Verkalýðsfélag Vestfirðinga leggur sérstaka áherslu á að tengja norður- og suðursvæði Vestfjarða í einni framkvæmd með jarðgöngum og vegabótum. Í ályktun stjórnar félagsins kemur fram að á meðan ástand vegamála á svæðinu er svo dapurlegt sem raun ber vitni, sé einfaldlega ekki hægt að bjóða íbúum og atvinnulífi á suðurfjörðum Vestfjarða upp á að standa í eðlilegri samkeppni við aðra landshluta vegna vanþróaðra samgangna. „Í þeim efnum eru vestfirskir vegir mörgum áratugum á eftir í uppbyggingu og þróun. Verkalýðsfélag Vestfirðinga ítrekar að bættar samgöngur eru ein af undirstöðunum þess að tryggja og viðhalda byggð á Vestfjörðum,“ segir í ályktuninni og enn fremur að krafa Vestfirðinga sé skýr:

„Góðar samgöngur eru lífæð hverrar byggðar, bæði hvað varðar atvinnu og menningu, sem og öryggi og þróun byggðar. Vegir á Vestfjörðum standast ekki þær kröfur sem gerðar eru til nútíma þjóðvega og uppfylltar hafa verið hjá öðrum. Stjórn Verkalýðsfélags Vestfirðinga skorar á samgönguráðherra og þingmenn kjördæmisins að tafarlaust verði ráðist í gerð heilsárs vegbóta við alla þéttbýlisstaði á Vestfjörðum.“

smari@bb.is

Auglýsing

Auglýsing

Smábátaeigendur jafnt og aðrir í sjávarútveginum eru flemtri slegnir vegna hríðlækkandi verðs á fiski, að því er segir á vef Landssambands smábátaeigenda. Á fyrstu tveim dögum í mars birtast tölur sem eiga sér enga líka hvað verðlækkun snertir. Fyrsta og annan mars 2016 var meðalverð á óslægðri ýsu á fiskmörkuðum 298 kr/kg. Nú ári síðar seldist ýsa á 187 kr/kg.  Mismunurinn er 111 kr/kg, verðlækkunin nemur 37%.

Verðhækkun á erlendum mörkuðum fyrir ferskan fisk er ekki nægjanleg á móti styrkingu krónunnar gagnvart evru, pundi og dollar, segir á vef Landssambandsins.

smari@bb.is

Auglýsing

Auglýsing

Samræmdu prófin í efstu bekkjum grunnskóla landsins hefjast í dag.  Nemendur í níunda og tíunda bekk taka prófin að þessu sinni í samræmi við breytta reglugerð og verða prófin rafræn. Þetta verður í eina skiptið sem tveir árgangar taka prófið á sama tíma. Framvegis verða samræmd könnunarpróf lögð fyrir að vori í níunda bekk í stað haustprófa í tíunda bekk.

Prófin verða með breyttu sniði í samræmi við lagabreytingar á grunnskólalögum og lögum um Menntamálastofnun. Í tilkynningu á vef Menntamálastofnunar kemur fram að með því að færa 10. bekkjar könnunarprófið í 9. bekk gefist nemendum, forráðamönnum þeirra og kennurum meira svigrúm til þess að nýta sér niðurstöðurnar til að bregðast við og móta áherslur í námi í 10. bekk.

smari@bb.is

Auglýsing

Auglýsing

Sveinn Ragnarsson á Svarfhóli í Geiradal hefur tekið við sem vefstjóri Reykhólahrepps. Hann tekur við af Hlyni Þór Magnússyni sagnfræðingi sem sagði starfinu lausu í haust en hefur aðstoðað sveitarstjóra með vefinn allt til þessa dags. Sveinn tekur við vef sem notið hefur vinsælda, þá sérstaklega fyrir vönduð vinnubrögð fyrrum vefstjóra.

Heima á Svarfhóli rekur Sveinn verkstæði. Hann er fyrrverandi sveitarstjórnarmaður, fyrrverandi og núverandi göngugarpur og annálaður áhugaljósmyndari, allavega í heimabyggð og líka þó víðar væri leitað.

smari@bb.is

Auglýsing

Auglýsing

Í nóvember 2016 var aflaverðmæti íslenskra skipa 10,2 milljarðar króna sem er samdráttur um 16,8% samanborið við nóvember 2015. Verðmæti botnfiskafla nam 7,7 milljörðum og dróst saman um 14,2% frá fyrra ári. Þetta kemur fram í frétt Hagstofunnar. Uppistaðan í verðmæti botnfiskaflans var þorskur en verðmæti hans nam 5,5 milljörðum sem er 2,6% minna en í nóvember 2015. Verðmæti uppsjávarafla dróst einnig saman á milli ára, nam tæpum 1,9 milljörðum sem er 21,2% minna en í nóvember 2015. Verðmæti flatfiskafla dróst saman um 25,5% og nam 522 milljónum króna í nóvember. Aflaverðmæti skelfisks dróst saman um 50,8% og nam um 88 milljónum samanborið við tæpar 179 milljónir í nóvember 2015.

Á 12 mánaða tímabili frá desember 2015 til nóvember 2016 var aflaverðmæti 134,9 milljarðar króna sem er 10,5% samdráttur miðað við sama tímabil ári fyrr. Verðmæti botnfiskafla dróst saman um 7,4 milljarða á milli tímabila. Verðmæti uppsjávartegunda dróst einnig saman á milli þessara 12 mánaða tímabila, vegur þar þyngst 7,7 milljarða samdráttur á verðmæti loðnuafla.

smari@bb.is

Auglýsing

Auglýsing

„Ég setti þessa tillögu fram til að bjarga því sem bjargað varð,“ segir Daníel Jakobsson, oddviti Sjálfstæðisflokksins, um breytingartillögu við samning Ísafjarðarbæjar við Hestamannafélagið Hendingu. Daníel lagði tillöguna fram á fundi bæjarstjórnar fyrir helgi og þegar til atkvæðagreiðslu kom um tillöguna sat Daníel hjá.

„Ég var að reyna að búa til leið fyrir Í-listann að bæta málið en það kom fljótlega í ljós að Í-listinn vildi ekki styðja breytingarnar og því sat ég hjá,“ segir Daníel sem hefur talað eindregið gegn samningnum og finnst hann meðal annars vera allt of dýr. „Ég hefði verið til í að kyngja upphæðinni í skiptum fyrir betri vinnubrögð.“ Samflokksmenn hans í Sjálfstæðisflokknum studdu breytingartillöguna auk bæjarfulltrúa Framsóknarflokks. Tillagan var felld með atkvæðum Í-listans.

Ísafjarðarbær lætur í té 30 milljónir kr. til að reisa reiðskemmu í Engidal og til viðbótar koma 20 milljóna kr. bætur frá Vegagerðinni fyrir aðstöðumissi Hendingar á Búðartúni í Hnífsdal.

„Þetta er allt of opinn samningur og of margt sem er óljóst,“ segir Daníel. Ísafjarðarbær og Hending ætla að stofna með sér einkahlutafélag um byggingu reiðskemmunnar. „Það er ekki búið að ákveða hvernig hús á að byggja. Engin þarfagreining liggur fyrir og hvað þá skilalýsing. Það liggur ekki fyrir hvernig það á að koma sjálfboðavinnu hestamanna inn í einkahlutafélag því hún er skattskyld. Verður stofnuð byggingarnefnd eða mun stjórn einkahlutafélagsins ráða för er annað sem vekur upp spurningar. Ég óttast að bærinn sé að skrifa upp á óútfylltan tékka,“ segir Daníel.

smari@bb.is

Auglýsing

Auglýsing

Skipsnafnið Júlíus Geirmundsson ÍS 270 hefur nú verið samfleytt við lýði í hálfa öld og fjögur skip borið það hingað til. Fyrsta skipið með þessu nafni kom til heimahafnar á Ísafirði þann 2. mars 1967 eða fyrir fimmtíu árum. Í samantekt Kristjáns G. Jóhannssonar, stjórnarformanns Hraðfrystihússins – Gunnvarar hf. kemur fram að lauslega áætlað hafa þessi fjögur skip að borið landi að landi rúmlega 200 þúsund tonn af fiski.

Fyrsta skipið var smíðað í Boizenburg í Austur-Þýskalandi. Fimm árum síðar kom næsta skip, sem var 407 lesta skuttogari sem var byggður í Flekkefjord í Noregi. Þriðja skipið sem bar nafnið Júlíus Geirmundsson ÍS 270 var 497 tonna skuttogari, sem fyrst kom til heimahafnar á Ísafirði 15. júní 1979. Tíu árum síðar kom núverandi Júlíus til Ísafjarðar og fyrsti flakafrystitogarinn en hann var smíðaður í Stettin í Póllandi.

► Samantekt um Júllana fjóra

smari@bb.is

Auglýsing

Auglýsing

Vika endómetríósu stendur nú yfir á landsvísu, en um er að ræða vitundarvakningu á samnefndnum sjúkdómi sem einnig er þekkt sem legslímuflakk. Zontasamtökin og þar á meðal Zontaklúbburinn Fjörgyn á Ísafirði er meðal þeirra sem styðja samtök um endómetríósu við framkvæmd vikunnar. Fjörgyn hefur að auki ákveðið að styrkja samtökin fjárhagslega og þá munu Safnahúsið og höfuðstöðsvar Orkubús Vestfjarða á Ísafirði vera með gula lýsingu af þessu tilefni dagana 4.-10. mars auk fleiri bygginga bæði á höfuðborgarsvæði og um landið.

Um 10% kvenna hafa endómetríósu eða um 176 milljónir kvenna í heiminum. Sjúkdómnum geta fylgt miklar kvalir og ýmsir erfiðir fylgikvillar, þar á meðal meltingarvandræði og ófrjósemi og er greiningartími sjúkdómsins almennt langur, en meðalgreiningartími er 7-8 ár. Stuðningur og fræðsla er meginverkefni Samtaka um endómetríósu sem vinna ötullega að því að fræða almenning og heilbrigðisstarfsfólk um sjúkdóminn. Margar konur með endómetríósu finna fyrir vantrú annarra og þurfa enn þann dag í dag að berjast fyrir viðurkenningu á líðan sinni og einkennum.

Nánari upplýsingar um sjúkdóminn og viku endómetríósu er að finna á vef samtakanna endo.is. Þar má kaupa söluvarning líkt og gulu slaufuna til styrktar samtökunum og þar má einnig finna upplýsingar um málþing sem haldið er í tilefni vitundarátaksins í hringsal Landspítalans á miðvikudag. Einnig er hægt að styrkja samtökin beint með því að leggja inn á 0336-26-2650 og kennitala: 711006-2650.

annska@bb.is

Auglýsing

Auglýsing