Mikil gróska er á sunnanverðum Vestfjörðum í íþróttastarfinu en í lok ársins 2024 voru stofnaðar tvær nýjar deildir innan aðildarfélaga HHF. Mikil ánægja er með aukið framboð í íþróttastarfi á svæðinu og eykur það líkur á að börn og unglingar finni sér íþrótt við hæfi.

Íþróttafélag Bílddælinga stofnaði Rafíþróttadeild ÍFB og í desember var haldið kynningarnámskeið en æfingar byrjuðu svo af fullum krafti í janúarmánuði. Mikil ánægja er með aukna starfsemi og framboð fyrir börn á Bíldudal. Samtals hefur verið safnað fyrir 6 stöðvum og mikill áhugi er fyrir starfseminni, það verður gaman að fylgjast með deildinni í framtíðinni vaxa og dafna.

Einnig var stofnuð Bogfimideild ÍH hjá Íþróttafélaginu Herði á Patreksfirði í samstarfi við Bogfimisamband Íslands. Boðið var upp á kynningarnámskeið í desember þar sem tveir aðilar frá Bogfimisambandinu komu og kynntu íþróttina fyrir íbúum bæjarins. Námskeiðið var virkilega vel sótt og mikill áhugi hefur skapast á svæðinu. Æfingar hófust í janúarbyrjun og er aðsóknin framar vonum, en alls hafa 38 einstaklingar, bæði börn og fullorðnir, skráð sig á æfingar. Svo mikil er aðsóknin að allir tímar eru fullir og lokað hefur verið fyrir skráningu og byrjað að skrá á biðlista.

Í báðum tilvikum fengu íþróttafélögin góða styrki til þess að koma nýjum deildum á laggirnar, og vilja íþróttafélögin þakka kærlega fyrir veittan styrk til uppbyggingar íþróttastarfs á sunnanverðum Vestfjörðum.

Bina Hannesdóttir, formaður HHF

Rafíþróttadeild innan HHF var stofnuð í fyrra.

“Þegar ég var lögfræðingur Skipulagsstofnunar árin 2000–2006 var Teigsskógur á mínu borði og það er alveg klárt mál að það er gríðarlega mikilvægt að framkvæmdir við Vestfjarðaveg um Gufudalssveit tefjist ekki frekar. Það er þegar búið að bíða í rúm 20 ár eftir þessi vegur klárist.”

Þessi frómu orð lét núverandi Samgöngu og sveitarstjórnarráðherra, Eyjólfur Ármannsson, 2. þingmaður Norðvesturkjördæmis, falla  þann 10. október 2023 í umræðum á Alþingi um tillögu að Samgönguáætlun. Segja má að þessi ummæli hafi orðið að áhrínisorðum og meirihluti fjárlaganefndar rammaði þessa hugsun inn í nefndarálit sitt með þessum hætti:

    “Fyrir liggur forgangsröðun í gildandi samgönguáætlun fyrir árin 2020–2024 sem dregist hefur að ljúka. Þar liggja fyrir tillögur um framkvæmdir varðandi vegi, flugvelli og hafnir. Þar að auki liggur fyrir langtímasamgönguáætlun til ársins 2034. Ekkert er því til fyrirstöðu að Vegagerðin, í samráði við innviðaráðuneyti, geti gert samninga við verktaka eins og í hefðbundnu árferði. Heildarframlög til nýframkvæmda á vegakerfinu hækka milli ára og nema 27,4 ma.kr. á næsta ári. Veigamestu framkvæmdir verða á Vestfjörðum, m.a. á Dynjandisheiði og í Gufudalssveit, á Reykjanesbraut og á hringvegi um Hornafjarðarfljót. Í áætlunum er gert ráð fyrir því að þeim framkvæmdum ljúki að mestu árið 2025 og því verði aukið svigrúm til nýrra verkefna árið 2026. Nefndin gerir ráð fyrir því að þá liggi fyrir samþykkt samgönguáætlun til fimm ára.”

“Meira að segja í myrkri”

Þetta var býsna skýrt og í samræmi við málflutning núverandi samgönguráðherra. Það eru út af fyrir sig ekki sérstök tíðindi. Ég leyfi mér amk að fullyrða að mikill stuðningur er við að lúka  framkvæmdum í Gufudalssveitinni, svo fljótt sem tæknilega megi. Segja má að okkar nýi samgönguráðherra hafi undirstrikað þetta þann 30. janúar sl. í viðtali við Kristján Má Unnarsson á Stöð 2, þegar hann sagði:

„Aðalatriðið er að klára Dynjandisheiði, klára Gufudalssveitina. Þetta eru stórhættulegir vegir og ég hef keyrt þetta margoft sjálfur, meira að segja í myrkri.” – Þessum orðum ber sannarlega að fagna og eru þau algjörlega í samræmi við við framangreindar yfirlýsingar við afgreiðslu fjárlaga.

En hvenær lýkur framkvæmdunum?

Það jók bjartsýni okkar margra að fregna þau tíðindi af Útboðsþingi Samtaka iðnaðarins að í næsta mánuði, verði boðnar út framkvæmdir við tvær brýr í Gufudalssveitinni; annars vegar 130 metra brú í Gufufirði og 58 metra brú í Djúpafirði. Ennfremur að ætlunin sé að fara í útboð á 230 til 260 metra brú í Djúpafirði, auk fleiri verkefna eins og þar sagði. Það skyggir hins vegar talsvert á gleðina, að þetta útboð er ekki fyrirhugað fyrr en á haustdögum, sem veldur áhyggjum um að verklok verði seint og um síðir. – Enda er það svo að margföld reynsla er af því að hugtakið “haust” getur verið ansi loðið og teygjanlegt þegar svo ber undir !!

Þess vegna er mikilvægt að upplýst sé hið fyrsta um hvenær ætla megi að þessum ofangreindu framkvæmdum ljúki. Í ljósi sögunnar og þeirra dæmalausu tafa sem hafa orðið á framkvæmdum á þessari leið, er bæði sjálfsagt og eðlilegt að framkvæmdahraðinn sé eins mikill og frekast er tæknilega unnt.

Með skírskotun til þeirra  ummæli sem samgönguráðherra lét  falla í ræðu sinni um Samgönguáætlun og fyrr er til vitnað langar mig að beina spurningum til hans í mikilli vinsemd.  Enda treysti ég  því, með skírskotun til fyrri orða hans, sbr hér að ofan,  að hann muni  einskis láta ófreistað svo að lokið verði við þessar framkvæmdir svo fljótt sem verða má af tæknilegum ástæðum.

Þrjár einfaldar spurningar

Því leyfi ég mér ágæti Eyjólfur Ármannsson samgönguráðherra að spyrja þig einfaldra spurninga og veit að þú munt svara þeim af einurð og hreinskilni:

1. Er lagt upp með við útboð framkvæmdanna í Gufudalssveitinni að þeim verði lokið jafn skjótt og tæknilega telst unnt ?
2. Hvenær má þess vænta að unnt verði að aka ofangreinda leið yfir Gufufjörð og Djúpafjörð?
3. Sum sé, kæri samgönguráðherra: Hvenær kemur þú vestur, mundar skærin, klippir á borðann og lýsir því yfir að langþráðum framkvæmdum við þennan umtalaða veg sé lokið?

Einar Kristinn Guðfinnsson, fyrrverandi þingmaður Norðvesturkjördæmis

Á síðasta fundi Bæjarráðs Ísafjarðarbæjar var lagt til við bæjarstjórn að sérreglum um byggðakvóta verði óbreyttar frá árinu 2023-24. Á fiskveiðiárinu 2023-2024 lögðust niður nokkur störf hjá Walvis Ehf sem séð hefur um löndun og slægingu á Flateyri vegna hráefnisskorts, minnir að starfsemin hafi endanlega verið stöðvuð september 2024.

Nú er Byggðakvóti Flateyrar 2024-25 285 tonn eitthvað færist á milli ára þannig að hann er rúm 400 tonn. Nú er engin starfandi fiskvinnsla á Flateyri og engin löndunar þjónusta, hvað veldur jú meðal annars þessar sérreglur. Ef sett væri á löndunarskilda á þau skip sem ætluðu að nýta sé byggðakvótann á Flateyri og ekki frá því hvikað myndi það þýða að það þyrfti að landa rúmlega 800 tonnum á Flateyri það væri eitthvað til að hjálpa til við atvinnuuppbyggingu á Flateyri sem hlýtur að vera hlutverk Bæjarfulltrúa Ísafjarðarbæjar að gæta að atvinnustarfsemi í ÖLLUM byggðarlögum bæjarins.

Því til viðbótar mætti alveg setja löndunarskildu á Byggðastofnunarkvótann þar eru 400 tonn.  Flateyri er ekki Grímsey.

Það sætir mikillar furðu hjá mér að þrátt fyrir að það séu nokkrir bæjarfulltrúar úr Önundarfirði og að núverandi bæjarstjóri hafi búið og starfað í firðinum að það skuli ekki einusinni vera tekið samtalið um þetta og leitað lausna.

Ég skora hér með á alla bæjarfulltrúa og bæjarstjóra Ísafjarðarbæjar að funda á Flateyri um þetta mál áður en endanleg ákvörðun verður tekin, það gengur ekki lengur að það sem ætlað er til að skapa atvinnu á Flateyri geri það ekki.

Gísli Jón Kristjánsson