Bæjarstjórn Ísafjarðarbæjar tekur undir umsögn hafnarstjórn um að ekki verður fallist á að eldiskvíar Arctic Sea Farm verði staðsettar á því svæði út af Arnarnesi sem lagt er til í matsáætluninni. Sú staðsetning myndi skerða aðkomu stærri skipa að Skutulsfirði og þrengja athafnasvæði þeirra, er í því sambandi aðallega átt við skemmtiferðaskip, flutningaskip og stærri olíuskip. Nú þegar eru eldiskvíar á Skutulsfirði sem skerða athafnarými og geta gert stærri skipum erfitt fyrir á akkerislægi. Bæjarstjórn segir að ekki verði unað við frekari skerðingu.

Bæjarstjórn telur að koma mætti í veg fyrir truflun á innsiglingu til Skutulsfjarðar ef umrætt svæði yrði fært að minnsta kosti lengd sína til suðausturs þannig að norðvestur mörk svæðisins sé í línu við Kirkjubólshlíð.

Bæjarstjórn ítrekar enn og aftur að afleitt sé að enga stefnumörkun stjórnvalda sé að finna um sjókvíaeldi á Vestfjörðum, fremur en annars staðar á landinu. Óheppilegt er að burðarþolsmat Ísafjarðardjúps skuli ekki liggja fyrir þegar leitað er umsagna um fiskeldisáform og verður til mikilla bóta þegar það verður gefið út en Ísafjarðarbær hefur upplýsingar um að matið sé hér um bil tilbúið.

„Rannsóknir á samlegðaráhrifum eldis og lífríkis í Ísafjarðardjúpi eru mikilvæg undirstaða í uppbyggingu fiskeldis við Djúp og skipulagningu þess og því er kallað eftir að stjórnvöld leggi fullan þunga í þann undirbúning sem nauðsynlegur er. Að frumkvæði sveitarfélaga á Vestfjörðum og Fjórðungssambands var unnin nýtingaráætlun fyrir Arnarfjörð sem vera mátti stjórnvöldum fordæmi. Það er því mjög miður að ríkisvaldið hafi ekki séð ástæðu til að samsvarandi skipulagsvinna færi fram á strandsvæði Ísafjarðardjúps, slík áætlun hefði auðveldað mjög framlagningu matsáætlana og gerð umsagna um þau,“ segir í umsögn bæjarstjórnar sem fagnar fyrirhuguðum áformum fiskeldisfyrirtækja um uppbyggingu fiskeldis í Ísafjarðardjúpi. Bæjarstjórn telur að fiskeldi muni styrkja undirstöður atvinnulífs í sveitarfélaginu og treysta tekjustofna Ísafjarðarhafna.

Bæjarstjórn Ísafjarðarbæjar ítrekar einnig þá áskorun sína að að sveitarfélög ráði skipulagi strandsjávar út að 1 sjómílu út fyrir grunnlínu landhelginnar. Einnig kallar bæjarstjórn eftir því að sveitarfélög fái heimildir til gjaldtöku af þeim aðilum sem nýta svæði í strandsjó til fiskeldis.
Þessi umsögn tekur yfir fyrri umsagnir nefnda Ísafjarðarbæjar og dregur þær saman í eina.
Bæjarstjórn gerir að öðru leyti ekki athugasemdir við framkomna tillögu að matsáætlun.

smari@bb.is

Það er sjaldan lognmolla í kringum leikdeild Höfrungs á Þingeyri, en síðustu ár hefur leikfélagið sett upp hverja stórsýninguna á fætur annarri, sem laðað hafa að gesti frá öllum Vestfjörðum og jafnvel víðar. Sérstök áhersla hefur verið lögð á að setja upp vandaðar og ævintýralegar fjölskylduleiksýningar. Fyrst fram senuna var hin óborganlega Lína Langsokkur og á eftir henni kom Galdrakarlinn í Oz með sínar skrítnu skrúfur og í fyrra var það Soffía frænka, ræningjarnir og allir hinir í Kardimommubænum sem glöddu leikhúsgesti. Að þessu sinni er aftur leitað til skapara Kardimommubæjarins, Torbjörns Egner og þá varð ekki minna frægt verk eftir þann meistara fyrir valinu, sjálf Dýrin í Hálsaskógi.

Sérstakur kynningarfundur um þessa stóru og miklu uppfærslu verður laugardaginn 25. febrúar klukkan 13.01 í Stefánsbúð á Þingeyri. Allir eru velkomnir hvort heldur sem fólk vill leika, smíða, sauma, mála eða bara forvitnast um verkefnið. Í framhaldinu hefjast svo æfingar sem standa yfir næstu vikurnar.

Leikstjóri er Elfar Logi Hannesson sem hefur leikstýrt öllum áðurnefndum uppfærslum leikdeildarinnar. Frumsýnt verður föstudaginn 7. apríl í Félagsheimilinu á Þingeyri, sem stundum heyrist kallað; miðstöð leiklistar á Vestfjörðum. Fleiri sýningar verða þá helgi og svo um og yfir páskahátíðna.

annska@bb.is

Ísfirðingurinn og poppstjarnan Helgi Björns ásamt félögum sínum í hljómsveitinni Síðan skein sól hafa blásið til 30 ára afmælistónleika í Háskólabíói þann 25.mars. Miðar á tónleikana fóru í sölu í síðustu viku og varð fljótt ljóst að uppselt yrði, er æstir aðdáendur sveitarinnar tóku yfir miðasölukerfi Tix um tíma, þá var smellt í aukatónleika sama kvöld til að sem flestir gætu komið og til að sjá og heyra hina goðsagnakenndu sveit sem tryllti lýðinn á níunda og tíunda áratug síðustu aldar.

Á tónleikunum stíga allir upprunalegu meðlimir hljómsveitarinnar saman á svið í fyrsta sinn í langan tíma, auk flestra annarra sem komið hafa við sögu sveitarinnar á þessum 30 árum, eins og: Ingólfur Sigurðsson, Hafþór Guðmundsson, Jakob Smári Magnússon, Eyjólfur Jóhannsson, Hrafn Thoroddsen, Stefán Már Magnússon, Atli Örvarsson og auðvitað sjálfur Helgi Björnsson. Auk þessa frábæra gengis munu góðir gestir líta við.

Það var í Hlaðvarpanum í Kvosinni í þykkri snjókomu, þann 25. mars 1987 að hljómsveitin Síðan Skein Sól hélt sína fyrstu tónleika. Í framhaldinu upphófst stíft tónleikahald í félagsmiðstöðvum, skólum og á tónleikastöðum borgarinnar. Síðan fóru þeir í hringferð um landið í svokallaðan kassatúr 1989, þar sem þeir léku að mestu órafmagnað. Þá tóku við ár með mikilli spilamennsku bæði á böllum og tónleikum og útgáfu mikils fjölda af lögum sem þjóðin hefur tekið ástfóstri við, eins og lögin: Blautar varir, Geta pabbar ekki grátið, Ég verð að fá að skjóta þig, Halló ég elska þig, Ég stend á skýi og Vertu þú sjálfur, svo einhver dæmi séu tekin. Ófá danssporin voru stigin undir þessum lögum á vestfirskum dansgólfum er sveitin spilaði reglulega á heimaslóðum framvarðarins Helga og nokkuð víst að einhverjir geri sér ferð suður yfir heiðar til að rifa upp gamlar minningar undir tali og tónum Síðan skein sólar.
annska@bb.is

Í dag mun Yann Rouxel verja meistaraprófsritgerð sína í haf- og strandsvæðastjórnun við Háskólasetur Vestfjarða. Ritgerð Yann ber titilinn Best Practices for Fishing Sustainability: Fishing Gear Assessment in the Newfoundland Inshore Northern Cod Fishery.
Leiðbeinandi verkefnisins er William Alan Montevecchi, rannsóknarprófessor við Memorial University á Nýfundnalandi. Pródómari er dr. Guðbjörg Ásta Ólafsdóttir, forstöðumaður Rannsóknaseturs Háskóla Íslands á Vestfjörðum.

Eins og titilinn gefur til kynna fjallar ritgerð Yann um mat á veiðafærum til að tryggja sjálfbæra nýtingu fiskistofna við Nýfundnaland. Stærsta fiskistofnahrun sögunnar átti sér stað við Nýfundnaland og nú hafa veiðar verið leyfðar á ný í takmörkuðu mæli. Nýfundnaland stendur því frammi fyrir verulegum áskorunum þegar kemur að vistfræðilegri og efnahagslegri sjálfbærni. Í ritgerðinni er lagt mat á þrjár veiðiaðferðir þorsks við Nýfundnaland, netaveiðar, handfæraveiðar og körfuveiðar. Veikleikar og styrkleikar hverrar veiðiaðferðar fyrir sig eru kannaðar til að komast að raun um hver þessara aðferða gæti verið besta fyrirmyndin við stjórnun veiðanna í framtíðinni.

Erindi Yann hefst kl. 14 í stofu 1 í Háskólasetrinu og er opið öllum áhugasömum.

Niðurstöður evrópskrar heilsufarsrannsóknar sýna að áfengis er sjaldnar neytt á Íslandi en á hinum Norðurlöndunum. Óhófleg drykkja er hins vegar nokkuð tíðari hér en annars staðar. Ísland er með sjöunda lægsta hlutfallið sem drekkur að minnsta kosti einu sinni í viku eða oftar, eða rétt rúmlega 20%. Hlutfallið er hæst í Bretlandi, 52,5%. Af Norðurlöndunum er Danmörk með hæsta hlutfallið, rúmlega 51%, sem er þriðja hæsta hlutfallið af þeim löndum sem tóku þátt í rannsókninni. Ef eingöngu er horft til þeirra sem drekka áfengi daglega er hlutfallið á Íslandi 0,6%, sem þýðir að Ísland er ásamt Litháen með næstlægsta hlutfallið. Hlutfallið mælist hæst í Portúgal, rúmlega 24%.

Á Íslandi er hlutfall fólks sem drekkur einu sinni í mánuði eða oftar (en þó ekki vikulega) það annað hæsta, eða rúmlega 39%. Hæst er það í Noregi, rúmlega 49%. Þá er hlutfall fólks á Íslandi sem drekkur sjaldnar en einu sinni í mánuði nokkuð hátt, tæplega 22%, sem er sjöunda hæsta hlutfallið í rannsókninni.

Hlutfall óhóflegrar drykkju var það fjórða lægsta á Íslandi, rúmlega 42%, en óhófleg drykkja er skilgreind sem neysla 60 gramma af hreinum vínanda í einni setu sem jafngildir 3 stórum bjórum eða 5 vínglösum. Með tíðni er átt við hversu oft á síðustu 12 mánuðum neysla áfengis samsvarar óhóflegri drykkju. Ísland er með annað hæsta hlutfallið sem neytir þetta mikils magns af áfengi sjaldnar en einu sinni í mánuði (tæplega 32%) og fjórða hæsta hlutfallið sem drekkur slíkt magn nokkrum sinnum í mánuði (en þó ekki í hverri viku), eða tæp 24%. Aftur á móti er Ísland með áttunda lægsta hlutfallið sem drekkur slíkt magn í hverri viku, rétt rúm 2% sem er vel undir meðaltali Evrópusambandsins sem er rúm 5%.

Evrópska heilsufarsrannsóknin er samræmd evrópsk rannsókn á heilsufari og heilsutengdri hegðun sem er framkvæmd af hagstofum á Evrópska efnahagssvæðinu. Íslenski hluti rannsóknarinnar var framkvæmdur haustið 2015. Í úrtaki voru 5.700 einstaklingar valdir af handahófi úr þjóðskrá. Af þeim svaraði 4.001 einstaklingur sem þýðir að svarhlutfallið var 70,2%.

Um þetta var fjallað á vef Hagstofu Íslands þar sem nálgast má frekari upplýsingar um rannsóknina.

annska@bb.is

Aldrei fór ég suður – rokkhátíð alþýðunnar er handan við hornið, en að vanda verður hún haldin um páskana á Ísafirði. Líkt og í fyrra verður hátíðin haldin í skemmu rækjuverksmiðjunnar Kampa við Ásgeirsgötu. „Það var hreinlega dýrðlegt að vera í Kampaskemmunni í fyrra. Húsnæðið sem Kampi lætur okkur í té hentar vel að öllu leyti. Mjög vel staðsett á eyrinni, hæfilega rúmgott og sándar rosalega vel. Við höfum verið að skoða nýjar útfærslur á húsinu því lengi getur gott batnað og það verður spennandi að sjá hvað kemur úr því,” segir Kristján Freyr Halldórsson, rokkstjóri Aldrei fór ég suður í tilkynningu frá hátíðinni.

„Við erum ákaflega glöð að fá færi til að endurtaka leikinn í ár. Þessi velvild Kampamanna, Jóni Guðbjartssyni og öllu hans fólki er ákaflega gleðileg og um leið undirstrikar hún að AFÉS er ekki bara rokktónleikar og djamm, heldur líka metnaðarfullt samfélagsverkefni sem virkjar Ísfirðinga og nærsveitunga til ítrekaðra stórvirkja af ýmsu tagi,” segir Kristján.

Stóra spurningin hvert ár þegar líður fram á þennan tíma er: hverjir spila svo í ár? Kristján vill lítið láta upp að svo stöddu. „Eins og er get ég bara staðfest að hátíðin mun svo sannarlega eiga sér stað í ár og gott betur, í skemmu Kampafólks á Ísafirði, alveg lengst niður á höfn. Jú og að prógrammið sem við höfum verið að smíða er alveg til fyrirmyndar og það styttist í að við getum hent prógramminu í loftið,” segir Kristján og bætir við að dagskráin sé fullbókuð í ár og komust færri að en vildu.

Vinstri græn og Sjálfstæðisflokkurinn njóta mest fylgis meðal landsmanna samkvæmt nýrri skoðanakönnun MRR. Munurinn á flokkunum er þó innan skekkjumarka. Vinstri-græn mælast með 27 prósenta fylgi, jafn mikið og í síðustu könnun í byrjun mánaðarins. Sjálfstæðisflokkurinn mælist með 24,4 prósenta fylgi, litlu meira en í síðustu könnun. Munurinn á fylgi VG og Sjálfstæðisflokks er innan skekkjumarka. Samfylkingin mælist með fylgi í tveggja stafa tölu í fyrsta skipti í rúmlega hálft ár, eða með 10,0% en mældist síðast með 7,8%. Stuðningur við ríkisstjórnina hækkaði milli kannana og kváðust 34,9% styðja ríkisstjórnina. Það er 2,3 prósentustiga hækkun frá síðustu könnun.

Fylgi við Pírata lækkar úr 13,6 prósentum í 11,9 prósent milli kannana. Fylgi Framsóknarflokksins fer úr 9,7 prósentum í 10,7 prósent. Breytingar á fylgi þessara flokka er innan skekkjumarka. Viðreisn mælist með 6,2 prósenta fylgi og Björt framtíð 5,4 prósent.

Matvælastofnun fór í eftirlit hjá Arctic Sea Farm á laugardag í kjölfar tilkynningar fyrirtækisins um gat á sjókví með regnbogasilungi í Dýrafirði. Búið er að loka gatinu en ekki er að svo stöddu vitað hve margir fiskar hafa sloppið. Ljóst er að sá regnbogasilungur sem slapp í umhverfið síðastliðið sumar kom ekki úr þessari sjókví og eru þær slysasleppingar áfram til rannsóknar hjá stofnuninni. Í tilkynningu Arctic Sea Farm til fjölmiðla kom fram að töluverður fjöldi fiska gæti hafa sloppið og að þarna hefði mögulega fundist skýring á veiðum á regnbogasilungi á Vestfjörðum síðastliðið sumar. Matvælastofnun útilokar að málin tengist og bendir í því ljósi á að flestir þeir fiskar sem veiddust af eftirlitsmanni Fiskistofu á Vestfjörðum síðasta sumar voru um hálft kíló að þyngd. Á sama tíma og þær veiðar stóðu yfir var fiskurinn í þeirri kví sem nú um ræðir um tvö kíló, en meðalþyngd fiska í kvínni er nú fjögur kíló.

Í fréttatilkynningu Matvælastofnunar kemur fram að enn er óljóst hvenær og hvernig gatið myndaðist, en líklegasta skýringin er sú að botnhringur og net hafi nuddast saman með þeim afleiðingum að núningsgat myndaðist á efri hluta þrengingar við botn kvíarinnar. Netið hefur verið lagfært og verður gatið stærðarmælt þegar kvíin verður tekin á land en áætluð stærð gatsins er um 80cm x 50cm. Fyrtækið hefur látið kafara yfirfara aðrar kvíar og búnaðinum verður öllum skipt út á þessu ári.