Framkvæmdir við veginn frá flugvellinum innan við Bíldudalsvog í Arnarfirði og upp á Dynjandisheiði eiga að hefjast á þessu ári samkvæmt samþykktri og gildandi samgönguáætlun Alþingis fyrir árin 2020 – 2034. Framkvæmdum á að vera lokið árið 2029. Staða verksins er þannig að búið er að ljúka frumdrögum, sem er fyrsta hönnunarstigið, en vegurinn er ekki kominn á verkhönnunarstig. Verkið er ekki fullhannað nema að litlum hluta segir í svörum Vegagerðarinnar við fyrirspurn Bæjarins besta.

Ný tillaga að langtíma samgönguáætlun 2024 – 2038 var lögð fram á Alþingi í byrjun október 2023. Þar er lagt til að seinka framkvæmdum við Bíldudalsveg, 30 km. og og að verkið verði unnið á árunum 2029-2033. Kostnaður er áætlaður 6.500 milljónir króna er tekið fram að nokkur óvissa sé í áætluninni.

Ekki náðist samkomulag um afgreiðslu nýju samgönguáætlunarinnar og dagaði málið uppi á Alþingi vorið 2024 og hefur ekki verið lagt fram að nýju.

Samgönguáætlunin sem samþykkt var í júní 2020 er því enn í gildi. Verkið ætti því að vera fullhannað nú og jafnvel búið að bjóða verkið út.

Ljóst er því að Vegagerðin miðar undirbúning við tillöguna sem ekki var samþykkt en fer ekki eftir ákvörðun Alþingis um að hefja verkið í ár.

-k

Frá því er greint á vefsíðu Vestfjarðastofu að í lok desember voru gefin út frumdrög Svæðisskipulags Vestfjarða 2025-2050 sem lýsa niðurstöðu samráðs við íbúa og aðra aðila sem fram fór á fyrri hluta síðasta árs. Þar segir að „ljóst er að trú íbúa og sveitarfélaga er að vöxtur samfélaga og atvinnulífs á Vestfjörðum á síðustu árum muni halda áfram með fjölgun íbúa, eflingu innviða og öflugra atvinnulífi.“

Svæðisskipulag Vestfjarða verður fyrsta heildstæða skipulagsáætlunin um þróun samfélags á Vestfjörðum og að því standa öll sveitarfélögin á Vestfjörðum í gegnum Fjórðungssamband Vestfirðinga. Það er VSÓ ráðgjöf og Úrbana skipulagsráðgjöf sem sjá um gerð Svæðisskipulags Vestfjarða fyrir Fjórðungssambandið og svæðisskipulagsnefnd Vestfjarða.

Við gerð frummatsins var ákveðið að vinna með ólíka valkosti samfélagsþróunar næstu 25 árin, byggða á spám um mannfjöldaþróun. Í frumdrögunum er að finna umfjöllun um þær framtíðarmyndir sem lagðar voru til grundvallar í skipulagsvinnunni. Þær voru upphaflega fimm og vísaði heiti þeirra til veðrabrigða: mótvindur, andvari, meðbyr, gustur og ofsi. Þessar framtíðarmyndir voru svo speglaðar við sviðsmyndir sem voru unnar fyrir Vestfirði, „Vestfirðir á krossgötum“ og við lýðfræðilega þróun samfélaga á Íslandi og Norðurlöndum.

íbúar verði 10.000 árið 2050

Meðbyr þótti líklegastur til að raungerast og spá um mannfjöldaþróun verði hin sama og á landsvísu og gerir m.a. ráð fyrir að íbúum hafi fjölgað um 38% árið 2050 og verði þá um 10.000. Það sem íbúar vildu helst sjá rætast var gustur, en hann kveður m.a. á um íbúafjölgun um 2,5% ár hvert sem er umfram mannfjöldaspá á landsvísu. Með þessa niðurstöðu voru framtíðarmyndirnar mótvindur og ofsi teknar út og unnið áfram með andvara, meðvind og gust.

Sveitarstjórnarfólk á 69. Fjórðungsþingi Vestfirðinga sem haldið var í Bjarnafirði sl. haust, kaus um andvara, meðbyr og gust til að verða viðmið við mótun svæðisskipulagsins. Óhætt er að segja að kosningin hafi verið æsispennandi. Andvari komst ekki á blað, en meðbyr sigraði með 51% greiddra atkvæða og gustur kom fast á hæla hans með 49%.

Frumdrög svæðisskipulags Vestfjarða 2025-2050 má nálgast hér. Frumdrögin munu nú leggja línurnar hver verða næstu skref í mótun svæðisskipulagsins og hvernig á að útfæra stefnumótun í samræmi við framtíðarsýn og lykilatriði frumdraganna. 

Íslenska kalkþörungafélagið á Bíldudal fagnaði í gær góðum árangri á síðasta ári. Sett var nýtt framleiðslumet og voru framleidd rúmlega 82.000 tonn af kalkþörungum til útflutnings á árinu 2024. Eru það um 1.000 tonnum meira en fyrra metárið sem er frá 2022.

„Af því tilefni fögnuðum við með okkar starfsfólki og verktökum í dag með því að gæða okkur á fallegri og gómsætri tertu“ sagði Halldór Halldórsson, forstjóri Ískalk. „Við erum þakklát starfsfólki okkar fyrir að leggja sig fram við að gera þetta mögulegt.“

Um þrjátíu manns starfa hjá verksmiðju Kalkþörungafélagsins. Árlegar tekjur félagsins eru nálægt 2 milljörðum króna. Félagið hefur gert samninga um nýja kalkþörungaverksmiðju í Súðavík, sem mun vinna úr kalkþörunganámum í Ísafjarðardjúpi og áformað er að hefji starfsemi á árinu 2027. Nýja verksmiðjan á að geta framleitt úr 125.000 m3 á ári og er vinnustaður fyrir 20-25 manns auk afleiddra starfa.

Ewa er gæðaeftirlitsmaður í fyrirtækinu.

Almar framleiðslustjóri og Josie sem sér um öll þrif og hefur starfað í ein 15 ár hjá fyrirtækinu.

Myndir: aðsendar.

Í byrjun desember sl. auglýsti Byggðastofnun eftir sérfræðingi á þróunarsvið stofnunarinnar. Alls bárust 18 umsóknir, 11 frá konum og sjö frá körlum. Nú hefur verið ákveðið ráða Hebu Guðmundsdóttur og Sigfús Ólaf Guðmundsson, segir á heimasíðu Byggðastofnunar.

Heba er með BSBA gráðu í viðskiptafræði frá University of Southern Mississippi og viðbótardiplóma í opinberri stjórnsýslu frá Háskóla Íslands. Heba hefur starfað sem verkefnisstjóri í atvinnu-, menningar- og kynningamálum fyrir sveitarfélagið Skagafjörð síðastliðin sjö ár. Í starfinu hefur hún m.a. komið að vinnu við Sóknaráætlun Norðurlands vestra og unnið með opinberum stofnunum og samtökum sem tengjast atvinnu- og byggðaþróun. Heba hefur víðtæka reynslu í viðburðastjórnun, verkefnastjórnun, samningagerð, þekkingarmiðlun og stefnumótun á sviði atvinnu- og byggðamála og þekkir vel þær áskoranir sem byggðir landsins standa frammi fyrir.

Sigfús er með B.Sc. í viðskiptafræði frá Háskóla Íslands, diplóma í opinberri stjórnsýslu frá Háskóla Íslands og lýkur MS gráðu í forystu og stjórnun með áherslu á verkefnastjórnun frá Háskólanum á Bifröst vorið 2025. Sigfús hefur starfað við verkefnastjórn síðan 2012 og síðustu sex ár verið deildarstjóri atvinnu-, menningar- og kynningamála hjá sveitarfélaginu Skagafirði. Á sviði atvinnu- og byggðamála hefur hann m.a. haft umsjón með byggðakvóta, gerð húsnæðisáætlunar og verið í miklum samskiptum og samstarfi við atvinnulífið s.s. ferðaþjónustuna auk þess að sjá um kynningar á fjárfestingatækifærum. Starf hans sem deildarstjóri felur einnig í sér skýrsluskrif, áætlanagerð og þekkingarmiðlun. Þá hefur Sigfús leitt stefnumótun og innleiðingu á stafrænni þróun og upplýsingatækni fyrir sveitarfélagið.

Christoph Pfülb, meistaranemi á öðru ári í Sjávarbyggðafræði hjá Háskólasetri Vestfjarða hefur hlotið rannsóknarstyrk frá Byggðastofnun fyrir lokaverkefnið sitt „Sjálfboðaliðastarf og áhættustýring á Íslandi: Rannsókn á hlutverki staðartengsla og staðbundinnar þátttöku í björgunarsveitum og hjálparstarfi“.

Christoph mun vinna með leiðbeinendum sínum, Dr. Jóhönnu Gísladóttur og Dr. Matthias Kokorsch, sem hafa mikla reynslu á þessu sviði í gegnum CliCNord-verkefnið.

Christoph segir að hann hafi fengið innblástur fyrir rannsókninni í gegnum tvö námskeið sem hann tók hjá Háskólasetri sem hluti af meistaranáminu. Námskeiðin voru Fólkið og hafið: Landfræðilegt sjónarmið sem er kennt af Dr. Kokorsch og Bjargráð við hamförum sem er kennt af Dr. Uta Reichardt. Christoph hefur lengi haft áhuga á mannúðarstarfi og áhættustýringu vegna náttúruváar enda hefur hann lengi verið félagi í þýsku björgunarsamtökunum DLRG.

„Ísland stendur frammi fyrir ólíkum tegundum af náttúruvá og er sérstaklega viðkvæmt fyrir áhrifum loftslagsbreytinga, sem geta aukið hættu á hamförum,“ segir Christoph. „Viðbrögð við neyðartilvikum byggja að miklu leyti á staðbundnu sjálfboðaliðastarfi, einkum í dreifbýli.“

Styrkurinn frá Byggðastofnun mun standa straum af kostnaði við rannsóknina, svo sem hugbúnaði fyrir gagnaúrvinnslu og ferðakostnaði vegna viðtala við sérfræðinga. „Þótt verkefnið krefjist ekki mikilla fjárfestinga veitir styrkurinn mér svigrúm til að einbeita mér algjörlega að ritgerðinni og nýta niðurstöðurnar sem best,“ segir Christoph

Veðurstofan mun auka vöktunarstig við Ljósufjöll vegna vaxandi skjálftavirkni á svæðinu undanfarnar vikur.

Salóme Jórunn Bernharðsdóttir náttúruvársérfræðingur, segir í samtali við fréttavefinn Vísi, það vera sérstakt að skjálftavirkni mælist svo lengi á jafnmiklu dýpi og raunin er nú. Skjálfti að stærðinni 2,9 varð við Grjótárvatn í morgun.

„Við erum semsagt að meta það sem svo  að þetta kalli á að við hækkum vöktunarstig hjá okkur varðandi Ljósufjöll og Ljósufjallakerfið. Það er ekki algengt að við fáum skjálfta á svona miklu dýpi eins og við erum að sjá við Grjótárvatn, þeir eru á 15-20 kílómetra dýpi, og það eru vísbendingar sem benda til þess að þetta séu einhvers konar kvikutengdar hreyfingar. Gos á þessu svæði hafa ekki verið algeng, þau hafa verið á fjögur hundruð ára fresti að meðaltali. Þetta eru lítil hraungos eða lítil sprengigos á stuttum sprungum. Þannig að áhrifin af þessu yrðu mjög takmörkuð “ segir Salóme.

Fyrir nokkru lauk árlegu haustralli Hafrannsóknastofnunar en í þeim leiðangri er meðal annars togað á miklu dýpi eða allt að 1400 metrum.

Þegar togað er svona djúpt finnast fjölmargar tegundir sem eru lítt þekktar þótt sumar séu nokkuð algengar. Einnig fást sjaldgæfar tegundir og sumar þeirra hafa fundist aðeins nokkrum sinnum á þeim 25 árum sem haustrallið hefur farið fram.

Í haustralli ársins veiddist tegundin þverhyrna (Lophodolos acanthognadus) í fyrsta sinn í íslenskri efnahagslögsögu og getur hún því hér með talist til íslenskrar fiskafánu..

Þverhyrna tilheyrir hyrnuætt af ættbálki kjaftagelgna en flestir fiskar þessa ættbálks eru djúpfiskar, ýmist botnfiskar eða botn- og miðsævisfiskar.

Auglýst hefur verið laust til umsóknar starf framkvæmdastjóra mannauðs hjá Heilbrigðisstofnun Vestfjarða. Framkvæmdastjóri mannauðs heyrir undir forstjóra og er hluti af framkvæmdastjórn. 

Lúðvík Þorgeirsson, forstjóri staðfestir við Bæjarins besta að Hanna Þóra Hauksdóttir,mannauðsstjóri sé á förum en verði í starfi út marsmánuði.

Á Heilbrigðisstofnun Vestfjarða starfa um 270 manns sem veita almenna heilbrigðisþjónustu á heilsugæslu-, hjúkrunar- og sjúkrasviði. Heilsugæslustöðvar eru á Ísafirði og Patreksfirði og heilsugæslusel í öllum byggðakjörnum heilbrigðisumdæmisins.