Atvinnuvega- og nýsköpunarráðuneytið hefur látið vinna skýrslu um þróun kostnaðar heimila við raforkuöflun, frá gildistöku raforkulaga 2005 til 2017. Sérstaklega er þar horft til heimila sem búa við rafhitun. Í skýrslunni er skoðuð þróun tekna og kostnaðar notenda fyrir kerfið í heild sinni. Helstu niðurstöður skýrslunnar eru að heildarkostnaður meðal heimilis við raforkuöflun, á verðlagi við lok árs 2016, hefur breyst tiltölulega lítið frá 2005, en hann hefur þó ætíð verið meiri í dreifbýli en þéttbýli. Ef skoðaður er hver kostnaðarþáttur fyrir sig kemur í ljós að kostnaður notanda við orkukaup fór heldur minnkandi í byrjun tímabilsins en hefur verið að vaxa á undanförnum árum. Á móti kemur að kostnaður notanda vegna flutnings og dreifingar hefur farið lækkandi á allra síðustu árum vegna aukinna niðurgreiðslna og dreifbýlisframlags.

Sé horft til viðskiptavina Orkubús Vestfjarða í dreifbýli hefur kostnaður lítið breyst á þessu tímabili en hefur sveiflast frá um 250 upp í um 330 þús. kr. á ári, á föstu verðlagi. Kostnaðurinn var mestur á árunum 2010 til 2014 en nú er hann svipaður og við upphaf tímabilsins. Frá 2005 til 2017 hafa niðurgreiðslur og verðjöfnun aukist um 20% fyrir þennan notanda en árlegur kostnaður notandans er að mestu óbreyttur en tekjur veitufyrirtækjanna hafa aukist um 10% af þessum notanda. Niðurgreiðslur og verðjöfnun hafa að undanförnu verið um tvöfalt meiri en þær voru minnstar rétt fyrir mitt tímabilið.

Kostnaður notanda í þéttbýli á veitusvæði Orkubús Vestfjarða hefur breyst lítið en hann er nokkuð lægri en fyrir notandann í dreifibýlinu. Að meðaltali er kostnaður notandans í dreifbýlinu um 40 þús. kr. hærri á ári og mesti munurinn er rúmlega 60 þúsund kr. á ári á þessu tímabili en nú er munurinn 27 þúsund kr. á ári (janúar 2017). Niðurgreiðslurnar hafa aukist um 7% frá upphafi tímabilsins til 2017 og tekjur veitufyrirtækjanna hafa aukist um 6% á föstu verðlagi. Eins og í dreifbýlinu voru tekjurnar minnstar rétt fyrir mitt tímabilið (2009).

Auglýsing

Auglýsing

Fjöldi starfs­manna sem eru á ís­lensk­um vinnu­markaði á veg­um er­lendra þjón­ustu­fyr­ir­tækja og starfs­manna­leigna hef­ur marg­fald­ast á milli ára. Þetta kem­ur fram í skýrslu Vinnu­mála­stofn­un­ar um ástandið á vinnu­markaði. Í sein­asta mánuði voru 40 er­lend þjón­ustu­fyr­ir­tæki starf­andi hér á landi en þau voru níu tals­ins í sama mánuði í fyrra. Alls voru 411 starfs­menn á veg­um þess­ara fyr­ir­tækja í fe­brú­ar, ná­lega tvö­falt fleiri en í sama mánuði í fyrra.

Þá voru starfs­menn starfs­manna­leigna, inn­lendra sem er­lendra, sam­tals 974 í sein­asta mánuði á veg­um 26 starfs­manna­leigna á vinnu­markaðinum og hafði þeim fjölgað úr 178 á einu ári. Yfir 20.000 er­lend­ir rík­is­borg­ar­ar voru að jafnaði á ís­lensk­um vinnu­markaði á sein­asta ári.

Auglýsing

Auglýsing

Hafrannsóknastofnun hefur birt mat á burðarþoli Ísafjarðardjúps með tilliti til sjókvíaeldis og er niðurstaða matsins að hámark lífmassa fiskeldis í Ísafjarðardjúpi verði 30 þúsund tonn. og er það meiri lífmassi en þegar hefur verið sótt um leyfi fyrir vegna fiskeldis í Ísafjarðardjúpi. Við gerð burðarþolsmats er einkum er horft til álags á lífríki sjávarbotnsins, súrefnisstyrk og styrk næringarefna í sjó. Þá er tekið tillit til stærðar fjarðanna og varúðarnálgunar varðandi raunveruleg áhrif eldisins einkum á botndýralíf og súrefnisstyrk.

Á vef Hafrannsóknastofnunar kemur fram að við breytingu á lögum um fiskeldi árið 2014 voru sett inn ný ákvæði um að rekstrarleyfi skuli fylgja burðarþolsmat sem framkvæmt sé af Hafrannsóknastofnun.

Vegna aðstæðna í Ísafjarðardjúpi og varúðarnálgunar varðandi raunveruleg áhrif áætlaðs eldis á vatnsgæði og botndýralíf, telur Hafrannsóknastofnun að hægt sé að leyfa allt að 30 þúsund tonna lífmassa í eldi í Ísafjarðardjúpi á hverjum tíma. Í þessu mati er gert ráð fyrir að heildarlífmassi í Ísafjarðardjúpi verði aldrei meiri en 30 þúsund tonn og að vöktun á áhrifum eldisins fari fram. Slík vöktun yrði forsenda fyrir hugsanlegu endurmati á burðarþoli fjarðarins, til hækkunar eða lækkunar, sem byggt yrði á raungögnum.

Hafrannsóknastofnun tekur fram að endanleg burðarþolsmörk fyrir ákveðna firði eða svæði verða seint gefin út enda hefur slíkt varla verið gert í nágrannalöndunum, heldur er alltaf tekið með í reikninginn hvaða staðsetningar og hvers konar eldi er um að ræða og fara umhverfisáhrifin eftir báðum þessum þáttum.

Því má búast við að burðarþol fjarða og annarra eldissvæða verði endurmetið á næstu árum ef þörf krefur.

Auglýsing

Auglýsing

Fyrir síðustu jól glöddust margir á Ísafirði er þeir sáu að ljós var komið á krossinn við kirkjugarðinn í Réttarholt í Engidal að nýju en hann hafði verið ljóslaus um árabil. Það var Lionsklúbbur Ísafjarðar sem sá til þess að krossinn fengi tilhlýðilegar fegrunaraðgerðir og lagfæringar og fengu félagar klúbbsins einvalalið með sér í verkið, þar sem allir gáfu vinnu sína.

Lionsklúbbur Ísafjarðar gaf Sóknarnefnd Ísafjarðarkirkju krossinn árið 1984 og ári síðar var krossinum komið fyrir í Engidal að tillögu nefndar. Skipastál var pantað til smíðanna og sá Friðgeir Hrólfsson Lionsmaður i Vélsmiðju Ísafjarðar um verkið. Þá komu gott sem allir starfandi félagar klúbbsins að verkinu sem vakti ánægju bæjarbúa að sögn Bjarndísar Friðriksdóttur formanns Lionsklúbbsins. Eftir að hafa prýtt garðinn í nokkur ár fór að bera á bilun í ljósabúnaði, sem á endanum gaf sig.

Bjarndís segir Lionsfólk hafa rætt sín á milli að þyrfti að laga krossinn og bæjarbúar hafi haft orð á því að ljós vantaði á krossinn. Í haust var svo drifið í að taka krossinn niður og var farið með hann í sandblástur í Vélsmiðjunni Mjölni í Bolungarvík, svo lögðu Sævar og starfsfólk Pólsins í hann nýjan ljósabúnað sem kom frá fyrirtækinu Vestkraft og þá var plast yfir lýsinguna útbúið í Vélsmiðjunni  Þristi. Lionsfélagar máluðu síðan krossinn og settu hann aftur upp á sinn stað í Engidal á aðventunni „Lionsklúbbur Ísafjarðar vill koma hjartans einlægustu þökkum fyrir fallegar gjafir til þeirra sem komu að verkinu sem bæjarbúar kunna svo sannarlega að meta. Það var sannkölluð jólagleði er það kom ljós að nýju,“ Segir Bjarndís.

annska@bb.is

Auglýsing

Auglýsing

Á miðvikudagskvöld fer fram skipulags- og vinnufundur í Skóbúðinni á Ísafirði fyrir verkefni sem hlotið hefur nafnið Suðupottur sjálfbærra hugmynda. Að baki verkefninu stendur áhugafólk um sjálfbærni og umhverfisvænan lífsstíl og vill það skapa vettvang þar sem fólk getur komið saman og rætt þau málefni ásamt því að leggja í púkkið hugmyndir um hvað íbúar Ísafjarðar og nágrennis geta tileinkað sér til að iðka megi slíkan lífsstíl með sem bestu móti.

Verkefnið mun standa fram í byrjun maímánaðar og verður hægt að koma við í Skóbúðinni mánudags til fimmtudagskvöld á milli klukkan 20 og 22. Þar geta gestir kynnt sér hvað aðrir í samfélaginu eru að gera, skoðað hugmyndir þeirra ásamt því að koma sínum eigin hugmyndum á framfæri og auðvitað fara saman í bland umræður um sjálfbærni og umhverfisvernd. Að sögn Hildar Dagbjartar Arnardóttur, sem leiðir verkefnið, munu eflaust spretta upp í kjölfarið vinnustofur, kynningarkvöld um ákveðin málefni ásamt framkvæmd einhverra hugmynda. Hún segir þó tímann leiða í ljós hvað íbúunum dettur í hug að gera á þessum stað sem er opinn fyrir öllu.

Á vinnufundinum sem hefst klukkan 20 á miðvikudagskvöld verður undirbúin opnun Suðupottsins sem fram fer á laugardag á milli klukkan 13 og 15. Allir áhugasamir um verkefnið eru velkomnir.

annska@bb.is

Auglýsing

Auglýsing

Í Vísindaporti vikunnar í Háskólasetri Vestfjarða verða ferðavenjur íbúa á norðanverðum Vestfjörðum sérstaklega til skoðunar. Lilja Guðríður Karlsdóttir, samgönguverkfræðingur, mun segja frá rannsóknarverkefni sínu þar sem hún skoðaði ferðamynstur og vinnusóknarsvæði á norðanverðum Vestfjörðum. Verkefnið vann Lilja á síðasta ári í gegnum fyrirtækið Viaplan en verkefnið var styrkt af Vegagerðinni og unnið í samstarfi við Innanríkisráðuneytið, Skipulagsstofnun og Byggðastofnun.

Niðurstöður verkefnisins sýna að langflestir vilja vinna nálægt heimili sínu sé þess kostur og mjög fáir eru tilbúnir að ferðast meira en 30 mín daglega til vinnu. Ennfremur sýndu niðurstöður að Ísafjörður er vinnusóknarsvæði fyrir flesta bæjarkjarnana í kring en Ísfirðingar sjálfir sækja hinsvegar fáir vinnu utan síns heimabæjar.

Lilja Guðríður Karlsdóttir er framkvæmdastjóri Viaplan, fyrirtækis sem sérhæfir sig í skipulagi samgangna.  Lilja er menntaður samgönguverkfræðingur frá Danmarks Tekniske Universitet og hefur unnið síðustu 14 árin við skipulag samgangna á Íslandi og í Danmörku. Stærstu verkefni síðustu ára hafa verið léttlestarkerfi í Óðinsvé og Árósum, svæðisskipulag höfuðborgarsvæðisins og Borgarlínuverkefni. Lilja hefur einnig einbeitt sér að samgönguskipulagi í mörgum af minni bæjum í Danmörku, t.d Billund, Ribe, Haderslev og Sønderborg.

Að vanda er Vísindaport opið öllum áhugasömum og það fer fram í hádeginu á föstudögum í sal Háskólasetursins.

Auglýsing

Auglýsing

Á laugardaginn  var lokahóf meistaraflokks Körfuknattleiksdeildar Vestra haldið á Hótel Ísafirði. Þótt tveir síðustu leikir deildarinnar hafi tapast um helgina bar þó engan skugga á hófið enda margt jákvætt í starfinu sem full ástæða er til að fagna. Leikmenn meistaraflokks, stjórn Kkd. Vestra og Barna- og unglingaráð komu saman og nutu ljúffengra veitinga Hótels Ísafjarðar og litu yfir tímabilið.

Á vefsíðu Vestra kemur fram að árangur meistaraflokks var ásættanlegur miðað við talsverðar mannabreytingar innan liðsins í upphafi tímabils. Þá er árangurinn einnig mun betri en spá formanna, þjálfara og fyrirliða í 1. deild í upphafi móts gaf til kynna en samkvæmt henni átti liðið að enda áttunda og næst neðst sæti. Sú spá átti ekki við rök að styðjast því liðið endaði í sjötta sæti og var nálægt því að tryggja sér sæti í úrslitakeppninni.

Á lokahófinu voru veittar viðurkenningar í sex flokkum: Besti leikmaðurinn, efnilegasti leikmaðurinn, besti sóknarmaðurinn, besti varnarmaðurinn, mestu framfarir og dugnaðarforkur ársins. Auk þess fengu allir leikmenn viðurkenningar meira til gamans en þar á meðal mátti finna viðurkenningar á borð við „reiðasti leikmaðurinn“, „elsti leikmaðurinn“ og „besta tanið“.

Hinrik Guðbjartsson, leikstjórnandi var valinn besti leikmaðurinn og hlaut hann einnig nafnbótina efnilegasti leikmaðurinn. Hinrik, sem er aðeins 21 árs gamall, sýndi í vetur að hann er meðal bestu leikstjórnenda 1. deildar og meðal efnilegustu leikstjórnenda landsins. Hinrik var með 16 stig, 3,5 fráköst og 2,8 stoðsendingar að meðaltali í leik á tímabilinu.

Besti sóknarmaðurinn var valinn Nebojsa Knezevic. Það kemur væntanlega engum á óvart enda býr Nebojsa yfir fádæma sóknarhæfileikum og getur skorað stig í öllum regnbogans litum, frá troðslum yfir í þriggja stiga körfur og allt þar á milli. Nebojsa er stigahæsti leikmaður liðsins í vetur með 18,7 stig í leik auk þess að státa af 7,9 fráköstum og 2,6 stoðsendingum.

Besti varnarmaðurinn var valinn Yima Chia-Kur. Þessi öflugi Banaríkjamaður sýndi oft góða varnartakta í vetur og með hæð sinni, styrk og krafti gerði hann vörn liðsins óárennilega fyrir andstæðingana.

Nökkvi Harðarson fékk viðurkenningu fyrir mestar framfarir. Nökkvi varð fyrir því óláni að hljóta slæm höfuðmeiðsl á miðju tímabili en lét það þó ekki stoppa sig og kom gríðarlega sterkur inn í seinni hluta mótsins. Það sést vel á því að í fjórum af síðustu sex leikjum deildarinnar var hann með yfir 10 stig auk þess að vera tvisvar með tvennu (yfir 10 stig og 10 fráköst).

Dugnaðarforkur ársins var svo valinn Adam Smári Ólafsson. Adam hefur sannarlega unnið fyrir þessum titli í vetur því hann hefur bæði leikið stórt hlutverk í meistaraflokki og unglingaflokki of oft leikið þrjá leiki á helgi án þess að blása úr nös eða kvarta yfir álagi.

Auglýsing

Auglýsing