Þingeyringurinn Pálmar Kristmundsson og samstarfsfólk hans hjá PKdM arkitektum hlutu á dögunum menningarverðlaun DV í byggingarlist fyrir hátækniverksmiðju Alvogen í Vatnsmýrinni. Er þetta annað árið í röð sem stofan hlýtur verðlaunin, en Pálmar er margverðlaunaður fyrir verk sín. Pálmar ólst upp á Þingeyri og flutti hann nýverið aftur í fjörðinn fagra þar sem hann hefur útbúið sér heimili í gömlu steypustöðinni að Söndum, en hann á og rekur PKdM arkitekta í Reykjavík.

Að mati dómnefndar menningarverðlauna DV er nýbygging Alvotech, sem er hluti af skipulagi Vísindagarða í Vatnsmýrinni, einstaklega fallegt dæmi um velheppnaða samvinnu og metnað allra þeirra aðila sem komu að verkinu, bæði á hönnunar- og framkvæmdatíma, sem skilaði af sér vönduðu og fagmannlegu handverki.

Hér má lesa umfjöllun dómnefndar í heild sinni.

annska@bb.is

Auglýsing

Auglýsing

Til að auka öryggi flutningskerfisins á Vestfjörðum á að leggja 132 kV jarðstreng í Dýrafjarðargöng milli Arnarfjarðar og Dýrafjarðar. Áformað er að reka strenginn fyrst um sinn á 66 kV spennu.

Jarðstrengurinn mun leysa af hólmi hluta Breiðadalslínu 1, 66 kV loftlínu milli Mjólkár og Breiðadals, þar sem línan liggur yfir Flatsfjall í allt að 750 metra hæð yfir sjávarmáli og aðstæður eru erfiðar til viðhalds og viðgerða.

Lagning strengsins er áformuð samhliða jarðgangagerðinni og verður hann tæplega 13 km langur, frá tengivirki við Mjólká að fyrstu stæðu í Dýrafirði þar sem hann verður tengdur inn á Breiðadalslínu 1.

Með lagningu 132 kV strengs verður með einföldum hætti hægt að spennuhækka Breiðadalslínu 1 og eyða þannig mögulegum flöskuhálsi í flutningsgetu línunnar.

Umhverfisáhrif jarðstrengsins eru metin óveruleg þar sem hann fylgir mannvirkjabelti samgangna og er ekki að valda nýju raski.

smari@bb.is

Auglýsing

Auglýsing

Bæjarstjórn Ísafjarðarbæjar hefur samþykkt útgáfu framkvæmdaleyfis til Vegagerðarinnar vegna jarð- ganga milli Arnarfjarðar og Dýrafjarðar í Ísafjarðarbæ. Auglýsing um útgáfu leyfisins birtist í Lögbirtingablaðinu fyrir helgi. Tilboð í verkið voru opnuð hjá Vegagerðinni 26. janúar síðastliðinn. Lægsta tilboðið áttu tékkneska verktakafyrirtækið Metrosta í samvinnu við Suðurverk. Tilboðið hljóðaði upp á tæplega 8,7 milljarða króna, 93% af áætlun um verktakakostnað.

Samkvæmt áliti Skipulagsstofnunar um mat á umhverfisáhrifum frá 17. maí 2013 eru ekki sett skilyrði fyrir framkvæmdaleyfinu. Hins vegar telur Skipulagsstofnun að áhrif framkvæmdarinnar á fornleifar verði nokkuð neikvæð m.a. þar sem fyrir liggur að ekki verði hjá því komist að raska slíkum minjum. Stofnunin leggur áherslu á að farið verði í hvívetna eftir ábendingum Minjastofnunar Ísland.

Ísafjarðarbær setur fram eftirfarandi skilyrði fyrir útgáfu framkvæmdaleyfis: Vegna framkvæmda innan hverfisverndarsvæða H1 sbr. deiliskipulag og Aðalskipulag Ísafjarðarbæjar 2008-2020 skal leitast við að varðveita sérkenni svæðanna, þ.e. menningar og náttúruminjar á afskekktum svæðum og hálendi.

smari@bb.is

Auglýsing

Auglýsing

Ný umbúðalína Fisherman er tilnefnd til FÍT-verðlaunanna sem veitt verða í vikunni. Fisherman sem er ferðaþjónustufyrirtæki á Suðureyri, er einnig með vefverslun þar sem hægt er að panta sér harðfisk, þorskalifur, söl og sjávarsalt yfir internetið. Það er Jóhanna Svala Rafnsdóttir hjá Kapli sem hannaði umbúðalínuna fyrir Fisherman.

FÍT, eða félag íslenskra teiknara, hefur um árabil veitt verðlaun fyrir það sem skarar fram úr í grafískri hönnun og myndskreytingum á Íslandi ár hvert. Tilnefnt er til verðlauna í 19 flokkum sem ná yfir helstu undirflokka grafískrar hönnunar og einnig eru veitt ein aðalverðlaun fyrir það sem þykir bera höfuð og herðar yfir önnur verk, þvert á flokka.

Aldrei hafa borist fleiri tilnefningar til verka en nú er um 300 tilnefningar bárust og voru 82 þeirra tilnefnd. Verkin sem vinna til verðlauna og viðurkenninga verða sýnd á veglegri sýningu sem undanfarin ár hefur verið haldin í tengslum við HönnunarMars. Verðlaunaafhendingin fer fram í Tjarnarbíó 22.mars klukkan 18:30.

annska@bb.is

Auglýsing

Auglýsing

Bæjarstjórn Ísafjarðarbæjar samþykkti á fundi sínum síðast liðinn fimmtudag, samning um uppbyggingu samfélagsmiðstöðvarinnar Blábanka á Þingeyri. Undanfarna mánuði hefur verið unnið að stofnun samfélagsmiðstöðvar á Þingeyri, með það að markmiði að veita og laða að þjónustu sem nýtast mun nærsamfélaginu og gestum þess.

Í fréttatilkynningu frá Ísafjarðarbæ kemur fram að þjónusta á Þingeyri hafi minnkað undanfarin ár. Í kjölfar þess að Pósturinn og Landsbankinn drógu úr sinni þjónustu á Þingeyri árið 2015 hafði Nýsköpunarmiðstöð samband við Ísafjarðarbæ og lagði til að þróaður yrði þjónustukjarni eða samfélagsmiðstöð á Þingeyri sem gæti verið fyrirmynd samskonar kjarna í öðrum þorpum á landsbyggðinni. Um er að ræða tilraunaverkefni sem getur orðið brautryðjandi verkefni í byggðamálum á Íslandi.

Kynningarfundir verða haldnir á næstu vikum.

Fréttatilkynning Ísafjarðarbæjar:

Bæjarstjórn Ísafjarðarbæjar samþykkti á fundi sínum í gær, 16. mars 2017, samning um uppbyggingu samfélagsmiðstöðvarinnar Blábanka á Þingeyri, sem er byltingarkennt þróunarverkefni í byggðamálum á Íslandi. Undanfarna mánuði hefur verið unnið að stofnun samfélagsmiðstöðvar á Þingeyri, með það að markmiði að veita og laða að þjónustu sem nýtast mun nærsamfélaginu og gestum þess. Nafn verkefnisins, Blábanki, er dregið af lit Landsbankahússins í miðbæ Þingeyrar, en er jafnframt tilvísun í bláa hagkerfið.

Þjónusta á Þingeyri hefur minnkað undanfarin ár. Í kjölfar þess að Pósturinn og Landsbankinn drógu úr sinni þjónustu á Þingeyri árið 2015 hafði Nýsköpunarmiðstöð samband við Ísafjarðarbæ og lagði til að þróaður yrði þjónustukjarni eða samfélagsmiðstöð á Þingeyri sem gæti verið fyrirmynd samskonar kjarna í öðrum þorpum á landsbyggðinni. Um er að ræða tilraunaverkefni sem getur orðið brautryðjandi verkefni í byggðamálum á Íslandi.

Leitast verður við að þróa þjónustuna í Blábankanum í samvinnu einkaaðila, opinberra aðila og íbúa á Þingeyri, þannig að þarfir Íslendinga nútímans fyrir þjónustu verði hægt að uppfylla á Þingeyri.  Ísafjarðarbær mun m.a. leggja áherslu á að gera opinbera þjónustu aðgengilegri, samskipti milli íbúa og opinberra stofnana skilvirkari, sem og að skapa grundvöll að félags- og efnahagslegri nýsköpun. Vinnan er nú vel á veg komin.

Árið 2020 verður Þingeyri við Dýrafjörð orðinn miðpunktur Vestfjarða, m.t.t. samgangna, þegar Dýrafjarðargöng verða opnuð. Aðstandendur verkefnisins telja nauðsynlegt að nota tækifærið og gera þorpið að þjónustumiðstöð þar sem ýmis atvinnustarfsemi, ferðamannaiðnaður, menning og mannlíf geta stutt hvað annað og að laða að þjónustu sem nýst getur nærsamfélagi og gestum.

Aðstandendur verkefnisins eru Nýsköpunarmiðstöð Íslands, Ísafjarðarbær, innanríkisráðuneytið, Landsbankinn, Simbahöllin og Vestinvest. Verkefnið var hluti af Vestfjarðaskýrslunni og var ákveðið að veita verkefninu stofnframlag og rekstrarframlag næstu þrjú árin frá ráðuneytinu. Stofnuð verður sjálfseignarstofnun utan um verkefnið og verður auglýst eftir stofnfélögum frá 13. apríl til 1. september nk. Blábankaverkefnið verður ekki rekið út frá hagnaðarsjónarmiði, heldur verður eingöngu leitast við að ná inn tekjum fyrir kostnaði.

Starfsemi Blábankans verður margvísleg, en verkefnið er unnið í samræmi við niðurstöður úr samtölum við íbúa, um þá þætti sem þeim þykja mikilvægir fyrir Þingeyri. Má þar helst nefna póst- og bankaþjónustu, námskeið, fræðslufundi og dægradvöl fyrir börn að loknum skóladegi. Í Blábankanum verður nútíma útgáfa af bókasafni, með hefðbundnu bókaláni, en einnig aðstaða og aðstoð í tölvum. Í Blábankanum verður opið og sveigjanlegt vinnurými, þar sem hægt er að leigja vinnuaðstöðu til lengri eða skemmri tíma. Leitast verður við að hafa aðstöðuna hlýlega með góðri nettengingu, kaffiaðstöðu, nútímalegri fundaraðstöðu með fjarfundarbúnaði, auk stakra vinnustöðva. Blábankanum er ekki ætlað að hýsa veitingastaði, gistirými eða matvöruverslun. Sköpunarþorpið Þingeyri er einnig framtíðarsýn sem aðstandendur verkefnisins vilja innleiða, m.a. með því að setja upp sjálfstætt FabLab í Blábanka með stuðningi Nýsköpunarmiðstöðvar og samstarfi við Vélsmiðjuna á Þingeyri. Vonast er til að starfsemi Blábankans muni gefa fólki tækifæri til að hittast, læra hvert af öðru og stofna til samstarfs, t.d. listamannabúða og skapandi námskeiða.

 Auglýst verður eftir starfsmönnum í tvö 50% stöðugildi, annars vegar starf forstöðumanns, sem hefur umsjón með starfsemi, rekstri og markaðsstarfi miðstöðvarinnar, og hins vegar í starf staðgengils forstöðumanns, sem hefur umsjón með vinnurými, sinnir almennri afgreiðslu og þjónustu.

Kynningarfundir verða haldnir á næstu vikum, m.a. fimmtudaginn 13. apríl kl. 18:00 á Þingeyri.

Auglýsing

Auglýsing

Þórdís Kolbrún R. Gylfadóttir, ráðherra ferðamála, og Grímur Sæmundsen, formaður Samtaka ferðaþjónustunnar, skrifuðu í gær undir samstarfssamning við Slysavarnafélagið Landsbjörg sem felur í sér stóraukinn stuðning við verkefnið Safetravel. Samningurinn er til þriggja ára og hljóðar upp á 35 milljónir króna á ári, til viðbótar við framlag Slysavarnafélagsins Landsbjargar í formi fjármuna og vinnu af hálfu sjálfboðaliða félagsins.  Ráðuneyti ferðamála leggur fram 25 milljónir króna á ári en lagði til samanburðar fram 16 milljónir á liðnu ári. Samtök ferðaþjónustunnar auka sitt framlag úr 6 milljónum árið 2016 í 10 milljónir á ári. Auk þess styður Icelandair Group verkefnið myndarlega.

Samningurinn markar tímamót og skapar forsendur til að auka verulega við Safetravel verkefnið sem Slysavarnafélagið Landsbjörg sinnir varðandi slysavarnir og öryggismál ferðamanna og hefur félagið þó unnið mikið og gott starf á þessu sviði um árabil. Verkefni sem stefnt er að því að efla á grundvelli þessa samnings eru meðal annars: Hálendisvakt Slysavarnafélagsins Landsbjargar, skjáupplýsingakerfi ferðamanna og  vefurinn Safetravel.is, m.a. með þýðingu á akstursefni vefsins á kínversku.

smari@bb.is

Auglýsing

Auglýsing