Fram kom í bókun frá síðasta bæjarráðsfundi Ísafjarðarbæjar að bæjarráð fæli bæjarstjóra að ræða við framkvæmdastjóra Byggðasamlags Vestfjarða um málefni fatlaðs fólks, um þann möguleika að Ísafjarðarbær taki yfir þjónustu við fatlað fólk í sveitarfélaginu. Stór hluti þjónustunnar hefur verið í höndum BSVest. Ef af þessu yrði þýddi það að Ísafjarðarbær drægi sig út úr samstarfi um málefni fatlaðs fólks, en Ísafjarðarbær er sem stendur stærsta sveitarfélagið í Byggðasamlaginu.

Pétur G. Markan sveitastjóri í Súðavík segir Súðavíkurhrepp ekki sjá ástæðu til að skoða breytingar að svo stöddu: „Súðavíkurhreppur er ekki að skoða sýna stöðu innan byggðasamlagsins, enda er það afstaða sveitarfélagsins að málefni fatlaðaðra séu best unnin í samvinnu allra sveitarfélaga á Vestfjörðum.  Með það að leiðarljósi, það er besta mögulega þjónusta sem völ er á, er engin ástæða til að skoða einhverjar breytingar.“

Friðbjörg Matthíasdóttir, starfandi bæjarstjóri Vesturbyggðar tekur undir með Pétri og segir að ef til breytinga komi gæti það verið tímafrekt ferli: „Til þess að Ísafjarðarbær geti tekið til sín þjónustuna þurfa þeir að segja sig úr byggðasamlaginu eða sveitarfélögin að taka ákvörðun um að slíta því. Það tekur drjúgan tíma. Ég tel að við getum vel sinnt þessu verkefni með sama hætti og við höfum gert hingað til, hvort heldur sem það verður á okkar forsendum eða í byggðasamlagi með öðrum sveitarfélögum á Vestfjörðum, en þetta hefur ekki verið rætt formlega hjá okkur.“

Pétur segir mikilvægt að hafa gæði  þjónustunnar í forgangi: „Hins vegar hefur Súðavíkurhreppur haft skoðun á rekstri byggðasamlagsins, eins og öllum öðrum rekstri sem sveitarfélagið kemur nálægt. Það breytir ekki afstöðu sveitarfélagsins, sem er að málaflokkurinn á að vera í því formi sem getur veitt bestu þjónustuna, sem er í þessu tilfelli byggðasamlag, þar sem sveitarfélögin taka höndum saman um þjónustuna.“

brynja@bb.is

Til stendur að að kynna Ultimate Frisbee fyrir íbúum á norðanverðum Vestfjörðum í kvöld. Halla Mia, fréttaritari Ríkisútvarpsins á Vestfjörðum stendur fyrir kynningunni: „Ég kynntist ultimate frisbee í Berlín, það er frekar vinsælt í Þýskalandi, Ástralíu, Bandaríkjunum og Kanada. Það er kannski rokið sem veldur að það hefur ekki náð fótfestu hér.“ En samkvæmt Höllu þarf maður að vera klárari í að kasta ef spilað er í roki, því sé oft spilað innanhúss.

Halla útskýrði leikinn stuttlega fyrir blaðakonu: „Það eru 5-7 í liði. Markmiðið er að koma disknum yfir völlinn og að hann sé gripinn á marksvæðinu sem er á enda vallarins. Það má ekki hlaupa á meðan maður er með diskinn í höndunum.“ Það sem er sennilega merkilegast er að það eru aldrei dómarar heldur snýst þetta um að leikmenn gera brotin upp sjálfir og segir Halla Mia regluna „sá vægir sem vitið hefur meira“ gilda á vellinum.

Á Facebook-síðu viðburðarins segir „Allir velkomnir, engir frisbíhæfileikar nauðsynlegir bara áhugi.“ Fyrir áhugasama um ultimate frisbee má lesa meira á vef Wikipediu.

Kynningin verður haldin í kvöld, mánudag klukkan 20 í íþróttamiðstöðinni Árbæ í Bolungarvík, sem er í sama húsnæði og Musteri vatns og vellíðunar.

brynja@bb.is

Á síðasta bæjarráðsfundi hjá Ísafjarðarbæ kynntu þau Dagný Arnalds, Ívar Kristjánsson og Runólfur Ágústsson fyrir bæjarráði hugmynd stýrihóps sem vinnur að þróun starfs lýðháskóla á Flateyri. Lýðháskólar eru einskonar lífsleikniskólar þar sem nemendur geta valið sér nám úr fjölda ólíkra námsgreina þar sem ekki er lögð áhersla á próf heldur fremur þátttöku og að nemendur læri eitthvað gagnlegt og skemmtilegt.

Í kynningu hópsins segir að margir þættir geri Flateyri að sterkum bæ fyrir lýðháskóla, umhverfið, árstíðirnar, friðsældin í náttúrunni og menningarlíf Flateyrar.

Runólfur Ágústsson er verkefnastjóri stýrihópsins: „Þessi hugmynd er búin að vera á floti á svæðinu býsna lengi  og við tókum þetta upp síðsumars og fórum að skoða þetta af alvöru. Hugmyndin gæti virst fólki pínu langsótt en þegar við fórum að greina lýðháskólahugmyndina og skoða fordæmi á Norðurlöndum, þar sem fólk er að fara að mennta sig menntunar vegna en ekki til að fá gráðu, þá sáum við margt jákvætt og framkvæmanlegt í hugmyndinni.“

Runólfur segir Flateyri hafa marga styrkleika til að hýsa lýðháskóla: „Við fórum að greina Flateyri út frá þessari hugmyndafræði og sáum fullt af góðum kostum. Þetta er öflugt, lítið og þétt samfélag sem er ákveðinn styrkleiki sem hefur sýnt sig á Norðurlöndunum að nýtast vel. Svo er Önundarfjörður einstakt umhverfi.“

Þær námsleiðir sem hópurinn leggur til að kenndar yrðu við lýðháskóla á Flateyri eru kvikmyndagerð, tónlist, umhverfisfræði og fjallamennska. „Tveir grundvallar styrkleikar Flateyrar eru vissulega kvikmyndir og tónlist. Þar viljum við byggja á styrkleika þess stóra hóps kvikmyndagerðarfólks sem á tengsl við Flateyri og kemur hingað reglulega, svo er auðvitað sterk tónlistarhefð á svæðinu öllu. Svo stingum við upp á umhverfistengdu nám sem yrði kennt á ensku og þar byggjum við á reynslu Háskólaseturs Vestfjarða.“

Hugmyndin hefur verið kynnt fyrir bæjarráði og segir Runólfur næsta skref vera að stofna félag utan um hugmyndina.

brynja@bb.is

Félag slökkviliðsmanna í Bolungarvík og Bolungarvíkurkaupstaður efna til árlegs brunavarnarátaks í Bolungarvík nú þegar skammdegið er að skella á og ljósa-, rafmagns- og kertanotkun er hvað mest. Í kvöld og á morgun laugardag munu slökkviliðsmenn í Bolungarvík ganga í hús og aðstoða við hvaðeina er varðar eldvarnir heimila sé þess óskað, ásamt því að hafa til sölu á kostnaðarverði rafhlöður í reykskynjara og minna á að að skipta þarf um rafhlöður í reykskynjurum einu sinni á ári og er góður siður að gera það fyrir upphaf jólaaðventu, einnig hafa þeir til sölu eldvarnarteppi og handslökkvitæki. Bjóðast þeir til að skipta um rafhlöður í reykskynjurum, setja upp nýja, sem og handslökkvitæki og eldvarnarteppi fyrir eldri borgara og þá sem erfitt eiga um vik.

Á laugardag verður slökkvitækjahleðsla staðsett á slökkvistöðinni og geta allir farið með slökkvitæki sín og látið yfirfara þau þar frá kl. 10. Handslökkvitæki þarf að yfirfara á tveggja ára fresti. Þeir sem ekki komast með handslökkvitæki sín til skoðunar á laugardag verða einnig aðstoðaðir og eru þeir beðnir um að hafa samband við slökkviliðsstjóra í síma 897 1482.

Algengustu brunar á Íslandi eru af völdum rafmagns og raftækja og oft hefur kviknað í út frá kertaskreytingum. Hættulegustu eldsvoðar verða að nóttu til þegar heimilisfólk er sofandi. Eldurinn magnast ótrúlega fljótt og reykurinn verður banvænn á fáeinum mínútum. Reykskynjarar sem vara heimilisfólkið við hættunni, ættu því að vera í hverju herbergi þar sem raftæki eru staðsett, einnig í bílskúrum. Prófa þarf reykskynjarana reglulega og skipta þarf um rafhlöður árlega. Reykskynjurum þarf að skipta út ef minnsti vafi leikur á að þeir séu í lagi og reykskynjarar eiga ekki að vera eldri en 10 ára. Einnig minna slökkviliðsmennirnir á að eldvarnarteppi og handslökkvitæki eigi að vera til á öllum heimilum og allir þurfi að kunna að nota þau.

annska@bb.is