Síða 2354

Æfa danssporin fyrir þorrablótið

 

Á föstudag gengur þorrinn í garð og upphefst þá mikil samkomutíð á Íslandi er landsmenn koma saman og blóta þorra. Algengasta samkomuformið eru þorrablótin sívinsælu þar sem gestir koma saman með misvel lyktandi þjóðlega rétti í trogi. Þá er sungið, gjarnan heimatilbúnar gamanvísur um náungann, og dansað. Nemendur í 10.bekk Grunnskólans á Ísafirði hafa um langa hríð komið saman á þorrablóti og það munu þau gera á bóndadaginn á föstudag, ásamt foreldrum sínum eða forráðamönnum og starfsfólki skólans.

Á þorrablótinu verða gömlu dansarnir stignir undir harmonikkuleik og hafa nemendur verið við æfingar hjá Evu Friðþjófsdóttur danskennara á öllum helstu sporunum. Á meðfylgjandi mynd af heimasíðu Grunnskólans á Ísafirði má sjá 10.bekkingana æfa hringdans og virðast þau klár í slaginn að sýna listir sínar og bjóða mömmu og pabba upp í dans á föstudagskvöldið.

annska@bb.is

Minnast Jóns úr Vör á málþingi

Jón úr Vör

 

Vesturbyggð, Sögufélag Barðastrandarsýslu og Rithöfundasambandið standa fyrir málþingi 21. janúar 2017 í Skjaldborgarbíói á Patreksfirði í tilefni aldarafmælis þorpsskáldsins Jóns úr Vör. Á þinginu verður ávarp frá Friðbjörgu Matthíasdóttur, bæjarstjóri Vesturbyggðar. Andrea Harðardóttir flytur erindi um skáldið og Úlfar Thoroddsen segir frá umhverfinu á æskuárum skáldsins. Nemendur úr Patreksskóla flytja ljóð Jóns úr Vör og býður Vesturbyggð upp á kaffiveitingar í hléi. Fjallað verður um verkefni Hauks Más Sigurðarsonar um Jón úr Vör og þá les skáldið Eiríkur Örn Norðdahl upp ljóð. Fundarstjóri er Alda Davíðsdóttir

Þann 21.janúar fæddist Jón Jónsson sem síðar varð þekktur sem Jón úr Vör á Vatnseyri við Patreksfjörð. Jón flytur sem ungur maður og ver hann lengstum hluta ævi sinnar í Kópavogi. Æskustöðvarnar höfðu mikil áhrif á hann og fjallar hann um þær í einu af sínu þekktasta verki, Þorpinu. Jón var um dagana rithöfundur, ritstjóri, fornbókasali og bókavörður. Hann var heiðursfélagi Rithöfundasambands Íslands, sem hann tók þátt í að stofna. Jón var sæmdur riddarakrossi hinnar íslensku fálkaorðu og var meðal annars tilnefndur til bókmenntaverðlauna Norðurlandaráðs árið 1986 fyrir bók sína Gott er að lifa.

Elfar Logi fjallaði í 2. tbl Bæjarins besta um Jón úr Vör.

annska@bb.is

Engar viðræður fyrr en eftir helgi

Samningafundi sjómanna og Samtaka fyrirtækja í sjávarútvegi lauk nú fyrir stundu og viðræðum verður frestað til mánudags. Tímann þangað til ætlar sjómannaforystan að nota til að kanna baklandið meðal umbjóðenda og ráða ráðum sínum. Sjómenn hafa í tvígang fellt kjarasamning sem forystan hefur samþykkt.

Verkfall sjómanna hefur staðið í rúmar fimm vikur og tap sjómanna og útgerða mikið svo ekki sé minnst á fiskverkafólk, en á annað þúsund starfsmanna í fiskvinnslu hafa fengið uppsagnarbréf frá því að verkfallið hófst.

Fulltrúar beggja málsaðila keyrðu á vegg í þessum viðræðum og það var kominn svolítill hiti í menn. Á ákveðnum málum steytti og því var ákveðið að kæla málið aðeins og byrja aftur eftir helgina,“ segir Valmundur Valmundsson, formaður Sjómannasambands Íslands, í samtali við blaðamann Morgunblaðsins í dag.

smari@bb.is

Íþróttamaður Ísafjarðarbæjar valinn

Kristín Þorsteinsdóttir var íþróttamaður Ísafjarðarbæjar á síðasta ári, hér er hún ásamt öðrum íþróttamönnum sem tilnefndir voru

Íþrótta- og tómstundanefnd Ísafjarðarbæjar fór á fundi sínum í gær yfir tilnefningar til íþróttamanns og efnilegasta íþróttamanns Ísafjarðarbæjar árið 2016. Í athöfn í Stjórnsýsluhúsinu næstkomandi sunnudag verður valið kunngjört. Athöfnin hefst klukkan 16 á 4.hæð.

Íþróttafélögin í Ísafjarðarbæ hafa tilnefnt eftirfarandi í valinu um íþróttamann ársins:

Albert Jónsson                     Skíðafélag Ísfirðinga

Anton Helgi Guðjónsson    Golfklúbbur Ísafjarðar

Daniel Osafu-Badu              Knattspyrnudeild Vestra

Haraldur Hannesson           Knattspyrnudeild Harðar

Jens Ingvar Gíslason           Handboltadeild Harðar

Kristín Þorsteinsdóttir        Íþróttafélagið Ívar

Nebojsa Knezevic                Körfuknattleiksdeild Vestra

Tihomir Paunovski               Blakdeild Vestra

Valur Richter                       Skotíþróttafélag Ísafjarðar

 

Í valinu um efnilegasta íþróttamanninn eru eftirtaldir tilnefndir:

Auður Líf Benediktsdóttir    Blakdeild Vestra

Ásgeir Óli Kristjánsson         Golfklúbbur Ísafjarðar

Jón Ómar Gíslason                 Handboltadeild Harðar

Nökkvi Harðarson                  Körfuknattleiksdeild Vestra

Sigurður Hannesson             Skíðafélag Ísfirðinga

Þráinn Ágúst Arnaldsson  Knattspyrnudeild Vestra

Á síðasta ári var það sundkonan Kristín Þorsteinsdóttir sem hampaði titlinum og var það þriðja árið í röð sem hún var valin íþróttamaður Ísafjarðarbæjar. Þá var Anna María Daníelsdóttir skíðakona valin úr hópi ungra og efnilegra iðkenda sem efnilegasti íþróttamaðurinn.

annska@bb.is

Selja regnbogasilung til Japan

Frystum regnbogasilungi raðað í gám.

Starfsmenn Hraðfrystihússins – Gunnvarar hf.  og dótturfélagsins Háafells hófu fyrir jól slátrun á fyrsta regnbogasilungnum sem settur var í eldiskvíar Háafells í Álftafirði. Fiskurinn er unninn í Íshúsinu á Ísafirði. Japanskir kaupendur komu í heimsókn fyrir jól til að taka út vöruna og staðfestu kaup en ágætis markaðsaðstæður eru um þessar mundir fyrir regnbogasilung í Asíu. Í dag er unnið að hleðslu fyrstu gámana sem seldir hafa verið til Japans en regnbogasilungur er þar í landi eftirsóttur í m.a. sushi og sashimi rétti.

Háafell er með leyfi fyrir 6.800 tonna eldi á regnbogasilungi en hyggst ekki nýta það. Fyrirtækið stendur nú í gerð umhverfismats á 6.800 tonna laxeldi á sömu staðsetningum í Ísafjarðardjúpi.

smari@bb.is

Éljagangur og kóf

Á Vestfjörðum verður vaxandi suðvestanátt með morgninum og verður vindhraði um 13-20 m/s um hádegi. Það dregur úr vindi er líða tekur á daginn og verður hann orðinn hægari síðla kvölds. Él og frost á bilinu 0 til 5 stig.

Snjóþekja, hálka, snjókoma eða éljagangur er á Vestfjörðum. Þæfingsfærð er á Hálfdáni og Kleifaheiði en unnið er að mokstri. Á vef Vegagerðarinnar er vakin athygli á að undir hádegi fari vindur vaxandi um norðvestanvert landið frá Snæfellsnesi og Borgarfirði norður í Skagafjörð og á Öxnadalsheiði.  Hvasst verður, SV 13-18 m/s og allt að 20-22 m/s á fjallvegum.  Ný lausamjöllin veldur auðveldlega kófi við þessar aðstæður og að auki verður éljagangur á þessum sömu slóðum. Lagast smámsaman í kvöld.

annska@bb.is

Nýr dragnótarbátur til Bolungarvíkur

Mynd: Vigfús Markússon

Útgerðarfélagið Mýrarholt ehf. í Bolungarvík hefur keypt dragnótarbátinn Örn GK. Mýrarholt hefur gert út Ásdísi ÍS í tæp þrjú ár, bæði á rækju og á dragnót. Aflabrögðin á dragnótinni hafa verið með eindæmum góð og á síðasta ári fiskaði Ásdís tæp 1.500 tonn. Frá því er greint í Aflafréttum að um 1.000 þorskígildakvóti hafi verið á Erni og hluti kvótans fylgir með í kaupunum. Mýrarholt er í eigu bræðranna Jóns Þorgeirs og Guðmundar Einarssonar og sona þeirra beggja.

Örn er talsvert stærri en Ásdís, eða 22 m að lengd og átta metra breiður. Báturinn var smíðaður í Póllandi árið 1999 og er sérsmíðaður fyrir dragnótarveiðar. Á vef Aflafrétta er haft eftir Einari Guðmundssyni, skipstjóra á Ásdísi, að afhending Arnar fari fram fljótlega og þá mun báturinn fara í slipp.

smari@bb.is

Neysluvatnið í lagi

Niðurstöður úr seinna sýni sem var tekið úr vatnsveitu Bolungarvíkur gefa til kynna að vatnsveitan sé í lagi og ekki er lengur þörf á vatnssuðu. Á fimmtudag í síðustu viku kom upp bilun í geislunarbúnaði og við sýnatöku kom í ljós saurgerlamengun í vatni. Búnaðurinn var lagaður samdægurs og annað sýni tekið sem eins og fyrr segir reyndist í lagi.

smari@bb.is

Aflasamdráttur á síðasta ári

Afkoma hafnarsjóðs Ísafjarðarbæjar batnaði á síðasta ári.

Afli íslenskra skipa árið 2016 var 1.069 þúsund tonn sem er 247 þúsund tonnum minna en landað var árið 2015. Samdrátt í aflamagni á milli ára má nær eingöngu rekja til minni loðnuafla en ríflega 101 þúsund tonn veiddust af loðnu á síðasta ári samanborið við tæp 353 þúsund tonn árið 2015. Þetta kemur fram í tölum Hagfstofu Íslands. Samdráttur í afla uppsjávartegunda var 32% á milli ára en alls veiddust tæp 576 þúsund tonn af uppsjávartegundum. Botnfiskafli nam 457 þúsund tonnum á síðasta ári sem er 4% aukning miðað við fyrra ár. Að venju er þorskaflinn uppistaðan í botnfiskaflanum en tæp 264 þúsund tonn veiddust af þorski á síðasta ári sem er 8% meira en árið 2015. Flatfiskaflinn var svipaður á milli ára og var tæp 24 þúsund tonnum á síðasta ári. Afli skel- og krabbadýra nam 12,7 þúsund tonnum sem er jafngildir 26% aukningu miðað við árið 2015.

Í desembermánuði var fiskaflinn rúm 59 þúsund tonn sem er 20% meiri afli en í desember 2015. Aukið aflamagn í desember skýrist af auknum uppsjávarafla, en afli uppsjávartegunda, kolmunna og síld, var 15 þúsund tonnum meiri en í desember 2015. Samdráttur varð hinsvegar í öðrum aflategundum, botnfiskafli dróst saman um 14%, flatfiskafli um 41% og skel- og krabbadýraafli um 28%.

Þrátt fyrir aukið aflamagn í desember má gera ráð fyrir að verðmæti aflans í desember hafi dregist saman um 5,5% sem skýrist af aflasamdrætti verðmætari tegunda.

smari@bb.is

Hlutur ríkisins í bensínlítranum aldrei verið meiri

Bensínverð á Íslandi er fjórum krónum hærra núna, um miðjan janúar, en það var í desember. Skýra má stærstan hluta hækkunarinnar með hækkunum opinberra gjalda en hlutur ríkisins í bensínverði hefur aldrei verið meiri en hann er nú 58,22 prósent. Þetta kemur fram í frétt Kjarnans. Hlutur ríkisins mun að öllum líkindum minnka að tiltölu heimsmarkaðsverð á olíu heldur áfram að hækka og krónan að veikjast.

Hækkunin nemur 4,10 krónum á hvern lítra í viðmiðunarverðinu sem stuðst er við í bensínvaktinni og kostar bensínlítrinn nú 194,40 krónur. Mest munar um hækkun opinberra gjalda sem hækkuðu um áramótin í takt við fjárlög ársins 2017.

smari@bb.is

 

Nýjustu fréttir