Í gær hófst akstur frístundarútu milli Bolungarvíkur og Ísafjarðar. Ferðirnar eru eingöngu ætlaðar börnum og unglingum frá Bolungarvík og Ísafirði vegna þátttöku þeirra í skipulögðu tómstundastarfi. Ferðirnar eru ekki ætlaðar almenningi, og ræður þar m.a. gildandi sérleyfi á leiðinni og að um almenningssamgöngur gilda ákveðnar reglur. Stoppistöðvar eru við Íþróttamiðstöðina Árbæ í Bolungarvík, Íþróttahúsið á Torfnesi á Ísafirði og aðal stoppistöð strætó á Ísafirði í Pollgötu.

Fargjald verður ekki innheimt að svo stöddu en frístundarútan er tilraunaverkefni sem mun standa út maí 2017 og verður verkefnið þá endurskoðað fyrir næsta vetur. Uppsetning stundaskráa í frístundastarfi í Bolungarvík og á Ísafirði verður þá einnig endurskoðuð með hliðsjón af ferðum frístundarútu.

„Markmiðið með frístundarútu er að bæta þjónustu við börn og unglinga sem stunda íþróttir og aðrar tómstundir í Bolungarvík og á Ísafirði og minnka álag á foreldra og aðstandendur. Ef vel gengur verður frístundarútan afar hagkvæm frá samfélagslegu sjónarmiði, sparar tíma og óþægindi meðal iðkanda og aðstandenda þeirra og minnkar akstur verulega, segir Jón Páll Hreinsson, bæjarstjóri Bolungarvíkurkaupstaðar í tilkynningu

Vestfirskar ævintýraferðir ehf. annast aksturinn samkvæmt samningi en Bolungarvíkurkaupstaður og Ísafjarðarbær standa að verkefninu.

► Áætlun rútunnar

smari@bb.is

Vestfirskar fiskvinnslur hafa ekki sagt upp starfsfólki vegna sjómannaverkfallsins að sögn Finnboga Sveinbjörnssonar, formanns Verkalýðsfélags Vestfirðinga. Hann segir stöðuna í verkfallinu grafalvarlega. „Við höfum ekki fengið neinar tilkyninngar um uppsagnir í skilningi laganna. Tvö fyrirtæki, Íslenskt sjávarfang á Þingeyri og Oddi á Patreksfirði, tóku starfsfólk af launaskrá samkvæmt undanþáguheimild sem Vinnumálastofnun veitti. Þetta heimildarákvæði gerir fólki kleift að skrá sig beint á atvinnuleysisbætur,“ segir Finnbogi.

Önnur fyrirtæki hafa að sögn Finnboga haldið starfsfólk á launaskrá. „Hraðfrystihúsið – Gunnvör sem er stærsta fyrirtækið í vestfirskum sjávarútvegi hefur náð að halda út einhverri starfsemi með vinnslu á eldisfiski og verktöku fyrir önnur eldisfyrirtæki. Fyrirtækið hefur einnig verið með sitt starfsfólk á námskeiðum og það er mjög virðingarvert framtak hjá þeim í Hnífsdal. Sömuleiðis hefur Íslandssaga á Suðureyri verið með sitt fólk á námskeiðum.“

Finnbogi segir að einu uppsagnirnar sem félagið hefur fengið inn á borð til sína eru uppsagnir hjá Klofningi á Barðaströnd. „Þær uppsagnir eru ekki tengdar sjómannaverkfallinu heldur hafa með erfiðar markaðsaðstæður í Nígeríu að gera.“

Eins og fram hefur komið er lítill gangur í viðræðum sjómanna og útvegsmanna. „Málið er komið í mjög sérstaka stöðu og það vekur mikla furðu að ríkisstjórnin segi það trekk í trekk að hún ætli ekki að koma að lausn deilunnar.“

Finnbogi segir að ríkið geti komið að málinu með öðrum hætti en með beinni lagasetningu á verkfallið. „Það er til dæmis sanngjörn krafa að ríkisvaldið viðurkenni rétt sjómanna á skattfrjálsum dagpeningum. Þeir eiga rétt á þeim eins og aðrir sem starfa fjarri heimilum sínum. Þetta yrði sennilega einn af þeim lyklum sem þarf að snúa til að leysa deiluna,“ segir Finnbogi Sveinbjörnsson.

Smari@bb.is

Eitt umferðaróhapp varð í umdæmi lögreglunnar á Vestfjörðum í síðastliðinni viku. En þá missti ökumaður stjórn á bifreið sinni á Hjallahálsi. Bifreiðin rann út af veginum og valt a.m.k. eina veltu. Ökumaður, sem var einn í bifreiðinni, var fluttur til skoðunar á heilsugæslustöðina á Hólmavík. Áverkar hans reyndust minni háttar.

Skemmtanahald fór vel fram en víða voru haldin þorrablót.

Tíðarfarið hefur verið með eindæmum gott og greiðfært verið víðast hvar. Oftar en ekki hefur það haft í för með sér að ökumenn gleymi sér og aki hraðar en ella. Lögreglan fylgist vel með og eru ökumenn minntir á að aka með varúð þó svo vegur sé auður og hindrunarlaus.

Í síðustu viku bárust lögreglunni á Vestfjörðum tvær tilkynningar frá íbúum í miðbæ Ísafjarðar um lausan hund. Um var að ræða sama hundinn í báðum tilvikum sem virtist ganga laus og í öðru tilvikinu fór hundurinn inn um ólæstar íbúðardyr. Enginn var heima og þegar íbúar komu heim var hundurinn búinn að éta ýmislegt matarkyns í eldhúsinu. Eigendum hundsins hefur verið gerð grein fyrir ákvæðum samþykktar Ísafjarðarbæjar um hundahald. Auk þess sem viðkomandi sviði Ísafjarðarbæjar hefur verið gerð grein fyrir þessu.

smari@bb.is

Sífellt verður háværari umræðan um hverslags skaðvaldur plastúrgangur getur verið umhverfinu og lífríki jarðar. Í síðustu viku rataði í fréttir hér á landi sem víðar frétt sem sagði af rúmlega sex metra löngum gáshnalli sem synti ítrekað á land við Björgvin í Noregi. Hvalurinn var á endanum aflífaður og þá  kom í ljós að hann hafði innbyrt meira en þrjátíu plastpoka. Fjallað var um málið í kvöldfréttum RÚV á sunnudag þar sem sagði að plastmengun í hafi væri víða mikið vandamál og væri Ísland ekki undanskilið þó ekki hefði komið upp álíka mál hér á landi.

Í fréttinni var sagt frá hreinsunarátökum sem farið hefur verið í hér á landi og þar tekin dæmi um hreinsun á Hornströndum sem og á Rauðasandi, en hreinsunarferðir eru farnar árlega á Hornstrandir og þá komast yfirleitt færri með en vilja í þá leiðangra sem iðulega skila af sér gífurlegu magni af rusli.

Sigríður Kristinsdóttir sérfræðingur í haf- og vatnsstreymi hjá Umhverfisstofnun hvatti í fréttinni fólk til þess að minnka plastnotkun og flokka rusl, sem hún sagði afar mikilvægt í ljósi þess að það tekur plast langan tíma að brotna niður í náttúrunni – allt að hundruðum ára.

Einn liður í aukinni meðvitund fólks um málið er að hafna plastumbúðum hvarvetna sem því verður við komið. Verslunarfólk er að verða meðvitaðra um þetta líkt og sagt var frá í viðtali við fisksalann Kára Jóhannsson í Fiskbúð Sjávarfangs.

annska@bb.is

Í-listinn vill vinna að því að íbúar Ísafjarðarbæjar geti með rafrænni íbúakosningu tekið þátt í ákvörðun um hvort farið verði í endurbyggingu Sundhallar Ísafjarðar. Fram að kosningu ætlar bærinn að kynna betur vinningstillögu Kanon arkitekta sem kunngjörð var í síðustu viku og hvaða atriði í tillögunni mætti gera með öðrum hætti.  Einnig þurfi að liggja fyrir hver annar kostnaður verður vegna Sundahallarinnar sem ekki tengjast vinningstillögunni með beinum hætti. Gísli Halldór Halldórsson, bæjarstjóri Ísafjarðarbæjar, skrifar á Facebook að kostnaður við viðhald á ytra byrði Sundhallarinnar sé dæmi um þetta. „Viðhald á ytra byrði þarf hvort eð er að fara fram ef ekki á að rífa Sundhöllina. Það virðist nokkuð ljóst að almenningur vilji alls ekki rífa þessa merkilega byggingu,“ skrifar Gísli Halldór.

Þá liggur fyrir að skoða þarf kostnað við endurnýjun á laugarbúnaði og bæjarstjórinn segir það ótvírætt að annaðhvort þurfi að enurnýja laugarbúnað eða loka sundlauginni.

Gísli Halldór segir að mikill þrýstingur sé á Ísafjarðarbæ að finna framtíðarhúsnæði fyrir líkamsræktaraðstöðu og þriðja hæð Sundhallarinnar gefur vissulega möguleika á því en þá þurfi að útfæra hvort það verkefni verði selt út í heilu lagi til einkaaðila eða hvort bærinn taki með einhverjum hætti þátt í því.

„Ef ekki á að rífa Sundhöllina og ekki á heldur að endurnýja laugarbúnað og búningsklefa þá þarf að finna byggingunni annað hlutverk og gera breytingar til að aðlaga hana að því hlutverki. Það mun áreiðanlega líka kosta mikinn pening,“ skrifar bæjarstjórinn að lokum.

smari@bb.is

Foreldrar menntaskólanema mæta ræðuliði Menntaskólans á Ísafirði í spennandi æfingaviðureign í gryfju MÍ á miðvikudagskvöldið. Þar mun væntanlega reyna á bæði lið er þau takast á um umræðuefnið „Djammið er snilld, þynnkan er lífsstíll!“ Þar sem foreldrar tala fyrir því, en nemendur gegn.

Ræðulið skólans skipa þau Hákon Ernir Hrafnsson, Ingunn Rós Kristjánsdóttir, Veturliði Snær Gylfason og Þórður Alexander Úlfur Júlíusson og voru þau öll að Hákoni undanskildum í ræðuliði skólans síðasta vetur. Það eru engir aukvisar fengnir til að reyna á getu nemendanna, en í foreldraliðinu eru séra Fjölnir Ásbjörnsson, Sigríður Lára Gunnlaugsdóttir, sjúkraþjálfari og framkvæmdastjóri HSV og Svavar Þór Guðmundsson, kerfisstjóri.

Ræðukeppnin fer fram í gryfju MÍ klukkan 20 á miðvikudagskvöldið og eru nemendur skólans og foreldrar sérstaklega hvattir til að mæta. Á meðfylgjandi mynd sem birtist á Nútímanum má sjá samansafn af þynnkumyndum af rappstjörnunni Emmsjé Gauta þar sem hann hafði tekið saman lífið eftir djamm.

Ræðulið M.Í. undirbýr sig fyrir keppni í 8 liða úrslitum Morfís og mun skólinn mæta Menntaskólanum að Laugarvatni í heimaleik þann 16.febrúar.

annska@bb.is