Landað var í októbermánuði 2.608 tonnum af eldisfiski í Bíldudalshöfn. Elfar Steinn Karlsson, hafnarstjóri segir að þessi mánuður hafi ekki verið óvenjustór, en þó í stærra lagi. Stærsti mánuðurinn á þessu ári er um 3.000 tonn.

Ekki var landað öðrum fiski í Bíldudalshöfn í mánuðinum. Í Patreksfjarðarhöfn komu 636 tonn að landi í október. Samtals var því landað 3.244 tonn í höfnum Vesturbyggðar í síðasta mánuði. Eldisfiskur var þar af 80%, en annar afli 20%.

Togarinn Vestri BA var á botnvörpu og landaði 176 tonnum eftir 3 veiðiferðir. Tveir bátar voru á línuveiðum. Patreksur BA var með 216 tonn og Agnar BA 48 tonn.

Tveir bátar voru á dragnótaveiðum. Patreksur BA landaði 88 tonnum og Esjar SH 99 tonnum.

Loks voru tveir bátar á handfærum. Sindri BA og Orion BA og voru samtals með 9 tonn.

Í gær reyndist erfitt að fá bókaðan tíma á Ísafirði hjá lækni við Heilbrigðisstofnun Vestfjarða. Samkvæmt upplýsingum Bæjarins besta fengust þau svör að ekki væri hægt að fá bókaðan tíma en boðið var upp á viðtal við hjúkrunarfræðing.

Hildur Elísabet Pétursdóttir, starfandi forstjóri stofnunarinnar staðfesti að vegna skyndilegra veikinda læknis hafi þurft að loka fyrir tímabókanir meðan verið væri að finna lækna í hans stað. Hún segir að það hafi nú verið gert og vandamálið því sem betur fer úr sögunni.

Stefnt er að því að hleypa umferð á veginn um Teigskóg 1. desember næstkomandi og þá verður hægt að aka um Þorskafjörð og inn Djúpafjörð framhjá Hjallahálsi. Sigurþór Guðmundsson, deildarstjóri hjá Vegagerðinni segir að komið sé bundið slitlag, en þó ekki tvöfalt alla leiðina. Vegrið eru ekki öll komin en verið er að klára að setja þau upp.

Þá er stefnt að því að undirrita samninga í næstu viku um fyllingar í Gufufirði og Djúpfirði sem boðnar voru út nýlega. Verktaki verður Borgarverk ehf, en tilboð þeirra var um 70% af kostnaðaráætlun.

Á Dynjandisheiði er búið að opna 4 km kafla frá Nordalsá að Vatnahvilft fyrir umferð og fyrra slitlag er komið á hann. Í desember er ætunin að opna annan nýjan vegarkafla með malarslitlagi frá Vatnahvilft og niður fyrir Botnshestinn. Verktaki þar er Suðurverk.

Handknattleikssamband Íslands, HSÍ og Arnarlax hafa undirritað samkomulag þess efnis að Arnarlax verði einn af bakhjörlum HSÍ. Frá og með HM kvenna sem hefst í næstu viku í Noregi, Svíþjóð og Danmörku mun Arnarlax hafa sitt vörumerki á baki allra keppnistreyja landsliða Íslands í handbolta.

Það eru stór verkefni framundan hjá HSÍ. A landslið kvenna heldur af landi brott á morgun og tekur liðið þátt í Posten Cup í undirbúningi liðsins fyrir þátttöku sína á HM. Stelpurnar halda svo til Stavanger á þriðjudaginn þar sem Ísland leikur sinn fyrsta leik á stórmóti frá 2012 30. nóvember nk. gegn Slóveníu. HM kvenna mun standa yfir frá 29. nóvember – 17. desember og verður mótið í beinni útsendingu á RÚV.

Karlarnir halda svo í byrjun janúar til Austurríkis þar sem undirbúningur þeirra fyrir EM hefst með tveimur vináttulandsleikjum gegn heimamönnum. Síðan verður haldið til Munchen þar sem Ísland leikur í C-riðli gegn Ungverjalandi, Serbum og Svartfjallalandi.

„Það er mikið fagnaðarefni fyrir HSÍ þegar við skrifum undir samstarfssamninga við nýja bakhjarla. Flestir bakhjarlar HSÍ í dag hafa verið í bakvarðasveit okkar í yfir áratugi, það er von okkar hjá HSÍ að samstarfið við Arnarlax verði farsælt og ánægjulegt“ segir Guðmundur B. Ólafsson, formaður HSÍ.

„Við vitum að handbolti er stór hluti af íslensku íþróttalífi og við gætum ekki verið stoltari en að fá að taka þátt í þeirri vegferð sem HSÍ er á. Áfram Ísland!“ segir Björn Hembre, forstjóri Arnarlax.

Á vefsíðunni skipamyndir.com er að finna mikið af myndum af skipum meðal annars þessa sem hér fylgir af Fjólu BA 150 sem var smíðuð árið 1971 hjá Trésmiðju Austurlands hf. á Fáskrúðsfirði.

Báturinn er 28 brl. að stærð og átti í fyrstu heimahöfn á Bíldudal.

Aðrar upplýsingar um bátinn eru af vefsíðunni aba.is

Báturinn var smíðaður fyrir Hólmaröst hf. Bíldudal og Erlend Magnússon, Reykjavík sem áttu hann í tvö ár.
Að sögn kunnugra var báturinn að mestu notaður, þessi tvö ár sem hann var á Bíldudal, til að flytja Bíldudals grænar baunir til höfuðborgarinnar.

Báturinn hefur alltaf borið nafnið Fjóla en með mismunandi einkennisstöfum þó.

Frá árinu 1973 hét báturinn Fjóla ÞH-182, Þórshöfn.

Frá árinu 1974 hét hann Fjóla BA-150, Bíldudal.

Frá árinu 1980 hét hann Fjóla BA-150, Patreksfirði.

Frá árinu 2005 hét hann Fjóla SH-808, Stykkishólmi.

Frá árinu 2008 hét hann Fjóla SH-55, Grundarfirði.

Frá árinu 2009 hét báturinn Fjóla BA-150, Reykhólum og var í eigu Styrju ehf. sem notaði hann til þjónustu við þangskurðarmenn á Breiðafirði.

Í ágúst 2015 eignaðist Selló hf. Akureyri bátinn en forsvarsmaður fyrirtækisins er Lárus H. List, myndlistamaður og áhugamaður um varðveislu eikarbáta.

Lárus sigldi bátnum frá Breiðafirði til Akureyrar þar sem einkennisstafirnir EA-35 komu á hann.

Báturinn heitir frá þessum tíma Fjóla EA-35 Akureyri og heitir svo enn árið 2023.

Sú kvöð eða öllu heldur beiðni fylgdi bátnum er hann sigldi frá Reykhólum til Akureyrar að nafnið Fjóla fylgdi honum um ókomin ár.

Í júní 2023 keypti Bjarmi Arnfjörð Sigurgarðarsson, Akureyri bátinn af Lárusi List og  er ekki annað vitað en að bátnum verði gert eitthvað til góða og hann notaður sem skemmtibátur.

Vilt þú hafa áhrif á mótun stefnu í málefnum innflytjenda?

Félags- og vinnumarkaðsráðuneytið vinnur nú í fyrsta sinn að slíkri framtíðarsýn og býður því til samtals hringinn í kringum landið og verða starfsmenn ráðuneytisins á Ísafirði miðvikudaginn 29. nóvember.

Fundurinn verður í Edinborgarhúsinu og hefst hann klukkan 17.

Túlkað verður á ensku og pólsku.

Stefnt er að því að innflytjendur hafi aukin tækifæri til inngildingar (e. inclusion) og virkrar þátttöku í samfélaginu og eru þeir því sérstaklega hvattir til að mæta og ræða þau sem mál sem þessu tengjast og liggja þeim á hjarta.

Hafískortið er byggt á ratsjármyndum frá Sentinel1 gervitunglinu frá því á mánudag.

Hafísinn var þá um 60 sjómílna fjarlægð NV af Straumnesi.

Útlit er fyrir suðvestanátt á svæðinu næstu daga og því líkur á því að hafísinn reki nær landi.

Í lok vikunnar verða hins vegar fremur hægar breytilegar áttir og þá ætti lítið að breytast.

Bæjarstjórn Vesturbyggðar hyggst lækka vatnsgjald á íbúðarhúsnæði á næsta ári úr 0,38% í 0,28% og vatnsgjald á annað húsnæði úr 0,5% í 0,4%. Þá er lagt til að lækka fráveitugjald á íbúðarhúsnæði og verður það 0,28% í stað 0,38% af fasteignamati. Önnur fasteignagjöld verða óbreytt samkvæmt tillögunni. Fasteignaskattur af íbúðarhúsnæði verður 0,55%, af fasteignum í B flokki 1,32%og af C flokki 1,65%.

Lækkunin á fráveitu- og vatnsgjaldinu af íbúðarhúsnæði er um 26%.

Tillögurnar hafa verið ræddar í bæjarstjórn og var þeim vísað til síðari umræðu sem verður væntanlega á næsta bæjarstjórnarfundi.

Bæjarstjórn samþykkti að útsvarshlutfall fyrir 2024 haldist óbreytt frá fyrra ári og verður það 14,74%.