Teitur Björn Einarsson þingmaður Sjálfstæðisflokksins er áhyggjufullur yfir verkfalli sjómanna enda valdi það víðtæku tjóni, ekki bara fyrir sjómenn og útgerðarmenn heldur á ýmis þjónustufyrirtæki, starfsfólk í fiskvinnslu, sveitarfélög og ríkissjóð. Í facebook færslu Teits kemur fram að þrátt fyrir að höfuðborgarsvæðið hafi ekki enn fundið á eigin skinni fyrir afleiðingum verkfallsins sé alvarleiki málsins mikill og brýnir hann samflokksmenn sína og þá sérstaklega Þorgerði Katrínu Gunnarsdóttur sjávarútvegsráðherra að vinna efnahagsgreiningu á áhrifum verkfallsins og viðbragðsáætlun. Fjörugar umræður hafa skapast um færslu Teits og fann Helgi Seljan sig knúin til að birta mynd af tvíti Þorgerðar með yfirlýsingu hennar um að vinna við kortlagningu á áhrifum verkfallsins sé hafin.

Teitur segir í samtali við bb að hann sé ekki að hvetja til lagasetningar á kjaradeiluna. Hann segist vænta þess og þykist vita að stjórnvöld vinni nú hratt og örugglega að sviðsmyndagreiningu á áhrifum verkfallsins.  Teitur er ósáttur við að fiskvinnslufólk sé í stórum stíl beitt í atvinnuleysistryggingarsjóð og segir það geta dregið deiluna á langinn. Þetta ákvæði sem nú er beitt hafi verið hugsað til dæmis vegna náttúruhamfara, ekki til að létta fyrirtækjum að halda lengur út í verkföllum.

Á kjaradeilur sjómanna voru sett lög 1994, 1998 og 2001 og hafa nú verið samningslausir í 6 ár. Á Vísindavefnum kemur fram að á tímabilinu 1985-2015 hafi löggjafinn stöðvað 14 vinnudeilur með lagasetningu.

bryndis@bb.is

Vinningstillaga Kanon arkitekta sýnir að miklir möguleikar eru fyrir hendi í Sundhöll Ísafjarðar að sögn Gísla Halldórs Halldórssonar, bæjarstjóra Ísafjarðarbæjar og formanns dómnefndar hugmyndasamkeppninnar. „Það er ljóst að miklir möguleikar eru fyrir hendi varðandi bætta aðstöðu og aðgengi, meðal annars möguleiki á 700 fermetra líkamsrækt á efstu hæðinni.“

Hann segir að nú þurfi að fara vandlega yfir tillögurnar og ákveða næstu skref. Tæknideild Ísafjarðarbæjar hefur áætlað að kostnaður við vinningstillögun gæti verið 408 milljónir kr. og minnsti hlutinn af því eru framkvæmdir við útisvæði og potta , eða 80 milljónir kr., en umræður meðal bæjarbúa hafa fyrst og fremst snúist um pottana.

Gísli Halldór leggur áherslu á að að nú sé komið að því að bærinn verði að taka ákvörðun um hvað skuli gera við Sundhöllina, hún standist ekki þær kröfur sem gerðar eru til sundstaða – hvort sem um er að ræða aðgengismál, búningsklefa eða starfsmannaaðstöðu.

Hann segir bæinn í stakk búinn að ráða við þessa framkvæmd. „Í ljósi allra annarra framkvæmda þá tæki þetta vel í. Þetta er því spurning um forgangsröðun. Ef þetta væri eina framkvæmdin þá væri auðvelt að ráðast í verkið, en mikilvægu verkefnin eru mörg og bæjarsjóður sem betur fer betur í stakk búinn til að takast á við þau en verið hefur í áratugi.“

► Hér má sjá niðurstöður hugmyndasamkeppninnar

smari@bb.is

Gjaldskrá fyrir bréfapóst hjá Íslandspósti hækkað í verði um 11 prósent í síðustu viku vegna fækkunar bréfa og launahækkana starfsfólks. Póst og fjarskiptastofnun samþykkti hækkunina skömmu fyrir síðustu mánaðamót. Íslandspóstur á einkarétt á þjónustu bréfapósts en á í samkeppni um fjölpóst.

Félag atvinnurekenda gagnrýnir hækkunina á verðskrá Íslandspósts og segir hana þá sjöundu á tæpum fimm árum. Þjónustan hafi hækkað í verði um 62,5 prósent frá því í júlí 2012.

Í tilkynningu frá Félagi atvinnurekenda er það gagnrýnt að gjaldskrá fyrirtækisins fyrir bréfapóst þar sem Íslandspóstur hefur enga keppninauta er hækkuð en verðskrá fyrir fjölpóst þar sem er samkeppni sé óbreytt þrátt fyrir launahækkanir. Keppinautar fyrirtækisins neyðist hinsvegar til að hækka sína gjaldskrá vegna mikilla launahækkana samkvæmt kjarasamningum.

smari@bb.is

Bændur sem ráða til sín sjálfboðaliða til vinnu brjóta lög. Þetta er mat Alþýðusambands Íslands og formanns Bændasamtakanna og greint er frá í Fréttablaðinu. Þar segir að á vefsíðunni Workaway séu 180 auglýsingar þar sem Íslendingar óski eftir sjálfboðaliðum til vinnu. Í flestum tilvikum er um að ræða störf í landbúnaði. Á annarri síðu, Helpx, eru 76 íslenskar auglýsingar.

Alþýðusambandið hefur með Starfsgreinasambandinu og Samtökum atvinnulífsins skorið upp herör gegn sjálfboðavinnu í landbúnaði. „Um störf í landbúnaði gilda kjarasamningar og því í trássi við lög og kjarasamninga að ráða ólaunað vinnuafl í þessi störf,“ er haft eftir Dröfn Haraldsdóttur, sérfræðingi hjá ASÍ.

smari@bb.is

Skólamál verða í brennidepli í Vísindaporti vikunnar í Háskólasetri Vestfjarða. Anna Lind Ragnarsdóttir, skólastjóri Súðavíkurskóla, flytur erindi sem byggir á spánýrri meistararitgerð hennar frá Háskóla Íslands. Þar varpar hún ljósi á uppeldisstefnuna Uppeldi til ábyrgðar í skólum og skoðar hvort hún geti verið leiðbeinandi fyrir samstarf við heimilin og samfélagið.

Undanfarin ár hafa grunnskólar leitast við að innleiða ýmsar uppeldisstefnur eða aðferðir til að betrumbæta allt skólastarf. Hvort sem vinna á með betri samskipti, agamál, starfshætti, líðan eða námsáhuga þá eru ýmsar leiðir færar og af nógu að taka. Meginniðurstöður Önnu Lindar benda til þess að stefnan Uppeldi til ábyrgðar sé vel til þess fallin að styrkja samstarf heimila, skóla og samfélags, einkum með stuðningi við foreldra í uppeldishlutverkinu og til þess að hafa jákvæð áhrif á gildi í samfélaginu. Þó má styrkja það enn frekar með því að leggja aukna áherslu á þátttöku foreldra í skólastarfinu og í ákvarðanatöku þeirra um nám barna sinna.

Anna Lind er fædd og uppalin í Súðavík, yngst sex systkina. Hún stundaði nám í unglingadeild Héraðsskólans í Reykjanesi og var eitt ár við Fjölbrautarskólann á Sauðárkróki en gerði þá hlé á skólagöngu. Hún lauk svo stúdentsprófi í kvöldskóla Menntaskólans á Ísafirði árið 1991. Hún útskrifaðist með kennarapróf úr fjarnámi við Kennaraháskóla Íslands árið 1996 og var það í fyrsta sinn sem KÍ útskrifaði nema úr fjarnámi á Vestfjörðum. Anna Lind tók við stöðu skólastjóra Súðavíkurskóla árið 1998 og hefur gegnt því starfi allar götur síðan. Þar fer fram kennsla jafnt á leikskóla- sem grunnskólastigi. Anna Lind lauk diplómanámi í stjórnun menntastofnana árið 2008 og mun í febrúar útskrifast með M.Ed. gráðu frá Háskóla Íslands.

Vísindaportið stendur frá kl. 12.10-13.00 í kaffistofu Háskólaseturs Vestfjarða og er öllum opið. Fyrirlestur vikunnar fer fram á íslensku.

annska@bb.is