Mjög viðkvæm staða
Mjög viðkvæm staða er í kjaradeilu sjómanna og útvegsmanna að sögn Finnboga Sveinbjörnssonar, formanns Verkalýðsfélags Vestfirðinga. „Menn bjuggust við samningi í nótt og að það kæmi gott útspil frá ríkisvaldinu en því miður varð ekki af því. Ef það hefur einhvern tímann verið þörf á aðkomu ríkisstjórnarinnar þá er það nú,“ segir Finnbogi. Ekki hefur verið boðað til formlegra samningafunda að sögn Finnboga.
Þorgerður Katrín Gunnarsdóttir sjávarútvegs- og landbúnaðarráðherra lagði til á fundi með deilendum að farið verði í greiningu á fæðis- og dagpeningum sjómanna, en það eitt og sér leysir ekki deiluna eftir því sem kemur fram hjá sjómannaforystunni.
Sjómannasambandið sendi frá sér tilkynningu í morgun þar sem fram kemur að leiðréttingar sé þörf á ójafnræði í skattalegri meðferð á dagpeningum. Sjómenn telji mikilvægt að úr þessu verði bætt. Þetta sé réttlætismál og hafi því veruleg áhrif í þeim kjaraviðræðum sem nú standi yfir.
smari@bb.is
Óásættanlegt að loka brautinni
Sveitarstjórnir hringinn í kringum landið hafa sameinast um að álykta gegn lokun NA/SV flugbrautarinnar á Reykjavíkurflugvelli, svokallaðarar Neyðarbrautar. Bæjarstjórn Vesturbyggðar hefur bæst í hópinn og í ályktun bæjarstjórnar segir að það hafi sýnt sig að það sé algjörlega óásættanlegt að brautin sé lokuð meðan ekki er boðið upp á aðrar lausnir til að sinna sjúkraflugi við þau tilteknu skilyrði sem brautinni er ætlað sinna. „Bíðum ekki eftir að það eigi sér stað óafturkræft tjón til að gripið verði til aðgerða. Íbúar landsbyggðarinnar þurfa að hafa óskert aðgengi að sjúkrahúsi allra landsmanna í Reykjavík,“ segir í ályktuninni.
Í síðustu viku ályktaði bæjarstjórn Bolungarvíkurkaupstaðar um sama mál. Þar er borgarstjórn Reykjavíkur hvatt til opna neyðarbrautin án tafar. „Lokun neyðarbrautarinnar er ógn við öryggi og heilsu þeirra sem búa og starfa utan höfuðborgarsvæðisins. Flugvöllurinn í Reykjavík er eitt mikilvægasta samgöngumannvirki þjóðarinnar og mikilvægt að Reykjavík sem höfuðborg ræki hlutverk sitt sem slíkt og skyldur við allt landið,“ segir í ályktun bæjarstjórnar Bolungarvíkurkaupstaðar.
smari@bb.is
Réttlætismál fyrir sjómenn
Breytingar á skattalegri meðferð fæðispeninga er réttlætimál í hugum sjómanna. Þetta kemur fram í yfirlýsingu frá Sjómannasambandi Íslands. Sjómannasambandið segir að viðræður við Samtök fyrirtækja í sjávarútvegi og sjómannasamtakanna hafa gengið vel liðna daga og að sameiginlegur skilningur er með aðilum um helstu kröfur.
„Líkt og komið hefur fram í umræðu hafa sjómenn talið að leiðréttingar sé þörf á ójafnræði í skattalegri meðferð á dagpeningum. Sjómenn telja mikilvægt að úr þessu verði bætt. Þar sem um réttlætismál er að ræða hefur þetta veruleg áhrif í þeim kjaraviðræðum sem nú standa yfir. Ráðherra hefur lagt til að fram fari heildstæð greining og skoðun á fæðis- og dagpeningum almennt á vinnumarkaði. Greining þessi er vafalaust jákvæð. Enn stendur þó útaf að fá viðurkenningu stjórnvalda á skattalegri meðferð á dagpeningagreiðslum til sjómanna.“
smari@bb.is
Mæta Laugvetningum á Ísafirði í kvöld
Í kvöld mætir MORFÍS lið MÍ Laugvetningum í átta liða úrslitum MORFÍS ræðukeppninnar. MÍ keppir heima að þessu sinni og fer keppnin fram í Gryfjunni í Menntaskólanum á Ísafirði. Keppendur MÍ hafa staðið í ströngu undanfarna daga við undirbúning og ræðuskrif, í síðustu viki mætti liðið til að mynda liði foreldra þar sem tekist var á um djammið og var hart barist en menntskælingarnir höfðu að lokum betur. Í kvöld er það leti sem tekist verður á um og muni MÍ-liðar tala fyrir henni en ML á móti.
Ræðulið skólans skipa þau Hákon Ernir Hrafnsson, Ingunn Rós Kristjánsdóttir, Veturliði Snær Gylfason og Þórður Alexander Úlfur Júlíusson og voru þau öll að Hákoni undanskildum í ræðuliði skólans síðasta vetur. Þjálfari þeirra er Sólveig Rán Stefánsdóttir.
Keppnin hefst klukkan 20 í Gryfjunni.
Krabbameinsfélagið gegn áfengisfrumvarpinu
Stjórn Krabbameinsfélags Íslands lýsir yfir andstöðu við frumvarp um afnám einkaleyfis Áfengis- og tóbaksverslunar ríkisins á smásölu áfengis og að heimila áfengisauglýsingar. Stjórnin hvetur alþingismenn til þess að fella frumvarpið. Í ályktun frá stjórninni segir að með frumvarpinu sé verið að leggja til að aðgengi að áfengi verði stóraukið með tilheyrandi fjölskylduvanda, samfélagslegum kostnaði, heilsufarsvanda og álagi á heilbrigðiskerfið.
Fjöldi fagfólks á sviði heilbrigðis og félagsvísinda auk félagasamtaka hafi fært góð rök fyrir því aukið aðgengi að áfengi sé ekki af því góða. „Alþjóðaheilbrigðismálastofnunin (WHO) hefur um áratugaskeið lagt til við aðildarþjóðir sínar að unnið verði markvisst að því að draga úr heildarneyslu áfengis. Það er fjarri lagi að hægt sé að taka ákvarðanir sem varða áfengi á þeirri forsendu að þar sé um að ræða venjulega neysluvöru,“ segir í ályktuninni.
Tengsl eru á milli áfengisneyslu og krabbamenins og félagið bendir á að vitað sé að áfengi auki líkur á krabbameini í munnholi, koki, barka, vélinda lifur, ristli, endaþarmi og brjóstum. Einnig séu vísbendingar um að það auki líkur á krabbameini í blöðruhálskirtli auk fleiri tegunda krabbameins. Áætlað er að áfengi sé orsök um 4% dauðsfalla af völdum krabbameins eða um 25 manns hér á landi árlega.
Þar segir einnig: „Með samþykkt frumvarpsins væri gengið þvert á ýmsar áætlanir til bættrar heilsu sem stjórnvöld hafa samþykkt á undanförnum árum og mikilvægum stoðum kippt undan árangursríkri forvarnastefnu í áfengismálum sem almenn samstaða hefur verið um hjá þjóðinni. Stefnu sem meðal annars hefur skilað því að hér á landi er heildarneysla áfengis með því lægsta sem þekkist í okkar heimshluta og árangur í forvörnum meðal ungmenna á heimsmælikvarða. Okkur ber skylda til að gera allt sem í okkar valdi stendur til að draga úr neyslunni en ekki auka hana. Þannig stöndum við vörð um heilsu fólksins í landinu.“
smari@bb.is
Strandveiðar auka á sátt
Í síðustu viku funduðu fulltrúar Landssambands smábátaeigenda (LS) með atvinnuveganefnd Alþingis. Á fundinum var farið yfir helstu áherslumál félagsins sem viðkoma breytingum á lögum um stjórn fiskveiða og reglugerðum. Auk þess var landssambandið kynnt, enda margir nefndarmanna á sínu fyrsta ári í þingmennsku.
Mesta áherslan var lögð á strand- og makrílveiðar. Einnig voru ræddar kröfur LS um að auka heildarafla í þorski, um línuívilnun, byggðakvóta, veiðigjald og samþykktir aðalfundar, svo eitthvað sé nefnt.
Hvað viðkemur strandveiðum var lögð áhersla á mikilvægi þeirra í að auka sátt um stjórnkerfi fiskveiða og fyrir hinar dreifðu byggðir, leið fyrir nýliða til að hefja útgerð. Allir þessir þættir mundu eflast ef krafa LS um „fernuna“ svokölluðu, en það er heiti yfir samfelldar strandveiðar í fjóra mánuði (maí – ágúst), fjóra daga í viku) næði fram að ganga. Þó að afli ykist yrði það ekki í beinu samhengi við fjölgun daga, þar sem sókn og viðhorf myndi gjörbreytast að mati LS. Að lokum var lögð áhersla á að strandveiðar hefðu ekki notið þeirrar aukningar sem orðið hefði á þorskkvótanum frá árinu 2011.
Varðandi makrílinn var ítrekuð áhersla félagsins um að aflétta öllum veiðitakmörkunum á færaveiðar þar til hlutdeild smábáta í heildarafla nær 16%.
smari@bb.is
Hægviðri í dag
Það verður hið ljúfasta veður á Vestfjörðum í dag, er Veðurstofan spáir hægri norðaustlægri eða breytileg átt og björtu veðri að mestu með hitastigi í kring um frostmark. Það þykknar upp í nótt og á morgun er gert ráð fyrir norðaustan m/s 8-13 er líður á daginn með rigningu og þá hlýnar nokkuð.
Nokkur hálka er á Vestfjörðum, einkum á fjallvegum.
Svarta gengið sýnd á Ísafirði
Á föstudagskvöldið verður sýnd í Ísafjarðarbíói heimildarmyndin Svarta gengið eftir Kára G. Schram. Í myndinni er sagt af Þorbirni Péturssyni, Bjössa, fjárbónda og einsetumanni á Ósi í Arnarfirði sem þurfti að bregða búi í kjölfar veikinda og var hann tilneyddur til að fella allt sitt fé. Þar á meðal var hópur kinda sem Bjössi kallaði Svarta Gengið sem hann hafði alið sérstaklega og náð sterku tilfinningasambandi við. Ekki kom til greina að senda Svarta Gengið í sláturhús og í kjölfarið ákvað hann að heiðra minningu mállausra vina sinna með þeim hætti sem honum fannst við hæfi og grafa þær í túninu heima. Jafnframt sótti hann um leyfi yfirvalda að fá að hvíla þeim við hlið þegar þar að kæmi.
Svarta Gengið, sem ber undirtitilinn saga um ást, dauða, bónda og fé er tæpur klukkutími að lengd og var hún frumsýnd í nóvember. Fékk myndin afar góða gagnrýni í Morgunblaðinu þar sem hún fékk fjórar og hálfa stjörnu. Gagnrýnandi myndarinnar Hjördís Stefánsdóttir sagði þar frásögnina einlæga og hún næði kærkominni nánd við persónu sína í hennar náttúrulega umhverfi. Jafnframt sagði hún: Kári varðveitir með myndinni dýrmæta arfleifð þjóðarinnar og dregur líkt og í fyrri verkum sínum upp lifandi lýsingu af einstakri persónu sem svo sannarlega á erindi við komandi kynslóðir. Þorbjörn reisti kindum sínum minnisvarða og Kári heiðrar svo ævistarf Þorbjörns og hverfandi lifnaðarhætti með þessari undurfallegu, raunsönnu mynd.
Nú eiga Vestfirðingar kost á því að berja myndina augum og hefst sýning hennar í Ísafjarðarbíói klukkan 19 föstudagskvöldið 17.febrúar. Aðstandendur myndarinnar koma með á Ísafjörð og bjóða gestum að sýningu lokinni til móttöku í Turnhúsinu í Neðstakaupstað.
Önnur sýning verður kl. 19:00 á laugardag.
Gísli á Uppsölum ílengist í Þjóðleikhúsinu
Nýjasta verk Kómedíuleikhússins, einleikurinn um einbúann Gísla á Uppsölum hefur hreiðrað vel um sig í Kúlunni í Þjóðleikhúsinu. Gísli í líkama leikarans Elfars Loga Hannessonar hélt suður yfir heiðar í janúarmánuði er Kómedíuleikhúsinu hafði boðist að hafa þrjár sýningar á verkinu. Mjög fljótt seldist upp á þær sýningar og var þá þremur sýningum bætt við og þegar seldist upp á þær þremur til viðbótar bætt við, sýningarnar eru nú orðnar 12 á fjölum Þjóðleikhússins og hefur þremur verið bætt við til viðbótar og verða það síðustu sýningarnar á verkinu í leikhúsi þjóðarinnar. Sýnt var í gærkvöldi klukkan 19:30 og næstu sýningar eru á laugardag og sunnudag klukkan 17.
Sýningin um Gísla á Uppsölum hefur vakið mikla athygli og hefur hún fengið afbragðs dóma gagnrýnenda og hlýleg viðbrögð gesta sem keppst hafa við að hlaða hana lofi og segist Elfar Logi hræður, hissa og þakklátur yfir viðbrögðunum.
Þeir Elfar Logi og Þröstur Leó Gunnarsson leikstjóri sýningarinnar voru í viðtali á Bylgjunni í vikunni og má heyra það hér.
