Á fimmtudaginn í síðustu viku var tekin fyrir í bæjarstjórn Ísafjarðarbæjar tillaga frá skipulags- og mannvirkjanefnd um að farið verði í hönnun á nýrri slökkvistöð á Ísafirði á árinu 2025.

Sigríðir Júlía Brynleifsdóttir, forseti bæjarstjórnar lagði fram breytingartillögu og vildi þess í stað vísa tillögunni til fjárhagsáætlunargerðar fyrir 2025. Þannig verði lagt heildstætt mat á framkvæmdaáætlun og -þörf sveitarfélagsins í einu lagi.

Var breytingartillagan samþykkt og því ekki ákveðið að sinni að fara í hönnun á nýrri slökkvistöð.

Samkvæmt minnisblaði sviðsstjóra umhverfis- og eignasviðs er heildarrýmisþörf fyrir nýja slökkvistöð áætluð um 650-785 fermetrar til að mæta þeim kröfum sem starfsemin hefur á núverandi stigi og byggingarkostnaður 299 m.kr. til 361.1 m.kr.

Ríkissjóður fékk um 5,5 m.kr. í fiskeldisgjald af stóru slátruninni í Drimlu á sunnudaginn. Þá fóru 150 tonn af eldislaxi í gegnum laxasláturhúsið. Fiskeldisgjaldið er 37,80 kr fyrir hvert kg svo ætla má að það skili 5.670.000 kr. í fiskeldisgjald.

Þá fær hafnarsjóður Bolungavíkur góðar tekjur af umvifum sunnudagsins í aflagjöld og önnur hafnargjöld. Jónn Páll Hreinsson, bæjarstjóri taldi aðspurði telja að tekjurnar séu á bilinu 600 – 700 þúsund krónur.

Ullaræði 2 er afar litrík og fjölbreytt prjónabók þar sem íslenski lopinn er uppistaðan í uppskriftunum.

Finnski hönnuðurinn Heli Nikula, sem hannar undir nafninu Villahullu, sló í gegn fyrir nokkrum árum með peysuuppskrift úr íslenskum lopa. Í kjölfarið fylgdu fleiri gríðarvinsælar uppskriftir og síðan bók, Villahullu eða Ullaræði, sem hefur notið mikillar hylli hérlendis sem annars staðar.

Hér er loksins komin ný og ekki síður skemmtileg bók sem inniheldur á þriðja tug uppskrifta, flestar að heilum peysum en einnig að sokkum, húfum, vettlingum og fleiri minni verkefnum.

Guðrún Hannele Henttinen þýddi.

Þyrla Land­helg­is­gæsl­unn­ar fór í könn­un­ar­flug yfir Vest­f­irði í morgun þar sem leitað var að hvíta­björn­um en í síðustu viku gekk hvíta­björn á land á Höfðaströnd í Jök­ul­fjörðum þar sem hann var felld­ur.

Þyrl­an fór af stað klukk­an 10 í morg­un og sótti lög­reglu­mann á Ísafjörð og fór svo í leit í Grunnavík, Jökulfjörðum og um Hornstrandir allt að Bjarnarfirði til að ganga úr skugga um að ekki væru fleiri hvítabirnir á ferðinni og reyndist svo ekki vera.

Guðlaugur Þór Þórðarson, umhverfis-, orku- og loftslagsráðherra hefur ákveðið að veita 510  milljónum króna í styrki til kaupa á hreinorku vörubifreiðum á þessu ári.

Þetta er í annað sinn sem slíkir styrkir eru veittir, en áætlað er að um rúmlega 600 þúsund lítrar af olíu sparist árlega með notkun hreinorku vörubifreiðanna sem hljóta styrk að þessu sinni. Hvert tæki sem kemst á hreina orku vegur þungt í orkuskiptum, þar sem hvert tæki notar margfalt meiri olíu á við venjulega fólksbifreið.

Allar 55 umsóknirnar sem bárust voru samþykktar með upphæðum samkvæmt samrýmdum viðmiðum. Sótt var um 621 milljónir kr. og komu 510 milljónir kr. til úthlutunar. Umsóknirnar sem bárust að þessu sinni eru um helmingi fleiri en í fyrra og vegna fleiri gerða hreinorku vöruflutningabíla. Ljóst er að framboð slíkra bíla er að aukast verulega.

Flestar voru umsóknirnar að þessu sinni vegna kaupa á stærri sendibílum eða pallbílum með stórum rafhlöðum, en einnig var talsvert um umsóknir vegna stærri vörubifreiða með enn stærri og öflugri rafhlöðum.

Háskólasetur Vestfjarða er hluti af verkefninu „Green Meets Blue“, sem er styrkt af Norrænu ráðherranefndinni um fiskveiðar og fiskeldi, landbúnað, matvæli og skógrækt.

Verkefnið verður undir forystu Nordregio og eru Háskólasetur Vestfjarða og Háskóli Hálanda og eyja í Skotlandi samstarfsaðilar í verkefninu.

Matthias Kokorsch, fagstjóri hjá Háskólasetri er verkefnisstjóri fyrir íslenska hluta verkefnisins. Aðstoðarmenn eru Rebecca og Tabea, sem báðar eru meistaranemar við Háskólasetur, ásamt Maria Wilke sem er fyrrverandi meistaranemi og kennari við Háskólasetur Vestfjarða og skrifaði doktorsverkefni um hafskipulag.

Norrænu löndin hafa sett sér metnaðarfull markmið um loftslags- og orkumál, þar sem endurnýjanleg orka á hafi úti gegnir lykilhlutverki í grænu umskiptunum en henni fylgja einnig áskoranir, þar með talið skörun við aðrar atvinnugreinar eins og sjávarútveg og fiskeldi. 

Ólafur Hauksson héaðssaksóknari segir að rannsókn á störfum tveggja fyrrverandi starfsmanna Innheimtustofnunar sveitarfélaga sé ennþá í rannsókn en hún sé tiltölulega langt komin.

Í desember 2021 sagði þáverandi stjórn af sér og ný stjórn sendi tvo starfsmenn í í tímabundið leyfi til þess „að ný stjórn geti farið yfir stöðuna og Ríkisendurskoðun geti lokið úttekt á verkefnum og starfsemi Innheimtustofnunar“ eins og sagði í fréttatilkynningu frá stofnuninni. Stjórnendurnir sem um er að ræða eru forstjórinn Jón Ingvar Pálsson og forstöðumaður útibúsins á Ísafirði Bragi Axelsson.

Í apríl 2022 var Héraðssaksóknari er í aðgerðum fyrir vestan vegna rannsóknarinnar. Tíu lögreglumenn og sérfræðingar á vegum embættisins voru að störfum við skýrslutökur og húsleit. Stjórn stofnunarinnar hafði þá nýlega rift samningi við Braga og Jón Ingvar vegna alvarlegra brota í starfi og vanefnda á samningi vegna trúnaðarbrots. 

Fram kom í fréttum RÚV að Jón Ingvar hefði samið við lögmannsstofu Braga á Ísafirði um að taka að sér innheimtuverkefni fyrir stofnunina. Stofnunin sá þá um að innheimta meðlag og var með skrifstofur í Reykjavík og á Ísafirði. 

Lögum um stofnunina hefur síðan verið breytt og innheimtuverkefnin flutt til ríkisins.

Karlalið Vestra sýndi mikila baráttu í leik sínum í gær gegn KR í Kaplaskjólinu í vesturbæ Reykjavíkur og gerði jafntefl 2:2 í jöfnum og spennandi leik. KR tók tvisvar forystu en jafnoft náði Vestri að jafna leikinn. Mörk Vestra gerðu Andri Rúnar Bjarnason  og Gustav Kjeldsen. Undir lok leiksins munaði minnstu að Andri Rúnar næði að skora sigurmark en skot hans var varið.

Eftir þessu úrslit er fallbaráttan en tvísýn og hörð. Vestri er í 11. sæti og fallsæti með 19 stig. Fylkir sem tapað í gær fyrir Fram er í 12. sæti og því neðsta með 17 stig. HK er sæti ofan en Vestri með 20 stig og leikur við KA á miðvikudaginn og KR er í 9. sæti með 22 stig.

Þessu fjögur lið eru í mikilli baráttu við að forðast fall úr deildinni. Tvö þeirra munu bjarga sér og hlutskipti tveggja verður að leika næsta ár í Lengjudeildinni.

Liðin eiga eftir að leika fjóra leiki og því 12 stig enn möguleg. Vestri á enn góða möguleika á að forðast fall. Liðið fær HK í heimsókn næsta laugardag og síðan koma tveir útileikir, gegn KA og Fram. Síðasti leikur tímabilsins verður svo 26. október á Kerecis vellinum á Ísafirði gegn Fylki.

Takist Vestra að vinna báða heimaleikina verður staða liðsins nokkuð vænleg.

Staða í neðri hluta Bestu deildarinnar eftir leik Vestra og KR. Fylkir tapaði fyrir Fram og á eftir að uppfæra töfluna með þeim úrslitum.

Enn er opið í Litlabæ í Skötufirði. Töluverður erill var í gær þegar Bæjarins besta kom í heimsókn, einkum erlendir ferðamenn akandi á bíleigubílum.

Guðrún Fjóla Kristjánsdóttir frá Hvítanesi sagði að veitingasalan hefði verið opin frá því í byrjum maí og verður opið út september. Hún sagði að mikið hafi verið að gera í allt sumar en hafði ekki tiltækar nákvæmar tölur um fjölda ferðamanna en sagði svo 10 til 15 þúsund gestir.

Gestir stoppa í Hvítanesi til þess að skoða selina og fá sér svo kaffi og meðlæti í Litlabæ. Það mátti sjá á bandarískum gestum í gær að þeim þótti mikil upplifun að koma í bæinn í Litlabæ sem lýsir vel aðbúnaði á Íslandi fyrir löngu síðan. Bærinn er lítill og lágt til lofts en engu að síður snyrtilegur og vandað til innanstokks.

Guðrún Fjóla Kristjánsdóttir.

Mynd: Kristinn H. Gunnarsson.