Aðfaranótt sunnudagsins 26. febrúar var lögreglunni á Vestfjörðum tilkynnt um að fólk væri inni á útisundlaugarsvæðinu í Bolungarvík. Þegar lögregluna bar að garði voru alls 8 ungmenni að fara af svæðinu eftir að hafa nýtt sér þessa aðstöðu. Vert er að minna á að stranglega bannað er að fara inn á þetta svæði utan opnunartíma, enda afmarkað með girðingu.

Tilkynnt var um þrjú umferðaróhöpp í liðinni viku. Eitt þeirra varð þann 24. febrúar þegar ökumaður missti stjórn á bifreið sinni í Mikladal með þeim afleiðingum að hún rann út af veginum og niður bratta hlíð, þó án þess að velta. Töluvert tjón varð á undirvagni bifreiðarinnar og ökumaður, sem var einn í bifreiðinni þegar atvikið átti sé stað, var færður undir læknishendur, þó ekki með alvarlega áverka. Þá rann önnur bifreið út af veginum í Vatnsfirði í Ísafjarðardjúpi þann 20. febrúar. Ekkert tjón varð á ökutækinu og engin meiðsl urðu á ökumanni eða farþegum. Þriðja óhappið varð þann sama dag, 20. febrúar í Vatnsfirði í Vesturbyggð en þá missti ökumaður stjórn á jeppabifreið sinni með þeim afleiðingum að bifreiðin rann út af veginum og valt eina veltu. Ökumaður og farþegi hlutu ekki alvarlega áverka. Ökumenn og farþegar í þessum óhöppum voru allir með öryggisbelti spennt og má telja víst að meiðsl hefðu orðið mun meiri ef svo hefði ekki verið. Rétt er að minna á mikilvægi þessa öryggisþáttar. Snjór og hálka var á yfirborði vega þegar þessi atvik urðu. Þá er rétt að minna ökumenn á að gæta sérstakrar varúðar þegar slíkar aðstæður eru fyrir hendi.

Tveir ökumenn voru kærðir fyrir að aka yfir leyfilegum hámarkshraða í vikunni. Báðir ökumennirnir voru stöðvaðir á Skutulsfjarðarbraut á Ísafirði, þar sem hámarkshraði er 60 km.

Lögreglan vill minna á varhugaverðar aðstæður sem geta skapast á vegum í umdæminu þegar yfirborð vega er þakið snjó og leysingar verða. Þá vill myndast krapi og oft á tíðum láta ökutæki illa að stjórn og renna til. Vert er að haga akstri, sem fyrr, miðað við aðstæður hverju sinni.

smari@bb.is

Bolungarvíkurkaupstaður hefur ekki tekið afstöðu hvort dómi Héraðsdóms Vestfjarða yfir Valdimar Lúðvík Gíslasyni verði áfrýjað. Valdimar Lúðvík var dæmdur þriggja mánaða skilorðsbundið fangelsi fyrir stórfelld eignarspjöll á friðuðu húsi í Bolungarvík í júlí 2014. Húsið er í eigu Bolungarvíkurkaupstaðar. „Ég geri ráð fyrir að dómurinn verði lagður fyrir bæjarráð eða bæjarstjórn og ákvörðun tekin um næstu skref,“ segir Jón Páll Hreinsson, bæjarstjóri í Bolungarvík.

Bolungarvíkurkaupstaður gerði skaðabótakröfu upp á 5,5 milljónir króna en Héraðsdómur vísaði meirihluta kröfunnar frá dómi, eða 4,5 milljónum kr. Var það gert vegna þess að sá hluti kröfunnar studdist við greinargerð byggingarfulltrúa Bolungarvíkurkaupstaðar um kostnað við endurbætur á skemmdunum sem húsið varð fyrir. Dómurinn taldi  greinargerðina ekki fullnægjandi gagn og taldi kröfuna því vera vanreifaða. Dómurinn féllst hins vegar á bótakröfu Bolungarvíkurkaupstaðar upp á eina milljón kr. en þar lagði bótakrefjandi fram reikninga vegna bráðabirgðaviðgerðar á húsinu. Jón Páll segir að hann hafi ekki átt kost á að ræða við lögfræðing bæjarins um þetta atriði dómsins.

smari@bb.is

Bæjarráð Ísafjarðarbæjar hefur samþykkt að sækja um fjárframlag frá Jöfnunarsjóði sveitarfélaga til að kanna möguleika á sameiningu sveitarfélaga. Bæjarráð hefur ákveðið að óska eftir samstarfi við Súðavíkurhrepp þar sem kannaðir verði kostir og gallar á sameiningu og hvernig þróa megi ríkara samstarf sveitarfélaganna.

Það vekur óneitanlega athygli að Bolungarvíkurkaupstað er ekki boðið að borðinu. „Bolvíkingar vildu ekki vera með. Við hittumst á óformlegum fundi og þar kom í ljós að þeir eru til í frekara samstarf en ekki tilbúnir í að fara í þessa vinnu þar sem á að skoða grundvöll sameiningar,“ segir Arna Lára Jónsdóttir, formaður bæjarráðs Ísafjarðarbæjar.

Hún leggur áherslu á að það sé einungis verið að tala um að fara í könnun á kostum og göllum samstarfs og sameiningar. „Þessi tvö sveitarfélög eru opin fyrir frekara samstarfi og þessi vinna getur leitt tvennt af sér, aukið samstarf eða formlegar sameiningarviðræður,“ segir Arna Lára.

smari@bb.is

Bryndís Sigurðardóttir hefur verið ráðin fjármálastjóri við Heilbrigðisstofnun Vestfjarða. Hún er viðskiptafræðingur að mennt frá Háskólanum á Akureyri og hefur auk þess lokið markaðs- og útflutningsnámi frá Endurmenntun HÍ og kerfisfræði frá Tietgenskolen, Odense í Danmörku. Bryndís hefur víðtæka starfsreynslu að baki er snýr að stjórnun, rekstri, fjármálum og bókhaldi. Hún hefur verið ritstjóri og eigandi Bæjarins besta og bb.is frá 2015 og gegndi stöðu framkvæmdastjóra Arctic Odda ehf. og Vestfirðings ehf. og jafnframt stöðu fjármálastjóra Dýrfisks hf. og Arctic Fish ehf.  2013 – 2014. Þá stofnaði Bryndís og rak bókhaldsskrifstofuna Yfirlit ehf. á árunum 2003 – 2013.

Aðeins ein umsókn barst um stöðu fjármálastjóra HVest og uppfyllti Bryndís öll skilyrði auglýsingar. Áætlað er að hún hefji störf 1. apríl.

smari@bb.is

Rannsóknarnefnd sjóslysa hefur lokið rannsókn á skipskaða þegar Jón Hákon sökk á Vestfjarðarmiðum í byrjun júlí 2015. Nefndin telur orsök slyssins vera þá að skipið var ofhlaðið og með viðvarandi stjórnborðshalla. Einn fórst þegar Jón Hákon sökk en þrír skipverjar náðu að komast upp á kjöl skipsins þegar því hvolfdi og halda sér þar þangað til hjálp barst. Þetta kom fram á vef RÚV.

Vegna ofhleðslu og viðvarandi stjórnborðshalla átti sjór greiða leið inn á þilfar skipsins í veltingi, bæði yfir lunningu og um lensport. Vegna óþéttleika á lestarlúgukarmi bættist stöðugt sjór í lestina. Varð þetta til þess að skipið missti stöðugleika og því hvolfdi þegar öldutoppur rann óhindrað yfir lunningu þess. Þá telur nefndin að í aðdraganda slyssins hafi lensibúnaður í lest ekki virkað sem skyldi vegna óhreininda í síu. Þetta átti sinn þátt í því að sjór safnaðist í lest skipsins.

smari@bb.is