöruborð en kvíarnar séu í a.m.k. 40 metra dýpi og þaðan af meira.

„Það er því með öllu ómögulegt að slík mannvirki geti með nokkru móti haft áhrif á vistgerðirnar sjavarfitjar og leirur.“ segir í svari Rorum.

Ekki verður séð að frekar hafi verið rætt um þetta atriði eftir þessi afgerandi svör frá Rorum ehf.

Húsnæðis og mannvirkjastofnun endaði svo á því að tilkynnan landeigandanum að eldið væri utan landareignar hans og hann því ekki aðili máls og gaf út í framhaldinu byggingarleyfið fyrir eldiskvíarnar. Sem var svo staðfest með niðurstöðu úrskurðarnefndar um umhverfis- og auðlindamál í síðustu viku.

Lögmaðurinn hélt engu að síður áfram tilraunum sínum til þess að stöðvar framgang leyfisveitingarinnar. Krafðist þess tvívegis að umboðsmaður Alþingis tæki málið til skoðunar, krafðist þess að HMS afturkallaði útgefið leyfi og gerði einnig kröfu á Skipulagsstofnun um að stöðva málið. Allt var þetta árangurslaust. Umboðsmaður Alþingis sagðist ekki geta tekið fyrir mál sem væru ekki útkljáð í stjórnkerfinu og kæruréttur væri til staðar. Húsnæðis- og mannvirkjastofnun hafnaði því að afturkalla byggingarleyfið , sagði það vera í samræmi við lög og að kærandi væri ekki málsaðili. Ekkert að að finna um svör Skipulagsstofnunar en væntanlega hefur stofnunin ekkert aðhafst.