Vegna hættu á slitlagsskemmdum er ásþungi takmarkaður við 10 Tonn frá kl. 8 í fyrramálið á þjóðvegum um alla Vestfirði. Takmarkanirnar gilda á eftirtöldum vegum: Vestfjarðavegi 60 frá Dalsmynni, Barðastrandarvegi 62, Bíldudalsvegi 63, Djúpvegi 61 að Flugvallarvegi í Skutulsfirði, Laxárdalsheiði 59, Innstrandavegi 68 frá Borðeyri og Drangsnesvegi 643.
smari@bb.is
Um helgina fór fram fjölliðamót í B-riðli Íslandsmótsins hjá 9. flokki stúlkna í Bolungarvík. Heimastelpur í Vestra mættu KR-b og Val. Vestrastelpur gerðu sér lítið fyrir og unnu riðilinn og tryggðu sér þar með þátttöku í A-riðli í næstu umferð og fá þá tækifæri til að etja kappi við bestu lið landsins í þessum aldursflokki. Mótið hófst á laugardegi með leik Vestra og KR-b sem lauk með 35-43 sigri Vesturbæinganna. Vestrastúlkur léku strax aftur næsta leik og mættu þá Völsurum. Þær létu tap í fyrsta leik ekki á sig fá og og knúðu fram sigur 49-45 í fjörugum leik.
Á sunnudaginn var leikin önnur umferð og Vestrastúlkur mættu fyrst KR-b. Þær urðu fyrir áfalli snemma í leiknum þegar Katla Sæmundsdóttir, annar af leikstjórnendum liðsins og stigahæsti leikmaður þess fram að þessu, meiddist illa á ökkla og varð að hætta leik en Vestrastúlkur létu það ekki beygja sig og unnu leikinn 52-43.
Fyrir lokaleik mótsins þar sem Valur og Vestri mættust var því allt galopið um úrslit riðilsins. Með sigri gátu Vestra stúlkur tryggt sér sigur í riðlinum og þar með þátttöku í A-riðli í næstu umferð á meðan Valsstúlkur þurftu á sigri að halda til að halda sér uppi í B-riðli. Fljótlega kom þó í ljós að nokkuð var af Valsstúlkum dregið eftir erfiðan leik gegn KR skömmu fyrr. Vestri hafði undirtökin í leiknum sem lauk með 53-47 sigri Vestra og sæti í A-riðli þar með í höfn.
„Þessar efnilegu stelpur sýndu og sönnuðu eina ferðina enn að þær eiga framtíðina fyrir sér í körfubolta og hafa tekið stórstígum framförum í vetur undir handleiðslu Nökkva Harðarsonar þjálfara og Adams Smára Ólafssonar aðstoðarþjálfara. Þess má svo geta að Nökkvi stýrði liðinu á laugardag en þurfti að ferðast á Selfoss til að spila með meistaraflokki á sunnudag. Það kom því í hlut Guðna Ólafs Guðnasonar að stýra stelpunum á seinni daginn sem hann gerði af sinni alkunnu fagmennsku,“ segir á vef Vestra um frammistöðu stúlknanna.
smari@bb.is
Verðlagseftirlit ASÍ hefur birt niðurstöður verðlagskönnunnar sinnar þar sem skoðað var gjald sem 15 stærstu sveitarfélög landsins innheimta fyrir hádegisverð og síðdegisvistun grunnskólabarna. Gjald fyrir hádegisverð, 3 tíma síðdegisvistun og hressingu fyrir barn í neðri bekkjum grunnskólans er hæst í Garðabæ kr. 36.484 á mánuði en lægst í Sveitarfélaginu Skagafirði kr. 24.234. Í Ísafjarðarbæ er rukkað 31.603 krónur fyrir þessa þjónustu sem gerir sveitarfélagið það fimmta dýrasta. Þegar litið er til hækkana á milli ára er Ísafjarðarbær með minnstu heildarhækkunina, 1% en mest er hækkunin hjá Reykjavíkurborg eða 11%, þar er þó endanleg tala heldur lægri, kr. 26.100.
Ef eingöngu er skoðuð gjaldskrá fyrir hádegisverð grunnskólabarna má sjá allt að 41% verðmun milli sveitarfélaga. Hæsta verðið er í Ísafjarðarbæ þar sem máltíðin kostar 492 kr. eða 10.332 krónur á mánuði ef gert er ráð fyrir 21. vikum degi í mánuði. Lægsta verðið er hins vegar í Sveitarfélaginu Árborg, 349 kr. máltíðin eða 7.329 krónur á mánuði.
Mjög misjafnt er á milli sveitarfélaga hvernig gjaldskráin fyrir þjónustu við grunnskólabörn er uppbyggð. Til að einfalda samanburð milli sveitarfélagana miðaði verðlagseftirlitið samanburð sinn við 21 virkan dag í mánuði, vistun í þrjá tíma á dag ásamt hressingu í síðdegisvistinni.
Frekar um könnunina má lesa á vef ASÍ
Í gær hófst akstur frístundarútu milli Bolungarvíkur og Ísafjarðar. Ferðirnar eru eingöngu ætlaðar börnum og unglingum frá Bolungarvík og Ísafirði vegna þátttöku þeirra í skipulögðu tómstundastarfi. Ferðirnar eru ekki ætlaðar almenningi, og ræður þar m.a. gildandi sérleyfi á leiðinni og að um almenningssamgöngur gilda ákveðnar reglur. Stoppistöðvar eru við Íþróttamiðstöðina Árbæ í Bolungarvík, Íþróttahúsið á Torfnesi á Ísafirði og aðal stoppistöð strætó á Ísafirði í Pollgötu.
Fargjald verður ekki innheimt að svo stöddu en frístundarútan er tilraunaverkefni sem mun standa út maí 2017 og verður verkefnið þá endurskoðað fyrir næsta vetur. Uppsetning stundaskráa í frístundastarfi í Bolungarvík og á Ísafirði verður þá einnig endurskoðuð með hliðsjón af ferðum frístundarútu.
„Markmiðið með frístundarútu er að bæta þjónustu við börn og unglinga sem stunda íþróttir og aðrar tómstundir í Bolungarvík og á Ísafirði og minnka álag á foreldra og aðstandendur. Ef vel gengur verður frístundarútan afar hagkvæm frá samfélagslegu sjónarmiði, sparar tíma og óþægindi meðal iðkanda og aðstandenda þeirra og minnkar akstur verulega, segir Jón Páll Hreinsson, bæjarstjóri Bolungarvíkurkaupstaðar í tilkynningu
Vestfirskar ævintýraferðir ehf. annast aksturinn samkvæmt samningi en Bolungarvíkurkaupstaður og Ísafjarðarbær standa að verkefninu.
smari@bb.is
Vestfirskar fiskvinnslur hafa ekki sagt upp starfsfólki vegna sjómannaverkfallsins að sögn Finnboga Sveinbjörnssonar, formanns Verkalýðsfélags Vestfirðinga. Hann segir stöðuna í verkfallinu grafalvarlega. „Við höfum ekki fengið neinar tilkyninngar um uppsagnir í skilningi laganna. Tvö fyrirtæki, Íslenskt sjávarfang á Þingeyri og Oddi á Patreksfirði, tóku starfsfólk af launaskrá samkvæmt undanþáguheimild sem Vinnumálastofnun veitti. Þetta heimildarákvæði gerir fólki kleift að skrá sig beint á atvinnuleysisbætur,“ segir Finnbogi.
Önnur fyrirtæki hafa að sögn Finnboga haldið starfsfólk á launaskrá. „Hraðfrystihúsið – Gunnvör sem er stærsta fyrirtækið í vestfirskum sjávarútvegi hefur náð að halda út einhverri starfsemi með vinnslu á eldisfiski og verktöku fyrir önnur eldisfyrirtæki. Fyrirtækið hefur einnig verið með sitt starfsfólk á námskeiðum og það er mjög virðingarvert framtak hjá þeim í Hnífsdal. Sömuleiðis hefur Íslandssaga á Suðureyri verið með sitt fólk á námskeiðum.“
Finnbogi segir að einu uppsagnirnar sem félagið hefur fengið inn á borð til sína eru uppsagnir hjá Klofningi á Barðaströnd. „Þær uppsagnir eru ekki tengdar sjómannaverkfallinu heldur hafa með erfiðar markaðsaðstæður í Nígeríu að gera.“
Eins og fram hefur komið er lítill gangur í viðræðum sjómanna og útvegsmanna. „Málið er komið í mjög sérstaka stöðu og það vekur mikla furðu að ríkisstjórnin segi það trekk í trekk að hún ætli ekki að koma að lausn deilunnar.“
Finnbogi segir að ríkið geti komið að málinu með öðrum hætti en með beinni lagasetningu á verkfallið. „Það er til dæmis sanngjörn krafa að ríkisvaldið viðurkenni rétt sjómanna á skattfrjálsum dagpeningum. Þeir eiga rétt á þeim eins og aðrir sem starfa fjarri heimilum sínum. Þetta yrði sennilega einn af þeim lyklum sem þarf að snúa til að leysa deiluna,“ segir Finnbogi Sveinbjörnsson.
Smari@bb.is
Eitt umferðaróhapp varð í umdæmi lögreglunnar á Vestfjörðum í síðastliðinni viku. En þá missti ökumaður stjórn á bifreið sinni á Hjallahálsi. Bifreiðin rann út af veginum og valt a.m.k. eina veltu. Ökumaður, sem var einn í bifreiðinni, var fluttur til skoðunar á heilsugæslustöðina á Hólmavík. Áverkar hans reyndust minni háttar.
Skemmtanahald fór vel fram en víða voru haldin þorrablót.
Tíðarfarið hefur verið með eindæmum gott og greiðfært verið víðast hvar. Oftar en ekki hefur það haft í för með sér að ökumenn gleymi sér og aki hraðar en ella. Lögreglan fylgist vel með og eru ökumenn minntir á að aka með varúð þó svo vegur sé auður og hindrunarlaus.
Í síðustu viku bárust lögreglunni á Vestfjörðum tvær tilkynningar frá íbúum í miðbæ Ísafjarðar um lausan hund. Um var að ræða sama hundinn í báðum tilvikum sem virtist ganga laus og í öðru tilvikinu fór hundurinn inn um ólæstar íbúðardyr. Enginn var heima og þegar íbúar komu heim var hundurinn búinn að éta ýmislegt matarkyns í eldhúsinu. Eigendum hundsins hefur verið gerð grein fyrir ákvæðum samþykktar Ísafjarðarbæjar um hundahald. Auk þess sem viðkomandi sviði Ísafjarðarbæjar hefur verið gerð grein fyrir þessu.
smari@bb.is
Á Vestfjörðum er vaxandi suðaustanátt og upp úr hádegi má búast við 15-23 m/s og rigningu með köflum. Heldur áfram að bæta í vind og verða 18-25 m/s í nótt og á morgun, en dregur úr vindi síðdegis. Hiti verður á bilinu 2 til 7 stig. Í athugasemdum veðurfræðings á vef Veðurstofu Íslands segir að næstu tvo sólarhringa gangi á með sunnan- og suðaustanhvassviðri eða -stormi, jafnvel roki við vesturströndina um tíma á morgun. Vætusamt verður á sunnanverðu landinu, en þurrt að kalla fyrir norðan. Dregur síðan talsvert úr vindi og úrkomu og kólnar og má þá vænta élja á vestanverðu landinu. Um helgina hvessir svo af suðvestri, hlýnar og fer aftur að rigna.
Á Vestfjörðum er hálka eða hálkublettir á flestum fjallvegum en greiðfært á láglendi, hálkublettir eru norður í Árneshrepp.
Sífellt verður háværari umræðan um hverslags skaðvaldur plastúrgangur getur verið umhverfinu og lífríki jarðar. Í síðustu viku rataði í fréttir hér á landi sem víðar frétt sem sagði af rúmlega sex metra löngum gáshnalli sem synti ítrekað á land við Björgvin í Noregi. Hvalurinn var á endanum aflífaður og þá kom í ljós að hann hafði innbyrt meira en þrjátíu plastpoka. Fjallað var um málið í kvöldfréttum RÚV á sunnudag þar sem sagði að plastmengun í hafi væri víða mikið vandamál og væri Ísland ekki undanskilið þó ekki hefði komið upp álíka mál hér á landi.
Í fréttinni var sagt frá hreinsunarátökum sem farið hefur verið í hér á landi og þar tekin dæmi um hreinsun á Hornströndum sem og á Rauðasandi, en hreinsunarferðir eru farnar árlega á Hornstrandir og þá komast yfirleitt færri með en vilja í þá leiðangra sem iðulega skila af sér gífurlegu magni af rusli.
Sigríður Kristinsdóttir sérfræðingur í haf- og vatnsstreymi hjá Umhverfisstofnun hvatti í fréttinni fólk til þess að minnka plastnotkun og flokka rusl, sem hún sagði afar mikilvægt í ljósi þess að það tekur plast langan tíma að brotna niður í náttúrunni – allt að hundruðum ára.
Einn liður í aukinni meðvitund fólks um málið er að hafna plastumbúðum hvarvetna sem því verður við komið. Verslunarfólk er að verða meðvitaðra um þetta líkt og sagt var frá í viðtali við fisksalann Kára Jóhannsson í Fiskbúð Sjávarfangs.
Vestri sigraði FSu á Selfossi um helgina, 70-80. Þetta var gríðarlega mikilvægur sigur í baráttunni um laust sæti í úrslitakeppninni. Með sigrinum standa lið Vestra og Hamars jöfn að stigum í 5.-6. sæti með 14 stig. Þessi tvö lið mætast svo á Jakanum í næstu umferð, föstudaginn 17. febrúar kl. 19:15. Ekki þarf að fjölyrða um mikilvægi þess leiks því innbyrðis viðureignir Vestra og Hamars geta vegið þungt þegar upp er staðið.
Vestri lék tvo leiki í körfunni um helgina því á föstudagskvöld var tekið á móti Fjölni í íþróttahúsinu á Torfnesi. Skemmst er frá því að segja að gestirnir fóru með sigur af hólmi 68-86. Afar góður þriðji leikhluti gestanna skar í raun út um leikinn eftir jafnan fyrri hálfleik. Lið Vestra var hálf vængbrotið í leiknum, Yima Chia-Kur varla stiginn upp úr veikindum auk þess sem Adam Smári Ólafsson var meiddur og Magnús Breki Þórðarson var kallaður heim í til Þórs í Þorlákshöfn vegna meiðsla þar á bæ.
smari@bb.is
Eftir hörkuspennandi fimmhrinu leik Vestrakvenna á laugardaginn í blaki gegn Fylkiskonum, vannst sætur sigur. Fyrsta hrinan var æsispennandi og endaði í 25-27 fyrir Fylki en Vestri girti sig heldur betur í brók í næstu tveimur og vann þær með 25-17 og 25-23, sigur í fjórðu hrinu féll svo Fylki í skaut 18-25 en í oddahrinu náði Vestri yfirhöndinni naumlega og sigraði 15-13.
Vestri er því enn í fjórða sæti deildarinnar með 12 stig en á tvo leiki til góða. Afturelding B og HK B eru að því er virðist geirnegld í fyrsta og annað sætið með 25 og 24 stig en aðeins sex stig skilja að liðin í þriðja – áttunda sæti og þar getur allt gerst.
Ágæt mæting var á bekkina en stuðningur heimamanna er ómetanlegur á leikjum sem þessum. Næstu helgi á Vestri útileiki við Stjörnuna B og ÍK en laugardaginn 25. febrúar mætir topplið deildarinnar Afturelding B og þá er eins gott að vera búin að taka lýsið.
bryndis@bb.is
