Heildarafli íslenska flotans á fyrri helmingi fiskveiðiársins, frá 1. september 2016 til loka febrúar 2017, var um 48 þúsund tonnum minni en á sama tímabili fiskiveiðiárið á undan. Aflinn nam tæpum 425 þúsund tonnum upp úr sjó á yfirstandandi fiskveiðiári, en var á sama tímabili í fyrra 472 þúsund tonn, sem er um 10% samdráttur. Meginskýringin á þessu er sjómannaverkfallið sem stóð í um 8 vikur. Mun meira eftir af aflamarki Á fyrri helmingi yfirstandandi fiskveiðiárs veiddu íslensk skip tæplega 31 þúsund tonni minna af þorski úr sjó en á fyrra ári. Samdráttur í ýsuafla var um 7,5 þúsund tonn. Heildaraflinn í botnfiski er á fyrri helmingi fiskveiðiársins tæp 176 þúsund tonn upp úr sjó en var 240 þúsund tonn á sama tímabili í fyrra. Þetta er um 27% samdráttur. Á fyrri helmingi fiskveiðiársins nam uppsjávarafli íslenskra skipa 246 þúsund tonnum. Milli ára varð talsverð aukning í makríl og loðnu en samdráttur í kolmunna.

Á miðju fiskveiðiári 2016/2017 höfðu aflamarksskip einungis nýtt um 42% af aflaheimildum sínum í þorski (er þá tekið tillit til flutnings heimilda frá fyrra fiskveiðiári, sérstakra úthlutana auk almennrar úthlutunar á grundvelli aflahlutdeildar). Á fyrra fiskveiðiári var þetta hlutfall 58% þannig að þarna eru áhrif verkfallsins augljós, segir á vef Fiskistofu. Þegar litið er til aflamarks í ýsu á sama tímabili þá hafa aflamarksskip veitt nýtt 30% ýsukvótans en 33% á fyrra ári. Í heildina þá hafa aflamarksbátar notað 35% af heildaraflamarki sínu fyrir yfirstandandi fiskveiðiár en 47% á fyrra ári.

Í heildina hafa krókaaflamarksbátar notað 48,9% af heildaraflamarki sínu fyrir yfirstandandi fiskveiðiár en 50,8% á fyrra ári. Krókaaflamarksaflinn og kvótastað- an eru því í góðu jafnvægi sem bendir til að verkfallið hafði þar minni áhrif eins og búast mátti við.

smari@bb.is

Auglýsing

Auglýsing

Verð fyrir grásleppu fer nú smám saman hækkandi.  Örn Pálsson, framkvæmdastjóri Landssambands smábátaeigenda, segir í samtali við fréttastofu RÚV að verðið nálgist 180 krónur fyrir kílóið, en 110 krónur voru boðnar í fyrstu. Þetta auki bjartsýni grásleppusjómanna enda þýði þessi hækkun vel á annað hundrað milljónir króna í aukin aflaverðmæti miðað við sömu veiði og á síðustu vertíð. Þá greiddu kaupendur 155 krónur fyrir kílóið af grásleppu.

Grásleppuveiðar á Vestfjörðum hefjast þann 1. apríl, nema á Ströndum þar sem fyrstu net máttu fara í sjó 20. mars.

smari@bb.is

Auglýsing

Auglýsing

Ferðamálastofa hefur gengið til samninga um gerð stefnumarkandi stjórnunaráætlana (e. Destination Management Plan) í öllum landshlutum. Þetta er eitt stærsta verkefni á sviði ferðaþjónustu sem ráðist hefur verið í hér á landi. Samið verður við markaðsstofur landshlutanna og Höfuðborgarstofu um að leiða vinnuna í hverjum landshluta en Ferðamálastofa og Stjórnstöð ferðamála hafa átt samvinnu um verkefnið, ásamt markaðsstofum landshlutanna.

„Þetta er eitt stærsta samhæfða þróunarverkefnið sem ráðist hefur verið í hér á landi. Í gerð stefnumótandi stjórnunaráætlana felst heildstætt ferli þar sem litið er til skipulags og samhæfingar í þróun og stýringu allra þeirra þátta sem geta haft áhrif á upplifun ferðamanna á hverju svæði. Þá horfum við til þarfa heimamanna, fyrirtækja og umhverfisþátta jafnt sem gesta,“ segir Ólöf Ýrr Atladóttir, ferðamálastjóri í tilkynningu.

Afurð verkefnisins felur í sér sameiginlega stefnuyfirlýsingu sem hefur það að markmiði að stýra uppbyggingu og þróun svæðis yfir ákveðinn tíma, skilgreina hlutverk hagsmunaaðila, tiltaka beinar aðgerðir sem hver og einn hagsmunaaðila ber ábyrgð á og hvaða bjargir/auðlindir þeir hyggjast nýta við þá vinnu. Gert er ráð fyrir til að áætlanagerðinni sjálfri ljúki á árinu 2018. „Niðurstöðurnar munu stuðla að markvissri þróun ferðaþjónustu í hverjum landshluta og auðvelda opinbera ákvarðanatöku sem snýr til dæmis að skipulagsmálum, uppbyggingu þjónustu, aðgangsstýringu og markaðsáherslum,“ segir Ólöf.

Svæðisbundin þróun hefur verið eitt af áherslusviðum Ferðamálastofu undanfarin misseri og hefur þetta metnaðarfulla verkefni verið í undirbúningi hjá stofnuninni síðan í upphafi árs 2015. Þetta er eitt af þeim forgangsverkefnum, sem skilgreind voru í Vegvísi fyrir ferðaþjónustuna, sem birtur var í lok árs 2015, en Ferðamálastofa og Stjórnstöð ferðamála hafa átt samvinnu um gangsetningu verkefnisins, sem fyrr segir.

Stjórnstöð ferðamála leiddi saman hagsmunaaðila og hefur samhæft undirbúning og innleiðingu verkfæra og aðferðafræði, en Ferðamálastofa fjármagnar verkefnið og heldur utan um framkvæmd þess. Stofnunin mun þannig beina 100 milljónum kr. af verkefnafé sínu til framkvæmdar verkefnisins á næstu 12 mánuðum.

smari@bb.is

Auglýsing

Auglýsing

Niðurstaða er komin í bótakröfu Ísafjarðarbæjar á hendur Viðlagatryggingu Íslands vegna tjóns sem hlaust á eigum bæjarins í vatnsflóðunum 8. febrúar 2015. Viðlagatrygging greiðir bænum 23 milljónir kr. og koma þær til viðbótar 13 milljónum kr. sem ákveðnar voru á fjárlögum 2015. Um er að ræða samkomulagsbætur og með greiðslu þeirra telst málið endanlega lokið af hálfu beggja aðila.

Íþróttamannvirkin á Torfnesi voru ekki tryggð og njóta því ekki tryggingaverndar frá Viðlagatryggingu Íslands. Gísli Halldór Halldórsson, bæjarstjóri Ísafjarðbæjar, segir að niðurstað málsins sé viðunandi, sé horft fram hjá tjóni á fótboltavöllunum.

Skömmu eftir flóðin hafnaði stjórn Viðlagatryggingar bótakröfunni á þeim forsendum að tjónið félli ekki undir bótasvið Viðlagatryggingar. Ísafjarðarbær kærði úrskurðinn og  fyrir ári síðan felldi úrskurðarnefnd Viðlagatryggingar ákvörðunina úr gildi vegna mikilla annmarka á úrskurðinum.

Samkvæmt samkomulaginu lýsir Ísafjarðarbær því yfir að fallið er frá öllum kröfum, hvaða nafni sem þær nefnast, á hendur Viðlagatryggingu Íslands vegna vatnsflóðanna á Ísafirði og á Suðureyri.

smari@bb.is

Auglýsing

Auglýsing

Grágæsin er komin til Vestfjarða. Á vef Náttúrustofu Vestfjarða segir að í síðustu viku hafi Guðbrandur Sverrisson á Bassastöðum við Steingrímsfjörð séð átta gæsir á Þröskuldum í norðan hríðarhraglanda. Í þessari viku sá starfsmaður Náttúrustofunnar 40 grágæsir við Höfða í Dýrafirði og 18 fugla í Önundarfirði.

Grágæs (Anser anser) er farfugl sem dvelur á Bretlandseyjum yfir vetrartímann en kemur til Íslands til að dvelja hér frá mars til október. Grágæsin er stærst þeirra gæsa sem verpa og dvelja hérlendis en hún er 75-90 cm að stærð og vegur um 3,5 kg. Hún verpur í maí og þá alltaf nálægt vatni, í mýrum, hólmum, grónum eyjum, á vatnsbökkum eða í lyngmóum. Grágæsir halda sig oftast í hópum utan varptíma og fara þá um í svokölluðu oddaflugi en þær halda sig þá oft á ræktuðu landi, á ökrum, í votlendi og á túnum.

smari@bb.is

Auglýsing

Auglýsing