Í sárabót fyrir það andstreymi sem rauðhærðir hafa orðið fyrir í tímana rás, fyrir það eitt að skarta gullfallegum rauðum makka, var árið 2009 ákveðið að 12. janúar væri dagurinn sem rauðhærðum væri hampað. Á opinberri og alþjóðlegri síðu samtakanna „International Kiss a Ginger“ er fólk hvatt til að kyssa alla rauðhærða sem kunna að verða á vegi þeirra í dag.
Fyrsti leikurinn í kvöld
Opnunarleikur HM 2017 í handbolta fór fram í gær og hinir Frönsku heimsmeistarar lögðu Brasilíumenn með miklum bravúr með 31 stigi gegn 16. Vincent Gerard markmaður var valinn maður leiksins en hann var í marki Frakka í seinni hálfleik.
Íslenska liðið er í B-riðli og etur kappi við feiknasterkt lið Spánar í kvöld kl. 19:45. Spænska liðið spilaði til úrslita á EM í Póllandi í fyrra þar sem það tapaði fyrir Þýskalandi. Fram kemur á ruv.is að leikmenn liðsins gjörþekki hvern annan og hafi spilað lengi saman. Góðu fréttirnar fyrir Íslenska liðið eru að fyrirliðinn Enterríos verður látinn hvíla í leiknum í kvöld en hann hefur glímt við meiðsli.
Talsverð endurnýjun er í Íslenska liðinu og munu áhorfendur þurfa að læra nokkur ný nöfn og efalaust sakna þeirra sem nú eru hættir. Það eru Arnar Freyr Arnarsson, Bjarki Már Elíasson, Janus Daði Smárason og Ómar Ingi Magnússon sem þreyta frumraun sína á stórmóti að þessu sinni og spennandi að sjá hvernig þeim gengur. Guðjón Valur var í þeirra sporum í Króatíu árið 2000 og enn gleður hann áhorfendur með snilli sinni á vellinum. Illu heilli var Aroni Pálmasyni snúið heim og tekur hann ekki þátt að þessu sinni vegna meiðsla.
Næsti leikur hjá Íslenska liðinu er gegn Slóveníu á laugardag og hefst hann kl. 13:45.
Af vestfirskum uppruna
Yngsti ráðherrann í nýrri ríkisstjórn Íslands, Þórdís Kolbrún Reykfjörð Gylfadóttir er Vestfirðingur í báðar ættir. Þórdís er sem lögfræðingur að mennt gegnir nú stöðu ferðamála-, iðnaðar-, og nýsköpunarráðherra. Hún er fædd og uppalin á Akranesi en ættuð af Vestfjörðum. Móðir hennar, Fjóla Katrín Ásgeirsdóttir, er dóttir Ásgeirs Hannessonar frá Ármúla í Ísafjarðardjúpi og Þórdísar Katarínusardóttur frá Arnadal í Skutulsfirði. Faðir hennar, Gylfi R. Guðmundsson, er sonur Guðmundar Helga Ingólfssonar frá Hnífsdal og Jónu Valgerðar Kristjánsdóttur frá Ísafirði, sem búsett er í Reykhólasveit.
Ný jógastöð opnuð á Mávagarði
Jógastöð Gunnhildar Gestsdóttir á Ísafirði hefur nú opnað á nýjum stað. Stöðin er nú til húsa við Mávagarð og er hún í innsta húsi þeirra þriggja nýbygginga sem þar hafa risið. Blaðamaður heimsótti Gunnhildi á nýja staðinn sem er afar vistlegur og með útsýni sem Ameríkanar myndu kalla milljón dollara, þar sem höf og fjöll Skutulsfjarðar, Ísafjarðardjúp og Snæfjallaströnd blasa við í allri sinni dýrð. Aðstaðan rúmar allt að tuttugu iðkendur hverju sinni og kenna þar jóga Gunnhildur sjálf, Aðalheiður Jóhannsdóttir og Jenný Jensdóttir.
Óhætt að segja að á skömmum tíma hafi möguleikar íbúa á norðanverðum Vestfjörðum til jógaiðkunar aukist til muna, en lengi vel var einungis einn kennari sem bauð upp á jógatíma. Gunnhildur segist afar ánægð með að hafa fengið þær Jennýju og Aðalheiði til liðs við sig og með þessu samstarfi megi bjóða upp á jógaiðkun fimm daga vikunnar og suma daga fleiri en einn tíma. Tímafjöldi Jógastöðvarinnar hefur því farið úr tveimur opnum tímum á viku í sex. Einnig kenna þær jóga á leikskólunum á Ísafirði, Grunnskólanum á Ísafirði og á Hlíf.
Kennt er á ýmsum tímum. Fyrir þá árrisulu er boðið upp á jóga á þriðjudagsmorgnum klukkan 6:15, á mánudögum er jóga í hádeginu, síðdegistímar eru á þriðjudögum, miðvikudögum og fimmtudögum og einnig er kennt á laugardögum. Stundaskrána má nálgast hér. Fyrir þá sem vilja prófa en hafa litla reynslu af jógaiðkun verður fljótlega boðið upp á sérstakt byrjendanámskeið, slíkt var einnig á haustönn, sem og námskeið í meðgöngujóga, en vonir standa til að boðið verði upp á það aftur á vorönn.
Aðspurð um ávinning þess að stunda jóga svarar Gunnhildur „Jóga er stundað um allan heim í þeim tilgangi að auka heilbrigði og andlegan þroska hvers einstaklings. Jóga er ætlað að þjálfa og sameina líkama og huga. Með því ræktum við heilbrigði í huga og á líkama og þannig leitumst við við að lifa í sátt við umheiminn og njóta lífsins til fulls. Lifa núna.“
Skattsvik í Súðavík
Á fundi sveitarstjórnar í Súðavík í lok desember fjallar stjórnin í seinni umræðu um fjárhagsáætlun fyrir árið 2017 en áætluð lokaniðurstaða ársins gerir ráð fyrir afgangi upp á rúmar 27 milljónir og handbært fé hækki í tæpar 84 milljónir í árslok. Pétur Markan sveitarstjóri Súðavíkurhrepps bókar í fundargerð að rekstur sveitarfélagsins hafi stórbatnað á kjörtímabilinu en það sé áhyggjuefni hversu útsvarstekjur dragast skart saman milli ára og skýringa sé ekki að leita með fækkun skattbærra manna eingöngu. Pétri þykir líklegasta skýringin að þeim tilfellum þar sem íbúar nota einkahlutafélög til að fjármagna heimilis- og einkaneyslu hafi fjölgað. „Þessi þróun er afar uggvænleg og í raun aðför að samfélaginu sem byggir samrekstur sinn á skattheimtu“ eru lokaorð bókunarinnar.
Í 31. grein laga um tekjuskatt (90/2003) er fjallað um hvaða kostnað megi draga frá tekjum í sjálfstæðum atvinnurekstri. Þar kemur fram í fyrstu málsgrein „þau gjöld sem eiga á árinu að ganga til að afla teknanna, tryggja þær og halda þeim við“. Í lögum virðist ekki gert ráð fyrir neinu svigrúmi til að fjármagna einkaneyslu í einkahlutfélögum.
Pétur Markan segir í samtali við bb.is í dag að aðallega sé átt við það svigrúm sem fellst í greiðslu lágra launa við eigin atvinnurekstur. „Í bókuninni er bent á þá vá sem fylgir því þegar að útsvarstekjur lækka. Margskonar skýringar geta verið á bakvið slíka þróun. Í tilfelli Súðavíkurhrepps, og þetta er veruleiki allra sveitarfélaga á landinu, verður sveitarfélagið af miklum tekjum vegna einkaneyslu sem tekin er í gegnum fyrirtæki, í stað þess að greiða starfsmönnum hærri laun, sem aftur skilar þér í meira framlagi til samneyslu samfélagsins. Þetta er fyrst og fremst vandamál sem rekja má til of mikils rýmis innan skattalöggjafarinnar hvað við lítur fyrirtækjum. Þá er líka stór hluti vandamálsins að sveitarfélög hafa enga skattheimtu af fyrirtækjum, sem er mikið réttlætismál fyrir sveitarfélög. Sveitarfélag rekur sína þjónustu og velferð á skatttekjum. Ef þær dragast saman, dregst starfsemi sveitarfélagsins saman. Ekkert ábyrgt sveitarfélag lætur þá staðreynd óhreyfða, ef skatttekjur þess dragast meira saman en eðlilegt getur talið. Þá er vegið að tilveru þess og framtíð og við því þarf að bregðast af ábyrgð, hreinskilni og festu.“
Í 7. grein þeirra laga sem áður er vísað til, segir „Vinni maður við eigin atvinnurekstur eða sjálfstæða starfsemi skal hann telja sér til tekna eigi lægra endurgjald fyrir starf sitt og hefði hann innt það af hendi fyrir óskyldan eða ótengdan aðila. Sama gildir um vinnu við atvinnurekstur eða starfsemi sem rekin er í sameign með öðrum og einnig um vinnu manns við atvinnurekstur lögaðila þar sem hann er ráðandi aðili vegna eignar- eða stjórnunaraðildar. Á sama hátt skal reikna endurgjald fyrir starf sem innt er af hendi af maka manns eða barni hans sé starfið innt af hendi fyrir framangreinda aðila.“
Opið fyrir umsóknir um byggðakvóta
Fiskistofa auglýsir eftir umsóknum um byggðakvóta til fiskiskipa fyrir eftirtalin byggðarlög skv. Ákvæðum reglugerðar nr. 641/2016 um úthlutun byggðakvóta til fiskiskipa á fiskveiðiárinu 2016/2017: Sandgerði, Akureyrarkaupstaður (Grímsey og Hrísey). Auk reglugerðarinnar er vísað til sérstakra úthlutunarreglna í eftirtöldum byggðalögum sbr. auglýsingu nr. 6/2017 í Stjórnartíðindum: Stykkishólmur, Ísafjarðarbær (Þingeyri, Flateyri, Suðureyri, Hnífsdalur og Ísafjörður), Vopnafjarðarhreppur (Vopnafjörður).
Umsóknum skal skilað til Fiskistofu og þarf þeim að fylgja samningur við vinnslu, fylgi slíkur samningur ekki með telst umsókn ekki gild. Umsóknarfrestur er til og með 26. janúar 2017.
Sú gula mætt í Breiðadal
Það urðu fagnaðarfundir í Önundarfirði í gær þegar sú gula varpaði geislum sínum að gamla bænum í neðri Breiðadal, í fyrsta sinn á þessu ári. Það skipti engum togum að húsmóðirin tók á sprett heim að bæ og skellti pönnukökur en það eru hefðbundnar trakteringar við tækifæri sem þessi.
bryndis@bb.is
Áfram kalt í veðri
Á Vestfjörðum í dag er spáð norðaustan 5-10 m/s og stöku éljum, einkum í nótt. Hægviðri verður í nótt og langt fram eftir degi á morgun, en gengur í suðaustan 10-15 m/s með snjókomu seint annað kvöld. Harðnað hefur í frosti á svæðinu síðustu daga og bítur kuldinn kinn, áfram verður kalt í veðri með frosti á bilinu 5 til 10 stig. Snjóþekja eða nokkur hálka er á Vestfjörðum. Þæfingsfærð er í Ísafjarðardjúpi en mokstur stendur yfir.
Gísli á fjalirnar á morgun
Okkar maður er mættur í Þjóðleikhúsið og er að gera klárt fyrir fyrstu sýningu á Gísla á Uppsölum en uppselt mun vera á fyrstu þrjár sýningarnar og bætti leikhúsið snarlega við þremur sýningum við þær upphaflegu þrjár sem voru fyrirhugaðar. Á heimasíðu Þjóðleikhússins er sýningunni líst sem einstöku leikverki um einstakan mann, hér sé um að ræða áhrifamikla sýningu sem hefur hrifið áhorfendur líkt og saga söguhetjunnar. Fyrsta sýning er á morgun kl. 19:30.
Elfar Logi hefur farið víða um land með þetta fertugasta leikverk sem Kómedíuleikhúsið hefur sett upp en vinsælast hingað til hefur verið einleikurinn um Gísla Súrsson. Í viðtali við bb.is í nóvember sagði Elfar: „Ég er bara í Gíslatöku ekkert annað og ann því vel, ætli maður geri ekki næst leikrit um vorn bæjarstjóra Gísla Halldór eða nafna hans Landa Einarsson.“
Jón Viðar Jónsson gagnrýnandi fer fögrum orðum um sýningu Elfars, „Þeir Elfar Logi og Þröstur Leó fara afskaplega næmum höndum um þetta viðkvæma efni og draga upp látlausa en blæbrigðaríka mynd af einbúanum og einstæðingnum sem þjóðin tók á einhvern undarlegan hátt að hjarta sér þegar hún kynntist honum fyrst í frægum þáttum Ómars. Örlög hans, hvernig stórvel gefinn maður dagar uppi í íslenskum afdal á tuttugustu öld, eru og verða trúlega alltaf ráðgáta. Ráðningu þeirrar gátu er ekki að finna í þessar fallegu sýningu og það er kannski, þegar upp er staðið, hennar helsti styrkur.“
Nú gefst sunnlendingum tækifæri til að njóta listar Elfars Loga og rifja upp í leiðinni þá upplifun að minnast Gísla á Uppsölum sem við kynntumst með Ómari Ragnarssyni.
Um 100 umsóknir bárust
Frestur til að sækja um styrk í Uppbyggingarsjóð Vestfjarða rann út á miðnætti á mánudag. Að þessu sinni bárust um 100 umsóknir, sem er heldur minna en á síðasta ári er þær voru um 130. Nú tekur við úrvinnsla og mat á umsóknum hjá úthlutunarnefnd sjóðsins og er niðurstaða að vænta í lok febrúar. Til ráðstöfunar í úthlutun eru um 65 milljónir að þessu sinni.
Uppbyggingarsjóðurinn var stofnaður árið 2015 og tók hann við hlutverki Menningarráðs Vestfjarða og Vaxtarsamnings Vestfjarða. Sjóðurinn er hluti af samningi íslenska ríkisins og Fjórðungssambands Vestfirðinga um Sóknaráætlun Vestfjarða 2015-2019. Úr sjóðnum eru veittir stofn- og rekstrarstyrkir til menningarstofnana, verkefnastyrkir til menningarmála og verkefnastyrkir til atvinnuþróunar- og nýsköpunarverkefna.
annska@bb.is
