Umhverfisstofnun hefur sent inn veiðistjórnunartillögur fyrir rjúpu árið 2024 til umhverfis-, orku- og loftslagsráðuneytis.

Samkvæmt drögum að nýrri stjórnunar og verndaráætlun rjúpu skulu veiðidagar vera heilir og veiði hefjast fyrsta föstudag á eða eftir 20. október.

Veiði er heimil frá og með föstudegi til og með þriðjudags innan tímabilsins. Því er óleyfilegt að veiða rjúpu miðvikudaga og fimmtudaga. 

Niðurstöður fjölþátta stofnlíkana (IPM) um hámarksfjölda veiðidaga og tillögur Umhverfisstofnunar að fjölda veiðidaga (veiðitímabili) eru eftirfarandi: 

Austurland:    45(25. okt – 22. des) 
Norðausturland:     20 (25. okt – 19. nóv)
Norðvesturland:     20 (25. okt – 19. nóv)
Suðurland:      20 (25. okt – 19. nóv)
Vesturland:      20 (25. okt – 19. nóv)
Vestfirðir:      25 (25. okt – 26. nóv)

Tillögurnar eru byggðar á nýjum samþættum stofnlíkönum sem hafa verið þróuð samhliða stjórnunar- og verndaráætluninni af Dr. Fred Johnson, bandarískum sérfræðingi í stofnlíkanagerð og veiðistjórnun. Áætlunin er afurð samstarfs viðeigandi hagsmunaaðila og í henni er nýtt veiðistjórnunarkerfi kynnt.

Í nýja veiðistjórnunarkerfinu er landinu skipt upp í sex svæði. (sjá mynd). Veiðitímabil hvers svæðis er ekki háð öðrum svæðum heldur stjórnast af ástandi stofnsins innan svæðisins.

Byggðastofnun telur að úthlutun upp á 500 þorskígildistonn á yfirstandandi fiskveiðiári til Hólmavíkur hafi þegar leitt til þess að heimaaðilar hafa komið upp fiskvinnslu á staðnum.

Eins og kunnugt er var rækjuvinnslu hætt á Hólmavík í sumarbyrjun 2023 og misstu þá 20 manns vinnuna. Í framhaldi af erindi frá Strandabyggð ákvað Byggðastofnun að auglýsa eftir samstarfsaðilum um nýtingu á allt að 500 þorskígildistonnum á þessu fiskveiðiári. Í vor voru svo auglýst 500 tonn til næstu sex fiskveiðiára.

Sú hvatning sem þessi úthlutun felur í sér hefur nú leitt til þess að stærstur hluti útgerðaraðila á staðnum hefur sameinast um nýtingu þessa aflamarks til veiða og vinnslu.

Úthlutunin er skilyrt vinnslu á staðnum og þannig er stuðlað að því að sem stærstur hluti virðiskeðjunnar sé staðsettur í byggðarlaginu. Eins og fram hefur komið í Fiskifréttum eru þegar 12 starfsmenn í vinnslunni auk þess sem úthlutunin styrkir stoðir útgerðar á staðnum.

Bæjarráð ísafjarðarbæjar samþykkti í morgun nýja gjaldskrá fyrir leikskóla og uppfærðar reglur um innritun og dvöl barna. Tekur nýja gjaldskráin gildi um næstu mánaðamót 1. ágúst.

Mánaðargjald hefur verið lækkað með tillit til þess að nú eru innifaldir í því 204 skóladagar í stað 212. Átta dagar eru því skilgreindir sem skráningardagar og þarf að greiða aukalega af því. Ekki verður veittur systkinaafsláttur af skráningargjaldi.

Viðmiðunargjald vistun og fæði, fyrir einn mánuð verður eftirfarandi:
Leikskólagjald kl. 8-14, mánaðargjald 32.508 kr.
Leikskólagjald kl. 8-15, mánaðargjald 40.528 kr.
Leikskólagjald kl. 8-16, mánaðargjald 44.218 kr.
Leikskólagjald kl. 7:45-16:15, mánaðargjald 47.908 kr.

Mánaðargjald fyrir hádegisverð er kr. 6.680, morgunhressing 4.330 kr. og sama fyrir síðdegishressingu. Fullt fæði mun kosta 15.340 kr.

Vistunargjald án fæðis er mismunurinn á viðmiðunargjaldi með vistun og fæði og fæðisgjaldinu.

40% afsláttur af vistunargjaldi er veittur einstaklingum með mánaðartekjur allt að 750.000 kr. og foreldrum í sambúð með mánaðartekjur allt að 750.000 kr. Afsláttur er ekki veittur af hádegisverði og hressingu.

Systkinaafsláttur er 40% með öðru barni og frítt fyrir þriðja barn af leikskólagjaldi/dagvistargjaldi
og hálfu aukagjaldi (8,5 tímar). Afsláttur gildir milli dagvistunaraðila/skóla og skólastiga. Afsláttur
er ekki veittur af skráningardegi, hádegisverði og hressingu.

Framkvæmdir standa yfir við nýja þekju og lagnir á Karlsbryggju á Reykhólum og gengur verkið samkvæmt áætlun.

Það er Geirnaglinn ehf á Ísafirði sem annast verkið. Fyrirtæki varð lægstbjóðandi í útboði og bauð rúmar 96 m.kr. sem er 18% yfir áætluðum verktakakostnaði.

Helstu verkþættir eru að steypa nærri 1.400 fermetra þekju, leggja vatnslögn og steypa upp rafbúnaðarhús og stöpla undir 3 ljósamöstur.

Verkinu skal lokið eigi síðar en 30. nóvember 2024.

Verkið er hluti af umfangsmiklum endurbótum á höfninni sem munu kosta liðlega 300 m.kr. þegar þeim verður lokið. Búið er að reka niður nýtt stálþil sem stækkaði bryggjuna umtalsvert.

Undir lok júlí 2022 hrundi niður stór hluti bryggjunnar á Reykhólum. Þá hafði lengi legið fyrir að bryggjan væri komin á tíma, en hún er síðan 1974. 

Teikning af endurbótunum.

Frá framkvæmdunum sem nú standa yfir.

Myndir: Hrafnkell Guðnason.

37. Mansakeppnin var haldin í Suðureyrarhöfn laugardaginn 13.júlí í sannkölluðum sudda. En þó að veðrið hafi ekki verið betra þá veiddist nokkuð vel bæði mansar, kolar, þorskar og ufsar að sögn Ævars Einarssonar.

Mansavinir standa fyrir keppninni sem byrjaði sumarið 1988 með „Mansaveiðikeppni“ barna 12 ára og yngri sem var haldin á sjónvarpslausum fimmtudegi. „Markmiðið með keppninni var og er að kenna börnunum að bera virðingu fyrir dýrum þó það sé ekki annað en marhnútur. Alltaf frá byrjun hefur öllum fiski verið haldið lifandi í sjókörum og verið sleppt að keppni lokinni.“

⁸Minnsta mansann 55 gr. veiddi Davion Aves.

Stærsta mansann 432 gr. veiddi Sóldís Líf Ágústsdóttir.

1. mesta mansa aflann 2.123gr. veiddi Viggó Jóhannsson.

2. mesta mansa aflann 920 gr. veiddi Davion Aves.

3. mesta mansa aflann 615. gr. veiddi Guðmundur Jörgen Sveinsson.

1. mesta heildaraflann 2.290 gr. veiddi Sigmar Ingi Snorrason.

2. mesta heildaraflann 2.237 gr. veiddi Viggó Jóhannsson.

3. mesta heildaraflann 920. gr. veiddi Davion Aves.

Furðulegustu veiðina: hárkolla m/óværu veiddi Vilborg Guðmundsdóttir.

Aflakóngur er Sigmar Ingi Snorrason og fær hann til varðveislu áletraðan farandbikar í eitt ár.

Mansavinir vilja þakka Klofningi ehf. fyrir ómetanlegan stuðning og kaup á verðl.gripum. Bjarka Rúnari og Rúnari Karvel fyrir sjó-dælingu. Guðna Albert fyrir vigtunina. Einari Dapo og Monu Marinu fyrir skráningu. Sturlu Páli fyrir frábæra grillveislu í lok keppninnar. Tristan Erni og Möndu Malindu fyrir aðstoðina.

Glaðir verðlaunahafar.

Ungir og knáir veiðimenn.

verðlaunafhending í undirbúningi.

Myndir: mansavinir/Ævar Einarsson.

Bygging á nýjum 2,7 milljón lítra vatnstanki í Hlíðardal er á lokastigi. Búið er að opna tilboð í tengingu vatnstanksins við lagnakerfi vatnsveitunnar og mun bæjarráð Bolungavíkurkaupstaðar taka tilboðin til afgreiðslu á morgun, þriðjudag.

Tvö tilboð bárust og voru þau frá Rörás ehf og Ístækni ehf bæði á Ísafirði. Ístækni bauð lægra eða 74 m.kr. Kostaðaráætlun var 65 m.kr.

Stefnt er að því að nýja vatnsveitan verði tekin í notkun í haust og verður allt vatn borholuvatn í og leysir af hólmi vatnsveitu með yfirborðsvatni.

Þegar hafa verið boraðar nokkrar holur og fengist gott vatn, en ekki nægilegt magn og verða fleiri holur boraðar síðar í sumar.

Heildarkostnaður við vatnsveituna er áætlaður um 300 m.kr.

Vatnstankurinn er gríðarstór en fellur vel inn í landslagið.