Um 148 þúsund er­lend­ir ferðamenn fóru frá land­inu í fe­brú­ar síðastliðnum sam­kvæmt taln­ing­um Ferðamála­stofu í Flug­stöð Leifs Ei­ríks­son­ar eða 47.600 fleiri en í fe­brú­ar á síðasta ári. Aukn­ing­in nem­ur 47,3% milli ára.

Ferðamönn­um fjölgaði jafn­framt mikið milli ára, árin á und­an en aukn­ing­in var 31,2% frá 2013-2014, 34,4% frá 2014-2015 og 42,9% frá 2015-2016.

Frá ára­mót­um hafa 284 þúsund er­lend­ir ferðamenn farið úr landi um Kefla­vík­ur­flug­völl sem er 59,5% aukn­ing miðað við sama tíma­bil í fyrra. Greint er frá þessu á vef Ferðamála­stofu.

Þar kem­ur jafn­framt fram að Bret­ar og Banda­ríkja­menn voru um helm­ing­ur ferðamanna en Bret­ar voru 31,9% og Banda­ríkja­menn 19,5% af heild­ar­fjölda. Tíu þjóðerni sem röðuðust þar á eft­ir voru eft­ir­far­andi, Kín­verj­ar með 5,7%, Frakk­ar með 4,5%, Þjóðverj­ar 4,4%, Kan­ada­menn 3,3% og Hol­lend­ing­ar með 2,1%.

Fjöldi erlendra ferðamenna sem fara um Leifsstöð hefur nærri fjór­fald­ast í fe­brú­ar á fimm ára tíma­bili. Þannig hafa fjöldi N-Am­eríkan­a nærri sex­fald­ast, Mið- og S-Evr­ópu­bú­ar meira en þre­fald­ast. Breskir ferðamenn er þrisvar sinnum fleiri en fyrir fimm árum. Norður­landa­bú­um hef­ur hins veg­ar fjölgað minna eða um 47,3% á tíma­bil­inu 2013-2017.

smari@bb.is

Háskóladagurinn verður á Ísafirði á morgun, en viðburðurinn hefur fest sig í sessi síðustu ár þar sem boðið er upp á kynningu á öllu því háskólanámi sem í boði er hér á landi. Gildir einu þá hvort hinir fróðleiksþyrstu séu nemendur sem eru að klára framhaldsskóla og leita að námi til að búa sig undir framtíð sína á fullorðinsárum eða fólk sem vill sækja sér frekari menntun hvar á ævistigum sem það kann að vera statt. Háskóladagurinn var í Reykjavík um nýliðna helgi og nú fer lestin ferð um landið þar sem fulltrúar sjö háskóla kynna yfir 500 námsbrautir, en það eru Háskóli Íslands, Háskólinn á Akureyri, Háskólinn á Bifröst, Háskólinn á Hólum, Háskólinn í Reykjavík, Landbúnaðarháskóli Íslands og Listaháskóli Íslands.

Háskóladagurinn verður í Menntaskólanum á Ísafirði, þann 9. mars á milli klukkan 11 og 13.

annska@bb.is

Áfram halda mánuðirnir áfram að skipa sér í röð þeirra hlýjustu í mælingum Veðurstofu Íslands og var nýliðinn febrúarmánuður hlýr og vætusamur. Einkum var hlýtt á norðan- og austanverðu landinu og vætusamt um sunnan- og vestanvert landið. Úrkoma var flesta daga á sunnan- og vestanverðu landinu og snjólétt um allt land þar til kyngdi niður snjó við Faxaflóa aðfaranótt þ. 26. og vöknuðu íbúar höfuðborgarinnar við 51 cm jafnfallinn snjó sem er næstmesta snjódýpt sem mælst hefur í Reykjavík til þessa en mest mældist hún hinn 18. janúar 1937, 55 cm.

Meðalhitinn í Reykjavík mældist 2,8 stig og er það 2,5 stigum ofan meðaltals áranna 1961-1990, en 1,8 stigum ofan meðaltals síðustu tíu ára. Í febrúar 2013 var hlýrra en þá var hitinn 3,8 stig. Á Akureyri var meðalhitinn 2,7 stig, 4,1 stigi ofan meðaltals 1961-1990 og 3,5 stigum ofan meðaltals síðustu tíu ára. Á Akureyri þarf að fara aftur til ársins 1965 til að fá heitari febrúarmánuð en þá var meðalhitinn 3,1 stig.

Í Reykjavík mældist úrkoma 126,3 mm sem er um 75% umfram meðallag 1961-1990 og þarf að fara aftur til ársins 2012 til að finna meiri úrkomu en þá mældist hún 135 mm. Veðurhæð var heldur minni en venja er. Meðalveðurhæð á sjálfvirkum stöðvum var 0,6 m/s minni en meðaltal síðustu tíu ára.

Nánar um tíðarfar í febrúar má lesa hér.

annska@bb.is

Bæjarráð Ísafjarðarbæjar mótmælir þeirri stefnu stjórnvalda í samgöngumálum, en fyrir helgi kom í ljós hvaða verkefni samgönguáætlunar fara undir niðurskurðarhnífinn. Meðal annars verður engu fé varið í vegagerð í Gufuadalssveit og á Dynjandisheiði. Í ályktun bæjarráðs erþví mótmælt að stjórnvöld fjármagni ekki samgöngukerfi landsins með þeim hætti sem nauðsynlegt er og líta þar með framhjá þeirri miklu þörf sem er í uppbyggingu innviða. „Bætt samgöngukerfi er ein af forsendum þeirrar uppbyggingar sem þarf að eiga sér stað á Íslandi vegna vaxtar atvinnulífsins á sviði ferðamála og fiskeldis,“ segir í ályktun bæjarráðs.

Hávær mótmæli hafa verið um land allt eftir að Jón Gunnarsson samgönguráðherra skar niður fjölda verkefna á samgönguáætlun sem var samþykkt rétt fyrir kosningar í haust. Ástæða niðurskurðarins er að fjárlög ársins ná ekki að fjármagna þann fjölda þjóðþrifaverka sem þingmenn settu inn í samgönguáætlun kortéri fyrir kosningar.

smari@bb.is

Teitur Björn Einarsson, þingmaður Sjálfstæðisflokksins í Norðvesturkjördæmi, hefur beint þeirri fyrirspurn til Þorgerðar Katrínar Gunnarsdóttur landbúnaðarráðherra hvort ráðherrann telji að leyfi eigi heimaslátrun, ekki aðeins til eigin nota á býli heldur einnig til sölu að því gefnu að vöruvöndun og öryggi séu í fyrirrúmi. Í fyrirspurn Teits Björns er ráðherrann spurður hvort hann telji að rýmka megi reglur til að efla vöruþróun og sölu beint frá býli með það fyrir augum að auka fjölbreytileika í matvælaframleiðslu fyrir neytendur og efla atvinnu í dreifbýli og einnig hvort ráðherrann hyggist beita sér fyrir breytingum í þessa átt á kjörtímabilinu.

smari@bb.is

Landaður afli í Bolungarvík fyrstu sjö vikur ársins eða þar til verkfalli sjómanna lauk 19. febrúar var 1.572 tonn og var Bolungarvík önnur stærsta löndunarhöfn landsins á þessum tíma. Þetta kemur fram á vefnum vikar.is. Aðeins Ólafsvík var með meiri landaðan afla eða 1.895 tonn. Fyrir sama tímabil í fyrra var landaður afli i Bolungarvík 1.987 tonn og því um 20% samdrátt að ræða milli ára.

Landaður afli í höfnum á Vestfjörðum fyrstu 7 vikur ársins 2017 var eftirfarandi:

Bolungarvík: 1.572 tonn
Tálknafjörður: 509 tonn
Suðureyri: 396 tonn
Patreksfjörður: 201 tonn
Flateyri: 201 tonn
Drangsnes: 191 tonn
Hólmavík: 181 tonn
Bíldudalur: 162 tonn
Ísafjörður: 118 tonn
Brjánslækur: 2 tonn
Súðavík: 2 tonn

smari@bb.is

Verkalýðsfélag Vestfirðinga leggur sérstaka áherslu á að tengja norður- og suðursvæði Vestfjarða í einni framkvæmd með jarðgöngum og vegabótum. Í ályktun stjórnar félagsins kemur fram að á meðan ástand vegamála á svæðinu er svo dapurlegt sem raun ber vitni, sé einfaldlega ekki hægt að bjóða íbúum og atvinnulífi á suðurfjörðum Vestfjarða upp á að standa í eðlilegri samkeppni við aðra landshluta vegna vanþróaðra samgangna. „Í þeim efnum eru vestfirskir vegir mörgum áratugum á eftir í uppbyggingu og þróun. Verkalýðsfélag Vestfirðinga ítrekar að bættar samgöngur eru ein af undirstöðunum þess að tryggja og viðhalda byggð á Vestfjörðum,“ segir í ályktuninni og enn fremur að krafa Vestfirðinga sé skýr:

„Góðar samgöngur eru lífæð hverrar byggðar, bæði hvað varðar atvinnu og menningu, sem og öryggi og þróun byggðar. Vegir á Vestfjörðum standast ekki þær kröfur sem gerðar eru til nútíma þjóðvega og uppfylltar hafa verið hjá öðrum. Stjórn Verkalýðsfélags Vestfirðinga skorar á samgönguráðherra og þingmenn kjördæmisins að tafarlaust verði ráðist í gerð heilsárs vegbóta við alla þéttbýlisstaði á Vestfjörðum.“

smari@bb.is