Á föstudaginn fékk lögreglan á Vestfjörðum tilkynningu um að verið væri að brenna sinu í Mjóafirði, skammt frá brúnni við Hrútey. Þegar lögreglumenn komu á vettvang var engan að finna á svæðinu en greinilegt að sina hafði verið brennd á allstóru svæði í Hrútey og nánasta nágrenni. Málið er til rannsóknar hjá lögreglunni. Lögreglan minnir á reglugerð um meðferð elds og varnir gegn gróðureldum Í reglugerðinni kemur fram að óheimilt sé að brenna sinu en þó sé eigendum jarða, á lögbýlum þar sem landbúnaður er stundaður, heimilt að brenna sinu en þó aðeins með skriflegu leyfi sýslumanns. Samkvæmt slíku leyfi má einungis brenna sinu á tímabilinu frá 1. apríl til 1. maí ár hvert. Aðeins í undantekningartilvikum má brenna sinu utan þess tímabils.

Alls voru 15 ökumenn kærðir fyrir að aka yfir leyfilegum hámarkshraða. Ökumennirnir voru stöðvaðir í Ísafjarðardjúpi, Strandasýslu og víðar í umdæminu. Sá sem hraðast ók var mældur á 141 km. hraða þar sem leyfilegur hámarkshraði er 90 km.

Tilkynnt var um eitt umferðarslys. Það var í Staðardal í Strandasýslu um miðjan dag í gær, sunnudaginn 12. febrúar. En þá valt jeppabifreið á veginum. Auk ökumanns voru fjórir farþegar í bifreiðinni. Meiðsl þeirra urðu minniháttar. Talið er að ökumaður hafi verið þreyttur og svefndrungi hafi orsakað atvikið. Ökumenn eru hvattir til þess að leggja ekki af stað ef þreyta er annars vegar og ef hún gerir vart við sig að stöðva og hvílast áður en haldið er áfram.

Einn ökumaður var kærður í liðinni viku fyrir að aka undir áhrifum áfengis. Sá var stöðvaður í Önundarfirði aðfaranótt sunnudagsins 12. febrúar.

smari@bb.is

Bæjarráð Ísafjarðarbæjar skorar á deiluaðila í sjómannaverkfallinu að sýna ábyrgð og ljúka samningum sem allra fyrst, enda er tjón vegna deilunnar orðið umtalsvert og fer hratt vaxandi. Tveir mánuðir eru á morgun frá því sjómannaverkfallið skall á. Tap vegna verkfalls sjómanna er metið fleiri milljarða króna og standi verkfallið lengur er áætlað að tapið geti numið um það bil milljarði á dag. Í nýrri skýrslu sjávarútvegsráðuneytisins kemur fram að heildaráhrif verkfallsins á ráðstöfunartekjur sjómanna eru talin nema um 3.573 milljónum króna til 10. febrúar 2017; tekjutap 2.400- 2.600 fiskverkamanna er metið á um 818 milljónir króna; tekjutap ríkissjóðs er gróft áætlað á tímabilinu 2,5 milljarðar króna og sveitarfélaga einn milljarður króna.

smari@bb.is

Vá Vesthópurinn lýsir yfir andstöðu við frumvarp til laga um breytingu á áfengislögum.  Hópurinn telur einsýnt að í breytingunum felist aðför að þeim góða árangri sem náðst hefur hér á landi í forvarnastarfi, sem m.a. hefur komið fram í niðurstöðum kannana meðal ungs fólks á vegum Rannsóknar & greiningar, undanfarna tvo áratugi.  Þetta kemur fram í umsögn Va Vest um frumvarp um að heimila sölu áfengis í matvöruverslunum. Í umsögninni segir að árangur Íslendinga í forvarnamálum sé ekki sjálfsagður. Hópurinn telur að þessi árangur sem margar aðrar þjóðir vildu státa af hafi orðið til með tvennum hætti. Annars vegar því forvarnastarfi sem Íslendingar hafa þróað og hins vegar heftu aðgengi ungmenna að áfengi í samræmi við gildandi áfengislög.

„Núverandi dreifingaraðili, ÁTVR, hvetur ekki til aukinnar sölu áfengis. Það er engin ástæða til að ætla annað en að einkaaðilar færu eins með sölu á áfengi og öðrum vöruflokkum sem verslunin hefur upp á að bjóða. Þar myndu lögmál markaðarins ráða. Þá er rétt að benda á að í flestum matvöruverslunum landsins, ekki síst í dreifðum byggðum, eru oft á tíðum ungmenni við afgreiðslu.,“ segir í umsögninni.

Vá Vesthópurinn er hópur fagaðila á norðanverðum Vestfjörðum sem hefur verið að störfum undanfarin 20 ár. Hlutverk og markmið hópsins er að sinna og stýra vímuefnaforvörnum á norðanverðum Vestfjörðum.

smari@bb.is

Sigurður Pétursson, framkvæmdastjóri Arctic Sea Farm, segir ályktun Landssambands veiðifélaga (LV) um fyrirætlanir fyrirtækisins um eldi í Ísafjarðardjúpi og rekstur stórs eiganda þess, Norway Royal Salmon (NRS), byggða á rangfærslum og misskilningi. LV sendi frá sér fréttatilkynningu í síðustu viku þar sem meðal annars er gagnrýnt að NRS stundi grænt eldi með ófrjóum laxi í Noregi, en ekki hérlendis.  Hann segir að ályktun LV megi skilja sem svo að meginstarfsemi NRS felist í eldi á ófrjóum laxi í Noregi. Það sé alrangt. „Vissulega er NRS leiðandi aðili á þessu sviði í Noregi. Hér er þó enn sem komið er aðeins um tilraunaverkefni að ræða sem NRS hefur metnað til að kanna til hlítar, einnig hér á landi í verkefni sem nú er í burðar­liðnum á vegum Arctic Sea Farm, NRS og fleiri aðila,“ segir Sigurður í fréttatilkynningu til fjölmiðla og bendir á að ófrjór lax nam einungis 1% ef heildarframleiðslu fyrirtækisins í fyrra og í norsku laxeldi nam framleiðslan á síðasta ári af ófrjóum laxi innan við 0,2 prósentum af heildinni.

„Að notkun geldstofna ryðji sér nú mjög til rúms í Noregi eins og fullyrt er í ályktun LV virðist því einungis ætlað að afvegaleiða umræðuna,“ segir Sigurður.

smari@bb.is

Tap vegna verkfalls sjómanna er metið fleiri milljarða króna og standi verkfallið lengur er áætlað að tapið geti numið um það bil milljarði á dag. Þetta kemur fram í skýrslu sjávarútvegs- og landbúnaðarráðherra um áhrif verkfallsins. Þorgerður Katrín Gunnarsdóttir, sjávarútvegs- og landbúnaðarráðherra, segir skýrsluna ekki leysa kjaradeiluna en hún varpi þó ljósi á þjóðfélagslegt tap deilunnar og gæti nýst í framtíðinni

Heildaráhrif verkfallsins á ráð- stöfunartekjur sjómanna eru talin nema um 3.573 milljónum króna til 10. febrúar 2017; tekjutap 2.400- 2.600 fiskverkamanna er metið á um 818 milljónir króna; tekjutap ríkissjóðs er gróft áætlað á tímabilinu 2,5 milljarðar króna og sveitarfélaga einn milljarður króna. „Ekki er hægt að halda því fram að þjóðhagslegt tap af völdum verkfallsins hafi numið 960-1.160 milljónum króna á hverjum verkfallsdegi hingað til, en bent er á að rannsóknir gefi það til kynna að við algjört og langvarandi vinnslustopp nálgist hið þjóðhagslega tap á degi hverjum þessar upphæðir. Vinnustoppið nú er hvorki algjört né langvarandi, en er engu að síður mjög víðtækt og hefur dregist á langinn þannig að áhrifa þess gætir nú talsvert víðar í hagkerfinu en á fyrstu vikum verkfallsins,“ segir í skýrslunni.

smari@bb.is

Frá því í lok nóvember 2016 hefur inflúensa A(H3) verið staðfest hjá 226 einstaklingum á landinu er fram kemur á vef Landlæknisembættisins. Í síðustu viku greindust fleiri með staðfesta inflúensu samanborið við vikurnar á undan og hefur hún nú verið staðfest í öllum landshlutum. Inflúensan er hlutfallslega algengari meðal 60 ára og eldri, meðalaldurinn er 63 ár hjá þeim sem greinst hafa frá því í nóvember. Inflúensan var fyrr á ferðinni á höfuðborgarsvæðinu en á síðustu vikum hefur inflúensan farið hægt vaxandi á landsbyggðinni. Frá því í byrjun desember hafa alls 95 einstaklingar legið á Landspítala vegna inflúensu, flestir yfir 70 ára, þar af greindist 21 í síðustu viku sem er aukning borið saman við vikurnar á undan.

Inflúensan er útbreidd í samfélaginu, sennilega er hún í hámarki núna og gera má ráð fyrir að tilfellum fækki á næstu vikum. Inflúensa A(H3N2) er sá stofn sem hefur verið í dreifingu, en ekki er útilokað að inflúensa A(H1N1) eða inflúensa B eigi eftir að koma í kjölfarið á næstu vikum.

Þeim fjölgar sem sem greinast með staðfesta Respiratory Syncytial veirusýkingu (RSV) en hún hefur greinst hjá alls 114 einstaklingum frá því í byrjun október, þar af 19 í síðustu viku sem er svipaður fjöldi og hefur greinst á síðastliðnum vikum. Það má því gera ráð fyrir að RSV sé í dreifingu í samfélaginu. Börn á fyrsta og öðru aldursári greinast hlutfallslega oftast með RSV en veiran hefur einnig verið staðfest hjá öðrum aldurshópum, einkum meðal aldraðra, sem ásamt ungabörnum er þekktur áhættuhópur. Þá er fjöldi tilkynninga frá heilsugæslunni og bráðamóttökum um niðurgang eins og gera má ráð fyrir á þessum árstíma.

annska@bb.is