Hafnastjórn Ísafjarðarbæjar hefur samþykkt að hafa opna samkeppni um útilistaverk á vegum Hafna Ísafjarðarbæjar.

Opin samkeppni felur í sér samkvæmt famlögðu minnisblaði Vestfjarðastofu:
Opið keppnisform þar sem allir hæfir listamenn geta sent inn tillögur.
Útilokar ekki alþýðulistafólk.
Hentar þegar markmiðið er að fá innsendingar á breiðum grunni og tryggja þátttöku sem flestra.
Getur krafist meira utaumhalds og matsvinnu vegna fjölda innsenda hugmynda.
Þar sem keppnin er opin og allir geta sent inn tillögur getur verið að listafólk hafi ekki þekkingu á
hentugu efnisvali eða þeim kostnaði sem verður við verkið.

Þá felur þessi leið í sé að skipuð verði dómnefnd til að tryggja faglegt mat. Í minnisblaðinu segir að dómnefndin þyrfti að samanstanda af fimm manns og væru þá tveir tilnefndir af sambandi íslenskra listamanna, SÍM.

Ný vatnsveita verður tekin í notkun í vikunni í Bolungavík. Byggður hefur verið ný vatnstankur í Hlíðardal sem er í tveimur hólfum og tekur hann 2,6 milljónir lítra af vatni. Vatnsþörfin er um 100 rúmmetrar á klst og dugar því fullur tankur í rúmlega sólarhring.

Bygging hófst á árinu 2022 og aðalverktaki eftir útboð var Þotan ehf og undirvektaki Vestfirskir verktakar ehf. Efla verkfræðistofa annaðist hönnun.

Vatnið er síað í gegnum diska og sandsíur og síðan geislað inn á tankinn og þaðan út á veitukerfi. Í gegnum nýju vatnsveituna er hægt að sía 240 m³ á klst.

Vatnið er að mestu borholuvatn. Síðar á árinu verða boraðar fleiri borholur og er vonast til að nægilegt vatn komi úr þeim svo allt vatn verði borholuvatn. Borað er í nágrenni við vatnsveituna í Hliðardal.

Jón Páll Hreinsson, bæjarstjóri segir að um sé að ræða eina stærstu innviðaframkvæmd í bæjarfélaginu síðustu áratugina og að kostnaður sé kominn í um 400 m.kr. Þörfin fyrir hreint og gott vatn fyrir íbúana sé augljós en ekki síður megi benda á að stærstu fyrirtæki bæjarins séu öll í matvælaframleiðslu, Jako Valgeir ehf, Arctic Fish og Arna, og það sé algert úrslitaatriði fyrir þau að geta fullvissað viðskiptavini sína um að þau notist við heilnæmt og gott vatn í vinnslunni.

Opið hús var á laugardaginn og var stöðugur straumur af fólki, bæði heimamenn og frá nágrannabæjunum, að skoða hin glæsilegu mannvirki.

Vatnsveituhúsið nýja.

Hreinsitankar vatnsveitunnar.

Myndir: Kristinn H. Gunnarsson.

Þórður Sveinsson, 50% eigandi að iðnaðarhúsnæði á Krossholti á Barðaströnd fer fram á að Vesturbyggð nýti sér forkaupsrétt að 50% eignahlut í sama húsnæði og selji svo sér þann eignarhlut.

Forsaga málsins er sú að Þórður eignaðist 50% í iðnaðarhúsinu að Krossholti skv. eignarheimild og er þinglýstur réttur eigandi skv. veðbókarvottorði og fasteignaskrá frá og með 14. apríl árið 2000.
Þá hefur hann hegðað sér í öllu eins og hann eigi í raun allt húsið, hefur greitt af því hita, rafmagn og önnur tilfallandi gjöld s.s. fasteignagjöld eins og segir í erindi hans til Vesturbyggðar. Þórður hefu stundað atvinnurekstur í húsnæðinu.

Í fyrra kom í ljós að Jakob Pálsson, sem er skráður fyrir 50% eignarhlut að eigninni seldi hlut sinn félaginu Hafsbrún ehf. Þinglýsing á kaupunum hefur enn ekki gengið í gegn vegna athugasemda frá sýslumanni um að lóðarleigusamningi þurfi að þinglýsa samhliða og Vesturbyggð þyrfti um leið að hafna forkaupsrétti sínum skv. kvöð sem enn er gildandi.

Þá hefur nýr eigandi heft aðgengi að húsinu, lagt fiskikörum fyrir framan hurðir og sent Þórði reikninga inn á hans heimabanka fyrir meintri leigu, ásamt því að saka hann um að meina sér um að nýta sinn helming.

Beiðni um nýtingu forkaupsréttar hafði áður verið tekið fyrir hjá Vestubyggð og afgreidd á 977. fundi bæjarráðs sem haldinn var 6. febrúar 2024 þar sem nýtingu forkaupsréttar var hafnað.

Að höfðu samráði við lögræðing sveitarfélagsins staðfestir bæjarráð nú afgreiðslu fyrrum bæjarráðs Vesturbyggðar og hafnar nýtingu forkaupsréttarins.

Bæjarráð vísar afgreiðslunni áfram til staðfestingar bæjarstjórnar.

Laugardaginn 15. febrúar 14:00-16:00 verður opið hús í nýju vatnsveitunni í Hlíðardal.

Bolungarvíkurkaupstaður býður íbúa og gesti velkomna á opið hús á Vatnsveitunni í Hlíðardal, sem hefur verið í smíðum undanfarin ár.

Undirbúningur hófst árið 2022, en framkvæmdir hófust árið 2023 og er þeim nú formlega lokið. 

Vatnsveitan samanstendur af tveimur meginvatnshólfum sem rúma samtals 2.700 m³ af vatni. Vatnstankurinn tryggir nægan vatnsforða fyrir bæinn í sólarhring og hreinsikerfið hefur afkastagetu upp á 240 m³ á klukkustund. Til samanburðar er meðalsvatnsnotkun bæjarins á bilinu 80-120 m³ á klukkustund, en hver íbúi notar að meðaltali um 165 lítra af vatni á dag.

Nýja vatnsveitan mun tryggja bæjarbúum öruggt og hreint drykkjarvatn til framtíðar og er stórt skref í innviðauppbyggingu Bolungarvíkur segir í tilkynningu á vef bæjarins.

Hér má sjá 3D mynd af tankinum

Mynd: Kristinn H. Gunnarsson

Færeyjar opna Þjóðarhöll sína fyrir innanhússíþróttir, Við Tjarnir, á laugardaginn.

Verið er að ljúka við síðustu verkin innandyra og utan svo allt verði tilbúið fyrir vígsluathöfina á laugardaginn.

Fyrsti landsleikurinn í Þjóðarhöllinni fer fram 12. mars þegar Færeyingar mæta Hollendingum í undankeppni Evrópumóts karla í handknattleik. Fyrsta skóflustunga Þjóðarhallarinnar, sem er í Hoyvík á Þórshafnarsvæðinu, var tekin 22. desember 2022.

Höllin, sem er hin glæsilegasta og búin öllum fullkomnasta búnaði, á að rúma allt að 2.700 áhorfendur í sæti á handboltaleikjum og 4.600 áhorfendur á standandi viðburðum s.s. tónleikum. Einnig býður hún upp á mikla möguleika til sýningahalds og ráðstefna.

Mikill metnaður var lagður í framkvæmdina auk þess sem salir og stúkur hallarinnar bera færeysk heiti.

Þjóðarhöllin, Við Tjarnir, leysir af hólmi Høllina á Hálsi sem hefur verið helsta keppnishöll innanhússíþrótta í Færeyjum frá 1970. Høllin á Hálsi er barn síns tíma og uppfyllir ekki kröfur sem gerðar eru til alþjóðlegrar keppni, m.a. í handknattleik né rúmar hún alla þá Færeyinga sem vilja mæta á kappleiki landsliðanna í handknattleik kvenna og karla sem hafa tekið stórstígum framförum á síðustu árum og gert sig gildandi í lokakeppni stórmóta.

Af vefsíðunni handbolti.is

Miðvikudaginn 19. febrúar er opinn kynningarfundur í Félagsheimilinu þar sem fram fer kynning nýju Aðalskipulagi Strandabyggðar 2021-2033. 

Fulltrúar frá Landmótun verða á fundinum og kynna aðalskipulagið og einnig verða þar fulltrúar frá Fasteignaumsýslunni og kynna áform um byggingu hótels á Hólmavík.  Íbúar er hvattir til að fjölmenna og kynna sér þær áherslur sem nýtt aðalskipulag felur í sér og þá uppbyggingu sem er framundan á Hólmavík.  Fundurinn hefst kl 17.30.

Fimmtudaginn 20. febrúar er síðan lokaíbúafundur Sterkra Stranda sem einnig er haldinn í Félagsheimilinu. Þar verður sagt frá íbúakönnun sem staðið hefur yfir að undanförnu,  farið yfir stöðu einstakra verkefna og unnið í hópavinnu varðandi ávinning verkefnisins. 

Fundarstjóri verður Aðalsteinn Óskarsson, sviðsstjóri byggðamála, hjá Vestfjarðastofu. Boðið verður upp á súpu, brauð og kaffi á fundinum. Fundurinn hefst kl 18.00.

Jón Atli Benediktsson, rektor og prófessor í rafmagns- og tölvuverkfræði við Háskóla Íslands, og Guðmundur Fertram Sigurjónsson, frumkvöðull og stofnandi heilbrigðistæknifyrirtækisins Kerecis, hlutu í gær heiðursverðlaun Verðlaunasjóðs Ásu Guðmundsdóttur Wright.

Verðlaun úr sjóði Ásu Guðmundsdóttur Wright eru veitt íslenskum vísindamanni sem náð hefur framúrskarandi árangri á sínu sérsviði í vísindum eða fræðum og miðlað þekkingu sinni til framfara í íslensku þjóðfélagi.

Til að leggja áherslu á tengsl vísinda og nýsköpunar og mikilvægi þeirra fyrir íslenskt samfélag eru nú í fyrsta sinn veitt verðlaun til frumkvöðuls sem hefur náð framúrskarandi árangri í nýsköpun.

Ása Guðmundsdóttir Wright stofnaði Verðlaunasjóð Ásu Guðmundsdóttur Wright árið 1968 í tengslum við hálfrar aldar afmæli Vísindafélags Íslendinga. Sjóðurinn hefur frá upphafi veitt heiðursverðlaun til 56 einstaklinga sem unnið hafa veigamikil vísindalegt afrek á Íslandi eða fyrir Íslands hönd.

Hættustig vegna bikblæðinga er í gildi á Bröttubrekku , í gengum Dalina , yfir Svínadal og út Hvolsdal en einnig á veginum yfir Vatnaleið á Snæfellsnesi, undir Hafursfelli og að Heydalsafleggjara. Sama gildir um þjóðveg 1, frá Borgarnesi yfir Holtavörðuheiði í Hrútafjörð.

Eins og sjá má á kortinu er mikið af varúðarmerkjum

Starfsfólk Vegagerðarinnar og verktakar vinna nú að því að gera við holur og aðrar skemmdir sem hafa myndast á vegum víða um land eftir umhleypingasamt veður. 

Vegfarendur eru beðnir að aka varlega á þessum leiðum en hraði er víða tekinn niður í 70 km/klst. Í aðstæðum sem þessum getur bik og möl festst á dekk. Þeir sem verða fyrir tjóni er bent á að senda inn tjónaskýrslu á mínum síðum á vef Vegagerðarinnar.

Tjónaskylda Vegagerðarinnar er metin í hverju tilviki.

Snemma í morgun kom Vörður II, björgunarskip Slysavarnafélagsins Landsbjargar á Patreksfirði, til hafnar með Jóhönnu Gísla í togi og skilaði Jóhönnu að bryggju rétt fyrir klukkan 6 í morgun.

Þá voru liðnir um 32 klukkustundir síðan Jóhanna Gísla fékk pokann í skrúfuna um 70 sjómílur norðvestur af  Látrabjargi og varð fyrir vikið óstjórnhæf.

Strax þá kvöldið 12 febrúar hófst stjórnstöð Landhelgisgæslunnar handa við að skipuleggja björgun Jóhönnu og drátt á skipinu til lands. Varðskipinu Þór, sem þá var statt austan við land, var stefnt í átt að Jóhönnu, ásamt því að áhöfnum björgunarskipa Landsbjargar á Rifi og Patreksfirði var gert viðvart.

Skipstjóri Guðmundar í Nesi, sem var á veiðum ekki langt frá Jóhönnu, ákvað að draga veiðarfæri sín og halda til aðstoðar. Þetta var skömmu fyrir miðnætti, aðfararnótt 13. Febrúar. Klukkan 4 um þá nótt var áhöfn Guðmundar í Nesi búin að koma taug á milli skipanna og skipin komin á hæga siglingu í litlum sjó en strekkings vindi, áleiðis til lands. Hraði skipanna í þessum drætti var frekar lítill eða um tvær og hálf til þrjár og hálf sjómíla á klukkustund.

Það var svo rúmlega eitt í nótt, aðfaranótt 14. Febrúar, sem áhöfn Varðar II var ræst út og haldið til móts við skipin, sem þá voru að nálgast mynni Patreksfjarðar.

Vörður II tók við drætti Jóhönnu rétt upp úr 2 í nótt og hélt þá Guðmundur í Nesi aftur til veiða.

Vörður kom svo eins og fyrr segir með Jóhönnu til hafnar á Patreksfirði snemma í morgun, rétt um einum og hálfum sólarhring síðar.