Í tilkynningu frá Cruise Iceland segir að ferðaþjónustufyrirtæki á Íslandi njóti mörg aukinna tekna vegna heimsókna skemmtiferðaskipa til landsins. Þar sem skipin leggist að bryggju skapist tækifæri fyrir staðbundna atvinnuþróun og efnahagsvöxt, eins og sýndi sig í skýrslu Reykjavík Economics sem unnin var í samstarfi við Faxaflóahafnir og aðra hagaðila. Skýrslan leiddi í ljós öflug efnahagsáhrif skemmtiferðaskipa og að þeir sem ferðast með þeim eyða töluvert hærri fjárhæðum í landi yfir styttri tímabil en áður var talið.

Fyrir skömmu birtist frétt á Akureyri.net þar sem Sara Sigmundsdóttir, framkvæmdastjóri Akureyri Whale Watching, greinir frá því að sumarið hafi verið gjöfult hjá fyrirtækinu. Innan fréttar er sérstaklega minnst á að þegar skemmtiferðaskipin koma til landsins er þörf á að fjölga ferðum hjá fyrirtækinu og telur framkvæmdastjórinn að rúmlega helmingur viðskiptavina þeirra í sumar komi af skemmtiferðarskipunum, sem er gríðarleg tekjuaukning fyrir hvalaskoðunarfyrirtækin.

Jón Auðun Auðunarson, framkvæmdastjóri Vesturferða, aðildarfélags Cruise Iceland, tekur undir það sem fram kemur í fréttinni:
“Þetta er okkar upplifun líka. Örugglega 85% af farþegum í hvalaskoðun koma frá skemmtiferðaskipum. Ég set ekki einu sinni inn brottför í hvalaskoðun þegar það er ekki skip í höfn. Það svarar ekki kostnaði að fara af stað með 2-4 farþega sem koma keyrandi til Ísafjarðar,“ segir Jón Auðunn og vísar þar í hversu mikil hagkvæmni felst í að einblína á þjónustu við þennan ferðamannahóp.

Ferðaþjónustan á Ísafirði er háð farþegum skemmtiferðaskipa
Jón Auðun telur ferðaþjónustuna á Ísafirði vera mjög háða skemmtiferðaskipum þar sem Ísafjörður er ekki á þjóðvegi 1 og keyrandi ferðamenn skauta oftast framhjá Vestfjörðum, sem sé auðvitað miður því landshlutinn hafi upp á mikið upp á að bjóða. Hann segir jafnframt að fyrirtækið eigi erfitt með að vera með reglulegar brottfarir í hvalaskoðunum yfir sumarið, enda séu þær núna sérsniðnar eftir komu og brottfaratíma skipa. Þetta fyrirkomulag reynist töluvert betur eins og áður sagði. Jón Auðunn bætir við: „Framkvæmdastjóri hjá Eldingu á Akureyri áætlaði að hlutfallið væri í kringum 50% í hvalaskoðun. Þetta sýnir enn og aftur hversu mikilvæg skemmtiferðaskip eru fyrir ferðaþjónustu á landsbyggðinni. Skipin skilja eftir miklar tekjur fyrir samfélagið – Það er bara staðreynd þótt að margir reyna að halda öðru fram.“

Míla hefur uppfært fyrirliggjandi stofnnet til að styðja aukna bandvídd með nýjum
bylgjulengdarbúnaði. Í tilkynningu frá Mílu segir að stofnnet Mílu hafi verið uppfært í 200 gígabita á sekúndu bandvídd.

„Aukin bandvídd kemur til með að nýtast öllum íbúum, stofnunum og fyrirtækjum á svæðinu og opnar á aukna möguleika. Þessi uppfærsla tryggir að Míla geti annað bandvíddareftirspurn á svæðinu næstu áratugi og opnar á frekari aukningu með auðveldum hætti. Hver bylgja býður upp á 200-400 gígabita á sekúndu og pláss er fyrir 50-100 bylgjur.“

„Það er gaman að sjá 30 ára ljósleiðaraþræði fá endurnýjun lífdaga með 200 gígabita uppfærslu með nýrri bylgjulengdartækni. Vestfirðir fá þarna góða innspýtingu af bandvídd sem kemur til að nýtast íbúum, stofnunum og fyrirtækjum á svæðinu.“ segir Daði Sigurðarson framkvæmdastjóri tæknisviðs Mílu. „Við eigum svo inni að bæta við fleiri bylgjum til að auka bandvídd enn frekar.“

Hrönn Ólína Jörundsdóttir, forstjóri Matvælastofnunar segist í svari við fyrirspurn Bæjarins besta hafna alfarið ásökunum Esterar Hilmarsdóttir um mútuþægni starfsmanna stofnunarinnar. Í aðsendri grein á Vísi síðasta þriðjudag segir Ester eftirfarandi:

 „En þrátt fyrir þessar niðurstöður skakar starfsfólk MAST sér í skrifstofustólunum svo skrjáfar í seðlunum sem norskir auðkýfingar hafa stungið í vasa þeirra, um leið og þau skrifa upp á rekstrarleyfið þvert á mat Samgöngustofu og þrátt fyrir mótmæli Vegagerðarinnar og Landhelgisgæslunnar.“

Ennfremur segir Hrönn:

„Við erum jafnframt að skoða rétt okkar og hvort höfundur hafi með þessum ásökunum brotið gegn ákvæðum almennra hegningarlaga varðandi að saka opinbera starfsmenn um refsiverða háttsemi. Við tökum þessu máli mjög alvarlega.“

Fyrrun mun hafa verið bænhús með kirkjugarði í Unaðsdal og kirkjuvegur langur út að Snæfjöllum, yzta bæ a Snæfjallaströnd. Þaðan var kirkjan flutt í Unaðsdal árið 1867 og sóknin lögð til Kirkjubólþinga með lögum árið 1880 og þjónað þaðan til 1908. Þá tók Vigurprestur við í 10 ár unz Staðarprestur í Grunnavík bætti öðrum 10 við.

Eftir 1928 hefur Unaðsdalskirkja verið útkirkja frá Vatnsfirði, eins og lögin frá 1907 kváðu á um. Um aldamótin 1900 voru 350 manns skráðir í sókninni en aðeins 150 árið 1907. Kirkjan, sem nú stendur í Unaðsdal, var byggð 1897. Hún er úr timbri með lofti og turni og stendur á sléttri eyri við ósa Dalsár. Fyrri kirkja stóð á gamla bænhússgrunninum í kirkjugarði allmiklu ofar og neðst í túni.

Forn koparhjálmur úr Snæfjallakirkju er meðal góðra gripa og einnig altaristafla eftir Anker Lund (Kristur að lækna Bartimeus blinda) og Guðmundur „bíldur” Pálsson (†1888) skar út stóra krossinn vinstra megin í kórnum. Kirkjan á einnig gamla ljósahjálma og altarisstjaka og tvær stórar klukkur í turni, önnur þeirra frá 1791.

Af vefsíðunni is.nat.is

Íþrótta- og Ólympíusamband Íslands (ÍSÍ) hefur valið fánabera Íslands á setningarhátíð Ólympíuleikanna í París 2024.

Frá 2020 hefur Alþjóðaólympíunefndin lagt áherslu á að frá öllum löndum séu tilnefndir tveir fánaberar, bæði karl og kona.

Fánaberar Íslands verða þau Guðlaug Edda Hannesdóttir sem keppir í þríþraut og Hákon Þór Svavarsson sem keppir í haglabyssuskotfimi. Þau eru bæði að keppa í fyrsta sinn á Ólympíuleikum og fá þennan heiður samhliða frumraun sinni. Jafnframt verður þetta í fyrsta sinn sem keppandi í skotíþróttum og þríþraut er fánaberi Íslands á setningarhátíð Ólympíuleikanna.

Að þessu sinni verður verður ekki hefðbundin innganga á setningarhátíð heldur sigla fulltrúar allra landa á bátum eftir ánni Signu í hjarta Parísarborgar. Setningarhátíðin er sú stærsta sem haldin hefur verið í sögu Ólympíuleikanna.

Íslands á fimm keppendur á Ólympíuleikunum í París, þau Guðlaugu Eddu Hannesdóttur í þríþraut, Hákon Þór Svavarsson í skotíþróttum, Anton Svein McKee og Snæfríði Sól Jórunnardóttur í sundi og Ernu Sóleyju Gunnarsdóttur í frjálsíþróttum. Það verður spennandi og skemmtilegt að fylgjast með þeirra vegferð á leikunum.

OPNUN: VITAR (Afmælissýning og útgáfuhóf) Jón Sigurpálsson (1954 – 2023)

Slunkaríki í Edinborgarhúsinu býður gesti velkomna á opnun afmælissýningar og útgáfuhófs kverinu „Vitar“ í tilefni af því að myndlistarmaðurinn og fyrrum stjórnarformaður Edinborgarhússins, Jón Sigurpálsson, hefði orðið sjötugur 2. ágúst n.k..    Fjölskylda Jóns hefur undanfarna mánuði tekið saman verk Jóns sem finna má í almannarýmum hér á landi og erlendis. Kverið er hannað af Einari Viðari Guðmundssyni Thoroddsen með textum eftir Halldór Björn Runólfsson, Björn Vigni Sigurpálsson og Kristínu Hagalín Ólafsdóttur.    Á sýningunni verða prentverk, ljósmyndaverk, veggverk og skúlptúrar eftir Jón ásamt skissum af listaverkum sem bæði urðu og urðu ekki að veruleika.    Viðburðurinn verður föstudaginn, 26. júlí kl.17.00 í Bryggjusal Edinborgarhússins, Ísafirði. Boðið verður upp á léttar veitingar.    —   Jón Sigurpálsson (1954 – 2023) fæddist í Reykjavík 1954. Eftir sex ára myndlistarnám í Hollandi settist hann að, ásamt eiginkonu sinni Margréti Gunnarsdóttur, á Ísafirði þar sem hann bjó og starfaði ævina út. Jón sýndi bæði hér á landi og erlendis um áratuga skeið og eftir hann eru fjölmörg útilistaverk. Jón hefur í gegnum tíðina komið að ýmsu í þágu myndlistar s.s. reksturs á galleríi Slunkaríki á Ísafirði og setu í stjórn Myndhöggvarafélags Reykjavíkur.   Aðgangur ókeypis Sýningin hlýtur stuðning úr sumarviðburðasjóði hafna Ísafjarðarbæja og uppbyggingarsjóði.

Heil­brigð­is­stofnun Vest­fjarða og Vest­ur­byggð hafa gengið til samn­inga um rekstur samþættrar heima­þjón­ustu í sveit­ar­fé­laginu.

Samn­ing­urinn er hluti af verk­efninu Gott að eldast, aðgerða­áætlun stjórn­valda í málefnum eldra fólks.

Heilbrigðisstofnun mun taka að sér rekstur heimastuðnings í samstarfi við sveitarfélagið. Lögð verður áhersla á persónumiðaða nálgun þar sem fagmenn vinna saman í teymisvinnu. Þjónustugátt verður ein, sem þýðir að allar beiðnir um þjónustu fara í gegnum eitt kerfi og mat á þeim verður sameiginlegt verkefni félags- og heilbrigðisstarfsfólks.

Markmiðið með verkefninu er að auka gæði þjónustu fyrir eldra fólk, minnka líkur á að fólk falli á milli þjónustukerfa og fækka innlögnum á sjúkrahús og hjúkrunarheimili. Með samþættingu félags- og heilbrigðisþjónustu er stefnt að því að þjónustan verði í einu flæði og að brugðist sé fljótt við breyttum þörfum notenda.

Með þessum samningi er stigið mikilvægt skref í átt að betri og skilvirkari þjónustu við eldra fólk í Vesturbyggð, þar sem hámarks nýting fjármuna er tryggð án þess að það komi niður á gæðum þjónustunnar. Vonir standa til um að þessi samþætta heimaþjónusta muni leiða til betri lífsgæða fyrir eldri íbúa sveitarfélagsins.

Þann 24. júlí munu 40 hjólreiðakappar víðs vegar að úr heiminum taka þátt í hjólreiðakeppni sem nú er haldin í þriðja sinn: þeir munu á fimm dögum hjóla 956 kílómetra leið um Vestfirði, í sumarbirtu allan sólarhringinn. Keppnin hefst á Silfurtorgi á Ísafirði klukkan 7:00 að morgni.

Keppnin nefnist Arna Westfjords Way Challenge og ArcticFish Midnight Special 2024.

Keppnin tekur fimm daga og er sú fyrsta sinnar tegundar segir í fréttatilkynningu. Keppninni er ætlað að tengja samfélag og þátttakendur. Hjólreiðakappar eru hvattir (og skyldaðir) til að koma við á „menningarlegum viðkomustöðum“ svo sem heitum laugum, kaffihúsum eða söfnum, líta upp og njóta aðeins og á þann hátt berst fjörið í keppnis vikunni um allt svæðið! Á meðan stöðvast tímatakan.

Hjólreiðafólkið kemur við á yfir 20 menningarlegum viðkomustöðum í vikunni, meðal annars kaffihúsinu í Litlabæ, fjölskyldureknum dýragarði að Hólum í Búðardal, heitum laugum svo sem Reykjafjarðarlaug og Dynjanda og Svalvoga þar sem vegurinn liggur í flæðarmálinu. Keppninni lýkur fyrir framan Edinborg (Pollgötumegin) þar sem verðlaunaafhending fer fram innandyra, afrekum verður fagnað fram eftir kvöldi.

Stærsti styrktaraðili keppninnar er Mjólkurvinnslan Arna í Bolungarvík sem framleiðir laktósafríar mjólkurvörur og dregur keppnin nafn sitt af þeim. ArcticFish styrkir keppnina einnig rausnarlega og ber lokakeppnin nafn þeirra ArcticFish Midnight Special. Aðrir styrktaraðilar eru Reiðhjólaverslunin Berlín, Hótel Ísafjörður,Borea Adventures, Kaffitár, Corsa, Oddi, Collab Hydro og Grainy Foods.

Frekari upplýsingar koma fram á cyclingwestfjords.com, Facebook og Instagram.