Landsnet hefur tekið í notkun nýjan spenni í tengivirkinu í Mjólká sem eykur bæði flutningsgetu og afhendingaröryggi. Nils Gústavsson framkvæmdastjóri framkvæmda– og rekstrarsviðs Landsnets segir það ánægjulegt að hafa lokið þessum áfanga í styrkingu flutningskerfisins á Vestfjörðum. Margir komu að framkvæmdinni en verkefni eins og þetta er flókið í framkvæmd þar sem um er að ræða breytingar á tengivirki sem er í fullum rekstri.

„Í tengivirkinu okkar í Mjólká var fyrir 132/66 kV spennir sem var orðinn takmarkandi fyrir flutning raforku til Vestfjarða. Til að bregðast við því var settur annar spennir af sömu stærð inn í virkið sem gerir það að verkum að flutningsgetan eykst til muna sem og rekstraröryggið á svæðinu.“ segir Nils.

Undirbúningur fyrir verkið hófst haustið 2015 og spennirinn var spennusettur í lok desember og tekinn  í rekstur þann 26.janúar 2017.

smari@bb.is

Þorgerður Katrín Gunnarsdóttir, sjávarútvegs- og landbúnaðarráðherra mun flytja skrifstofu sína tímabundið vestur á Ísafjörð dagana 13. 14. og 15. febrúar næstkomandi. Með ráðherranum í för verður meðal annars ráðuneytisstjóri og aðstoðarmaður ráðherra.

Tilgangurinn með flutningunum er að heimsækja fyrirtæki og stofnanir og styrkja tengsl ráðuneytisins við sveitarfélög utan höfuðborgarsvæðisins. Áætlað er að skrifstofan flytji tímabundið út á land þrisvar til fjórum sinnum á ári.

Ráðherrann verður með viðtalstíma á Ísafirði milli kl. 08:30 og 12:00 þriðjudaginn 14. febrúar í fundarsal Háskólaseturs Vestfjarða.

Óskir um viðtöl skulu berast á netfangið gudny.steina.petursdottir@anr.is

smari@bb.is

Vinsælt getur verið hjá þeim sem sækja Vestfirði heim að kíkja í heimsókn á Náttúrustofu Vestfjarða í Bolungarvík og ekki hefur síður heimafólk gaman af heimsókn þangað, þá sér í lagi yngri kynslóðin. Í gær kom þangað í áhugasamur hópur úr Grunnskólanum í Bolungarvík og komu krakkarnir með tvær beinagrindur sem þeir höfðu fundið í fjöruferð við Bug og vildu fá greiningu á. Beinagrindurnar sem þau fundu voru annarsvegar af tjaldi og svo var þar stærri, heilleg beinagrind sem ungu rannsóknarmennirnir töldu nokkuð víst að væri af hinum sjaldséða fjörulalla, en einnig kom til greina að þar væri um að ræða kind.

Á vefsíðu tileinkaðri íslenskum kynjaskepnum sem nemendur í Laugarlækjarskóla unnu, segir að fjörulalla sé að finna víða með fram ströndum landsins, þó ekki hafi hans verið vart alls staðar og algengastur sé hann við Breiðafjörð og á Vestfjörðum. Fjörulalla er ekki að mörgu getið í fornum ritum en kemur fyrst fram á 19.öld. Þá var það 13 ára strákur sem sá hann þegar hann fór út í sker á Breiðafirði. Lýsing hans á Fjörulalla hljóðar svo: „Það var á stærð líkt og meðalstór hundur en þó öllu digurra, lágfætt og lubbalegt með rófu líkt og kind. Ekki kvaðst hann hafa getað greint hvort út úr haus þess stóðu eyru eða lítil horn og eigi gat hann heldur greint lögun á skoltum þess því alltaf sneri það afturhlutanum að honum. Þess var getið til að þarna hefði verið fjörulalli.“

Ekki eru allir allir sannfærðir um tilvist fjörulalla fremur en annarra furðuskepna, en stundum er ágætt að hafa það sem ævintýralegra reynist.

annska@bb.is

Keppnislið Menntaskólans á Ísafirði mætti liði Fjölbrautarskólans í Garðabæ í annarri umferð spurningakeppninnar Gettu betur í gærkvöldi. Lið MÍ háði þar drengilega baráttu en leit að lokum í minni pokann fyrir sterku liði FG sem sigraði með 35 stigum gegn 21 stigi MÍ. Það er því ljóst að MÍ birtist ekki á skjánum þetta árið en næstu stig keppninnar undanúrslit og úrslit fara fram í Sjónvarpinu og hefst keppnin þar föstudaginn 24.febrúar. Undanúrslit fara fram 23. og 25.mars og úrslitakeppnin verður í Háskólabíó föstudaginn 31.mars.

annska@bb.is

Smábátasjómenn á sunnanverðum Vestfjörðum hafa sótt sjóinn af hörku í sjómannaverkfallinu, en þeir eru ekki í verkfalli eins og kunnugt er. Oddi hf. hefur keypt hráefni af þeim bátum sem eru að róa frá Tálknafirði og Patreksfirði. Fiskeríið hefur verið með allra besta móti og það, auk harðrar sjósóknar, hefur gert að verkum að allt fiskvinnslufólk Odda hefur haft vinnu í 19 daga af 27 mögulegum vinnudögum frá áramótum. Er það annar veruleiki en flestar fiskvinnslur á landinu búa við í verkfallinu.

Sjómannaverkfallið veldur verulegu raski í byggðalögum allt landið um kring með tekjutapi sjómanna, verkafólks, útgerða og fyrirtækja sem þjónusta sjávarútveginn og samfélagslegt tjón verður seint metið til fullnustu. Með sjósókn smábáta á sunnanverðum Vestfjörðum hefur í það minnsta verið hægt að lágmarka það tjón sem landverkafólk verður fyrir.

smari@bb.is