At­vinnu­leysi jókst í sein­asta mánuði og voru að meðaltali 5.200 manns skráðir at­vinnu­laus­ir í mánuðinum skv. nýbirtri skýrslu Vinnu­mála­stofn­un­ar um vinnu­markaðinn. Fjölg­un at­vinnu­lausra má að stærst­um hluta rekja til upp­sagna fisk­verka­fólks í sjómannaverkfallinu. Fjöldi at­vinnu­lausra jafn­gild­ir 3% at­vinnu­leysi, sem hef­ur ekki verið hærra frá apríl 2015. Að meðaltali fjölgaði á at­vinnu­leys­is­skrá um 1.281 frá des­em­ber­mánuði.

Greiðslu­stofa at­vinnu­leys­is­bóta greiddi ríf­lega einn millj­arð í bæt­ur og aðrar greiðslur vegna at­vinnu­lausra í sein­asta mánuði. Auk fisk­vinnslu­fólks og sjó­manna var nokk­ur fjölg­un at­vinnu­lausra úr bygg­ing­ariðnaði, flutn­inga­starf­semi, versl­un og fleiri at­vinnu­grein­um, sem er í takt við hefðbundna árstíðasveiflu.

smari@bb.is

Í dag kl. 17 opnar Cale Coduti sýningu í Gallerí Úthverfu á Ísafirði. Cale Coduti er amerískur málari og útskrifaðist frá Pennsylvania State University 2016 með BFA í teiknun og málun. Hann hefur tekið þátt í samsýningum og haldið einkasýningar í Bandaríkjunum frá 2014 og hlotið fjölda tilnefninga og viðurkenninga fyrir verk sín.

Á sýningunni í Úthverfu verða teikningar og málverk sem hann hefur unnið á meðan á dvöl hans hefur staðið í gestavinnustofum ArtsIceland á Ísafirði. Mörg verka hans tjá tilfinningar sem liggja djúpt og eru ekki auðveldar að túlka með orðum. Verkin eru fagurfræðilegar tilraunir, stundum fullar af gleði og stundum þrungnar meiningu sem erfitt að skilgreina.

Allir eru velkomnir á opnun sýningarinnar í dag og þiggja þar léttar veitingar. Sýningin stendur til laugardagsins 18. febrúar og er opin eftir hádegi virka daga og/eða eftir samkomulagi.

smari@bb.is

Súðavíkurskóli sigraði í flokki skóla að 90 nemendum í grunnskólakeppni Lífshlaupsins sem lauk í gær. Gríðarlega góð þátttaka var í skólanum þar sem allir voru skráðir til leiks og var skráð hreyfing tæpa 13 daga af þeim 14 sem keppnin stóð, eða 12,89 og var langt í annað sætið sem var með 9,39. Grunnskólakeppni Lífshlaupsins hófst 1.febrúar og í keppninni mátti skrá alla hreyfingu sem náði minnst 60 mínútum samtals á dag hjá nemendum.

Dagbjört Hjaltadóttir kennari við Súðavíkurskóla segir að hvert tækifæri hafi verið notað til að skoppa út um allar grundir og móa. Hin fjölbreyttustu verkefni voru framkvæmd sem fólu í sér hreyfingu og skiluðu stigum í pottinn. Til dæmis var í stærðfræðitíma mæld lengd steypireyðar, sem taldi eina 30 metra, farið var í myrkragöngu þar sem gengið var út úr upplýstu þorpinu út í myrkrið í kring og farið var í skólaskóginn, þar sem nemendur hafa plantað trjám og voru tré þar mæld, svo einhver dæmi séu tekin.

Vinnustaðakeppni Lífshlaupsins er í gangi allan mánuðinn og í flokki vinnustaða með 10-29 starfsmenn leiðir Súðavíkurskóli einnig. Góð þátttaka er í hreyfiátakinu og í gær voru skráðar hreyfimínútur komnar í 9 milljónir og dagar með lágmarkshreyfingu orðnir rétt rúmlega100 þúsund talsins.

Verðlaunaafhending Lífshlaupsins fer fram föstudaginn 24. febrúar í sal KSÍ þar fá þeir sem skarað hafa fram úr í keppninni glæsilega viðurkenningaplatta afhenta fyrir frammistöðuna.

annska@bb.is

Í kvöld efna Vinnumálastofnun og frumkvöðlakonur á Vestfjörðum til fundar í Vestrahúsinu. Á fundinum verða styrkir til atvinnumála kvenna kynntir en á vegum Vinnumálastofnunar hefur styrkjum til kvenna til að sinna viðskiptahugmynd eða þróa verkefni, verið veitt frá árinu 1991. Styrkirnir eru veittir af Velferðarráðherra en það er Vinnumálstofnun sem hefur vistað verkefnið hin síðari ár. Opnað hefur verið fyrir umsóknir í ár og er umsóknarfrestur til 20. febrúar.

Á fundinum í kvöld verður einnig kynning á FREE verkefninu en það er samstarfsverkefni fimm þjóða um að styrkja frumkvöðlakonur á landsbyggðinni. Það eru Ísland, Bretland, Litháen, Króatía og Búlgaría sem standa að þessu verkefni. Aðalmarkmið FREE verkefnisins, sem er styrkt af Evrópusambandinu,  er að aðstoða frumkvöðlakonur á landsbyggðinni til að koma hugmyndum sínum og fyrirtækjum á framfæri með fræðslu og hvatningu auk þess að efla tengslanet kvenna.  Markhópur verkefnisins eru frumkvöðlakonur sem hafa nú þegar viðskiptahugmynd sem þær vilja hrinda í framkvæmd eða hafa nýlega stofnað fyrirtæki.

Tengslanet frumkvöðlakvenna á svæðunum verða sett upp og munu leiðtogar, frumkvöðlakonur sem eru í rekstri, stýra þeim á hverju svæði fyrir sig. Gert er ráð fyrir því að tengslanetið starfi í 10 mánuði að lágmarki á tilraunatímabilinu og að a.m.k. sex fundir verði haldnir á tímabilinu en þróun hvers tengslanets og framtíð er í höndum leiðtoganna sjálfra og netsins sem myndað verður og þannig því reynt að virkja grasrótina á hverjum stað.

Stofnaður hefur verið facebook hópur um verkefnið en fundurinn hefst kl. 20:00 í Vestrahúsinu.

Umhverfisstofnun hefur unnið tillögu að starfsleyfi fyrir Fjarðalax ehf. til framleiðslu á allt að 10.700 tonnum á ári af laxi í Patreksfirði og Tálknafirði. Fyrirtækið er með 3.000 tonna gilt starfsleyfi í sömu fjörðum og kemur starfsleyfistillagan til viðbótar því.  Fjarðalax er síðan í fyrra í eigu Arnarlax sem er stærsta fiskeldisfyrirtæki á landinu með sjókvíaeldi á Suðurfjörðum Vestfjarða og plön um stórfellt laxeldi í Ísafjarðardjúpi og Jökulfjörðum. Þá er Arnarlax með umsókn í vinnslu í Eyjafirði.

Athugasemdir við tillöguna skulu vera skriflegar og sendar Umhverfisstofnun. Frestur til að skila inn athugasemdum er til 11. apríl 2017. Á vef Umhverfisstofnunar má finna auglýsta tillögu Umhverfisstofnunar, umsóknargögnin, tilkynningu til Skipulagsstofnunar og matsskylduákvörðun hennar.

smari@bb.is

Framkvæmdasýsla ríkisins óskar eftir tilboðum í framkvæmdir við byggingu seinni áfanga aurflóðavarnargarðs ofan Hjallavegar og nyrsta hluta Urðarvegar á Ísafirði. Um er að ræða um það bil 650 m langan aurvarnargarð og samsvarandi flóðafarveg ofan hans. Í fyrri áfanga, árið 2011, var nyrðri hluti garðsins formaður og eru nú um 170 m eftir af gerð hans. Þó á enn eftir að gera stóran hluta af farveginum í nyrðri hlutanum. Í verkinu felst einnig að leggja um 570 m langan vegslóða eftir botni flóðafarvegar og meðfram vegslóðanum skal gera lækjarfarveg. Jafnframt lagning um 170 m af göngustígum sem eftir er að leggja, mótun skeringa flóðmegin við garða og frágangur. Aurvarnargarðurinn gegnir því hlutverki að stöðva grjót og verður um 5 m á hæð þ.e. frá botni í flóðafarvegi og upp á topp garðs. Garðurinn er 1,5 m breiður í toppinn og breidd flóðafarvegar í botninn er um 4 m. Í garðinn þarf nú um 7 þús. m3 efnis. Magnið sem kemur upp úr farveginum er hins vegar um 23 þús. m3. Umframefni skal ekið á tipp í Grænagarðsnámu um vegslóða ofan varnargarða sem þegar hafa verið byggðir ofan byggðar á Ísafirði, neðan Gleiðarhjalla. Verkinu skal vera að fullu lokið eigi síðar en 31. október 2017.

smari@bb.is