Vox Domini, söngkeppni Félags íslenskra söngkennara, FÍS, fer fram í Salnum í Kópavogi um helgina. Meðal þátttakenda í keppninni er ungur Ísfirðingur Aron Ottó Jóhannsson sem stundar nú söngnám við Tónlistarskóla Ísafjarðar undir handleiðslu Ingunnar Óskar Sturludóttur. Vox Domini er opin söngvurum yngri en 35 ára og er þar keppt til verðlauna í 3. flokkum: miðstigi, framhaldi og opnum flokki, sem er fyrir þá sem eru að stíga sín fyrstu spor í þessari atvinnugrein og verða veittar viðurkenningar þeim sem þykja skara fram úr í hverjum flokki. Aron Ottó keppir á miðstigi en þar etja kappi þeir nemendur sem lokið hafa grunnprófi.

Er þetta í fyrsta sinn sem keppnin er haldin en stefnt er að því að hún verði árlegur viðburður og er hún fyrsta keppni sinnar tegundar hér á landi. Þess má geta að Sigrún Pálmadóttir, söngkennari við Tónlistarskóla Ísafjarðar, er meðal dómara í keppninni. Hún mun þó víkja úr dómnefnd þegar Aron Ottó stígur á stokk.

annska@bb.is

Ferðamannapúls Gallup lækkar um 2,1 stig milli mánaða og hefur aldrei mælst lægri. Púlsinn í desember er 80,6 stig af 100 mögulegum en var 82,7 stig í október. Í desember var ferðamannapúlsinn hæstur meðal ferðamanna frá Spáni eða 85,9 stig. Þar á eftir komu Frakkar með 83,8 stig og þá Bandaríkjamenn, Þjóðverjar og Kanadamenn. Ferðamannapúlsinn er lægstur meðal ferðamanna frá Malasíu, Singapúr og Írlandi. Ferðamannapúls Gallup byggir á svörum ferðamanna við spurningum að Íslandsferð lokinni.

Allir undirþættir ferðamannapúlsins lækka milli mánaða en mest lækka þættir sem snúa að því hvort Íslandsferðin hafi uppfyllt væntingar, hvort ferðin hafi verið peninganna virði sem og heildaránægja með Íslandsferðina en einkunn á heildaránægjuþættinum fer í fyrsta sinn undir 80 stig.

Þeir ferðamenn sem dvöldu hér á landi yfir jól og/eða áramót voru spurðir hvort það hafi uppfyllt væntingar þeirra að eyða jólunum/áramótunum á Íslandi. Um 21% sagði að það að eyða jólunum á Íslandi hafi að öllu leyti uppfyllt væntingar og tæplega 37% sögðu það hafa að miklu leyti uppfyllt væntingar þeirra. Naumlega 28% sögðu það hafa uppfyllt væntingar þeirra að einhverju leyti en tæp 15% sögðu að það hafi að litlu eða engu leyti uppfyllt væntingar þeirra.

Hins vegar sögðu rúm 48% það hafa að öllu leyti uppfyllt væntingar sínar að eyða áramótunum á Íslandi og tæplega 34% sögðu það hafa að miklu leyti uppfyllt væntingar. Rúmlega 11% sögðu það hafa að einhverju leyti uppfyllt væntingar þeirra en naumlega 6% sögðu að það hafi að litlu eða engu leyti uppfyllt væntingar þeirra.

smari@bb.is

Þingmenn úr öllum flokkum stjórn­ar­and­stöð­unnar vilja að Krist­ján Þór Júl­í­us­son, mennta- og menn­ing­ar­mála­ráð­herra, skipi starfs­hóp til að gera úttekt á starf­semi fjöl­miðla utan höf­uð­borg­ar­svæð­is­ins og leiðir til að tryggja stöðu þeirra. Þrettán þingmenn stjórnarandstöðuflokkanna standa að þings­á­lykt­un­ar­til­lögu þess efnis á Alþing­i.

Sam­kvæmt til­lög­unni á starf­hóp­ur­inn að leggja fram til­lögur sem fela í sér aðferðir og leiðir til að efla og tryggja stöðu lands­byggð­ar­fjöl­miðla „þannig að þeir fái gegnt lýð­ræð­is-, menn­ing­ar-, upp­lýs­inga- og fræðslu­hlut­verki sín­u.“ Hóp­ur­inn eigi að skila skýrslu og til­lögum eigi síðar en 1. nóv­em­ber næst­kom­and­i.

„Fáum blandast hugur um mikilvægi frjálsrar fjölmiðlunar enda er þekking almennings á umheiminum og skilningur á honum að miklu leyti kominn undir fréttum miðlanna og annarri umfjöllun þeirra. Staðbundnir fjölmiðlar og fjölmiðlar á landsvísu sem starfræktir eru utan höfuðborgarsvæðisins gegna hlutverki við að tryggja nauðsynlega fjölbreytni lýðræðislegrar umræðu og skoðanaskipta þar sem margvísleg sjónarmið njóta sín og verða grundvöllur afstöðu og ákvarðanatöku,“ segir í greinargerð með tillögunni.

smari@bb.is

Farþegar í áætluðu inn­an­lands­flugi Flug­fé­lags Íslands næstu þrjá daga hafa verið látn­ir vita af þeim mögu­leika, að verk­fall Flugfreyjufélags Íslands geti skollið á í fyrra­málið. Þetta seg­ir Árni Gunn­ars­son fram­kvæmda­stjóri fé­lags­ins, í sam­tali við mbl.is.

Hafa farþeg­arn­ir ým­ist verið látn­ir vita með texta­skila­boðum í síma eða tölvu­pósti, eft­ir þeim upp­lýs­ing­um sem þeir gáfu upp við bók­un.

„Við höf­um und­ir­búið okk­ar farþega og látið þá vita af þess­um mögu­leika, og boðið þeim val­kosti til að bregðast við þessu,“ er haft eftir Árna.

Allt flug Flugfélags Íslands felur niður klukkan sex í fyrramálið ef samningar nást ekki fyrir þann tíma. Samkvæmt verkfallsboðun Flugfreyjufélagsins þá er einnig gert ráð fyr­ir ótíma­bundnu verk­falli, sem hefjast mun klukk­an sex að morgni sjötta fe­brú­ar.

smari@bb.is

Í Vísindaporti Háskólaseturs Vestfjarða þessa vikuna mun líffræðingurinn, doktorsneminn og Ísfirðingurinn Sigurður Halldór Árnason fjalla um rannsókn sína á íslenskum dvergbleikjustofnum. Erindið ber titilinn: Hvernig mótar umhverfið svipfarsbreytileika á meðal dvergbleikjustofna í ferskvatnslindum á Íslandi?

Í erindinu mun Sigurður fjalla um doktorsverkefni sitt en í því er hann að skoða áhrif umhverfis á þróun smábleikju á Íslandi. Hann mun ræða um það hvernig umhverfið getur haft bein áhrif á þróun stofna og þær breytingar sem geta orðið á umhverfinu í kjölfar slíkra breytinga. Einnig mun hann kynna aðferðir sem hann notar til að skoða hvort og hvernig mismunandi umhverfisaðstæður leiða til þróunar á mismunandi svipfari meðal smábleikjustofna hér á Íslandi. Að lokum mun hann kynna brot af niðurstöðum sínum og ræða hvaða þýðingu þær geta haft fyrir skilning okkar á því hvernig samspil vist- og þróunarferla móta líffræðilegan fjölbreytileika.

Sigurður Halldór er Ísfirðingur að uppruna en fluttist ungur til Bandaríkjanna. Hann er með MSc gráðu í líffræði frá Háskóla Íslands þar sem hann sérhæfði sig í frumerfðafræði og stofnerfðafræði plantna. Hann lauk BS nám við Háskólann í Hawaii á Honolulu þar sem hann sérhæfði sig í vist- og þróunarfræði og vann við verndun einlendra landsnigla á Hawaii. Hann býr nú á Ísafirði ásamt konu sinni og tveimur börnum þar sem hann vinnur við að ljúka doktorsnámi í vatnalíffræði við Háskólann á Hólum í samstarfi við Háskóla Íslands.

Vísindaportið er að vanda öllum opið og stendur frá 12.10-13.00 í kaffistofu Háskólasetursins í Vestrahúsinu. Fyrirlesturinn að þessu sinni fer fram á ensku.

annska@bb.is

Afhending samfélagsstyrkja Orkubús Vestfjarða fór fram í gær á þremur stöðum samtímis; á Ísafirði, Patreksfirði og á Hólmavík. Orkubúinu bárust alls 82 styrkumsóknir og að þessu sinni voru veittir 42 styrkir að fjárhæð 3.425.000 kr. Styrkupphæðirnar eru frá 50 þúsund kr. og upp í 150 þúsund kr. Orkubúið vill með styrkjunum sýna stuðning í verki við þá aðila og félög sem sinna ýmsum samfélagsmálum á Vestfjörðum. Og eins og sjá má á listanum hér fyrir neðan, getur verið um að ræða ýmiskonar starfsemi eða félagasamtök, svo sem björgunarsveitir, íþrótta- og æskulýðsstarf, menningarstarfsemi og listir, eða einhver önnur áhugaverð verkefni sem skipta máli fyrir vestfirskt samfélag.

Eftirtalin félagasamtök fengu styrk að þessu sinni:

• Björgunarsveitin Heimamenn: Björgunarstarf – búnaðarkaup 150 þús. kr.
• Ungmennafélagið Afturelding Reykhólum: Ungmennfélagsstarfsemi 50 þús. kr.
• Björgunarfélag Ísafjarðar: Björgunarstarf – búnaðarkaup 150 þús. kr.
• Blakdeild Vestra: Blak- búnaðarkaup 50 þús. kr.
• Edinborgarhúsið ehf: Hljóðkerfi 100 þús. kr.
• Golfklúbbur Ísafjarðar: Golf – unglingastarf 50 þús. kr.
• Handknattleiksdeild Harðar: Handknattleikur fámennar byggðir 50 þús. kr.
• Harmonikufélag Vestfjarða: Landsmót harmonikkuunnenda 50 þús. kr.
• Héraðssamband Vestfjarða 3 umsóknir: Fjölmenning (1), fámennar byggðir (2), barnastarf skíði (3) alls 200 þús. kr.
• Hollvinir skíðasvæðisins í Tungudal: Skíðasvæði fyrir byrjendur – töfrateppi 50 þús. kr.
• Knattspyrnudeild Vestra – yngri flokkar: Samstarf íþróttafélaga 50 þús. kr.
• Kvennakór Ísafjarðar: Landsmót kvennakóra 50 þús. kr.
• Rauða kross deildirnar á n Vestfjörðum: Búnaður til skyndihjálpar 100 þús. kr.
• Samgöngufélagið: Útvarpsendingar í jarðgöngum 50 þús. kr.
• Skíðafélag Ísafjarðar: Unglingalandsmót Íslands 100 þús. kr.
• Sunnukórinn: Kórstarf 50 þús. kr.
• Sæfari,félag áhugamanna um sjósport á Ísafirði: Námskeið fyrir unglinga 50 þús. kr.
• Tónlistarskóli Ísafjarðar: Hljóðfærakaup 75 þús. kr.
• Golfklúbbur Bolungarvíkur: Golf – unglingastarf 50 þús. kr.
• Heilsubærinn Bolungarvík: Körfuboltavöllur – útisvæði 100 þús. kr.
• Rafstöðin, félagasamtök: Rafminjasafn – uppbygging rafstöðvar 100 þús. kr.
• Sunddeild UMFB: Sunddeild – unglingastarf 50 þús. kr.
• Verslun Bjarna Eiríkssonar – Háaver ehf: Skipulag sýningar – saga verslunar 50 þús. kr.
• VáVest: Forvarnir 50 þús. kr.
• Björgunarsveitin Sæbjörg: Björgunarstarf – búnaðarkaup 150 þús. kr.
• Íþróttafélagið Grettir á Flateyri: Fimleikadeild – búnaður 50 þús. kr.
• Björgunarsveitin Björg Suðureyri: Björgunarstarf – búnaðarkaup 150 þús. kr.
• Íþróttafélagið Stefnir á Suðureyri: Útihreystitæki 50 þús. kr.
• Kvenfélagið Ársól: Varðveisla sögu Sóleyjar 100 þús. kr.
• Björgunarsveitin Blakkur: Björgunarstarf – búnaðarkaup 150 þús. kr.
• Golfklúbbur Patreksfjarðar: Golf – unglingastarf 50 þús. kr.
• Tónlistarskóli Vesturbyggðar: Hljóðfærakaup 75 þús. kr.
• Ungmennafélag Tálknafjarðar: Frjálsíþróttasvæði – uppbygging 75 þús. kr.
• Björgunarsveitin Kópur, Bíldudal.: Björgunarstarf – búnaðarkaup 150 þús. kr.
• Höfrungur leikdeild: Dýrin í Hálsaskógi 50 þús. kr.
• Kómedíuleikhúsið: Uppsetning á leikriti 50 þús. kr.
• Sjálfseignarstofnun Vélsmiðju Guðmundar J. Sigurðssonar: Eldsmíði – varðveisla þekkingar 50 þús. kr.
• Björgunarsveitin Dagrenning Hólmavík: Björgunarstarf – búnaðarkaup 150 þús. kr.
• Geislinn: Samstarf íþróttafélaga 50 þús. kr.
• Sauðfjársetur á Ströndum: Náttúrubarnaskóli 50 þús. kr.
• Skíðafélag Strandamanna: Gönguskíðaaðstaða 50 þús. kr.
• Björgunarsveitin Björg: Björgunarstarf – búnaðarkaup 150 þús. kr.

smari@bb.is