Alls voru 1.343 fólksbílar nýskráðir í febrúar og er það 28% meiri sala heldur en í febrúar á síðasta ári, er salan nam 1.048 bílum. Bílasala það sem af er ári er orðin 2.575 bílar, en var 2.267 í fyrra, aukning um 13,6%.
Af þessum 1.465 seldu bílum voru 419 seldir af BL og hefur umboðið aukið hlutdeild sína um 17% það sem af er ári og alls selt 820 bíla. Enn betur hefur þó Brimborg gert, en söluaukning þar á bæ er 27%. Samkvæmt skráningartölum Samgöngustofu voru merki BL með 28,7% hlutdeild í febrúar og það sem af er árinu er hlutdeildin 28,8% á heildarmarkaði fólks- og sendibíla.
Næst söluhæsta umboðið er Brimborg með 478 selda bíla, Toyota með 444, Askja með 426 og Hekla með 394. Hlutdeild Brimborgar það sem af er ári er 16,8%, Toyota 15,6%, Öskju 15,0% og Heklu 13,8%.
Nýskráningar bílaleigubíla voru 18% fleiri í febrúar heldur en í sama mánuði 2016, en þó 23 prósentum færri sé litið til janúar og febrúar samanlagt. Alls voru 469 bílar nýskráðir bílaleigunum í febrúar, samanborið við 397 í sama mánuði 2016.
Toyota er mest selda eina bílategundin á þessum fyrstu tveim mánuðum ársins með 390 bíla og þar fast á eftir í öðru sæti kemur Kia með 346 bíla. Vinsælasti liturinn á bílum þessa fyrstu mánuðum ársins er hvítur en af heildarskráningum ársins eru 573 bílar hvítir, segir í frétt frá Bílgreinsambandinu.
Samtök ferðaþjónustunnar lýsa yfir miklum vonbrigðum yfir boðuðum niðurskurð í samgönguáætlun. Helga Árnadóttir, framkvæmdastjóri samtakanna, segir með ólíkindum að nauðsynlegum framkvæmdum skuli enn og aftur vera ýtt út af borðinu. Hún bendir á að ríkið hvetji ferðamenn til að ferðast um landið allt árið um kring, og þá sé nauðsynlegt að gera þeim það kleift því samgöngur séu lífæð ferðaþjónustunnar.
„Við erum að tala um að ná að hvetja ferðamenn til að fara víðar, ferðast um landið allan ársins hring – og þar er ríkið og stendur með okkur í þar – en það er ekki hægt á sama tíma þá að draga úr framkvæmdum þannig að þeim sé ekki gert kleift að sækja þá staði sem þeir vilja sækja,“ sagði Helga í samtali við Morgunútvarpið á Rás 2.
Ákvörðun Jóns Gunnarssonar samgönguráðherra um niðurskurð á samgönguáætlun í ljósi minna fjármagns til vegamála á fjárlögum hefur verið mótmælt landið um kring af sveitarstjórnum, landshlutasamtökum, hagsmunasamtökum og venjulegum borgurum þessa lands.
Birkir Eydal valinn á úrtaksæfingu U-18 landsliðsins.
Hinn 17 ára gamli knattspyrnumaður úr Vestra, Birkir Eydal, hefur verið valinn á úrtaksæfingu U-18 landsliðsins. Að Birkir hafi verið valinn kemur þeim sem þekkja til hjá Vestra ekki óvart, enda löngum vitað hvað í honum býr. „Þessi árangur er auðvitað mjög góður ef við lítum á kringumstæðurnar,“ segir Svavar Þór Guðmundsson, formaður knattspyrnudeildar Vestra. Í úrtaki hjá KSÍ eru valdir 90 strákar til þátttöku í fyrsta hópi. Þessir hópar eru síðan skornir niður í smærri hópa og nú er Birkir t.d. kominn í 30 manna úrtak. „Það þýðir að hann er samkvæmt þjálfurum þessa landsliðs í topp 30 af um 400 strákum sem æfa í þessum aldursflokki á landinu.
Í byrjun febrúar voru þeir Guðmundur Arnar Svavarsson og Ívar Breki Helgason voru valdir úr röðum Vestra til að taka þátt í úrtaksæfingum fyrir U-16 landsliðið og eru þeir enn í 90 manna úrtakinu.
Svavar bendir á að tveir drengir úr Vestra, þeir Þórður Hafþórsson og Þráinn Arnaldsson, eru báðir komnir í 30 manna úrtak í U-17 landsliðsins.
„Hjá stelpunum eru Hafdís Bára Höskuldsdóttir og Lára Ósk Albertsdóttir í sömu aðstæðum. Þær eru að banka á dyr landsliðanna í sínum aldursflokki og eru komnar í gegnum fyrsta niðurskurð. Þær hafa líka verið að spila með strákunum núna til þess að æfa þær í hraðara spili og öðrum aðstæðum sem gætu nýst þeim vel í þessari baráttu,“ segir Svavar.
Birkir er lykilmaður í meistaraflokki Vestra í blaki.
Þess má geta að Birkir er afar fjölhæfur íþróttamaður, þrátt fyrir ungan aldur hefur hann keppt með meistaraflokki Vestra (áður Skellur) í blaki í fjögur ár og hefur farið fjórum sinnum á erlend stórmót með unglingalandsliðum í blaki.
Kennarar á leikskólanum Eyrarskjóli mættu svartklæddir til vinnu í morgun til að sýna samstöðu með konum um allan heim, samstöðu í baráttu sinni fyrir kvenfrelsi í hverri þeirri mynd sem hún birtist. Á alþjóðlegum baráttudegi kvenna á síðasta ári mætti Marzena Glodkowska kennari á Bláakjarna svartklædd til að sýna samstöðu með konum í heimalandi sínu Póllandi en þá áformuðu pólsk yfirvöld að leggja algjört bann við fóstureyðingum með lagasetningu. Pólskar konur og kynsystur þeirra um víðan heim mótmæltu kröftuglega og var lögunum á endanum hafnað. En baráttunni fyrir frelsi kvenna yfir eigin líkama er ekki lokið. Víða um heim hafa komur ekki aðgang að getnaðarvörnum og ekki val um að stjórna barneignum sínum.
Í dag vilja kennarar á Eyrarskjóli standa við bakið á Marzenu með stuðningi í verki, jafnframt því sem þær standa með kynsystrum sínum í Póllandi og um heim allan. Í yfirlýsingu á heimasíðu skólans segja kennararnir vilja á alþjóðabaráttudegi kvenna leggja áherslu á eftirfarandi:
„Algjör grundvöllur kvenréttinda og jafnrétti kynjanna er sá að konur hafi yfirráð yfir eigin líkama, að konur hafi vald til að stjórna eigin lífi eins og þeim hentar best, að eignast börn þegar þeim hentar, að rjúfa þungun þegar þeim hentar. Kynfrelsi kvenna er því ein af grundvallarkröfum okkar allra sem berjumst fyrir jafnrétti kynjanna, grundvallarkröfum okkar allra sem berjumst fyrir mannréttindum og betra samfélagi.
Við stöndum nú frammi fyrir því að yfirvöld út um allan heim, líka í Evrópu, vinna skipulega og staðfastlega gegn þessum grundvallarmannréttindum kvenna, að stjórna eigin líkama. Yfirvöld út um allan heim hafa sett lög sem takmarka aðgang kvenna að læknisþjónustu, lög sem takmarka yfirráð kvenna yfir eigin líkama.“
Konur hafa aldrei verið fleiri á vinnumarkaði hér á landi. Mynd úr safni frá kvennahlaupinu á Ísafirði.
Atvinnuþátttaka kvenna var tæp 80% árið 2016 og hefur aldrei mælst hærri samkvæmt tölum sem Hagstofan birtir í dag, á sama tíma var þátttaka karla rúm 87%. Tölur Hagstofunnar á þessum alþjóðlega baráttudegi kvenna birta í tali og tölum ýmsar upplýsingar um stöðu kvenna á vinnumarkaðinum á Íslandi. Þar kemur fram að óleiðréttur launamunur kynjanna hjá fullvinnandi launþegum var rúm 14% árið 2015. Tæplega helmingur kvenna 25-64 ára var með háskólamenntun árið 2016 samanborið við þriðjung karla á sama aldri. Þá voru 45% karla og 30% kvenna með starfs- og framhaldsmenntun. Konur eru nú 48% alþingismanna og 44% kjörinna sveitarstjórnarmanna en í mörgum öðrum áhrifastöðum er hlutur kvenna lægri. Hlutfall kvenna í stöðu framkvæmdastjóra fer eftir stærð fyrirtækis, til dæmis var það 22% hjá fyrirtækjum með 1-49 starfsmenn en 9% í fyrirtækjum með 250 starfsmenn eða fleiri árið 2015.
Hagstofa Íslands gefur í dag út bæklinginn Konur og karlar á Íslandi 2017 í samstarfi við Jafnréttisstofu og velferðarráðuneytið. Í honum eru samanteknar upplýsingar sem gefa vísbendingar um stöðu kvenna og karla í samfélaginu. Þar eru tölur og myndrit um mannfjölda, fjölmiðla, menntun, vinnumarkað, laun og áhrifastöður.
Í dag, þann 8.mars er alþjóðlegur baráttudagur kvenna og nota konur um víðan heim daginn til að berjast fyrir bættum réttindum og minna á að þrátt fyrir að mikið hafi áunnist síðan hugmyndin að deginum kviknaði árið 1910, sé landi ekki náð og enn hlutir sem berjast þarf fyrir til að rétta hlut kvenna, þó áherslur og verkefni kunni að vera mismunandi eftir löndum. Hugmyndina að deginum átti þýska kvenréttindakonan Clara Zetkin, sem bar hana fyrst upp á fundi Alþjóðasamtaka sósíalískra kvenna sem haldinn var í Kaupmannahöfn árið 1910. Þá var talið brýnt að velja sunnudag þar sem það var eini frídagur verkakvenna í þá daga og því var dagsetningin ekki fastsett fyrstu árin, en þá voru helstu baráttumál kvennadagsins kosningaréttur kvenna og samstaða verkakvenna.
Alþjóðlegur baráttudagur kvenna var fyrst haldinn hátíðlegur meðal sósíalískra kvenna í Danmörku, Þýskalandi, Austurríki og Sviss þann 19. mars árið 1911. Svíþjóð, Frakkland og Holland bættust síðan við árið 1912 og árið 1913 var alþjóðlegs baráttudags kvenna einnig minnst í Tékkóslóvakíu og Rússlandi, er frá segir á vef Kvennasögusafnsins. Árið 1914 söfnuðust konur þúsundum saman í Þýskalandi 8. mars og var það upphafið að stórum mótmælafundum og kröfugöngum verkamanna og –kvenna sem stóðu í heila viku. Sama dag árið 1917 gerðu konur í Pétursborg verkfall til að krefjast betri kjara og friðar. Allir pólitískir leiðtogar lögðust gegn verkfallinu en konurnar héldu sínu striki. Fjórum dögum síðar sagði keisarinn af sér og bráðabirgðastjórn veitti konum kosningarétt og var þá rússneska byltingin hafin. Árið 1921 ákvað Alþjóðasamband kommúnista að samþykkja tillögu Clöru Zetkin um að 8. mars yrði þaðan í frá baráttudagur kvenna.
Misjafnt var eftir löndum hvort merkjum dagsins var haldið á lofti og fór æ minna fyrir honum eftir því sem árin liðu, en með tilkomu nýju kvennahreyfingarinnar um 1970 gekk 8. mars í endurnýjun lífdaga og ákváðu Sameinuðu þjóðirnar árið 1977 að 8. mars skyldi vera alþjóðlegur baráttudagur kvenna fyrir friði og jafnrétti.
Þennan dag árið 1989 ákváðu íslenskar konur frá fjölda kvennasamtaka og félaga að helga daginn baráttunni gegn kynferðisofbeldi á Íslandi. Á vef Stígamóta segir að sjaldan hafi myndast eins víðtæk samstaða um nokkurt mál meðal íslenskra kvenna. Hóparnir kynntu starfsemi sína á fjölmennum baráttufundi sem haldinn var í Hlaðvarpanum 8. mars 1989. Á fundinum var ákveðið að stofna Samtök kvenna gegn kynferðisofbeldi, sem leiddi af sér stofnun Stígamóta ári seinna, en þau opnuðu þennan dag árið 1990.
Í dag er dagsins minnst með ýmsum hætti. Til að mynda verður samstöðufundur í Iðnó klukkan 17 undir yfirskriftinni „Konur gegn afturför“ þar sem þemað í ár er hinn vaxandi þjóðernisfasismi og bakslag í réttindabaráttu kvenna og minnihlutahópa. Þar sem spurt er hvernig getur femínisminn verið andsvar við þeirri afturför.
Fyrsta stiklan úr kvikmyndinni Ég man þig vekur upp ótta og skelfingu. Kvikmyndin er gerð eftir bók Yrsu Sigurðardóttur en henni er leikstýrt af Óskari Þór Axelssyni, sem leikstýrði Svartur á leik.
Handritið var skrifað af Ottó Geir Borg, Óskari Þór Axelssyni og Yrsu Sigurðardóttur en kvikmyndin fjallar um ungt fólk sem er að gera upp hús á Hesteyri á Jökulfjörðum. Á Ísafirði dregst nýi geðlæknirinn í bænum inn í rannsókn á sjálfsmorði eldri konu, en svo virðist sem hún hafi verið heltekin af syni hans sem hvarf.
Með aðalhlutvert fara Ágústa Eva Erlendsdóttir, Þorvaldur Davíð Kristjánsson, Jóhannes Haukur Jóhannesson, Sara Dögg Ásgeirsdóttir, Anna Gunndís Guðmundsdóttir og Þröstur Leó Gunnarsson.
Veðurstofa Íslands spáir norðaustan 8-13 m/s og slyddu eða snjókomu á Vestfjörðum í dag, einkum verður ofankoman á svæðinu norðanverðu. Hiti verður nálægt frostmarki. Það léttir heldur til á morgun og þá kólnar í veðri. Á föstudag er búist við vaxandi austanátt á landinu, með 10-18 m/s síðdegis, hvassast verður við suðurströndina.
Á Vestfjörðum er hálka eða hálkublettir en hálka og éljagangur á Steingrímsfjarðarheiði og snjóþekja á Þröskuldum.
Í febrúarlok heimsóttu Bolungarvík ungmenni frá Lyon í Frakklandi á vegum Erasmus+ áætlunarinnar, sem sem er stærsta mennta- og æskulýðsáætlun í heiminum og mörgum hér á landi af góðu kunn. Er til að mynda tekið þátt í ungmennaskiptaverkefnum á þeirra vegum mátti lesa um eitt skemmtilegt slíkt verkefni á síðum Bæjarins besta í fyrra sem nemendur við Grunnskóla Bolungarvíkur tóku þátt í.
Franski hópurinn taldi 10 ungmenni á ferð með Bolvíkingnum Guðmundi Arngrímssyni og dvaldi sex daga í Bolungarvík þar sem þau hófu samstarf með 10. bekk grunnskólans. Þau fóru um víðan völl að kynnast svæðinu, heimsóttu meðal annars Holtsfjöru í slagviðri, skoðuðu Ósvör, skelltu sér á kaffihús á Ísafirði, fóru í sund á Suðureyri og urðu vitni að stórkostlegum dansi norðurljósanna. Einnig fengu þau að kynnast íslenskum hefðum líkt og að maska, og fengu þau til að mynda að smakka rjómabollur, plokkfisk og hákarl, svo fátt eitt sé nefnt og segir Guðmundur dvölina hafa verið mikla upplifun og mikinn lærdóm fyrir ungmennin.
Ungmennin á fyrsta vinnufundi í Einarshúsi í Bolungarvík
Guðmundur á fyrirtækið Cursus Iceland sem sérhæfir sig í alls kyns námskeiðum er lúta að sjálfbærni og meðhöndlun náttúru. Hann hefur talvert komið að ungmennaskiptaverkefnum áður, en þá í formi þess að þjálfa starfsmenn, en þetta er í fyrsta sinn sem hann er sjálfur með hóp á vegum áætlunarinnar sem hann segir gefandi og skemmtilegt verkefni. Það sem hópurinn vinnur að er að rannsaka sitt eigið vistspor og hvernig þau hafa áhrif í gegnum sína eigin neyslu og kauphegðun. Guðmundur segir verkefnið afar brýnt, það sé mikilvægt að ná til unga fólksins ef við viljum í raun sjá viðhorfs – og atferlisbreytingar í veröldinni og það í raun ákvarði hvernig okkur reiðir af yfir höfuð. Hann segir gífurlega mikilvægt að ungmennin öðlist vitund um eigið vistspor og hvernig við í sameiningu sköpum gríðarlega eftirspurn eftir drasli.
Guðmundur Arngrímsson leiddi hópinn. Mynd af Fésbókarsíðu Einarshússins.
Ungmennin vinna í fjórum hópum sem hver svo velur sér tiltekið verkefni eða sjónarhorn til umfjöllunar sem þau svo túlka í gegnum stuttmyndir og segist Guðmundur binda miklar vonir við að þær hafi áhrif á ungmenni víða og veki þau til aukinnar vitundar í þessum skilaboðum frá jafnöldrum: „Vonandi verður hugvekjan það öflug að hún verði boðberi nýrra neysluviðmiða og nýrrar hugmyndafræði til framtíðar. Stuttmynd sem færi víða er sterkt vopn og mikilvægt fyrir þau sem að verkefninu koma að koma skilaboðunum áfram, því það skiptir engu máli hversu merkilegt það er sem þú hefur að segja ef enginn heyrir það.“
Guðmundur gerir mikið af því að teikna upp og gera náttúruleiksvæði og segir hann þetta allt tengjast saman: „Það er gott að skoða hvernig maður hagar sér í náttúrunni og hvernig við sköpum merkingu í umhverfinu okkar. Fyrir framtíðina er mikilvægt að finna þessa tengingu hjá sem flestum, því það er ekki hægt að sýna hollustu ef fólki finnst það ekki vera hluti af umhverfinu.“
Hópurinn kemur aftur saman í júlí er íslensku ungmennin halda út til Frakklands þar sem þau skoða sig um í Lyon ásamt því að halda áfram að vinna að stuttmyndagerðinni.
