Það eru einmuna rólegheit í febrúarveðrinu og á matseðli dagsins hjá yfirvöldum veðurs og vinda má reikna með austlægri átt 5-10 og rigning eða súld með köflum í dag. Lægir síðdegis. Hiti 1 til 6 stig. Úrkomulítið í nótt og í fyrramálið. Norðaustan 3-8 síðdegis á morgun, léttir heldur til og kólnar.
bryndis@bb.is
Morgunklúbburinn eða Akademían líkt og félagsskapurinn er iðulega kallaður sem reglulega kemur saman að morgunlagi í sundlauginni á Þingeyri lætur sig málefni líðandi stundar varða. Eitt af þeim málum sem rædd hafa verið í klúbbnum að undanförnu er það hvort heimila eigi áfengissölu í matvöruverslunum líkt og tekist er á um á Alþingi Íslendinga um þessar mundir. Ákvað Akademían að ekki dugi að ræða einungis þetta mikilvæga mál í heita pottinum, heldur samþykkti hún eftirfarandi ályktun með eiginlega öllum greiddum atkvæðum er fram kemur í fréttatilkynningu:
„Akademían á sundlaugarbakkanum á Þingeyri fordæmir Brennivínsfrumvarpið sem nú liggur fyrir Alþingi. Þeir þingmenn sem að því standa, ættu að snúa sér að þarfari málum fyrir kjósendur sína. Það er grátlegt þegar dreifbýlisþingmenn telja þetta forgangsmál fyrir landsbyggðina.
Allir vita að það er auðveldara fyrir börn og unglinga að nálgast eiturlyf en að panta pizzu. Á það sama að gilda um áfengið? Akademían tekur undir með Birgi Jakobssyni landlækni, sem segir:
„Það er talað fyrir því að gera mjög áhættusama og kostnaðarsama tilraun með sölu á áfengi í matvöruverslunum. Þetta er stórhættulegt. Áhrif þessarar tilraunar verður ekki hægt að draga til baka.“
Niður í skúffu með Brennivínsfrumvarpið segjum við! Það getur vel verið að sú skoðun okkar sé afturhald. Það verður þá bara að hafa það og hana nú!“
Rækjuveiðar í Ísafjarðardjúpi hófust í síðustu viku. Sjávarútvegsráðuneytið gaf út 460 tonna kvóta í haust en veiðar voru ekki leyfðar fyrr en í síðust viku vegna mikillar seiðagengdar í Djúpinu. Hraðfrystihúsið Gunnvör hf. á stærsta hluta kvótans og koma 200 tonn í hlut fyrirtækisins. Kvóti Halldórs Sigurðssonar ÍS er 126 tonn og Ásdís fær þriðja mest í sinn hlut, eða 62 tonn.
smari@bb.is
Það stefnir í óefni í rekstri Menntaskólans á Ísafirði en fjárframlög til skólans fara minnkandi samhliða færri nemendum. Frekari fækkun nemenda mun að óbreyttu leiða til fábreyttara námsframboðs og þá mun skólinn ekki geta innritað alla þá nemendur sem útskrifast úr grunnskólum á svæðinu, eins og honum ber þó að gera samkvæmt lögum. Þetta kemur fram í bréfi Jón Reynis Sigurvinssonar skólameistara til menntamálaráðuneytisins. Við blasir að nemendum skólans í dagskóla mun fækka nokkuð fram til 2020 og kemur þrennt til: Í fyrsta lagi vegna stöðugrar fækkunar íbúa á norðanverðum Vestfjörðum. Í öðru lagi vegna styttingar framhaldsskólans í þrjú ár. Þetta mun leiða til enn frekari fækkunar frá og með 2018 en þá munu þeir nemendur sem eru nú á 2. ári bóknáms útskrifast. Í þriðja lagi hafa nemendur eldri en 25 ekki verið innritaðir í bóknám frá vorönn 2015 nema pláss sé í hópum.
Þingmönnum kjördæmisins hefur verið gert kunnugt um stöðu og framtíðarhorfur skólans með bréfi skólameistara, Jónu Benediktsdóttur, formanns skólanefndar MÍ og Gísla Halldórs Halldórssonar, bæjarstjóra Ísafjarðarbæjar. Í bréfinu er lýst þungum áhyggjum af stöðu skólans og er óskað liðsinnis þingmanna til að sjá til þess að skólinn geti haldið stöðu sinni sem einn af burðarásum í samfélaginu á norðanverðum Vestfjörðum.
smari@bb.is
Ung bolvísk listakona, Valdís Rós Þorsteinsdóttir, varð þeirrar óvæntu ánægju aðnjótandi að selja sína fyrstu mynd á dögunum, eftir að faðir hennar Þorsteinn Másson birti mynd af henni með verkið „Storm“ á Twitter. Valdís sem iðulega er kölluð Dísa og er níu ára gömul, hefur þrátt fyrir ungan aldur sýnt sérlega góða færni í gerð olíumálverka eftir að hafa á síðasta ári farið að horfa á kennslumyndbönd á YouTube þar sem Bob Ross leiðir áhorfendur í gegnum helstu trixin við svokallaða wet-on-wet tækni. „Við fórum að fikra okkur áfram eftir þessum myndböndum og Dísa sýndi strax að hún er „natural talent.“ Segir Steini pabbi Dísu í spjalli við blaðamann, en hún hafði mikið teiknað fram að því.
Það var enginn annar en rithöfundurinn Stefán Máni sem keypti myndina. Stefán Máni er myndlistarunnandi og segist strax hafa fallið fyrir myndinni er hann sá hana á Twitter og kannað hvort hún væri föl. „Steini, sem umboðsmaður listakonunnar, stakk upp á vöruskiptum sem hentaði bara prýðilega en ég samt von á því að verðskrá listamannsins fari hækkandi úr þessu.“ Segir Stefán Máni um listaverkakaupin:
„Við hittumst svo á Grillhúsinu og bíttuðum á verkum. Ég fékk málverkið og Valdís fékk árituð eintök af Svartagaldri og Döprustu stúlku í öllum heiminum. Það var mjög gaman að hitta þau feðgin. Steini er mikið ljúfmenni og Valdís Rós jafnsæt og krúttleg og hún er klár. Held að framtíðin sé hennar, hvað sem sem hún mun taka sér fyrir hendur. Myndin er kominn upp á vegg á besta stað í stofunni heima hjá mér. Ekki amalegt að vera með Vestfirska sjávarmynd fyrir augunum alla daga!“ Vestfirskra tengla gætir í þeim verkum sem skipst var á, stormurinn sem stundum ýfir hafflötinn við Vestfirði í verki Dísu og í Svartagaldri er súðvíski lögreglumaðurinn Hörður Grímsson í aðalhlutverki.
Unga listakonan er hógvær og ekkert mikið fyrir að ræða heiðurinn að sögn föður hennar, en hann segir að hún sé þó afar ánægð með söluna á Stormi. Dísa getur strax sest við lesturinn á Döprustu stúlkunni í öllum heiminum, en Svartigaldur bíður betri tíma og segir Steini að hún muni eflaust kunna að meta hana þegar hún verður eldri, en líkt og flestir vita er Stefán Máni hve þekktastur fyrir skrif á glæpasögum af myrkari sortinni.
Á föstudaginn fékk lögreglan á Vestfjörðum tilkynningu um að verið væri að brenna sinu í Mjóafirði, skammt frá brúnni við Hrútey. Þegar lögreglumenn komu á vettvang var engan að finna á svæðinu en greinilegt að sina hafði verið brennd á allstóru svæði í Hrútey og nánasta nágrenni. Málið er til rannsóknar hjá lögreglunni. Lögreglan minnir á reglugerð um meðferð elds og varnir gegn gróðureldum Í reglugerðinni kemur fram að óheimilt sé að brenna sinu en þó sé eigendum jarða, á lögbýlum þar sem landbúnaður er stundaður, heimilt að brenna sinu en þó aðeins með skriflegu leyfi sýslumanns. Samkvæmt slíku leyfi má einungis brenna sinu á tímabilinu frá 1. apríl til 1. maí ár hvert. Aðeins í undantekningartilvikum má brenna sinu utan þess tímabils.
Alls voru 15 ökumenn kærðir fyrir að aka yfir leyfilegum hámarkshraða. Ökumennirnir voru stöðvaðir í Ísafjarðardjúpi, Strandasýslu og víðar í umdæminu. Sá sem hraðast ók var mældur á 141 km. hraða þar sem leyfilegur hámarkshraði er 90 km.
Tilkynnt var um eitt umferðarslys. Það var í Staðardal í Strandasýslu um miðjan dag í gær, sunnudaginn 12. febrúar. En þá valt jeppabifreið á veginum. Auk ökumanns voru fjórir farþegar í bifreiðinni. Meiðsl þeirra urðu minniháttar. Talið er að ökumaður hafi verið þreyttur og svefndrungi hafi orsakað atvikið. Ökumenn eru hvattir til þess að leggja ekki af stað ef þreyta er annars vegar og ef hún gerir vart við sig að stöðva og hvílast áður en haldið er áfram.
Einn ökumaður var kærður í liðinni viku fyrir að aka undir áhrifum áfengis. Sá var stöðvaður í Önundarfirði aðfaranótt sunnudagsins 12. febrúar.
smari@bb.is
Bæjarráð Ísafjarðarbæjar skorar á deiluaðila í sjómannaverkfallinu að sýna ábyrgð og ljúka samningum sem allra fyrst, enda er tjón vegna deilunnar orðið umtalsvert og fer hratt vaxandi. Tveir mánuðir eru á morgun frá því sjómannaverkfallið skall á. Tap vegna verkfalls sjómanna er metið fleiri milljarða króna og standi verkfallið lengur er áætlað að tapið geti numið um það bil milljarði á dag. Í nýrri skýrslu sjávarútvegsráðuneytisins kemur fram að heildaráhrif verkfallsins á ráðstöfunartekjur sjómanna eru talin nema um 3.573 milljónum króna til 10. febrúar 2017; tekjutap 2.400- 2.600 fiskverkamanna er metið á um 818 milljónir króna; tekjutap ríkissjóðs er gróft áætlað á tímabilinu 2,5 milljarðar króna og sveitarfélaga einn milljarður króna.
smari@bb.is
Bæjarstjórinn okkar Gísli Halldór gaf sér tíma til að svara grein minni um stóru málin í samfélaginu og bendir á nokkur atriði sem hann telur mig fara ranglega með. Fyrir það er ég þakklátur og ánægður með að ekki er allt mitt svartsýnis raus rétt.
Norðurtanginn, safnmunageymslan
Gísli bendir á að Ísafjarðarbær greiði ekki leigu fyrir tómt geymsluhúsnæði í norðurtanganum gamla. Enn staðfestir svo annarsstaðar að greiðslur hafi verið inntar af hendi til leigusala. Ísafjarðarbær á því inni hjá leigusala nokkra upphæð að mati Gísla.
Skemmur þurfa ekki endilega að vera ljótar byggingar. Verið er að byggja þær nokkrar hér á Ísafirði þessa stundina og ég get ekki sagt að þær séu neitt ljótar, þó þær séu kannski ekki nein listaverk. Ég get ekki sagt að Norðurtanginn sé neitt sérstaklega fallegur en Gísli bendir á að hugmyndin sé að nýta húsnæðið til 10 ára eða þar til hægt er að byggja t.d. í tengslum við Gamla Sjúkrahúsið betri aðstöðu undir safnið og notendur þess. Hefðum við t.d. byggt skemmu eða keypt eitthvað húsnæði undir safnið, þá gætum við selt það aftur þegar kæmi að því að byggja betri aðstöðu og ættum þá eitthvað upp í byggingakostnaðinn.
Reiðskemman góða
Það verður vissulega ánægjulegt ef skemma hestamanna getur staðið undir rekstri sínum og enn ánægjulegra ef iðkendum fjölgar hjá hestamönnum. Af sjálfsögðu fagnar HSV því að búið sé að semja við hestamenn, annað væri óeðlilegt. Eitthvað myndi nú ganga á ef félagið sem berst fyrir bættri aðstöðu til íþróttaiðkunar færi að berjast gegn uppbyggingu fyrir eina grein.
Það er gott til þess að vita að bærinn ætli áfram að viðhafa samráð sem komið var í gang við HSV. Enn ánægjulegra verður það ef tekst að skipta út gólfinu í íþróttahúsinu á Torfnesi í ár.
Lykilatriði að leiðrétta rétt
Í máli þínu kemur eftirfarandi fram „Eins og flestir vita þá borgar Ísafjarðarbær venjulega 100% af rekstri íþróttamannvirkja, þarna er því um sérstaklega góð kjör að ræða fyrir bæinn.“ Er þar verið að tala um 49% hlut bæjarins í reiðskemmunni. Sigurður Jón Hreinsson benti okkur á að af 108,5 milljóna veltu skíðasvæðis væri gert ráð fyrir 11,5 milljónum í aðgangseyri. Ég þarf að borga 600 kr í hvert skiptið sem ég fer í sund, og ef ég ætla að fá tíma í einhverju íþróttahúsa bæjarins þá þarf ég einnig að borga fyrir það. Það er því alveg ljóst að Ísafjarðarbær borgar ekki 100% af rekstri íþróttamannvirkja sinna.
Sundlaugin í sundhöllinni eða ekki
Það er vissulega kostnaður sem fylgir því að breyta húsnæði sundhallar til annarra nota en það getur einnig verið hagur í því að koma sundlaug og Íþróttahúsi í sömu byggingu. Hvað gætum við sparað mörg stöðugildi með að hafa sundlaugina og Íþróttahúsið í sömu byggingu? Ég heyrði því fleygt að með sparnaði um 1 stöðugildi mætti réttlæta fjárfestingu upp á um 80 milljónir.
Ódýr bygging þarf ekki að vera ljót. Hvað er að því að byggja ódýrt, við þurfum ekki alltaf að spandera í flott og lúxus. Ég heyrði eitt sinn góða sögu af uppbyggingu verkmenntaskólans á Akureyri. Þar var víst krafa um að einhverju hlutfalli af byggingakostnaði væri eytt í listaverk. Þegar verkið var vel á veg komið þá átti eftir að mála einn stóran vegg innandyra og allur aur uppurinn nema listaverkasjóðurinn. Til að komast hjá listaverka hlutanum og klára verkið á ódýran og góða máta á skólameistari að hafa ráðið listmálara til að mála vegginn góða. Með þessu tókst að klára verkið á réttri fjárhagsáætlun.
Krafturinn í bæjarapparatinu
Krafturinn virðist svo mikill að þrátt fyrir auknar tekjur eru skuldir einnig að hækka. Skuldaviðmið er eftir því sem mér skilst reiknað sem hlutfall af tekjum bæjarsjóðs. Þannig að ástæða hinnar ánægjulegu lækkunar viðmiðsins er ekki lækkun skulda heldur hækkun tekna.
Það er ánægjulegt að menn séu tilbúnir að ræða stóru og erfiðu málin. Enn þar ekki nóg að vera tilbúinn að ræða málin menn verða líka að vera tilbúnir í möguleg skoðanaskipti.
Skólamálin
Það hefur vissuleg mikið verið gert til að standa við markmiðin, enn hvaða framtíðarsýn er það að hlaupa til á síðustu stundu með plástur á sárið í annað skiptið á 3 árum. Gleymum því ekki að plássskortur í leik- og grunnskólum okkar er ánægjulegasta vandamál sem við fáum á borð okkar.
Gott samfélag gulli betra
Góð aðstaða til tómstundaiðkunar spilar vissulega stóran þátt í að byggja upp gott mannlíf. Enn án góðrar leik- og grunnskólaaðstöðu höfum við mjög takmörkuð not fyrir tómstundaraðstöðuna. Helsta ógn góðs samfélags er hækkandi meðalaldur þess sem það byggja.
J. Bæring Pálmason
Vá Vesthópurinn lýsir yfir andstöðu við frumvarp til laga um breytingu á áfengislögum. Hópurinn telur einsýnt að í breytingunum felist aðför að þeim góða árangri sem náðst hefur hér á landi í forvarnastarfi, sem m.a. hefur komið fram í niðurstöðum kannana meðal ungs fólks á vegum Rannsóknar & greiningar, undanfarna tvo áratugi. Þetta kemur fram í umsögn Va Vest um frumvarp um að heimila sölu áfengis í matvöruverslunum. Í umsögninni segir að árangur Íslendinga í forvarnamálum sé ekki sjálfsagður. Hópurinn telur að þessi árangur sem margar aðrar þjóðir vildu státa af hafi orðið til með tvennum hætti. Annars vegar því forvarnastarfi sem Íslendingar hafa þróað og hins vegar heftu aðgengi ungmenna að áfengi í samræmi við gildandi áfengislög.
„Núverandi dreifingaraðili, ÁTVR, hvetur ekki til aukinnar sölu áfengis. Það er engin ástæða til að ætla annað en að einkaaðilar færu eins með sölu á áfengi og öðrum vöruflokkum sem verslunin hefur upp á að bjóða. Þar myndu lögmál markaðarins ráða. Þá er rétt að benda á að í flestum matvöruverslunum landsins, ekki síst í dreifðum byggðum, eru oft á tíðum ungmenni við afgreiðslu.,“ segir í umsögninni.
Vá Vesthópurinn er hópur fagaðila á norðanverðum Vestfjörðum sem hefur verið að störfum undanfarin 20 ár. Hlutverk og markmið hópsins er að sinna og stýra vímuefnaforvörnum á norðanverðum Vestfjörðum.
smari@bb.is
Það verður hlýtt í veðri á Vestfjörðum í dag og hæglætis veður, suðlæg átt, 5-10 m/s og dálítil súld eða rigning. Austlægari í kvöld en austan 3-8 m/s og rigning á morgun, en slydda til fjalla. Talsvert hlýtt hefur verið á landinu það sem af er febrúarmánuði og í dag og á morgun verður hiti á bilinu 1 til 7 stig, þegar líður á vikuna kólnar í veðri og gangi spár eftir þá mun sjást snjór á föstudag.
Vegir eru að heita má greiðfærir um allt land en sums staðar er þokuloft.
