Landaður afli í Bolungarvík fyrstu sjö vikur ársins eða þar til verkfalli sjómanna lauk 19. febrúar var 1.572 tonn og var Bolungarvík önnur stærsta löndunarhöfn landsins á þessum tíma. Þetta kemur fram á vefnum vikar.is. Aðeins Ólafsvík var með meiri landaðan afla eða 1.895 tonn. Fyrir sama tímabil í fyrra var landaður afli i Bolungarvík 1.987 tonn og því um 20% samdrátt að ræða milli ára.

Landaður afli í höfnum á Vestfjörðum fyrstu 7 vikur ársins 2017 var eftirfarandi:

Bolungarvík: 1.572 tonn
Tálknafjörður: 509 tonn
Suðureyri: 396 tonn
Patreksfjörður: 201 tonn
Flateyri: 201 tonn
Drangsnes: 191 tonn
Hólmavík: 181 tonn
Bíldudalur: 162 tonn
Ísafjörður: 118 tonn
Brjánslækur: 2 tonn
Súðavík: 2 tonn

smari@bb.is

Verkalýðsfélag Vestfirðinga leggur sérstaka áherslu á að tengja norður- og suðursvæði Vestfjarða í einni framkvæmd með jarðgöngum og vegabótum. Í ályktun stjórnar félagsins kemur fram að á meðan ástand vegamála á svæðinu er svo dapurlegt sem raun ber vitni, sé einfaldlega ekki hægt að bjóða íbúum og atvinnulífi á suðurfjörðum Vestfjarða upp á að standa í eðlilegri samkeppni við aðra landshluta vegna vanþróaðra samgangna. „Í þeim efnum eru vestfirskir vegir mörgum áratugum á eftir í uppbyggingu og þróun. Verkalýðsfélag Vestfirðinga ítrekar að bættar samgöngur eru ein af undirstöðunum þess að tryggja og viðhalda byggð á Vestfjörðum,“ segir í ályktuninni og enn fremur að krafa Vestfirðinga sé skýr:

„Góðar samgöngur eru lífæð hverrar byggðar, bæði hvað varðar atvinnu og menningu, sem og öryggi og þróun byggðar. Vegir á Vestfjörðum standast ekki þær kröfur sem gerðar eru til nútíma þjóðvega og uppfylltar hafa verið hjá öðrum. Stjórn Verkalýðsfélags Vestfirðinga skorar á samgönguráðherra og þingmenn kjördæmisins að tafarlaust verði ráðist í gerð heilsárs vegbóta við alla þéttbýlisstaði á Vestfjörðum.“

smari@bb.is

Smábátaeigendur jafnt og aðrir í sjávarútveginum eru flemtri slegnir vegna hríðlækkandi verðs á fiski, að því er segir á vef Landssambands smábátaeigenda. Á fyrstu tveim dögum í mars birtast tölur sem eiga sér enga líka hvað verðlækkun snertir. Fyrsta og annan mars 2016 var meðalverð á óslægðri ýsu á fiskmörkuðum 298 kr/kg. Nú ári síðar seldist ýsa á 187 kr/kg.  Mismunurinn er 111 kr/kg, verðlækkunin nemur 37%.

Verðhækkun á erlendum mörkuðum fyrir ferskan fisk er ekki nægjanleg á móti styrkingu krónunnar gagnvart evru, pundi og dollar, segir á vef Landssambandsins.

smari@bb.is

Samræmdu prófin í efstu bekkjum grunnskóla landsins hefjast í dag.  Nemendur í níunda og tíunda bekk taka prófin að þessu sinni í samræmi við breytta reglugerð og verða prófin rafræn. Þetta verður í eina skiptið sem tveir árgangar taka prófið á sama tíma. Framvegis verða samræmd könnunarpróf lögð fyrir að vori í níunda bekk í stað haustprófa í tíunda bekk.

Prófin verða með breyttu sniði í samræmi við lagabreytingar á grunnskólalögum og lögum um Menntamálastofnun. Í tilkynningu á vef Menntamálastofnunar kemur fram að með því að færa 10. bekkjar könnunarprófið í 9. bekk gefist nemendum, forráðamönnum þeirra og kennurum meira svigrúm til þess að nýta sér niðurstöðurnar til að bregðast við og móta áherslur í námi í 10. bekk.

smari@bb.is

Sveinn Ragnarsson á Svarfhóli í Geiradal hefur tekið við sem vefstjóri Reykhólahrepps. Hann tekur við af Hlyni Þór Magnússyni sagnfræðingi sem sagði starfinu lausu í haust en hefur aðstoðað sveitarstjóra með vefinn allt til þessa dags. Sveinn tekur við vef sem notið hefur vinsælda, þá sérstaklega fyrir vönduð vinnubrögð fyrrum vefstjóra.

Heima á Svarfhóli rekur Sveinn verkstæði. Hann er fyrrverandi sveitarstjórnarmaður, fyrrverandi og núverandi göngugarpur og annálaður áhugaljósmyndari, allavega í heimabyggð og líka þó víðar væri leitað.

smari@bb.is

Í nóvember 2016 var aflaverðmæti íslenskra skipa 10,2 milljarðar króna sem er samdráttur um 16,8% samanborið við nóvember 2015. Verðmæti botnfiskafla nam 7,7 milljörðum og dróst saman um 14,2% frá fyrra ári. Þetta kemur fram í frétt Hagstofunnar. Uppistaðan í verðmæti botnfiskaflans var þorskur en verðmæti hans nam 5,5 milljörðum sem er 2,6% minna en í nóvember 2015. Verðmæti uppsjávarafla dróst einnig saman á milli ára, nam tæpum 1,9 milljörðum sem er 21,2% minna en í nóvember 2015. Verðmæti flatfiskafla dróst saman um 25,5% og nam 522 milljónum króna í nóvember. Aflaverðmæti skelfisks dróst saman um 50,8% og nam um 88 milljónum samanborið við tæpar 179 milljónir í nóvember 2015.

Á 12 mánaða tímabili frá desember 2015 til nóvember 2016 var aflaverðmæti 134,9 milljarðar króna sem er 10,5% samdráttur miðað við sama tímabil ári fyrr. Verðmæti botnfiskafla dróst saman um 7,4 milljarða á milli tímabila. Verðmæti uppsjávartegunda dróst einnig saman á milli þessara 12 mánaða tímabila, vegur þar þyngst 7,7 milljarða samdráttur á verðmæti loðnuafla.

smari@bb.is

„Ég setti þessa tillögu fram til að bjarga því sem bjargað varð,“ segir Daníel Jakobsson, oddviti Sjálfstæðisflokksins, um breytingartillögu við samning Ísafjarðarbæjar við Hestamannafélagið Hendingu. Daníel lagði tillöguna fram á fundi bæjarstjórnar fyrir helgi og þegar til atkvæðagreiðslu kom um tillöguna sat Daníel hjá.

„Ég var að reyna að búa til leið fyrir Í-listann að bæta málið en það kom fljótlega í ljós að Í-listinn vildi ekki styðja breytingarnar og því sat ég hjá,“ segir Daníel sem hefur talað eindregið gegn samningnum og finnst hann meðal annars vera allt of dýr. „Ég hefði verið til í að kyngja upphæðinni í skiptum fyrir betri vinnubrögð.“ Samflokksmenn hans í Sjálfstæðisflokknum studdu breytingartillöguna auk bæjarfulltrúa Framsóknarflokks. Tillagan var felld með atkvæðum Í-listans.

Ísafjarðarbær lætur í té 30 milljónir kr. til að reisa reiðskemmu í Engidal og til viðbótar koma 20 milljóna kr. bætur frá Vegagerðinni fyrir aðstöðumissi Hendingar á Búðartúni í Hnífsdal.

„Þetta er allt of opinn samningur og of margt sem er óljóst,“ segir Daníel. Ísafjarðarbær og Hending ætla að stofna með sér einkahlutafélag um byggingu reiðskemmunnar. „Það er ekki búið að ákveða hvernig hús á að byggja. Engin þarfagreining liggur fyrir og hvað þá skilalýsing. Það liggur ekki fyrir hvernig það á að koma sjálfboðavinnu hestamanna inn í einkahlutafélag því hún er skattskyld. Verður stofnuð byggingarnefnd eða mun stjórn einkahlutafélagsins ráða för er annað sem vekur upp spurningar. Ég óttast að bærinn sé að skrifa upp á óútfylltan tékka,“ segir Daníel.

smari@bb.is