Þriðjudagur 18. mars 2025
Síða 27

 Flumbrugangur fortíðar vandamál framtíðar

Það voru mistök að færa skóla frá ríki til sveitarfélaga – stór mistök !

Þessi tilfærsla bauð upp á mismunun sem öllum mátti vera ljóst í upphafi – en mismunun í þessum málaflokki er lögbrot.

Þetta gerist á sama tíma og mörg sveitarfélög eru að missa sína helstu tekjulind – það er að segja þegar kvötakerfið er smá saman að kippa burðarstoðunum undan atvinnulífinu á landsbyggðinni – og akkúrat þá skikkar ríkið landsbyggðarbörnin í fræðslu-uppeldi hjá þeim sem ekki höfðu fjárhagslega burði til að veita það.

Því hefur oft verið haldið fram að sjávarútvegsstefna þjóðarinnar sé sú fullkomnasta í víðri veröld – því hefði mátt ætla að þetta fullkomna sköpunarverk hafi átt að tryggja þjóðarbúinu auknar tekjur – það má því furðu sæta að ákveðið hafi verið að létta lögbundnum fræðsluskyldum af herðum ríkisins og varpa þeim yfir á aðrar öllu minni að burðum – sem áttu auk þess í vök að verjast vegna minnkandi tekna.

Hafa þeir sem fyrir þessu stóðu einhvern tíman verið spurðir um hvað hafi vakað fyrir þeim með þessum gjörningi og þá hvort hann hafi skilað þeim árangri sem vænst var í upphafi vegferðar ?

Var grunnskólakerfið kannski talið vera hluti af hinu svokallaða ríkisbákni sem lengi hefur verið þyrnir í augum íhaldsins – og þá lausnin að færa það til og brjóta það niður.

Mennt er máttur segir máltækið. Menntun er undirstaða velferðar – illa upplýst og illa menntuð þjóð er veik þjóð sem á endanum festist í vitahring vanmáttar til allra verka. Vandamálin óleyst eru látin ganga á milli eins og heit kartafla sem enginn vill snerta – svo eru kannski gerðar einhverjar breytingar sem engum gagnast bara svo hægt sé að segja að eitthvað hafi verið gert og vandræðagangurinn heldur áfram því mistök fást ekki viðurkennd – dýrmætur tími og orka fara svo í að dylja mistök á mistök ofan og þá er ótalin kostnaðurinn við að hafa fólk í vinnu sem gerir lítið annað en að finna „flóttaleiðir“ fyrir vanhæfa yfirmenn út úr ógöngum.

Það er nefnilega svo þegar vandamálin eru látin ganga á milli  eins og fágætir erfðagripir þá er oftast verið að hlífa „merkilegu“ fólki sem á þar sök – það telur sig hins vegar laust allra mála þegar búið er að varpa vandamálunum í margfeldi yfir á aðra. Svona er ábyrgðarleysið í sinni tærustu mynd – vaðandi um alla stjórnsýslu almenningi til trafala og tjóns.

Þjóðinni er því oft gert að fóstra vandamál jafnvel í áratugi sem sprottinn eru upp úr mistökum þeirra sem telja sig ekki þurfa að axla ábyrgð á eigin gjörðum.

Hvítflibba-yfirsjónir svo pent sé til orða tekið eru best varðveittu opinberu leyndarmálin á Íslandi – þau eru jafn djúpt grafin í kerfinu og morðið á Kennedy í því bandaríska og fást ekki afhjúpuð fyrr en áratugum eftir að allir eru gengnir sem að komu –  svo ekki komi rispur á „frontin“ hjá þeim „fínu“ – það má svo í fjarlægri framtíð kenna tíðaranda um.

Það eru flestir sammála um að kennarar séu vanmetnir til launa. Þessi mikilvæga stétt sem hefur á liðnum árum verið að fá í fangið hvert áskorunarverkefnið á fætur öðru sem hefur þurft að fella inn í skólastarfið jöfnum höndum samhliða hefðbundinni kennslu er sannarlega verðug mannsæmandi launa. – Baráttukveðjur til þeirra !

Verkefnum er vísað inn í skólanna án þess að því er virðist að búið sé að útfæra þau á nokkurn hátt né aðlaga að skólastarfinu svo þau valdi ekki röskun þar á. 

Þarna hafa einhverjir verið að ýta vandamálum út af sínum skrifborðum yfir til skólanna í stað þess í samráði við kennarana að finna einhverja millilendingu fyrir verkefnin þar sem þau væru undirbúin og aðlöguð að skólastarfinu.

Margir líta svo á að skólarnir séu uppeldisstofnanir – sem þeir eru ekki – það er hlutverk foreldra að sjá um uppeldið. Það má hins vegar telja nokkuð víst að nemendur beri með sér vandamálin heima fyrir í skólann – svo sem fjárhagsáhyggjur og þá þjóðfélagsástandið hverju sinni að birtast í líðan og hegðun nemenda – því ekki ósennilegt þegar illa árar að kennarar þurfi að eyða miklu tíma í að takast á við hegðunarvandamál af ýmsum toga.

Það hafa margar misráðnar ákvarðanir verið teknar á Alþingi íslendinga í gegnum tíðina – mistök sem ekki hafa fengist leiðrétt – þau hafa bara verið fléttuð inn í tilveru almennings sem sjálfsögðum – í sumum tilfellum sem sér íslenskum hefðum – eins og til dæmis verðtrygging lána og veðsetningaréttur á aflaheimildum.

Það er freistandi að ætla að mistökin sum hafi verið með vilja gerð – mistök sem hafa átt að þjóna ákveðnum sjónarmiðum en ekki endilega fjöldanum – og þá litið svo á að eðlilegt væri að fórna einhverju í þágu þeirra guðsútvöldu í heimi forréttindana og klípa kannski smá hér og þar af velferðarþjónustunni – eftir þörfum.

Öll höfum við eflaust í angist fylgst með fjöldamorðunum á Gasa – þar má sjá yfirgang í sinni hryllilegustu mynd – yfirgang sem blessaður er af einni valdamestu þjóð í heimi – þjóð sem fengið hefur afdrep í bakgarði íslendinga með sín stríðstól – þar sem hún getur í næði undirbúið útrás til landvinninga á sama tíma og hún skipuleggur útivistarparadís fyrir lúxusfólk á blóðakrinum á Gasa. – Slík óhæfa verður vart endurtekin ef framtíðin ætlar að læra eitthvað af mistökum fortíðar. Þessi smekkleysa undirstrikar óumdeilanlega hversu mannslífin eru lítils metin þegar peningar og völd eru annars vegar. Það má aldrei verða sjálfsagður hlutur að fórna mannslífum í hagræðingar og ábataskyni – virðingar og siðleysið er það sama hvort sem um eitt er að ræða eða milljón. 

Með hátíðlegum helgisvip sem helst má sjá á trúarlíkneskjum sverja frambjóðendur í aðdraganda kosninga að uppræta ósiði og mistök andstæðinga sinna – en svo verður eitthvað minna um efndir þegar á hólminn er komið – þá eiga opinber kosningaloforð það til að umbreytast í einhvers konar öfugmælavísur – kannski vegna þess að þau hafa ekki þótt eiga samleið með þeim loforðum sem gefin hafa verið í bakherbergjum – þar sem gæla má við persónulega ávinninga.

Hrossakaup eru alkunn í íslenskri pólutík – svona gerast kaupin á eyrinni er sagt og glott – rétt eins og um smá daður hafi verið að ræða en ekki framtíð og velferð þjóðar.

Við sem þjóð erum ekki í góðum málum þegar kjörnir fulltrúar eru farnir að versla með velferð  – hvort sem um einhverja hópa er að ræða eða heildina. Skemmdu eplin smita út frá sér þegar samherjarnir fara að verja þau og þá um leið að selja sig undir ákveðin skilyrði sem setja þeim mörk til framfara í þágu þjóðar – kaupin á eyrinni eru þá komin með völdin og komin í aðstöðu til að framfylgja því er um var samið í prívat samtali.

Það þjónar enginn tveimur herrum svo vel sé – það ættu þeir að hafa í huga sem heitið hafa að standa vörð um hagsmuni þjóðarinnar við störf sín á Alþingi.

Það er ekki eftirsóknarvert að lifa í blekkingarheimi þar sem samviskunni hefur verið úthýst. þar sem blekkingum er beitt þar er fátt í lagi – þær gefa þeim sem lifa í veruleikafirrtri „ævintýraveröld“ forskot í lífsgæðakapphlaupinu á meðan hinir bíða við „ráslínuna“ eftir grænu ljósi frá duttlungasveitinni í seðlabankanum – sem lætur stjórnast af – guð má vita hverju !

Það er ástæða fyrir því að svo mörg íslensk ungmenni eru föst í foreldrahúsum langt fram á fullorðinsár – í vonleysi rænd þeirri eftirvæntingu sem fylgir framtíðarplönum æskunnar.

Við þurfum ríkisstjórn sem lætur ekki stjórnast af hræðsluáróðri, kúgunartilburðum og frekju auðvaldsins – fasistaríki eru ekki nein fyrirmyndarríki – en það kallast þau ríki þar sem stjórnvöld ganga fyrst og fremst erinda peningavaldsins á kostnað heildarhagsmuna.

Það hafa margir lengi reynt að vara við uppgangi peningaaflanna í heiminum – afla sem nú eru komin með bífurnar upp á borð í Hvíta húsinu – þessu öfl eru með sterkt tengslanet út um heim allan og við getum verið alveg viss um að Ísland er fyrir löngu komið inn á þeirra kort svo ríkt sem það er af auðlindum – svo kannski hefur aldrei verið meiri þörf en nú fyrir ábyrga og trausta stjórn.

Lifið heil !

Vilhelmína H. Guðmundsdóttir

Lífsreyndur eldri borgari. 

Vegagerðin: býður upp á aukaferðir með Baldri

Breiðafjarðarferjan Baldur.

Vegagerðin hefu ákveðið að bjóða flutningaðilum aukaferðir með ferjunni Baldri vegna vetrarblæðingaástandsins á Vestjarðavegi. Ástæðan er sú að ásþungatakmökunin við 7 tonn sem tekur gildi í hádeginu verður til þess að flutningabíla, t.d. með fisk að vestan verða að aka yfir Þröskulda, suður Strandir og yfir Holtavörðuheiði, sem lengir ferðatímann verulega.

Það þarf að hafa samband tímanlega við Sæfara og óska eftir aukaferðum segi í tilkynningunni.

Búist er við að þetta ástand vari næstu daga.

Vikuviðtalið: Halla Signý Kristjánsdóttir

Hver er ég?

Ég heiti Halla Signý og er dóttir hjónana Árilíu Jóhannesdóttur og Kristjáns Guðmundssonar og er frá Brekku á Ingjaldssandi. Ég er 11. í röðinni af 12 börnum og yngst 10 barna þeirra hjóna sem komumst upp. Fædd 1964 þann 1. maí, veturinn hafði verið mildur og mamma og pabbi tíndu fjallagrös á Sandsheiðinni þegar mamma skutlaðist yfir á Flateyri í lok apríl til að eiga mig.

Líklega hef ég ekki verið á dagskrá, til var ritgerð heima sem pabbi skrifaði á unglingsárunum þar sem hann viðraði framtíðarsýnina. Hann ætlaði auðvitað að verða bóndi á Brekku, eiga tvö börn strák og stelpu og lifa á landsins gæðum í fallegum dal. Hann stóð við það en eignaðist sex stelpur og sex stráka með mömmu sem ætlaði að verða söngkona. Stelpuskottið sem fæddist í torfbæ á Bessa í Dýrafirði ólst upp frá sjö ára á Flateyri og fór í vist í henni stóru Reykjavík hjá henni frú Sigurðsson sem var skosk söngkona og kenndi söng. Hún heyrði að stúlkan að vestan hafði fögur hljóð þegar hún söng við uppvaskið og tók hana í kennslu. En eins og frú Árilía sagði „mamma hringdi og vildi að ég kæmi vestur til að mjólka beljuna því hún var ein með börnin, pabbi á sjó og amma lögst í rúmið, en svo elskaði ég bara hann pabba þinn svo mikið að ég kaus að fara vestur aftur“.
Þannig var það og saman voru þau sátt við barnahópinn sinn og húsmæðraskólagengna mamma söng og bakaði tólf sortir fyrir jólin og  og pabbi ræktaði sauðfé og gekk um fallegu fjöllin sem umlukti okkur á þrjá vegu á Sandi. Þau elsku hvort annað, okkur barnahópinn, lífið og tilveruna.

Ég gekk í barnaskóla á Ingjaldssandi fram til 13 ára aldurs og þá lá leiðin í héraðsskólann að Núpi, það þýddi ekkert að gráta heimþrána í koddann, maður var jú orðin fullorðin og varð að standa sig enda bauð Sandsheiðin ekki upp á hægt væri að sækja framhaldsmenntun frá Sandi.

Búseta og störf

Þó heima sé alltaf Brekka á Ingjaldssandi hef ég átt mörg góð „heima“.  Þegar ég var búin að prufa að fara í framhaldsskóla í Reykjavík, vinna í sláturhúsinu og frystihúsinu fór ég til Bolungarvíkur, vann í sparisjóðnum hjá Sólberg og kynntist manninum mínum honum Sigga Gumma, sem er Bolvíkingur af líf og sál. Þar eignaðuðumt við okkar fyrsta heimili, fluttum síðan á Kirkjubóli í Bjarnardal og hófum búskap vorum þar með hléum til ársins 2001 er við fórum í Borgarnes þar sem ég fór í nám að Bifröst og Siggi Gummi í lögguna í Borgarnesi. Það var gott að búa í fallega Borgarfirðinum en Vestfirðingarnir söknuðu heimahagana og heim héldum við með reynsluna og ég með viðskiptaprófið frá Bifröst. Ég tók við fjáramála- og skrifstofustjórastarfi árið 2005 hjá Bolungarvíkurkaupstað. Þar fékk ég að starfa við það sem ég hafði áhuga á.  Ég hef alltaf haft áhuga á félags- og samfélagsmálum og þegar maður starfar að sveitastjórnarmálum er manni fátt óviðkomandi, hvort sem það er að koma að uppbyggingu varnargarða eða redda peru í félagsheimilið. Vinna að málefnum íbúa allt frá leikskóla að málefnum eldri borgara er gefandi og krefjandi. Mér þótti gott að búa í Bolungarvík, samfélagið sterkt og landslagið fallegt með Þuríði í Óshyrnunni sem vakir enn yfir og mun vonandi standa sína plikt áfram. Bolvíkingar standa fast á sínu, mesta ógn margra var að „helvítis bæjastjórinn væri nú að fara inneftir til að sameinast þeim sem sjá ekki sólina nema rétt yfir hádegið“ Sjálfstæðir og sjálfbjarga það kemur þeim langt og standa saman þegar á reynir.

Svo rann upp árið 2017 og það komu kosningar til Alþingis, ég ákvað að láta reyna á eftirspurnina. Það fór svo að ég var kosin inn og þar var ég í sjö ár eða tvö kjörtímabil. Það var skemmtilegur og krefjandi tími. Að reka sveitarfélag er eins og reka stórt heimili, allir íbúar koma manni við og líkt og í heimilisrekstri er engin undanskilinn. Heildin er ekki sterkari en veikasti hlekkurinn. Sama má segja um ríkið nema mengið er stærra.

Ég er þakklát fyrir þennan tíma. Á þingi sitja skemmtilegar einstaklingar sem gaman er að kynnist,  auðvitað allskonar fólk en allir brenna fyrir sínu og þá er alltaf fjör. Ég verð alltaf þakklát að fá að starfa fyrir okkar kjördæmi og fá að kynnast fólki og aðstæðum, þar býr mikill kraftur. Sérstaklega var ánægulegt að verða vitni að þeirri uppbyggingu og vexti sem hefur verið hér á Vestfjörðum síðastliðinn áratug.

Staðan í dag

Ó fjörður okkar fóstursveit, við finnum yndi hér, sagði Guðmundur Ingi í fallegu ljóði um Önundarfjörð. Við Siggi Gummi erum sammála um það. Nú búum við í Holti  í Önundarfirði ég orðin verkefnastjóri hjá Fræðslumiðstöð Vestfjarða yfir verkefninu Gefum Íslensku séns, sem er spennadi verkefni sem við ætlum að útfæra og útbreiða með því að byggja betur undir þátttöku erlendra íbúa í samfélaginu. Með fjölbreytileikan að vopni stöndum við sterkari saman.

Fjölskyldan

Þegar mamma gekk með sitt áttunda barn eignaðist hún rafmagnsþvottavél og varð að orði „nú get ég eignast átta börn í viðbót“ en hún stóð ekki við það, þegar ég gekk með mitt fjórða barn eignaðist ég þurrkara þá sagði ég „ nú get ég eignast fjögur börn í viðbót“ en ég stóð ekki við það. Svo alsæl með mín fjögur og þau hafa gefið mér níu barnabörn sem fylla líf okkar Sigga Gumma sannarlega gleði og verkefnum. Fjölskyldan er stór og líka á ég ítök í krökkum sem komu til okkar í sveit og hafa svo sem ekkert farið langt frá okkur síðan.  Svoleiðis vil ég sjá lífið, með mitt milli vestfirskra fjalla.

Ég þakka áheyrnina, góðar stundir.

Enn lækka ásþunginn vegna bikblæðinga

Vegna aukinnar hættu á slitlagsskemmdum og slysahættu sem getur skapast af bikblæðingum, verður ásþungi takmarkaður við 7 tonn á Vestfjarðavegi 60 frá Hringvegi 1 við Dalsmynni (Bröttubrekku) að Djúpvegi 61 við Þröskulda, frá kl. 12:00 föstudaginn 14. febrúar 2025.

Á mánudaginn var tilkynnt um 10 tonna ásþunga á þessum vegarkafla og á miðvikudaginn var að auki varað við bikblæðingum og lýst yfir hættustigi.

uppfært kl 11:20. Vegagerðin segir í tilkynningu að þetta ástand muni að öllum líkindum vara a.m.k fram yfir helgi.  Leiðin um Heydal og Skógarströnd er með 10 tonna ásþunga til Búðardals.

Þeir flutningsaðilar sem óska eftir aukaferðum með ferjunni Baldri vegna vetrarblæðingaástandsins á Vestjarðavegi, þurfa að hafa samband tímanlega við Sæferðir og óska eftir aukaferðum.

MÍ í 2. sæti meðalstórra stofnana í Stofnun ársins 2024

Frá afhendingu viðurkenningarinnar. Mynd: M.Í.

Menntaskólinn á Ísafirði hlaut í gær viðurkenningu í þriðja sinn í könnun Sameykis um Stofnun ársins. Skólinn varð þá annað árið í röð í öðru sæti í flokki meðalstórra stofnana (40-89 starfsmenn) árið 2024. Skólinn hlýtur þar með sæmdarheitið fyrirmyndarstofnun. Skólinn hefur nú hlotið viðurkenningu í Stofnun ársins í þrjú ár í röð. Árið 2022 var skólinn hástökkvari ársins og var þá sú ríkisstofnun sem bætti starfskjör starfsmanna best það árið og 2023 var skólinn í öðru sæti í flokki meðalstórra stofnana eins og nú.

Frá þessu er greint á vefsíðu Menntaskólans á Ísafirði.

Skólinn hækkaði í heildareinkunn frá því í fyrra og fékk hæstu einkunn allra meðal- og stórra ríkisstofnana hvað varðar stjórnun.

„Við í MÍ erum stolt af viðurkenningunni og árangrinum. Við erum í sama sæti og í fyrra en bætum árangurinn því við hækkum í heildareinkunn milli ára. Við erum þakklát fyrir okkar frábæra starfsfólk og það góða starf sem það leggur af mörkum.  Nú er bara að halda áfram að byggja upp gott vinnuumhverfi innan skólans með fagmennsku og samvinnu að leiðarljósi. Efst í mínum huga er þakklæti til starfsfólks skólans fyrir þeirra góða framlag. Saman gerum við góðan skóla enn betri“ segir Heiðrún Tryggvadóttir skólameistari.

Stofnun ársins er samstarfsverkefni Sameykis, fjármála- og efnahagsráðuneytisins og Reykjavíkurborgar. Á hverju ári tekur allt starfsfólk skólans, óháð félagsaðild, þátt í könnuninni. Mælingin nær yfir níu ólíka þætti og þannig fæst heilsteypt mynd af innra starfsumhverfi stofnana. Tilgangur með vali á stofnun ársins er að taka eftir og verðlauna vinnustaði sem ná framúrskarandi árangri í mannauðsstjórnun. Þá nýtist könnunin stjórnendum til að vinna að umbótum í stjórnun og starfsumhverfi og á að efla starfsumhverfi félagsfólks og starfsfólks í almannaþjónustu. Niðurstöður könnunarinnar veita afar mikilvægar upplýsingar um starfsumhverfi vinnustaða og samanburð við aðrar stofnanir.

Hér má sjá niðurstöður allra stofnana sem tóku þátt í könnuninni.

Júlíus Geirmundsson ÍS: Landsréttur sýknaði skipstjórann og útgerðina

Júlíus Geirmundsson ÍS í Ísafjarðarhöfn í janúar 2024. Mynd: Kristinn H. Gunnarsson.

Í gær féll dómur Landsréttar í máli sem skipverji á Júlíusi Geirmundssyni ÍS höfðaði á hendur skipstjóranum og framkvæmdastjóra og útgerðastjóra Hraðfrystihússins Gunnvör hf. Krafist var þess að skipstjórinn greiddi 2 m.kr. í miskabætur og hinir 1,5 m.kr. hvor.

Málshöfðandinn eða stefnandi var háseti um borð í veiðiferð sem hófst aðfaranótt 27. september 2020. Upp komu veikindi meðal skipverja og reyndist um að ræða covid19. Stefndu vou sakaðir um að sýna af sér stórfellt gáleysi með þeirri háttsemi sem þeir viðhöfðu meðan á umræddri veiðiferð stóð og með því valdið stefnanda bæði líkamlegu og andlegu heilsutjóni.

Héraðsdómur Reykjavíkur sýknaði 9. október 2023 framkvæmdastjórann og útgerðarstjórann en dæmdi skipstjórann til að greiða 400 þús. kr. í miskabætur og 1,8 m.kr. í málskostnað.

Landsréttur staðfesti dóm Héraðsdóms varðandi framkvæmdastjórann og útgerðarstjórann en sneri við dómi skipstjórans og sýknaði hann. Málskostnaður milli aðila var felldur niður á báðum dómsstigum.

Landsréttur kemst að þeirri niðurstöðu að ekki liggur ekki fyrir að skipstjórinn hafi sýnt af sér stórfellt gáleysi með viðbrögðum sínum við veikindum skipverja, sem sé forsenda þess að um sekt gæti verið að ræða.

Skipverjinn hafi í upphafi sagt að hann væri með flensu og leið nokkur tími áður en grunur um covid19 vaknaði. Þá geti sú töf ekki valdið smiti skipverja, sem kom smitaður af kórónuveirunni um borð í togarann, sem og smiti þeirra sem smituðust þar áður en ástæða var til að gruna að skipverjar væru smitaðir af veirunni.

Þá skiptir það máli í rökstuðningi Landsréttar að ekki kom fram sönnun um að skipstjórinn hafi virt að vettugi tilmæli umdæmislæknis sóttvarna um að sigla til Ísafjarðar og koma með skipverjann í sýnatöku, og að ekki liggi ekki fyrir að skipstjórinn hafi fengið slík tilmæli.

Þá liggur fyrir að skipstjórinn „hringdi í heilsugæsluna á Ísafirði 14. október vegna veikindanna og athugaði í framhaldinu hversu margir skipverjar hefðu fundið fyrir einkennum og skráði þær upplýsingar. Kom þá í ljós að mun fleiri skipverjar höfðu fundið til einkenna en tilkynnt höfðu aðaláfrýjanda um veikindi. Af framlögðum gögnum verður ráðið að þá hafi verið búið að ákveða, í samráði við umdæmislækni sóttvarna, að skipið kæmi til hafnar 18. október og að skipverjar færu í sýnatöku.“

Fundur um byggðakvóta Ísafjarðarbæjar

Föstudaginn 14. febrúar býður bæjarstjóri Ísafjarðarbæjar til opins fundar og umræðu um væntanlega afgreiðslu Ísafjarðarbæjar á tillögum vegna sérstakra skilyrða (sérreglna) um byggðarkvóta á fiskveiðiárinu 2024/2025.

Fundurinn fer fram í fundarsal bæjarstjórnar, 2. hæð í Stjórnsýsluhúsinu á Ísafirði, og hefst klukkan 12.

Hagsmunaaðilar eru hvattir til að mæta og ræða sjónarmið sín.

List fyrir alla auglýsir eftir umsóknum á sviði barnamenningar

List fyrir alla auglýsir eftir umsóknum um listviðburði eða verkefni á sviði barnamenningar fyrir grunnskólabörn. Umsóknarfrestur fyrir skólaárið 2025 – 2026 er 16. mars 2025.

List fyrir alla er barnamenningarverkefni á vegum menningar – og viðskiptaráðuneytis, sem ætlað er að miðla listviðburðum til barna og ungmenna um land allt og jafna þannig aðgengi barna á grunnskólaaldri að fjölbreyttum og vönduðum listviðburðum óháð búsetu og efnahag.

Til barnamenningar teljast verkefni á sviði lista og menningar sem unnin eru fyrir börn og/eða með virkri þátttöku barna.

Leitast er við að gera allar listgreinar sýnilegar innan verkefnisins eins og kostur er.

Listverkefnin skulu í öllum tilfellum vera unnir af fagfólki og af metnaði.

Hjólastólakörfuknattleikur

Kynning verður á verkefninu „Allir með” í Kringlunni laugardaginn 15. febrúar á milli klukkan 14:00 – 15:00.

Sérstök áhersla verður á kynningu á hjólastólakörfubolta sem er að fara af stað fyrir börn með sérþarfir. Settur verður upp körfuboltavöllur og leikið 2 á 2.

Áhorfendur geta fylgst með af tveimur hæðum.Gestir fá að prófa hjólastólana og taka þátt í keppni. 

Hjólastólakörfubolti er ein af fimm greinum sem verða í boði á Íslandsleikunum á Selfossi helgina 29. – 30. mars 2025. Leikarnir eru fyrir þá sem finna sig ekki í hefðbundnu íþróttastarfi og/eða eru með stuðningsþarfir.

„Allir með” er samstarfsverkefni ÍSÍ, UMFÍ og Íþróttasambands fatlaðra. Verkefnið gengur út á að fjölga tækifærum fyrir fötluð börn innan íþróttahreyfingarinnar.

Breyting á deiliskipulagi vegna kláfs upp á Eyrarfjall

Bæjarstjórn Ísafjarðarbæjar samþykkti á fundi sínum þann 6. febrúar 2025, að kynna skipulagslýsingu vegna vinnu við nýtt deiliskipulag fyrirhugaðs kláfs upp á Eyrarafjall á Ísafirði.

Skipulagssvæðið er staðsett í Eyrarfjalli sem er 700 metra hátt beint fyrir ofan Ísafjarðarbæ. Það afmarkast af byrjunarstöð kláfsins við hlíðarfót Eyrarfjalls, upp að Gleiðarhjalla þar sem reistur verður millistaur fyrir kláfinn og svo áfram á topp Eyrarfjalls þar sem endastöð kláfsins er staðsett. Við framkvæmdina verður sett upp vinnulyfta sem mun flytja allt byggingarefni og lyftustaura upp á Gleiðarhjalla og Eyrarfjall. Ekki þarf því að leggja vegslóða upp fjallshlíðina.

Framkvæmdin, sem verður í höndum Eyrarkláfs ehf., felst í að útbúa bílastæði fyrir farþega kláfsins, upphafsstöð kláfsins í hlíð Eyrarfjalls og endastöð á toppi fjallsins með einum millistaur á Gleiðarhjalla. Á toppi Eyrarfjalls verður gert ráð fyrir þjónustubyggingu og hóteli á seinni stigum.

Hverjum þeim sem telur sig eiga hagsmuna að gæta er gefinn kostur á að gera athugasemd við tillöguna á kynningartíma sem er frá 12. febrúar 2025 til og með 12. mars 2025.

Nýjustu fréttir