Stormur ríkir frameftir degi á Vestfjörðum með suðaustan 18-25 m/s, en það dregur úr vindi síðdegis. Rigning verður með köflum og hiti 2 til 7 stig. Suðaustan 8-15 m/s og úrkomulítið seint í kvöld, en hægari á morgun. Kólnar og hiti verður á bilinu 0 til 4 stig á morgun.

Á vef Veðurstofu Íslands er varað við suðaustan roki eða ofsaveðri um landið vestanvert er búist er við vindstyrk allt að 30 m/s fram eftir degi. Hvassast verður við Breiðafjörð og á Norðurlandi Vestra kringum hádegi, en síðdegis lægir talsvert.

Á Vestfjörðum er hálka á Steingrímsfjarðarheiði en hálkublettir á Þröskuldum,  Kleifaheiði og Hálfdáni og einnig á köflum á Ströndum. Óveður er á Kleifaheiði og Ennishálsi.

annska@bb.is

Stjórn Fjórðungssambands Vestfirðinga hefur samþykkt tillögu um að sambandið taki upp á sína arma umræðu um nýja tekjustofna sveitarfélaga. Pétur G. Markan, formaður Fjórðungssambandsins, segir nauðsynlegt fyrir sveitarfélögin, sem hafa mikla þjónustuskyldu, að þau verji tekjustofna sína og sæki nýja sé þess kostur. „Það er algjörlega borðleggjandi að sveitarfélög eiga rétt á hlutdeild í skattstofnum á fyrirtæki. Enda ekki til það fyrirtæki sem ekki er í sveit sett,“ segir Pétur sem telur eðlilegt að sveitarfélögin fái hlut af fjármagnstekjuskatti. „Það myndi rétta af útsvarsskerðingu vegna ehf-væðingarinnar,“ segir hann.

Það er ekki einvörðungu fjármagnstekjuskattur sem Pétur og stjórn Fjórðungssambandsins telja að sveitarfélögin eigi að fá hlutdeild í. „Það er afar brýnt að sveitarfélögin geri skýlausa kröfu um tekjustofna af eldisuppbyggingunni. Þetta er gott verkefni fyrir Fjórðungssambandið að vinna að enda  miklir hagsmunir í húfi fyrir almenning á Vestfjörðum.“

Stjórnin ætlar að láta vinna minnisblað um þessa nýju tekjustofna og verður minnisblaðið lagt fyrir næsta stjórnarfund. Í framhaldinu ætlar sambandið að taka upp viðræður við stjórnvöld um málið.

smari@bb.is

Ekkert er flogið frá Reykjavíkurflugvelli í morgunsárið vegna þess mikla hvassviðris sem geisar. Búið er að aflýsa bæði morgunflugi sem og síðdegisflugi til Ísafjarðar, en næsta athugun fyrir flug til Akureyrar og Egilsstaða er í athugun klukkan 14:15.

Óveðurslægðin krappa fer hratt hjá skammt fyrir vestan land fyrir og um hádegi. Það hvessir verulega suðvestan- og vestanlands upp úr klukkan 9 og  nær hámarki um hádegi. Reikna má við veðurhæð 23-30 m/s og hviður verða staðbundið allt að 40-50 m/s.  Vestan til á Norðurlandi, allt norður í Skagafjörð  verður einnig foráttuhvasst og verður í hámarki þar á milli kl. 11 og 14.

Á vef vegagerðarinnar er sérstaklega er varað við aðstæðum á Reykjanesbraut á milli kl. 09 og 12, þar sem vindur  þvert á veginn verður 22-25 m/s með hviðum 35 m/s. Slagveðursrigning á sama tíma og vatn í hjólförum.

annska@bb.is

Sveitarstjórn Súðavíkurhrepps leggur mikla áherslu á áform fiskeldisfyrirtækja í Ísafjarðardjúpi hafi sem minnst neikvæð áhrif á umhverfi sveitarfélagsins. Í umsögnum sveitarstjórnar um matsáætlanir Háfells ehf., Arnarlax ehf., og Arctic Sea Farm, er farið fram á einstakir viðkvæmir umhverfisþættir verði kannaðir sérstaklega í gerð umhverfismats og leggur sveitarstjórn áherslu á að kanna áhrif laxeldis á laxveiðiár í sveitarfélaginu og að burðarþolsmat Ísafjarðardjúps verði framkvæmt sem fyrst.

Sveitarstjórnin minnir á mikilvægi þess að skipulagsvald sveitarfélaga nái yfir aðliggjandi strandsvæði, firði og flóa og Súðavíkurhreppur telur æskilegt er að skipulag standsjávar nái út að einni sjómílu frá grunnlínu.

Þá vill sveitarstjórn tryggja sveitarfélögum sanngjarna tekjustofna af starfsemi fiskeldisfyrirtækjanna, hvort sem það er gegnum auðlindargjald eða annað form.

Fyrirtækin þrjú stefna á stórfellt laxeldi í Ísafjarðardjúpi og leyfisumsóknir fyrirtækjanna eru samanlagt upp á 24.400 tonn.

smari@bb.is