Guðrún Hafsteinsdóttir, fyrrv. ráðherra og alþm. verður á ferð um Vestfirði á morgun og miðvikudag til fundar við Sjálfstæðismenn þar.

Guðrún tilkynnti framboð sitt til formanns í Sjálfstæðisflokknum á laugardaginn s.l. í Salnum í Kópavogi að viðstöddum um 600 stuðningsmönnum. Í lok ræðu sinnar sagði hún að hún hyggðist taka samtal við flokksmenn í aðdraganda landsfundar, og það samtal hófst í dag er hún lagði af stað á Snæfellsnes. 

Fyrstu fundirnir eru á Snæfellsnesi í kvöld, og svo kvöldfundir á Ísafirði og Bolungarvík annað kvöld og á Bíldudal og Patreksfirði fyrri part miðvikudags. Þaðan liggur leiðin svo til Norðurlands og þaðan austur og Guðrún lokar svo hringnum á Suðurlandi. 

Póstnúmer hafa í raun þann eina tilgang samkvæmt lögum um póstþjónustu, að veita starfsfólki og flokkunarvélum upplýsingar um hvert eigi að senda viðkomandi póstsendingu þannig að henni verði dreift til rétts viðtakanda. Hlutverk póstnúmera er því aðeins að styðja við skilvirka dreifingu póstsendinga. 

Hins vegar hafa, fyrirtæki og yfirvöld, í gegnum tíðina notað  póstnúmer í öðrum tilgangi, t.d. til ýmiss konar flokkunar varðandi réttindi og skyldur borgaranna. Sérhver önnur notkun á póstnúmerum er á ábyrgð þess aðila sem notar póstnúmer til einhvers konar aðgreiningar í sinni þjónustu.  

Samkvæmt 15. gr. laga um póstþjónustu er það Byggðastofnun sem ákvarðar landfræðileg mörk póstnúmera og gefur út póstnúmeraskrá. Samkvæmt skilgreiningu á póstnúmeri og ákvæði laganna er tilgangur póstnúmers eingöngu til landfræðilegrar afmörkunar, til að staðsetja viðtakanda og þar með auðvelda dreifingu á póstsendingum.  

Við breytingar á póstnúmerakerfinu er kveðið á um að Byggðastofnun skuli hafa samráð við Þjóðskrá Íslands. Í greinargerð er jafnframt vikið að því að Byggðastofnun sé heimilt að hafa samráð við aðra hagsmunaaðila.  

Að mati Byggðastofnunar er nauðsynlegt að ákveðinn stöðugleiki og fyrirsjáanleiki sé þegar um póstnúmer er að ræða og að þeim sé ekki breytt nema að vandlega athuguðu máli og í sátt við þá póstrekendur sem nota póstnúmer til að auðvelda flokkun og dreifingu póstsendinga.  

Einungis póstrekendur, sveitarfélög og opinberar stofnanir geta gert kröfu um að póstnúmerum og/eða landfræðilegri þekju verði breytt. Tillögum að breytingum skal fylgja rökstuðningur. Allar breytingar sem kunna að verða gerðar á póstfangaskránni verða að öðru jöfnu miðaðar við áramót. 

Þorbjörn Halldór Jóhannesson hefur tekið sæti Örnu Láru Jónsdóttur í bæjarstjórn Ísafjarðarbæjar en Arna Lára tók nýverið sæti á Alþingi fyrir hönd Samfylkingarinnar í Norðvesturkjördæmi.

Bæjarstjórn samþykkti á fundi síðastliðinn fimmtudag tillögu bæjarstjóra um að veita Örnu Láru lausn frá störfum sínum í bæjarstjórn Ísafjarðarbæjar, að hennar eigin ósk, til loka kjörtímabils.

Arna Lára tók fyrst sæti í bæjarstjórn Ísafjarðarbæjar fyrir Í-listann þann 15. júní árið 2006 og hefur verið bæjarfulltrúi allar götur síðan. Í bréfi hennar til bæjarstjórnar segir: 

„Það hefur verið mér sannur heiður að fá að starfa sem bæjarfulltrúi Ísafjarðarbæjar í 19 ár að fjölbreyttum verkefnum og vera treyst fyrir mikilvægum störfum fyrir hönd sveitarfélagsins. Ég er þakklát fyrir allt góða samstarfsfólkið sem ég hef fengið að starfa með í gegnum árin og vil þakka fyrir samstarfið af heilum hug.“ segir Arna Lára

Starfshópur um öryggi ferðamanna skilaði sinni fyrstu áfangaskýrslu til ráðherra í desember síðastliðnum. Starfsemi hans er liður í framkvæmd aðgerðaáætlunar með ferðamálastefnu til 2030. Samkvæmt aðgerð E.7. Bætt öryggi ferðamanna er markmið hennar að tryggja öryggi ferðamanna um land allt, eins og kostur er, hvort sem um er að ræða á fjölsóttum áfangastöðum eða á ferð um landið almennt.

Hlutverk starfshópsins er að koma með tillögur að úrbótum á sviði öryggismála í ferðaþjónustu, tryggja samráð á milli hlutaðeigandi ráðuneyti, stofnana og atvinnugreinarinnar, auk þess að stuðla að framgangi verkefna sem hafa það að markmiði að bæta öryggi ferðamanna þvert á hið opinbera og atvinnulíf.

Starfshópinn skipa:

• Dagbjartur Brynjarsson, Ferðamálastofu, formaður.
• Ágúst Elvar Bjarnason, SAF.
• Elín Sigurveig Sigurðardóttir, Icelandia, tilnefnd af SAF.
• Gauti Daðason, innviðaráðuneyti.
• Guðný Hrafnkelsdóttir, menningar- og viðskiptaráðuneyti.
• Haukur Herbertsson, Mountaineers of Iceland, tilnefndur af SAF.
• Helga Harðardóttir, heilbrigðisráðuneyti.
• Jóhanna Katrín Þórhallsdóttir, Vatnajökulsþjóðgarði, tilnefnd af umhverfis-, orku- og loftslagsráðuneyti.
• Kjartan Jón Björgvinsson, dómsmálaráðuneyti.

 Á vef Fiski­stofu hefur verið opnað fyr­ir um­sókn­ir um nýliðakvóta í grá­sleppu.

 Sam­hliða laga­breyt­ing­unni sem fól í sér kvóta­setn­ingu teg­und­ar­inn­ar var álveðið að sá hluti kvót­ans sem hefðbundið fell­ur í hlut rík­is­ins og er ætlað að út­hluta sem byggða- og at­vinnu­kvóta, s.s. 5,3% grá­sleppu­kvót­ans, mun vera ráðstafað sem sér­stök­um nýliðakvóta.

Nýliði er sá sem á skip sem ekki hefur skráða aflahlutdeild og hefur ekki fengið úthlutað aflahlutdeild eða átti rétt á aflahlutdeild í grásleppu vegna fiskveiðiársins 2024/2025. 

Bæjarráð Ísafjarðarbæjar ræddi á fundi sínum í morgun um vetrarþjónustu á Dynjandisheiði. Samkvæmt reglum Vegageðainnar er svonefnd C regla í gildi fyrir Dynjandisheiðina og þjónusta er 5 daga vikunnar. Ekki er þjónusta um helgar og hina daga lýkur henni um kl 17:00.

Bókað var á fundinum og óskað eftir því að auka þjónustuna:

Miklar vegabætur hafa orðið á sunnanverðum Vestfjörðum og yfir Dynjandisheiði á síðustu árum. Er nú svo komið að vegalengd frá höfuðborgarsvæðinu til allra þéttbýlisstaða innan Ísafjarðarbæjar, sérstaklega Þingeyrar og Flateyrar, er talsvert styttri þá leiðina heldur en um Djúp. Ekki er vetrarþjónusta á nýjum vegi yfir Dynjandisheiði eftir klukkan 5 á virkum dögum eða um helgar. Þá hefur borið á því að heiðinni sé lokað fljótt þegar veður breytast. Bæjarráð Ísafjarðarbæjar beinir því til samgönguyfirvalda að gera bragarbót á þessu svo fjárfestingin nýtist betur.

Fasteignasala Vestfjarða flutti á föstudaginn sig um set á Ísafirði. Fasteigansalan flutti sig úr húsnæði Landsbankans að Hafnarstæti 1 yfir í Stjórnsýsluhúsið. Fasteignasala Vestfjarða var stofnuð árið 2006, en áður hafði Lögfræðistofa Tryggva Guðmundssonar sinnt fasteignasölu á Vestfjörðum frá árinu 1976.

Segja má að Fasteignasalan sé komin að nýju á gamlan stað en fyrir 19 árum flutti hún úr stjórnsýsluhúsinu. Fasteignasalan verður á 3. hæðinni þar sem áður var lögreglustjórinn á Vestfjörðum. Það embætti hefur flutt sig niður á fyrstu hæðina og skrifstofur lögreglustjórans eru nú þar sem áðu var Innheimtustofnun sveitarfélaga.

Guðmundur Óli Tryggvason, framkvæmdastjóri Fasteignasölunnar tók á móti gestum og gangandi á föstudaginn og bauð upp á veitingar til að fagna þessum áfanga.

Guðmundur Óli Tryggvason og gestir.

Myndir: Kristinn H. Gunnarsson.

Heimastjórn Patreksfjarðar gerir alvarlega athugasemd við þá ákvörðun Vestfjarðastofu að auglýsa ekki stöðu verkefnastjóra á sunnanverðum Vestfjörðum lausa til umsóknar og beinir því til stjórnar Vestfjarðastofu að tryggt verði að öll störf Vestfjarðastofu séu auglýst, hvort sem um er að ræða störf sem eru staðbundin eða óháð staðsetningu.

Heimastjórnin sendi fyrirspurn til stjórnar Vestfjarðastofu um mögulegar breytingar á stöðugildum hjá Vestfjarðastofu og hvort stæði til að auglýsa lausa stöðu verkefnastjóra á sunnanverðum Vestfjörðum. Í bókun stjórnar Vestfjarðastofu kemur fram að stjórnin hafi ekki tekið ákvörðun um að fækka stöðugildum hjá Vestfjarðastofu en fjöldi stöðugilda sé háður verkefnastöðu hverju sinni. Fjöldi starfsmanna á hverri starfstöð geti einnig verið mismunandi. Þó sé stefnt að því að ekki séu færri en tveir verkefnastjórar
starfandi á sunnanverðum Vestfjörðum og tveir á Ströndum/Reykhólum hverju sinni.

Að fengnum svörum stjórnar Vestfjarðastofu bókaði heimastjórn Patreksfjarðar að með vísan til svarsins standi ekki til að auglýsa til umsóknar lausa stöðu verkefnastjóra á sunnanverðum Vestfjörðum og gerir alvalega athugasemdir við það.

Hins vegar er því fagnað því að gengið hafi verið frá ráðningu verkefnastjóra farsældar og ítrekað mikilvægi þess að ávallt sé tryggt að tveir starfsmenn Vestfjarðastofu séu jafnan á hverju svæði innan starfssvæðis Fjórðungssambands Vestfirðinga og Vestfjarðastofu.

Vegagerðin hefur tilkynnt að í dag kl 14 taki gildi takmörkun á ásþunga við 10 tonn vegna hættu á slitlagsskemmdum.

Á Vestfjörðum gildir takmökunin á eftirfarandi vegum:

Vestfjarðavegi 60 frá Hringvegi 1 við Dalsmynni, að Djúpvegi 61 í Skutulsfirði

Djúpvegi 61 frá Vestfjarðavegi 60 í Króksfirði til Súðavíkur.

Þingeyrarvegi 622

Flateyrarvegi 64

Súgandafjarðarvegi 65

Barðastrandarvegi 62

Bíldudalsvegi 63

Tálknafjarðarvegi 617

Laxárdalsvegi 59

Innstrandavegi 68

Uppfært kl 10:31. Vegagerðin hefur bætt við að frá kl 16 gildi þungatakmörkunin einnig á Djúpvegi 61 frá Súðavík að Flugvallarvegi 631 Skutulsfirði.

Uppfært kl 17:00. Bætt hefur við ásþungatakmörkun frá kl 16 á þessum vegum:

Reykhólasveitarvegi 607.

Strandavegi 643 frá Djúpvegi 61 og um 645 að Drangsnesi.

Fyrir bæjastjórn Ísafjarðarbæjar var lögð í síðustu viku sú tillaga að reglur um úthlutun byggðakóta verði óbreyttar frá síðasta ári. Um er að ræða 947 tonna þorskígildiskvóta auk 169 tonn sem ónotuð voru frá fyrra ári sem skiptast á fjögur byggðarlög innan sveitarfélagsins, Ísafjörð, Flateyri, Suðureyri og Þingeyri. Að þessu sinni kemur enginn byggðakvóti í hlut Hnífsdals.

Ágreiningur kom fram í bæjarstjórninni varðandi skilmála úthlutunarinnar. Lagt var til að sem fyrr væri nægjanlegt að landa byggðakvóta til vinnslu innan sveitarfélagsins en Kristján Þór Kristjánsson, bæjarfulltrúi Framsóknarflokksins bar fram breytingartillögu á þann veg að byggðakvótann yrði að nýta til vinnslu í sama byggðarlagi og kvótinn væri merktur, en ekki einhvers staðar innan sveitarfélagsins.

Gísli Jón Kristjánsson, útgerðarmaður, ritaði grein á Bæjarins besta í síðustu viku og segir þar að nokkur störf hjá Walvis Ehf sem séð hefur um löndun og slægingu á Flateyri hafi tapast vegna hráefnisskorts. Byggðakvóti Flateyrar hefur verið úthlutað til Íslandssögu ehf á Suðureyri. Gísli Jón segir að nú sé engin starfandi fiskvinnsla á Flateyri og engin löndunar þjónusta og að þessar sérreglur valdi því.

Bæjarstjórn Ísafjarðarbæjar frestaði afgreiðslu reglanna um byggðakvóta til næsta fundar.