Bæjarráð Ísafjarðarbæjar vill sameina fræðaslunefnd og íþrótta- og tómstundanefnd  undir heitinu skóla-, íþrótta- og tómstundanefnd og að nefndin verði skipuð fimm aðalfulltrúum og fimm til vara. Ný nefnd taki til starfa 1. janúar 2024. 

Málið fór til umsagnar í fræðslunefnd sem tók vel í hugmyndina. Íþrótta- og tómstundanefnd setti sig ekki upp á móti tillögunni en bókaði ag hún hefði verulegar áhyggjur af vægi íþrótta- og tómstundamála innan sameinaðar nefndar. Fulltrúar Í-listans í nefndinni lögðu til að nefndarmönnum verði fjölgað í sameinaðri nefnd til að tryggja að málaflokkurinn fái sína fulltrúa.

Það var hins vegar ekki niðurstaða bæjarráðs, sem leggur til að nýja nefndin verði skipuð fimm fulltrúum eins og þær nefndir sem lagðar verða niður. Bæjarráðið leggur þó til við bæjarstjórn að hafa í huga sjónarmið íþrótta- og tómstundanefndar um að málaflokkurinn fái vægi við skipan nýrra nefndarmanna.

Málið fer til bæjarstjórnar sem tekur það fyrir til afgreiðslu.

Ísfirðingurinn Hulda Leifsdóttir, sem býr í Rauma í Finnlandi opnaði um helgina myndlistarsýninguna Eldur og ís í Galleria Käytävä sem er í sendiráði Íslands í Helsinki í Finnlandi. Sýningin verður opin til 7. janúar á næsta ári. Um er að ræða sölusýningu. Þau sem vilja koma og sjá sýninguna geta hringt í sendiherrabústaðinum og samið um tíma til að koma á staðinn.

Við sama tækifæri var Tapio Koivukari, sem margir Vestfirðingar þekkja , með ljóðalestur og kynnti ljóðabók sína „Innifirði“.

Loks var sama dag haldið jólaball hjá Íslendingafélaginu ogsungið og dansað í kringum jólatréð. Sendiherra Íslands er Harald Aspelund sem á ættir sínar til Ísafjarðar.

Hjónin Hulda Leifsdóttir og Tapio Koivukari.

Ísfirðingurinn Hulda Leifsdóttir og Bolvíkingurinn Rögnvaldur K. Kristinsson.

Hulda ásamt sendiherrahjónunum Harald Aspelund og Ásthildi Björg Jónsdóttur.

Dansað var í kringum jólatréð í viðeigandi klæðnaði.

Það er ýmislegt sem hefur gerst á árinu sem er að líða, því er íbúum Reykhólahrepps boðið að kíkja í baksýnisspegilinn og tilnefna orð sem hefur verið mikið notað, orð sem hefur haft áhrif í samfélaginu eða orð sem átti að hafa áhrif en gerði það ekki.

Orð sem allir þekkja eða orð sem er bara notað í vinahópnum.

Orð með sterkum íslenskum grunni eða slangur.

Á vef Reykhólahrepps segir að þetta sé mest til gamans gert og þar má finna upplýsingar um það hvernig á að koma orði ársins á framfær.

Ríkiskaup, fyrir hönd Fjórðungssambands Vestfirðinga kt. 700573-0799 óska eftir tilboðum í þjónustu skipulagsráðgjafa við undirbúning og gerð svæðisskipulags Vestfjarða.

Svæðisskipulagið marki meginstefnu og langtímaframtíðarsýn í umhverfis- og byggðamálum Vestfjarða, þar sem hagsmunir sveitarfélaganna fari saman til að stuðla að uppbyggingu Vestfjarða sem landfræðilegri, hagræni og félagslegri heild sem styrkir byggðaþróun á Vestfjörðum til framtíðar.

Allar nánari upplýsingar er að finna í rafrænu útboðskerfi Ríkiskaupa.

Eftirlitsmenn Fiskistofu munu  í desember eins og alla aðra mánuði fljúga ómönnuðum loftförum til eftirlits og vilja minna á að allar upptökur eru skoðaðar vel og fiskur sem fer fyrir borð er tegundargreindur.

Fiskistofa vil því biðja sjómenn og útgerðaraðila að kynna sér vel reglur og lög um stjórn fiskveiða.

Atriði sem þarf að hafa í huga eru meðal annars þessi:

• Óhætt er að sleppa hlýra og ef hann er lífvænlegur.
• Skylt er sleppa beinhákarli, háfi og hámeri, ef lífvænleg.
• Heimilt er að sleppa lífvænlegri tindaskötu.
• Sleppa á grásleppu sem fæst í  þorskfiskanet.
• Heimilt er að sleppa lífvænlegum rauðmaga við hrognkelsaveiðar.
• Komi lúða um borð í veiðiskip sem meðafli á umsvifalaust að sleppa lífvænlegri lúðu.
• Við línuveiðar skal sleppa allri lúðu með því að skera á taum línunnar.
• Við handfæra- og sjóstangaveiðar á að losa lúðu varfærnislega af krókum eða skera á lykkju slóðans áður en lúða kemur um borð.

Meirihluti fjárlaganefndar Alþingis leggur til að Matvælaráðuneytið fái á næsta ári 10 m.kr. hækkun á rekstrartilfærslufé.

Í skýringum með tillögunni segir að lagt sé til að Vesturbyggð fái 10 m.kr. tímabundið framlag til uppbyggingar Vatneyrarbúðar að Aðalstræti 1, Patreksfirði. Fram kemur að unnið er að stofnun þekkingarseturs í húsnæðinu sem m.a. á að hýsa rannsóknar- og þróunarsetur fiskeldis og skapa vettvang í nærumhverfi fiskeldis fyrir einstaklinga og stofnanir sem vinna að rannsóknum og eftirliti í fiskeldi og tengdum greinum.