Meirihluti Íslendinga, eða 58 prósent, er andvígur því að sala léttvíns í matvöruverslunum hér á landi verði leyfð. Um 32 prósent Íslendinga eru hlynntir því, samkvæmt nýrri könnun Maskínu. Andstaða við sölu léttvíns í matvöruverslunum hefur aukist frá því í febrúar í fyrra þegar um 52 prósent voru andvíg því og 35 prósent hlynnt því. Lítið fleiri eru hlynntir sölu bjórs í matvöruverslunum, eða á bilinu 33 til 34 prósent.

Yfirgnæfandi meirihluti er andvígur sölu sterks áfengis í matvöruverslunum eða hátt í 74 prósent svarenda. Þegar niðurstöður eru skoðaðar úr öllum spurningunum þremur kemur í ljós að rúmlega 66,3 prósent eru ekki hlynntir sölu á neinu áfengi í matvöruverslunum.

Andstaða við sölu bjórs í matvöruverslunum eykst með hækkandi aldri. Þannig eru um 60 prósent þeirra sem eru yngri en 25 ára hlynnt sölunni en aðeins um 19 prósent þeirra sem eru 55 ára og eldri. Þá er andstaðan meiri utan höfuðborgarsvæðisins.

Nærri helmingur kjósenda Bjartrar framtíðar, Pírata og Sjálfstæðisflokks er hlynntur sölu bjórs á meðan kjósendur Samfylkingarinnar og Vinstri grænna sýna mestu andstöðuna, eða um 70-75 prósent. Sami marktæki munur var á milli hópa þegar kemur að sölu léttvíns.

smari@bb.is

Aflafréttir segja frá því á heimasíðu sinni að Kópur BA sem seldur frá frá Þórsbergi á Tálknafirði haustið 2015 til Nesfisks hafi nú verið seldur til Noregs.

Þórsberg hf á Tálknafirði seldi Kóp haustið 2015, sagði upp öllum starfsmönnum til sjós og lands og lokaði frystihúsinu. Báturinn hefur síðan þá legið við bryggju í Njarðvík þar sem kvótinn var fluttur af honum og yfir á báta Nesfisks.

Kópur BA á langa vestfirska sögu og á BB.is í desember 2002 er fjallað um komu hans til Tálknafjarðar og þar er Kópur kynntur til leiks sem gamall Tálknfirðingur en hann var gerður út frá Tálknafirði frá 1968-1978.

bryndis@bb.is

Í gær afhentu forsvarskonur samskotasjóðsins Stöndum saman Vestfirðir þrjú hjartastuðtæki til Lögreglunnar á Vestfjörðum. Tækin fara í lögreglubíla á Ísafirði, Patreksfirði og Hólmavík og með tilkomu þeirra eru allir lögreglubílar á Vestfjörðum útbúnir slíkum tækjum. Þetta er þriðja söfnunin sem SSV stendur fyrir undanfarið ár og hafa þegar fyrir tilstuðlan hans verið afhent barkaþræðingartæki og sprautudælur á Heilbrigðisstofnun Vestfjarða á Ísafirði og sjúkrarúm á HVEST á Patreksfirði, auk áður nefndra hjartastuðtækja til Lögreglunnar.

Söfnun þessi sló öll met í tímalengd söfnunar, því einungis tók það Vestfirðinga rúmar tvær vikur að klára að fjármagna tækjakaupin og segjast forsvarkonurnar Tinna Hrund Hlynsdóttir, Steinunn Einarsdóttir og Hólmfríður Bóasdóttir verulega glaðar með hvernig til tókst: „Þegar við sameinum krafta okkar þá getum við gert stórkostlega hluti saman. Við erum auðvitað að springa úr stolti og ánægju.“ Þær segja allar sem lagt hafa söfnuninni lið mega gefa sjálfum sér klapp á bakið og segja gaman að sjá hvernig þessi þriðja söfnun virtist ná vel til fólks, sem var duglegt að leggja henni lið sem og að láta vita af henni með því að dreifa upplýsingum á samfélagsmiðlum.

Næsta söfnun sjóðsins verður í haust og ekki liggur ljóst fyrir á þessari stundu hver hún verður. Stjórn SSV er opin fyrir samstarfi við önnur félög ef einhverjir eru að horfa til þess að fara í stórar fjáraflanir. Reikningur sjóðsins (Kt. 410216-0190 Banki 156-26-216) er þó alltaf opinn og hafa einhverjir brugðið á það ráð að hafa hann inn í mánaðarlegum greiðslum og rennur allt það sem inn í sjóðinn kemur til þeirra verkefna sem eru styrkt hverju sinni.

annska@bb.is

Formaður bæjarráðs Bolungvíkurkaupstaðar gagnrýnir vinnubrögð Gísla Halldórs Halldórssonar, bæjarstjóra Ísafjarðarbæjar, vegna hugmynda um sameiningu sveitarfélaga við Djúp. Bæjarráð Ísafjarðarbæjar hefur samþykkt að bjóða Súðavíkurhreppi til samstarfs um að kanna möguleika á sameiningu og verður sótt um fjárframlag frá Jöfnunarsjóði sveitarfélaga til framkvæmdar slíkrar könnunar.

„Það kemur manni spánskt fyrir sjónir að þau tvö ætli að fara í einhverja sér vegferð. Það var búið að ákveða að funda þann 10. mars um samstarf sveitarfélaga við Djúp svo þetta kemur á óvart,“ segir Baldur Smári Einarsson, formaður bæjarráðs Bolungarvíkurkaupstaðar.

Arna Lára Jónsdóttir, formaður bæjarráðs Ísafjarðarbæjar, sagði í samtali við bb.is að Bolungarvíkurkaupstað hafi verið boðið að borðinu, en hafi hafnað því. „Okkur var ekki beinlínis boðið,“ segir Baldur Smári um orð Örnu Láru. „Á óformlegum fundi kynnir bæjarstjóri Ísafjarðarbæjar ákveðið prójekt sem var fullmótað og við áttum að samþykkja. Þetta er verklag sem við getum engan veginn við sætt okkur við og er okkur algjörlega á móti skapi. Hvernig staðið var að þessu af hálfu bæjarstjórans á Ísafirði er sameiningu og auknu samstarfi ekki til framdráttar,“ segir Baldur Smári.

Hann segir að eftir þennan óformlega fund hafi verið ákveðið að setjast niður og ræða málin á ofangreindum fundi sem halda á þann 10. mars. „Ef mönnum er alvara með sameiningu og vilja vinna málin vel þá setjast bæjarfulltrúar niður og ræða um mögulega fleti á sameiningu áður en lengra væri haldið. Á þessum fundi var Gísli Halldór með allt tilbúið og við áttum einfaldlega að samþykkja það sem hann var búinn að gera.“

Baldur Smári segir að menn verði að horfa raunsætt á málin og átta sig á sínu lýðræðislega umboði. „Við vitum alveg hver hugur Bolvíkinga hefur verið til sameiningar, það er enginn í Bolungarvík að pressa á sameiningu og sameining yrði einfaldlega felld í kosningu að svo stöddu. Ég sé ekki tilganginn í því að fara í þessa vinnu þegar ég veit að þetta verður fellt. Þessi vinnubrögð bæjarstjórans eru ekki til þess fallin að skapa traust, en traust er það mikilvægasta í svona viðræðum,“ segir Baldur Smári sem er þó ekki afhuga sameiningu sveitarfélaganna. „Mín persónulega sýn er að einhvern tímann á næstur árum kemur sá dagur að við förum í að sameina sveitarfélögin, en menn verða að velja þann dag vandlega.“

smari@bb.is

Í fimm ár hefur Grunnskóli Bolungarvíkur tekið þátt í eTwinningverkefnum af ýmsum toga, einu til fimm verkefnum á hverju ári. Yfir 10 kennarar sem starfa við skólann hafa lagt þar hönd á plóg.  Greinilegt er að Grunnskóli Bolungarvíkur hefur verið mjög heppinn með samstarfsskóla og staðið sig vel í verkefnunum. Verkefni skólans hafa nánast ár hvert fengið gæðavottun auk þess sem þau hafa unnið til stærri verðlauna. Árið 2015 var verkefnið Art connects us valið besta verkefni í Evrópu fyrir 6-13 ára. Á síðasta ári var verkefnið Sound by sound step together valið besta verkefnið á Íslandi og er Zofía Marciniac myndmenntakennari í Grunnskólnum í Bolungarvík þátttakandi í þessum báðum verkefnum. Núna í febrúar var verkefnið  Username: children Passwoord: right sem Elín Þóra Stefánsdóttir tók þátt í valið besta verkefnið í Þýskalandi fyrir 4-11 ára.

smari@bb.is

Í dag er sprengidagur, en svo nefnist síðasti dagur fyrir lönguföstu, næstur á eftir bolludegi og á undan öskudegi í föstuinngangi. Á þessum degi tíðkast á að bjóða upp á saltkjöt og baunir á íslenskum heimilum og belgja sig út, þó ekki séu margir sem enn viðhaldi þeirri hefð að fasta í kjölfarið. Oftast er boðið upp á baunasúpu með grænmeti, kartöflum, rófum og gulrótum og jafnvel beikoni og saltað lambakjöt, ýmist elduðu sér eða soðnu í súpunni.

Þeim sem veikir eru fyrir hjarta ættu að fara sér varlega í saltkjötsátinu, en á sprengidag fjölgar þeim sem leita á Hjartagátt Landspítalans samkvæmt því sem Karl Andresen yfirlæknir þar sagði í viðtali við RÚV árið 2014. Sagði hann jafnframt að mikið saltaður matur eins og borðaður er á sprengidag sem og um jól og hátíðir getur verið varasamur fyrir þá sem eru veikir fyrir.

Lagstúfurinn „Saltkjöt og baunir, túkall“ er oft sunginn þegar sprengidagurinn fer að nálgast en er einnig oft sönglaður til merkis um að einhverju sé lokið, til dæmis skemmtiatriði. Það mun hafa verið skemmtikrafturinn Baldur Georgs sem var upphafsmaður þessa en lagstúfinn er að finna á plötu með Baldri og Konna frá 1954 og kann hann að hafa tekið þetta eftir bandarískum rakarakvartettum er segir á vef Wikipediu.

annska@bb.is

Aðfaranótt sunnudagsins 26. febrúar var lögreglunni á Vestfjörðum tilkynnt um að fólk væri inni á útisundlaugarsvæðinu í Bolungarvík. Þegar lögregluna bar að garði voru alls 8 ungmenni að fara af svæðinu eftir að hafa nýtt sér þessa aðstöðu. Vert er að minna á að stranglega bannað er að fara inn á þetta svæði utan opnunartíma, enda afmarkað með girðingu.

Tilkynnt var um þrjú umferðaróhöpp í liðinni viku. Eitt þeirra varð þann 24. febrúar þegar ökumaður missti stjórn á bifreið sinni í Mikladal með þeim afleiðingum að hún rann út af veginum og niður bratta hlíð, þó án þess að velta. Töluvert tjón varð á undirvagni bifreiðarinnar og ökumaður, sem var einn í bifreiðinni þegar atvikið átti sé stað, var færður undir læknishendur, þó ekki með alvarlega áverka. Þá rann önnur bifreið út af veginum í Vatnsfirði í Ísafjarðardjúpi þann 20. febrúar. Ekkert tjón varð á ökutækinu og engin meiðsl urðu á ökumanni eða farþegum. Þriðja óhappið varð þann sama dag, 20. febrúar í Vatnsfirði í Vesturbyggð en þá missti ökumaður stjórn á jeppabifreið sinni með þeim afleiðingum að bifreiðin rann út af veginum og valt eina veltu. Ökumaður og farþegi hlutu ekki alvarlega áverka. Ökumenn og farþegar í þessum óhöppum voru allir með öryggisbelti spennt og má telja víst að meiðsl hefðu orðið mun meiri ef svo hefði ekki verið. Rétt er að minna á mikilvægi þessa öryggisþáttar. Snjór og hálka var á yfirborði vega þegar þessi atvik urðu. Þá er rétt að minna ökumenn á að gæta sérstakrar varúðar þegar slíkar aðstæður eru fyrir hendi.

Tveir ökumenn voru kærðir fyrir að aka yfir leyfilegum hámarkshraða í vikunni. Báðir ökumennirnir voru stöðvaðir á Skutulsfjarðarbraut á Ísafirði, þar sem hámarkshraði er 60 km.

Lögreglan vill minna á varhugaverðar aðstæður sem geta skapast á vegum í umdæminu þegar yfirborð vega er þakið snjó og leysingar verða. Þá vill myndast krapi og oft á tíðum láta ökutæki illa að stjórn og renna til. Vert er að haga akstri, sem fyrr, miðað við aðstæður hverju sinni.

smari@bb.is

Bolungarvíkurkaupstaður hefur ekki tekið afstöðu hvort dómi Héraðsdóms Vestfjarða yfir Valdimar Lúðvík Gíslasyni verði áfrýjað. Valdimar Lúðvík var dæmdur þriggja mánaða skilorðsbundið fangelsi fyrir stórfelld eignarspjöll á friðuðu húsi í Bolungarvík í júlí 2014. Húsið er í eigu Bolungarvíkurkaupstaðar. „Ég geri ráð fyrir að dómurinn verði lagður fyrir bæjarráð eða bæjarstjórn og ákvörðun tekin um næstu skref,“ segir Jón Páll Hreinsson, bæjarstjóri í Bolungarvík.

Bolungarvíkurkaupstaður gerði skaðabótakröfu upp á 5,5 milljónir króna en Héraðsdómur vísaði meirihluta kröfunnar frá dómi, eða 4,5 milljónum kr. Var það gert vegna þess að sá hluti kröfunnar studdist við greinargerð byggingarfulltrúa Bolungarvíkurkaupstaðar um kostnað við endurbætur á skemmdunum sem húsið varð fyrir. Dómurinn taldi  greinargerðina ekki fullnægjandi gagn og taldi kröfuna því vera vanreifaða. Dómurinn féllst hins vegar á bótakröfu Bolungarvíkurkaupstaðar upp á eina milljón kr. en þar lagði bótakrefjandi fram reikninga vegna bráðabirgðaviðgerðar á húsinu. Jón Páll segir að hann hafi ekki átt kost á að ræða við lögfræðing bæjarins um þetta atriði dómsins.

smari@bb.is