Samtök heilbrigðiseftirlitssvæða á Íslandi andmæla tillögum umhverfis- orku- og loftslagsráðuneytisins og matvælaráðuneytisins um að leggja niður heilbrigðiseftirlit sveitarfélaga í núverandi mynd og flytja málaflokkinn frá sveitarfélögum til ríkisins.

Ráðuneytin hafa sett á laggirnar stýrihóp í framhaldi af Skýrslu starfshóps um fyrirkomulag eftirlits með hollustuháttum og mengunarvörnum og matvælum, útg. ágúst 2023 sem hefur það hlutverk „að fylgja eftir tillögum starfshópsins og undirbúa innleiðingu á nýju eftirlitskerfi“.

Í bréfi samtaka heilbrigðiseftirlitssvæða á Íslandi, SHÍ, til sveitarfélaganna frá því í júní er vakin athygli á þessum áformum.

SHÍ gerir alvarlegar athugsemdir við skýrslu starfshóps um fyrirkomulag eftirlits með hollustuháttum
og mengunarvörnum og matvælum og telur rökstuðning vanta fyrir niðurstöðu hópsins um að heppilegast sé að flytja heilbrigðiseftirlit sveitarfélaga til ríkisins.

Helstu röksemdir í skýrslunni, skv. bréfi SHÍ, eru þær að skortur sé á samræmingu heilbrigðiseftirlits á landinu, núverandi fyrirkomulag hafi í för með sér of mikið flækjustig og kostnað fyrir atvinnurekendur, og að ESA hafi í sínum úttektum gert athugasemdir við núverandi fyrirkomulag matvælaeftirlits vegna
orðsporshættu.

SHÍ telur að flækjustig muni ekki minnka, heldur aukast, við flutning eftirlits til ríkisins þar sem leyfisveitingar sem eru í höndum heilbrigðiseftirlita í dag mun skiptast á tvær stofnanir, Umhverfisstofnun og Matvælastofnun. „Flutningur á verkefnum frá sveitarfélögum til ríkisins hefur yfirleitt haft í för með sér aukinn kostnað fyrir rekstraraðila og samfélagið, en ekki þá lækkun í kostnaði sem stefnt er að.“

Einnig bendir SHÍ á að heilbrigðiseftirlit sveitarfélaga er rekið af sértekjum allt að 70% þannig að sveitarfélögin leggja til um 30% af kostnaði að jafnaði. Tillögur ofangreindrar skýrslu snúast um að taka yfir þau verkefni sem eru rekin af sértekjum en hin verkefnin, s.s. tiltekt á lóðum og lendum, vöktun á loftgæðum, vatngæðum og strandsjó, umsagnir og ráðgjöf, munu liggja áfram hjá sveitarfélögunum.

SHÍ bendir einnig á að athugasemdir ESA snúa ekki nema að takmörkuðu leyti að matvælaeftirliti heilbrigðiseftirlits sveitarfélaga heldur að stærstum hluta að matvælaeftirliti sem rekið er af ríkinu sjálfu.

Að mati SHÍ er niðurstaða skýrslunnar byggð á veikum grunni, rökstuðning vantar og samráði við hagaðila, þ.m.t. heilbrigðiseftirlitin og sveitarfélögin, verulega ábótavant.

Nýr bátur kom til heimahafnar á Drangsnesi á fimmtudaginn. Báturinn er 15 tonna Kleopatra með beitningavél. Útgerðarfélagið Skúli ehf. á Drangsnesi á bátinn og gerir hann út.

Haraldur Ingólfsson verður skipsstjóri á bátnum.

Óskar Torfason er framkvæmdastjóri útgerðarfélagsins Skúla og er með 10 starfsmenn.

Útgerðarfélagið tók á móti bátnum með viðhöfn og bauð viðstöddum í veitingar.

Haraldur Ingólfsson skipstjóri ásamt föður sínum Ingólfi Andréssyni.

Myndir: Óskar Albert Torfason.

Stuttnefja er fremur stór svartfugl sem svipar mjög til langvíu. Á sumrin er hún svört að ofan en hvít að neðan, síður hvítar án ráka. Hvítir jaðrar armflugfjaðra mynda ljósa rák á aðfelldum væng. Á veturna teygist hvítur litur bringunnar upp á kverk. Kynin eru eins.

Fluglag og hegðun eru í grundvallaratriðum eins og hjá langvíu. Stuttnefja er best greind frá langvíu á hvítum síðum, dekkri lit að ofan, styttri og þykkari goggi með hvítri goggrönd, brattara enni og kantaðri kolli og á veturna á hvítum vöngum. Höfuðlag er annað en á álku, auk þess er stuttnefja hálslengri og stélstyttri. Hún flýgur með kýttan háls og er fimur kafari. Er afar félagslynd.

Stuttnefja kafar eftir fæðunni og knýr sig áfram með vængjunum neðansjávar líkt og aðrir svartfuglar. Aðalfæðan er loðna, en tekur einnig síli, síld, annan smáfisk, ljósátu og marflær.

Af vefsíðunni fuglavefur.is

Laxeldisfyrirtækið Arctic Fish sem ásamt dótturfyrirtækjunum Arctic Smolt, Arctic Sea Farm og Arctic Odda starfar vítt og breytt um Vestfirði segir frá því á facebooksíðu sinni í gær að það hafi gefið Dýrfirðingum lax sem þeir hafi kunnað vel að meta.

„Matvælastofnun hefur ýmiskonar eftirlit með eldisfyrirtækjum. Eitt af því sem að þau vilja kanna er kynþroskastig fiskins okkar.

Til að til að kanna kynþroska verður að aflífa fiska, taka út kynkirtla og vega þá. Í gær fór þessi rannsókn fram og stýrðu starfsmenn Blás Akurs aðgerðinni. Tekin voru sýni af 133 fiskum með meðalþyngd um 4kg sem er fyrirtaks matfiskur.

Ekki vildum við láta þá fara til spillis og starfsfólkið okkar í Dýrafirði tók sig til og bauð Þingeyringum upp á þessi flottu laxaflök sem að Rafal okkar hafði flakað.

Þetta virðist hafa farið vel í íbúana og má sjá á samfélagsmiðlum myndir af gómsætum laxaréttum sem voru á boðstólum á Þingeyri í gær.“

Matvælastofnun vill upplýsa neytendur um innköllun á tveimur tegundum af United flour hveiti frá Thailandi sem fyrirtækin Fiska.is og Dai Phat flytur inn vegna þess að það inniheldur ólöglegt aukefni benzólý peroxíð. Fyrirtækin hafa í samráði við Heilbrigðiseftirlit Garðabæjar, Hafnarfjarðar, Kópavogs, Mosfellsbæjar og Seltjarnarness og Heilbrigðiseftirlit Reykjavíkur innkallað vöruna.

Tilkynningarnar bárust til Matvælastofnunar í gegnum RASFF evrópska hraðviðvörunarkerfið. 

Innköllunin á við allar dagsetningar og framleiðslulotur.

Neytendur sem keypt hafa vöruna er bent að neyta hennar ekki, farga eða fara með hana í verslunina og fá endurgreitt.

Þá segir Matvælastofnun einnig frá því að Innnes ehf. hafi að höfðu samráði við Heilbrigðiseftirlit Reykjavíkur stöðvað sölu og innkallað frá viðskiptavinum Beutelsbacher Epla- og Gulrótarsafa (750 ml) þar sem galli við framleiðslu veldur vexti mjólkursýrubaktería þannig að drykkurinn gerjast.
Innköllunin einskorðast við þær vörur sem merktar eru með dagsetningunni 01.03.26. 

Guðni Th. Jó­hann­es­son for­seti Íslands var sæmd­ur gull­merki Ferðafé­lag Íslands fyr­ir fram­lag sitt til mál­efna vegna lýðheilsu og úti­vist­ar í heimsókn sinni í Árneshrepp fyrr í þessum mánuði.

For­set­inn hef­ur tekið þátt í mörg­um viðburðum Ferðafé­lags Íslands á embætt­istíð sinni og lagt sitt lóð á vog­ar­skál­arn­ar til að auka áhuga þjóðar sinn­ar á heil­brigðum lífs­hátt­um og úti­vist er sagt í til­kynn­ing­unni Ferðafélagsins.

Páll Guðmunds­son fram­kvæmda­stjóri FÍ sæmdi Guðna merk­inu á tindi Glissu í Árnes­hreppi.