Framkvæmdasýslan-Ríkiseignir (FSRE), auglýsir í dag eftir tilboðum í utanhússviðgerðir að Aðalstræti 92 á Patreksfirði fyrir hönd Ríkiseigna. Húsið hýsir núna lögregluna og sýslumannsembætti Vestfjarða. Verk þetta felur í sér að niðurrif á klæðningu, sprunguþéttingar, endurnýjun glugga og lagfæringar á þaki. Byggja þarf viðbót við anddyri að byggingunni. Áætlað er að verktími verði um 7 mánuðir eða frá 1. maí 2025 þar til 15. október 2025. 

Útboð þetta er aðeins auglýst innanlands.  Tilboðum skal skilað fyrir 10. apríl n.k. kl 12.

Arctic Fish birti ársskýrslu sína fyrir árið 2024 í gær.

Á árinu 2024 slátraði Arctic Fish 10.667 tonnum af laxi og seldi félagið afurðir fyrir um 12 milljarða. Hagnaður félagsins eftir skatta nam 390 milljónum króna.

„Nú þegar við gerum upp árið 2024 er tími til að horfa til baka á tímabil vaxtar, lærdóms og árangurs. Félagið er enn í uppbyggingarfasa með öllu sem því fylgir. Á sama tíma er mikilvægt að tryggja arðbærann rekstur með kostnaðaraðhaldi og skilvirkni í rekstri.

Þær umbætur sem við náðum á árinu 2024 hefðu ekki verið mögulegar án eldmóðs og ástríðu starfsfólksins, sem knýr Arctic Fish áfram á degi hverjum. Saman náðum við ýmsum mikilvægum áföngum, þar á meðal metháum framleiðslutölum í seiðaeldinu okkar, frábærum árangri í baráttunni við laxalús og fyrsta heila rekstrarárinu í vinnslunni okkar í Bolungarvík.

Við stöndum því á sterkum grunni og stefnum á áframhaldandi sjálfbæran vöxt.” – Sagði Stein Ove Tveiten, forstjóri Arctic Fish Holding.

Veiðigjald fyrir þorsk og ýsu var á síðasta ári 7,5 milljarðar króna samkvæmt upplýsingum sem fram koma í frumvarpsdrögum ríkisstjórnarinnar um breytingar á lögum um veiðigjald sem eru til kynningar í samráðsgátt stjórnvalda. Miðað við ákvæði frumvarpsins hefði veiðigjaldið orðið 13,1 milljarður króna ef þau hefðu gilt á síðasta ári. Hækkunin er um 5,6 milljarðar króna.

Þá á eftir að taka tillit til nýrra ákvæða um frítekjumark fyrirtækja gagnvart veiðigjaldinu, sem ætlað er að lækka álagt veiðigjald á minni fyrirtæki. Frítekjumarkið var 555 milljónir króna í fyrra en hefðu verið 1.270 milljónir króna samkvæmt nýju reglunum.

Hækkunin er greind eftir kerfum. Hún lendir að mestu hjá aflamarksskipum. Veiðigjaldið hækkar þar úr 5,9 milljörðum króna í 10,4 milljarða króna fyrir 2024. Í krókaaflamarkskerfinu hækkar veiðigjaldið um 1 milljarð króna og um 166 m.kr. í strandveiðikerfinu. Í þessum tölum á eftir að taka tillit til hækkunar á afslætti vegna breyttra regla um frítekjumark.

Lárus G. Jónsson viðkenndi fyrir Héraðsdómi Vestfjarða að hafa falsað undirskrift Þorsteins Tómassonar við viðskipti við bílaleigu en það hafi verið samkvæmt samkomulagi og leyfi frá honum.

Lárus hafði samið um kaup á fyrirtækinu Mömmu Nínu af Þorsteini en samningar ekki frágengnir þegar samningurinn við bílaleiguna voru gerðir og sagðist Lárus því ekki hafa getað notast við eigin undirskrift.

Þorsteinn kærðu fölsunina til lögreglunnar og höfðaði lögreglustjórinn á Vestfjörðum mál á hendur Lárusi fyrir Héraðsdómi Vestfjarða fyrir skjalafals.

Þorsteinn bar vitni fyrir dómi og kvað ákærða aldrei hafa staðið við nema hluta af kaupsamningnum þar sem hann hafi ekki greitt skuldir sem hvíldu á félaginu. Þetta hafi leitt til þess að mannorð og lánstraust vitnisins og [D] hefðu hrunið í kjölfarið. Ákærði hafi safnað frekari skuldum og meðal annars ákveðið að taka bíla á langtímaleigu. Ákærði hafi falsað undirritun vitnisins til þess að bílaleigan gæti skoðað lánstraust félagsins. Vitnið hafi yfirhöfuð ekki gefið ákærða heimild til þess að nota nafn sitt í viðskiptum félagsins og hefði aldrei komið slíkt til hugar.

Í niðurstöðu dómara segir að skjalafals sé refsivert og fyrir liggi að Lárus ritaði undir skjöl við bílaleigu með nafni annars manns. En engu að síður var hann sýknaður með þeim rökum að Þorsteinn hafi ekki borið skaða af fölsuninni og að að ákæruvaldinu hafi ekki tekist að sanna að ásetningur ákærða hafi verið annar en að koma á viðskiptum á milli B ehf. og C ehf., hann hafi formsins vegna talið nauðsynlegt að nota nafn fyrri eiganda fyrrnefnda félagsins í því skyni og álitið sig njóta til þess heimildar.

Helgi Jensson, lögrelgustjóri segir í svari til Bæjarins besta að hann hafi verið í samskiptum við ríkissaksóknara vegna málsins, en það liggi ekki enn fyrir ákvörðun frá þeim um hvort þessum dómi verður áfrýjað.

Háafell stóð fyrir kynningu á nýju umhverfismati fyrir 4.500 tonna laxeldi í Ísafjarðardjúpi í gær. Fundurinn var í Edinborgarhúsinu og mætti 70 -80 manns til þess að fylgjast með.

Háafell hefur þegar leyfi fyrir 6.800 tonna eldi í Djúpinu og sækir um leyfi til þess að auka það um 4.500 tonn. Miðað við gildandi burðarþolsmat og gildandi áhættumat vegna erfðablöndunar myndi viðbótin öll vera til eldis á ófrjóum laxi.

Gauti Geirsson, framkvæmdastjóri Háafells segir að þetta sé lokaferlið í tveggja ára vinnu við hið nýja umhverfismat þar sem gerð er grein fyrir væntanlegum áhrifum viðbótareldisins á umhverfið. Hann segir að þetta sé reyndar þriðja umhverfismatið sem Háafell gerir í Djúpinu. Sótt er um að auka við eldið á þeim þremur stöðum sem fyrirtækið hefur þegar leyfi fyrir eldi og því er ekki farið fram á nýjar staðsetningar fyrir kvíar.

Næsta skref er að leggja fram skýrsluna um umhverfismat til Skipulagsstofnunar, sem hefur ákveðinn tíma til þess að skila sínu áliti á fyrirhugaðri stækkun. Gauti telur að það gæti legið fyrir í sumar eða haust.

Að því áliti fengnu er óvíst um næsta skref. Það er stjórnvalda að taka ákvörðun um að hrinda í framkvæmd ákvæðum gildandi laga sem mæla fyrir um að bjóða skuli út leyfi á nýjum svæðum. Það hefur ekki enn verið gert þar sem ný leyfi síðustu ár hafa verið umsóknir sem lagðar voru inn fyrir gildistöku laganna eða breytingar á þegar útgefnum leyfum.

Gauti kvaðst ekki kvíða neinu í þeim efnum heldur væri fyrirtækið að gera sig tilbúið til þess að auka starfsemi sína í Ísafjarðardjúpi hvort heldur það væri að taka þátt í útboði um heimildir eða auka við þegar útgefin leyfi.

Einar Valur Kristjánsson, framkvædastjóri HG í ræðustól á fundinum.

Myndir: Björn Davíðsson.

Atvinnuleysi jókst um 0,6 prósentustig á milli mánaða samkvæmt tölum Hagstofunnar og mældist 5,5 prósent í febrúar samkvæmt árstíðaleiðréttum niðurstöðum.

Alls voru 12.900 atvinnulausir á landinu í febrúar, þar af 5.800 karlar og 7.100 konur.

Atvinnuþátttaka var 80,4 prósent og hlutfall starfandi var 76 prósent. Árstíðaleiðrétt hlutfall starfandi dróst saman um 1,4 prósentustig á milli mánaða og atvinnuþátttaka dróst saman um 1 prósentustig.

Áætlað er að 30.600 einstaklingar hafi óuppfyllta þörf fyrir atvinnu. Jafngildir það 12,8% af samanlögðu vinnuafli og mögulegu vinnuafli.

Nýliðna helgi var íbúaþing á Reykhólum. Það var upphaf þáttöku Reykhólahrepps í verkefninu Brothættar byggðir, sem er leitt af Byggðastofnun með aðstoð Vestfjarðastofu.

Verkefnisstjóri er Embla Dögg Bachmann á Reykhólum en stjórn verkefnisins skipa fulltrúar Byggðastofnunar, Helga Harðardóttir og Kristján Þ. Halldórsson, frá Vestfjarðastofu Aðalsteinn Óskarsson, fulltrúi sveitarstjórnar Reykhólahrepps er Hrefna Jónsdóttir og fulltrúar íbúa Guðlaug G. I. Bergsveinsdóttir og Vésteinn Tryggvason.

Fjölmörg mál voru tekin til umræðu á íbúaþinginu, í samtals 17 málefnahópum og mun verða horft til allra málefnanna í mótun verkefnisáætlunar. Sérstaklega var ánægjulegt að fulltrúar yngri kynslóðarinnar tóku virkan þátt á íbúaþinginu.

Undir lok þingsins var kosið heiti á verkefnið úr 6 tillögum sem komu fram.

Fjársjóður fjalla og fjarða  var valið og þegar niðurstaða var ljós kvaddi Erla Reynisdóttir í Mýrartungu sér hljóðs og mælti fram þessa vísu:

Fjársjóður fjalla og fjarða,

hér finnur þú fegurð og frið.

Auðlegð afls og jarðar,

hver nýtir það nema við?

Alþýðusamband Íslands (ASÍ) telur framkomið frumvarp um breytingu á raforkulögum ófullnægjandi með öllu og  hvetur ríkisstjórnina til að draga það til baka.

Þetta kemur fram í ítarlegri umsögn Alþýðusambandsins um frumvarp til laga um breytingu á raforkulögum nr. 65/2003 (raforkuöryggi), mál nr. 130/2025 sem birt hefur verið á vef alþingis.

Í umsögninni kveðst Alþýðusambandið fagna sýndum vilja stjórnvalda til að tryggja forgang heimila og almennra notenda að raforku sem birtist í samstarfsyfirlýsingu stjórnvalda og framlagningu þessa frumvarps. Á hinn bóginn er það mat ASÍ að frumvarpið nægi ekki til að tryggja raforkuöryggi þessara notenda.

Í umsögninni segir:

„Alþýðusamband Íslands gerir athugasemdir við að frumvarpið feli ekki í sér neina vernd fyrir heimili og smærri fyrirtæki gegn verðhækkunum á raforku. Lykilþáttur í að tryggja raforkuöryggi er að tryggja að raforka sé á viðráðanlegu verði. Þrátt fyrir að frumvarpið tryggi íslenskum heimilum örugga afhendingu á raforku er ekkert í frumvarpinu sem tryggir að sú raforka verði á viðráðanlegu verði og sem kemur í veg fyrir að almenningur og smærri fyrirtæki lendi í verðsamkeppni við stórnotendur raforku.“

Þá er vikið að sérstöðu raforkumarkaðarins sem sé gjörólíkur þeim sem tíðkist á meginlandi Evrópu:

 „Hér á landi eru stórnotendur ráðandi á raforkumarkaði og nota 80% raforkunnar en almenningur og smærri fyrirtæki samanlagt 20%. Þessu er öfugt farið í löndunum í kringum okkur. Þá er nær öll raforka sem framleidd er á Íslandi endurnýjanleg auk þess sem íslenskur raforkumarkaður er lokaður og tíma tekur að setja á fót nýjar virkjanir. Þetta þýðir að ekki er hægt að bregðast við framboðsskorti með skömmum fyrirvara og að hærra orkuverð hefur ekki sömu áhrif á framboð og eftirspurn eftir raforku hér og á meginlandi Evrópu.“

Fram kemur sú afstaða Alþýðusambandsins að framganga íslenskra stjórnvalda í þessum málaflokki sé með öllu óskiljanleg og beinir að lokum þeim tilmælum til ríkisstjórnarinnar að málið verði tekið til baka:

Eyþór Bjarnason hefur verið ráðinn forstöðumaður í stuðningsþjónustu á velferðarsviði Ísafjarðarbæjar.

Eyþór lauk stúdentsprófi frá Verkmenntaskólanum á Akureyri árið 2008. Hann stundaði kennaranám á árunum 2010 til 2012 við Háskóla Íslands og Háskóla Akureyrar og sem stendur stundar hann nám á hug- og félagsvísindasviði við Háskólann á Akureyri í fjölmiðlafræði. Hann lauk Leiðtogaþjálfun – Forysta til framtíðar í Háskólanum á Bifröst 2022 og þá hefur hann setið ýmis leiðtoga-, stjórnunar- og öryggisnámskeið.

Eyþór hefur meðal annars starfað sem svæðisstjóri hjá Ikea 2013 til 2018 þar sem hann gekk jafnframt verslunarstjóravaktir, sem afgreiðslustjóri lyfjalagers hjá Distica á árunum 2018 til 2021 og sem verslunarstjóri Nettó árin 2021 til 2022.