Veðurspá fyrir Vestfirði í dag kveður á um suðvestan 13-20 m/s og súld eða rigningu. Það dregur úr úrkomu og vindi og í kvöld má búast við vestan 10-18 m/s og þurru veðri. Hiti 1 til 6 stig. Á vef Veðurstofu Íslands má sjá að umhleypingar verði á landinu næstu daga. Hlýindi í dag, frost á morgun, hita ofan við frostmaki og rigningu á miðvikudag, en frosti aftur á fimmtudag.
Á Vestfjörðum er hálka eða á mörgum leiðum. Snjóþekja er á Þröskuldum.
Hafin er söfnun til aðstoðar Færeyingum vegna aftakaveðurs og mikils tjóns sem varð í Færeyjum í desember. Aðstandendur fésbókarsíðunnar „Færeyingar: Við biðjumst afsökunar“ sendu ríkisstjórn Íslands bréf þann 27. desember þar sem vakin var athygli á þessum hamförum og hvatt til þess að íslenska ríkið lét fé af hendi rakna til nágranna okkar. Engin svör við þessari beiðni hafði borist tveim dögum seinna og þá var hafin landssöfnun undir yfirskriftinni Færeyingar og Íslendingar eru frændur og á fésbókarsíðu hennar má nálgast allar upplýsingar.
Í fréttatilkynningu frá hópnum kemur fram að Ásmundur Friðriksson er eini þingmaðurinn sem virt hefur hópinn viðlits en forseti Íslands, Guðni Th. Jóhannesson hvatti landsmenn í fésbókarfærslu sinni á gamlársdag til að sýna samhug í verki og leggja til í söfnunina.
Í gær höfðu safnast tæpar þrjár milljónir en söfnunin mun standa að minnsta kosti út þessa viku.
Við hér á Vestfjörðum höfum svo sannarlega notið vinaþels Færeyinga og á Flateyri og í Súðavík standa minnisvarðar þess, tákn örlætis og vinsemdar.
Reikningsnúmer söfnunarinnar er 1161-26-6000 og kennitalan 170961-7819
Smári Haraldsson, forstöðumaður Fræðslumiðstöðvar Vestfjarða, segist reikna með að ráðning í stöðu forstöðumanns ráðist í janúar. Staðan var auglýst fyrr í vetur en Smári lætur af störfum 1. mars næstkomandi.
Samkvæmt Smára kom stjórn Fræðslumiðstöðvarinnar saman rétt fyrir jól, ræddi málin og fór yfir umsóknir. „Við hittust næst 10. janúar, þá veljum við væntanlega úr umsækjendahópnum sem við bjóðum svo í viðtal,” segir Smári.
Hann segir ekki vera búið að festa hvenær nýr forstöðumaður tæki við: „Það hefur engin dagsetning verið nefnd en ég hætti 1. mars og þá væri eðlilegast að nýr forstöðumaður taki til við þá en það yrði samkomulagsatriði.“
Eins og áður hefur komið fram sóttu 12 um starfið. Einn dró umsókn sína baka vegna þess að hann hafði ráðið sig í annað starf og einn óskaði eftir að nafn hans yrði ekki opinberað að svo stöddu.
Hinir 10 eru:
Andri Ragnar Guðjohnsen meistari í alþjóðaviðskiptum.
Dagbjört Agnarsdóttir, verkefnastjóri.
Hilmar Þór Hafsteinsson, kennari.
Margrét Björk Arnardóttir, náms- og starfsráðgjafi.
Marthen Elvar Veigarsson Olsen, meistaranemi.
Óli Örn Atlason, frístunda- og forvarnarfulltrúi.
Ólöf Dómhildur Jóhannsdóttir, myndlistarmaður.
Sigurður Pétursson, sagnfræðingur.
Sædís María Jónatansdóttir, deildarstjóri.
Valgeir Ægir Ingólfsson, verkefnastjóri.
Heilbrigðisráðherra hefur að ráði Rannsóknarnefndar samgönguslysa falið landlækni að skipa vinnuhóp til að fjalla um ökuleyfi og veikindi og breytt og bætt skipulag hvað þessi mál varðar.
Rannsóknarnefndin skilað skýrslu í febrúar árið 2015 vegna slyss sem talið var orsakast af heilsubresti ökumanns. Nefndin sagði að heilsufar ökumanns hefði legið ljóst fyrir um árabil en engu að síður hafði hann fengið endurnýjað ökuleyfi sjö mánuðum fyrir slysið en hann lést í kjölfar þess. Í skýrslu nefndarinnar kemur fram að hún telji að ekki takist nægjanlega vel að framfylgja ákvæðum um heilbrigðiskröfur sem gerðar eru til ökumanna í íslenskum lögum og reglum. Í skýrslunni segir ennfremur að embætti Landlæknis hafi árið 2007 birt leiðbeiningar fyrir íslenska lækna þar sem komi fram yfirlit yfir helstu sjúkdóma sem geta dregið úr ökuhæfni og hvenær sé nauðsynlegt að afturkalla ökuréttindi sjúklinga. Nefndinni þykir ljóst að greiningartæki og viðmið skorti ekki en nokkuð vanti upp á framkvæmd þeirra.
Þessar tölur sem virðast vera algjörlega úr lofti gripnar hafa talsvert mikið gildi fyrir Kómedíuleikhúsið og þá um leið fyrir íbúa Vestfjarða sem fengið hafa að njóta afreka leikhússins frjálsa á Vestfjörðum í árabil. Já, áratugabil og fyrir það stendur talan 19, Kómedíuleikhúsið hefur nú lifað í 19 ára og mun því á því herrans ári sem nú hefur gengið í garð, 2017, fagna tvítugsafmæli og geri aðrar menningarstofnanir betur.
Talan 40 stendur fyrir þann fjölda verka sem Komedíuleikhúsið hefur sett á svið frá upphafi og á árinu 2016 voru sýningarnar 71.
Elfar Logi, leikhússtjóri Kómedíuleikhússins gerir upp árið á Þingeyrarvefnum og þar kennir ýmissa grasa. Í upphafi árs segist Elfar hafa verið fenginn til að rota jólin með sínum hætti og stjórna þrettándagleði Ísafjarðarbæjar og Bolungarvíkur. Leikhúsið daðraði við Sjeikspír á árinu og losaði sig við bæði Búkollu og Fjalla-Eyvind, fór með hinn fræga Gretti á erlenda grund og birti á sviðinu einbúann þjóðfræga Gísla á Uppsölum. Leikverkið um Gísla á Uppsölum hefur fengið mikið lof og er nú á leiðinni á fjalirnar í Þjóðleikhúsinu í janúar.
Nánar má lesa um afrek okkar Vestfirska Komedíuleikhúss hér.
Íbúar Strandabyggðar taka lestur alvarlega og hafa tekið afgerandi forystu í landsleiknum Allir lesa. Þriðji landsleikurinn er haldinn nú á þorranum, frá 27. janúar til konudagsins 19. febrúar 2017. Keppt er í liðum og/eða sem einstaklingur og mældur sá tími sem varið er í lestur. Nú þegar nokkrir dagar eru liðnir af keppninni mælist lestur Strandamanna 22 klst. og næst á eftir þeim koma íbúar Dalabyggðar með 7,3 klst.
Í lok þorra verða sigurlið heiðruð með verðlaunum og viðurkenningum, svo og sá einstaklingur sem ver mestum tíma í lestur á þessu tímabili. Einstaklingskeppnin er nýbreytni í ár svo nú verður í fyrsta sinn ljóst hver er aðal lestrarhestur landsins. Hver þátttakandi getur keppt bæði sem einstaklingur og í liði, eða valið aðeins annan kostinn.
Allar tegundir bóka eru gjaldgengar. Það skiptir ekki máli hvernig bækur þú lest eða hvort þú lest prentaðan texta, rafbók eða hljóðbók. Hér er átt við allar bækur sem innihalda til dæmis skáldskap, fræði, skýrslur eða eitthvað allt annað. Lestu þér til ánægju um leið og þú keppir í lestri.
Allir geta myndað lið, til dæmis á vinnustaðnum, í saumaklúbbnum, vinahópnum eða með fjölskyldunni. Foreldrar sem lesa fyrir ung börn sín eru sérstaklega hvattir til að mynda lið með börnunum og skrá lesturinn. Einn aðili, liðsstjórinn, stofnar lið inni á vefnum og bætir öðrum liðsmönnum í liðið. Aðrir geta einnig fundið liðið og gengið í það. Þau lið sem verja mestum tíma í lestur standa uppi sem sigurvegarar.
smari@bb.is
Nú er árið 2016 runnið í aldanna skaut og aldrei það kemur til baka, það var árið sem tók ansi margar stórstjörnur þó reyndar megi deila um hvort það var árið eða eiturlyfin sem ábyrgð bera á fráfalli þeirra. Árið 2016 var um margt merkilegt og nægir þá að nefna landsmálin, óvenjumikill trúnaðarbrestur varð milli stjórnvalda og almennings sem leiddi til þess að forsætisráðherra sagði af sér eftir ein fjölmennustu mótmæli íslandssögunnar og boðað var til kosninga að hausti. Nýir stjórnmálaflokkar náðu góðum árangri í kosningunum en illa hefur gengið að raða saman stjórn. Ísland hefur verið í sviðsljósi fjölmiðla um allan heim fyrir það heimsmet að eiga flesta í Panamaskjölunum, sérstaklega opinberar persónur.
Þessa árs verður minnst sem árinu þar sem almenningur gerði sér grein fyrir valdi sínu og nýtti það, almenningi mislíkaði spilling stjórnvalda og setti forsætisráðherra af, almenningi mislíkaði líka lygar forsvarsmanna Brúneggja og enginn kaupir lengur Brúnegg.
Í útlöndum hefur stríðið í Sýrlandi sett sitt mark á árið og miskunnarlaus dráp á saklausu fólki, nánast í beinni útsendingu. Í henni Ameríku var kosinn forseti, sagan mun segja okkur hvort hann reynist sú ógn við heimsfriðinn sem margir telja nú. Og í Evrópu voru það Brussel, Nice og Berlín sem voru í skotlínu hryðjuverkamanna árið 2016.
Hjá okkur hér Bæjarins besta og bb.is hófst árið með látum með umfjöllun um ráðningu tónlistarskólastjóra í Vesturbyggð og talsverða athygli vakti sömuleiðis umræður um nekt í saunaklefum en það var Eiríki Erni Norðdal mikið áhugamál. Fréttir af Orkubúi Vestfjarða voru fyrirferðamiklar framan af ári enda miklar sviptingar í stjórn OV. Ríkisendurskoðun gerði alvarlegar athugasemdir við vinnubrögð vegna ráðningar Orkubússtjóra og þóttu þau ekki til fyrirmyndar. Gullrillurnar komu, sáu og sigruðu á árinu og voru fréttaefni meira eða minna allt árið, enda miklar afrekskonur þar á ferð. Í maí hvolfdi bát út af Aðalvík og fórst þar einn maður. Í júlí brann útihús í Tannanesi í Önundarfirði til kaldra kola. Þegar líða tók á haustið fóru stjórnmálamenn að láta í sér heyra, nýir kynntir til sögunnar og aðrir að fara frá og allt fram yfir kosningar var bæði vefur og blað undirlagt af kosningamálum. Fiskeldi hefur verið reglubundnum hætti verið til umfjöllunar, í mars var sérstakt tölublað lagt undir kosti og galla fiskeldis en atvinnugreinin er svæðinu mikilvæg og um leið afar umdeild. Dýrafjarðargöng hafa sömuleiðis verið fréttaefni, ekki síst nú í desember þegar framkvæmdir við þau duttu út af fjárlögum, og síðan inn aftur. Sjómannaverkfall og afleiðingar þess hafa verið til umfjöllunar nú í árslok.
Á næstu dögum mun nýr vefur bb.is vera kynntur til sögunnar en sá gamli sem hefur þjónað okkur í hálfan annan áratug verður lagður til hinstu hvílu. Hann hefur staðið sig vel, verið öruggur og snar en seinfær fyrir nýjungar og svo sannarlega barn síns tíma. Það eru allar líkur á að nýr vefur valdi okkur og lesendum einhverjum vandræðum til byrja með en vonandi til bóta þegar til framtíðar er litið.
Við á bb.is og Bæjarins besta sendum okkar allra bestu nýjárskveðjur til ykkar allra með kærri þökk fyrir áhugann á liðnum árum.
Bryndís Sigurðardóttir
Ritstjóri
Katrín Björk Guðjónsdóttir lætur ekki deigan síga ef marka má bloggið hennar og þar má lesa um framfarir hennar og sigra. Hún hefur dvalið hjá foreldrum sínum á Flateyri yfir hátíðarnar og augljósar framfarir hennar eru gleðilegar. Katrín er aðeins 23 ára gömul en er eins og hún segir á síðunni sinni „í bataferli eftir tvær heilablæðingar og einn blóðtappa“
Í nýjustu færslunni má lesa um hvílíkar framfarir hún hefur náð á árinu sem er að líða. Í byrjun árs var hún tiltölulega nýlega farin að halda höfði, hreyfa vinstri hendi og geta notað höndina til að stafa en þangað til hafði hún aðeins getað stafað með augunum. Katrín segist hafa verið ósátt og leið en jólastemming jólanna 2015 hafi þó glatt hana mikið. Að geta rúllað sér í hring í rúminu sínu var afrek þeirra jóla en núna getur hún sest upp, gengið með stuðningi bæði upp og niður stiga og tjáð sig með einstaka orðum og setningum.
Katrín er greinilega mikið jólabarn og nýtur jólaundirbúningsins og í byrjun desember voru verkefni næstu daga skráð skilmerkilega; tala meira, undirbúa heimferð, ganga meira, kaupa jólaskraut, skreyta, baka, kaupa jólagjafir og pakka jólagjöfum.
Hægt er fylgjast með ótrúlegu baráttuþreki Katrínar á bloggsíðu hennar hér.
Nú fyrir stundu valt bifreið út af veginum í Súgandafirði en mikil hálka er á veginum. Eftir því sem best er vitað urðu ekki alvarleg slys á fólki sem þó engu að síður var flutt til aðhlynningar á Heilbrigðisstofnun Vestfjarða.
