Bæjarstjórn Bolungarvíkurkaupstaðar hvetur borgarstjórn Reykjavíkur til að opna tafarlaust aftur NA/SV flugbraut á Reykjavíkurflugvelli, svokölluð neyðarbraut, meðan ekki hefur fundist önnur viðunandi lausn varðandi sjúkraflug. Þetta kemur fram í bókun sem Guðrún Stella Gissurardóttir lagði fram á síðasta bæjarstjórnarfundi og var samþykkt samhljóða. „Öllum ætti að vera ljóst að  lending á neyðarbrautinni hefur og getur skipt sköpum varðandi sjúkraflug utan af landi, oft í erfiðum tilfellum þar sem um líf eða dauða er að tefla. Lokun neyðarbrautarinnar er ógn við öryggi og heilsu þeirra sem búa og starfa utan höfuðborgarsvæðisins,“ segir í bókuninni.

Reykjavíkurflugvöllur er eitt mikilvægasta samgöngumannvirki þjóðarinnar að mati bæjarstjórnar Bolungarvíkur og í bókuninni er áréttað mikilvægi þess að Reykjavík ræki hlutverk sitt sem höfuðborg og uppfylli skyldur við allt landið.

smari@bb.is

Þórólfur Matthíasson, prófessor í hagfræði við Háskóla Íslands, leggur til að stjórnvöld skerði fiskveiðikvóta næsta árs um allt að fimm prósent á viku meðan sjómannaverkfallið stendur yfir. Innkallaðan kvóta mætti síðan leigja út og nota andvirðið til að bæta stöðu þeirra sveitarfélaga sem hafi orðið hvað harðast úti í deilunni.

Þetta skrifar Þórólfur í aðsendri grein í Kjarnanum. Hann segir að nú þegar tveir mánuðir séu liðnir síðan sjómannaverkfallið hófst virðist deilendur fjær því að ná samkomulagi en við upphaf deilunnar, þvert á það sem ætla mætti. „Sé samningsvilji lítill leysast verkföll venjulega þegar annarhvor aðilinn eða báðir átta sig á að kostnaðurinn við áframhaldandi verkfall er þeim sjálfum of dýr,“ skrifar Þórólfur.

Verkfallið er byrjað að hafa áhrif á fjárhag sveitarfélaga sem treysta verulega á sjávarútveg og nefnir Þórólfur að þar hafi hægt á innstreymi útsvarstekna og hafnargjalda. „Þessi sveitarfélög geta ekki hægt á greiðslum til grunnskóla- og leikskólakennara sem dæmi séu tekin. Þau eru því í klemmu,“ skrifar Þórólfur.

Hann segir deiluna bitna harðast á þriðja aðila af meiri þunga en á bæði sjómenn og sjávarútvegsfyrirtæki. „Tekjuflæði sjávarútvegsfyrirtækja sem ekki eiga birgðir hægist eða stoppar meðan á verkfalli stendur. En þar sem þessi fyrirtæki hafa í höndum rétt til að veiða svo og svo mikið magn af fiski er aðeins um seinkun tekjuflæðis að ræða. Félög með góða eiginfjárstöðu eiga auðvelt með að leysa úr þeim fjárhagsvandræðum sem slík seinkun greiðsluflæðis kann að valda. Hugsanlega fæst lægra verð fyrir afurðir vegna tímabundins offramboðs þegar verfall leysist.“

Þá bendir hann á að sjómenn fái greiðslur úr verkfallssjóðum, og því leggist verkfallið af minni þunga á þá sem eru í verkfalli en á þriðja aðila. „Það eru því sterkar vísbendingar um að verkfallið geti staðið nokkrar vikur, jafnvel mánuði í viðbót,“ skrifar Þórólfur.

Ár­lega fá útgerð­ar­fé­lög bréf frá Fiski­stofu þar sem þeim er úthlutað rétti til veiða ákveð­ins magns af hinum ýmsu fiski­teg­und­um. Þórólfur segir að það sé ekkert sem banni stjórn­völdum að skil­yrða þá úthlutun sem fyrir dyrum stendur 1. sept­em­ber næst­kom­and­i.  Þannig gæti rík­is­stjórn og Alþingi ákveðið að kvóti næsta árs skerð­ist um t.d. 5% fyrir hverja viku sem verk­fall stendur lengur en 8 vik­ur. Inn­kall­aðan kvóta mætti síðan leigja út og nota and­virðið eða hluta þess til að bæta stöðu þeirra sveit­ar­fé­laga sem verða fyrir hvað mestum skaða vegna verk­falls­ins.

smari@bb.is

Nemendur á húsasmíðabraut Menntaskólans á Ísafirði héldu í síðustu viku reisugildi vegna byggingar sem þeir hafa nýlokið við að slá upp á lóð skólans. Er það 21m2 hús sem mun Fossavatnsgangan hefur fest kaup á og mun það þjóna hlutverki brautarskýlis og verður því komið fyrir á Botnsheiði þar sem það verður aðstaða fyrir starfsfólk við drykkjarstöð að sögn Þrastar Jóhannessonar kennara við húsasmíðabraut MÍ. Húsið var teiknað af Tækniþjónustu Vestfjarða og hafa Vestfirskir verktakar yfirumsjón með verkinu. Vonir standa til að verkinu verði lokið fyrir páska, þá verður búið að klára húsið að utan, setja hurðir og glugga ásamt því sem það verður klætt með bárujárni.

Þröstur ásamt Fannari Þór Þorfinnssyni kenna við húsasmíðabraut skólans. Á fjórðu önn smíða nemendur á húsasmíðabraut hús og er þetta það fjórða sem smíðað er frá því er húsasmíðabrautin tók til starfa árið 2005. Fyrsta húsið reis tveimur árum síðar 50m2 sumarbústaður sem nú er í Arnardal. Tveimur árum síðar var byggt samskonar hús sem selt var í Skagafjörð. Árið 2010 var byggt 24m2 hús sem Ferðafélag Íslands keypti og setti upp í Nýjadal.

Sex nemendur taka þátt í húsbyggingunni, en nemendum við brautina hefur fækkað mikið frá því er hún fyrst tók til starfa er 10-12 nemendur hófu nám að hausti fyrstu árin. Í haust sóttist enginn nemandi eftir að komast á húsasmíðabraut. Þröstur segir breytinguna ansi mikla á skömmum tíma, en þróunin hafi tekið dýfu niður á við eftir hrun. Hann segir jafnframt mikla möguleika felast í því að hafa þau réttindi sem námsbrautin veitir. Það sé hægt um vik námslega séð að taka viðbótarnám sem skili nemendum einnig stúdentsprófi, en hann segir þróunina augljóslega vera í þá átt að sem flestir ljúki námi sem stúdentar. Það rímar fullkomlega við umræðu undanfarinna ára þar sem allt bendir til að verknám eigi undir verulegt högg að sækja. Þröstur segir að hér á landi vanti alltaf smiði og einnig ef fólk hyggur á vinnu á Norðurlöndum, þá sé á flestum stöðum þessara réttinda krafist. Þröstur segir marga sem útskrifast hafa af brautinni haldið áfram námi í iðn- og tæknifræði.

annska@bb.is

Morgunklúbburinn eða Akademían líkt og félagsskapurinn er iðulega kallaður sem reglulega kemur saman að morgunlagi í sundlauginni á Þingeyri lætur sig málefni líðandi stundar varða. Eitt af þeim málum sem rædd hafa verið í klúbbnum að undanförnu er það hvort heimila eigi áfengissölu í matvöruverslunum líkt og tekist er á um á Alþingi Íslendinga um þessar mundir. Ákvað Akademían að ekki dugi að ræða einungis þetta mikilvæga mál í heita pottinum, heldur samþykkti hún eftirfarandi ályktun með eiginlega öllum greiddum atkvæðum er fram kemur í fréttatilkynningu:

„Akademían á sundlaugarbakkanum á Þingeyri fordæmir Brennivínsfrumvarpið sem nú liggur fyrir Alþingi. Þeir þingmenn sem að því standa, ættu að snúa sér að þarfari málum fyrir kjósendur sína. Það er grátlegt þegar dreifbýlisþingmenn telja þetta forgangsmál fyrir landsbyggðina.

Allir vita að það er auðveldara fyrir börn og unglinga að nálgast eiturlyf en að panta pizzu. Á það sama að gilda um áfengið? Akademían tekur undir með Birgi Jakobssyni landlækni, sem segir:

„Það er talað fyrir því að gera mjög áhættusama og kostnaðarsama tilraun með sölu á áfengi í matvöruverslunum. Þetta er stórhættulegt. Áhrif þessarar tilraunar verður ekki hægt að draga til baka.“

Niður í skúffu með Brennivínsfrumvarpið segjum við! Það getur vel verið að sú skoðun okkar sé afturhald. Það verður þá bara að hafa það og hana nú!“

annska@bb.is

Það stefnir í óefni í rekstri Menntaskólans á Ísafirði en fjárframlög til skólans fara minnkandi samhliða færri nemendum. Frekari fækkun nemenda mun að óbreyttu leiða til fábreyttara námsframboðs og þá mun skólinn ekki geta innritað alla þá nemendur sem útskrifast úr grunnskólum á svæðinu, eins og honum ber þó að gera samkvæmt lögum. Þetta kemur fram í bréfi Jón Reynis Sigurvinssonar skólameistara til menntamálaráðuneytisins. Við blasir að nemendum skólans í dagskóla mun fækka nokkuð fram til 2020 og kemur þrennt til: Í fyrsta lagi vegna stöðugrar fækkunar íbúa á norðanverðum Vestfjörðum. Í öðru lagi vegna styttingar framhaldsskólans í þrjú ár. Þetta mun leiða til enn frekari fækkunar frá og með 2018 en þá munu þeir nemendur sem eru nú á 2. ári bóknáms útskrifast. Í þriðja lagi hafa nemendur eldri en 25 ekki verið innritaðir í bóknám frá vorönn 2015 nema pláss sé í hópum.

Þingmönnum kjördæmisins hefur verið gert kunnugt um stöðu og framtíðarhorfur skólans með bréfi skólameistara, Jónu Benediktsdóttur, formanns skólanefndar MÍ og Gísla Halldórs Halldórssonar, bæjarstjóra Ísafjarðarbæjar. Í bréfinu er lýst þungum áhyggjum af stöðu skólans og er óskað liðsinnis þingmanna til að sjá til þess að skólinn geti haldið stöðu sinni sem einn af burðarásum í samfélaginu á norðanverðum Vestfjörðum.

smari@bb.is

Ung bolvísk listakona, Valdís Rós Þorsteinsdóttir, varð þeirrar óvæntu ánægju aðnjótandi að selja sína fyrstu mynd á dögunum, eftir að faðir hennar Þorsteinn Másson birti mynd af henni með verkið „Storm“ á Twitter. Valdís sem iðulega er kölluð Dísa og er níu ára gömul, hefur þrátt fyrir ungan aldur sýnt sérlega góða færni í gerð olíumálverka eftir að hafa á síðasta ári farið að horfa á kennslumyndbönd á YouTube þar sem Bob Ross leiðir áhorfendur í gegnum helstu trixin við svokallaða wet-on-wet tækni. „Við fórum að fikra okkur áfram eftir þessum myndböndum og Dísa sýndi strax að hún er „natural talent.“ Segir Steini pabbi Dísu í spjalli við blaðamann, en hún hafði mikið teiknað fram að því.

Það var enginn annar en rithöfundurinn Stefán Máni sem keypti myndina. Stefán Máni er myndlistarunnandi og segist strax hafa fallið fyrir myndinni er hann sá hana á Twitter og kannað hvort hún væri föl. „Steini, sem umboðsmaður listakonunnar, stakk upp á vöruskiptum sem hentaði bara prýðilega en ég samt von á því að verðskrá listamannsins fari hækkandi úr þessu.“ Segir Stefán Máni um listaverkakaupin:

„Við hittumst svo á Grillhúsinu og bíttuðum á verkum. Ég fékk málverkið og Valdís fékk árituð eintök af Svartagaldri og Döprustu stúlku í öllum heiminum. Það var mjög gaman að hitta þau feðgin. Steini er mikið ljúfmenni og Valdís Rós jafnsæt og krúttleg og hún er klár. Held að framtíðin sé hennar, hvað sem sem hún mun taka sér fyrir hendur. Myndin er kominn upp á vegg á besta stað í stofunni heima hjá mér. Ekki amalegt að vera með Vestfirska sjávarmynd fyrir augunum alla daga!“ Vestfirskra tengla gætir í þeim verkum sem skipst var á, stormurinn sem stundum ýfir hafflötinn við Vestfirði í verki Dísu og í Svartagaldri er súðvíski lögreglumaðurinn Hörður Grímsson í aðalhlutverki.

Unga listakonan er hógvær og ekkert mikið fyrir að ræða heiðurinn að sögn föður hennar, en hann segir að hún sé þó afar ánægð með söluna á Stormi. Dísa getur strax sest við lesturinn á Döprustu stúlkunni í öllum heiminum, en Svartigaldur bíður betri tíma og segir Steini að hún muni eflaust kunna að meta hana þegar hún verður eldri, en líkt og flestir vita er Stefán Máni hve þekktastur fyrir skrif á glæpasögum af myrkari sortinni.

annska@bb.is

Á föstudaginn fékk lögreglan á Vestfjörðum tilkynningu um að verið væri að brenna sinu í Mjóafirði, skammt frá brúnni við Hrútey. Þegar lögreglumenn komu á vettvang var engan að finna á svæðinu en greinilegt að sina hafði verið brennd á allstóru svæði í Hrútey og nánasta nágrenni. Málið er til rannsóknar hjá lögreglunni. Lögreglan minnir á reglugerð um meðferð elds og varnir gegn gróðureldum Í reglugerðinni kemur fram að óheimilt sé að brenna sinu en þó sé eigendum jarða, á lögbýlum þar sem landbúnaður er stundaður, heimilt að brenna sinu en þó aðeins með skriflegu leyfi sýslumanns. Samkvæmt slíku leyfi má einungis brenna sinu á tímabilinu frá 1. apríl til 1. maí ár hvert. Aðeins í undantekningartilvikum má brenna sinu utan þess tímabils.

Alls voru 15 ökumenn kærðir fyrir að aka yfir leyfilegum hámarkshraða. Ökumennirnir voru stöðvaðir í Ísafjarðardjúpi, Strandasýslu og víðar í umdæminu. Sá sem hraðast ók var mældur á 141 km. hraða þar sem leyfilegur hámarkshraði er 90 km.

Tilkynnt var um eitt umferðarslys. Það var í Staðardal í Strandasýslu um miðjan dag í gær, sunnudaginn 12. febrúar. En þá valt jeppabifreið á veginum. Auk ökumanns voru fjórir farþegar í bifreiðinni. Meiðsl þeirra urðu minniháttar. Talið er að ökumaður hafi verið þreyttur og svefndrungi hafi orsakað atvikið. Ökumenn eru hvattir til þess að leggja ekki af stað ef þreyta er annars vegar og ef hún gerir vart við sig að stöðva og hvílast áður en haldið er áfram.

Einn ökumaður var kærður í liðinni viku fyrir að aka undir áhrifum áfengis. Sá var stöðvaður í Önundarfirði aðfaranótt sunnudagsins 12. febrúar.

smari@bb.is