Það er hafið yfir allan vafa að Ísland er í tísku sem ferðamannaland og þegar ferðamenn voru spurðir hversu líklegt er að þeir heimsæki landið aftur, töldu meira en 80% af svarendum það mjög eða frekar líklegt.  Þetta er meðal  þess sem kemur fram í skýrslu Byggðastofnunar um stöðu og horfur í ferðaþjónustu. Það er ekki sjálfgefið að þessi þróun haldi áfram og margt sem yfirvöld og fyrirtæki í ferðaþjónustu þurfa að huga að.

Langtímastefnumótun fyrir ferðaþjónustu á Íslandi er nauðsynleg með tilliti til uppbyggingar innviða, markaðssetningar landsins og sköpunar verðmætra starfa í greininni.

Það er gömul saga og ný að mikil tækifæri felast í því að lengja ferðamannatímann og nýta þar með fjármagn, starfsfólk og tæki betur. Að mati skýrsluhöfunda er þetta stærsta áskorunin sem íslensk ferðaþjónustufyrirtæki standa frammi fyrir, einkum í ferðaþjónustu utan höfuðborgarsvæðisins.

Nokkrar ástæður hafa verið nefndar sem torveldi dreifingu ferðamanna utan háannatíma og sú helsta eru samgöngumál. Álag á samgönguæðar landsins hefur aukist töluvert með auknum ferðamannastraumi,  en fjárveitingar frá ríki hafa ekki verið í samræmi við það. Álagið hefur einnig aukist á Keflavíkurflugvelli. Á árinu 2010 voru 7 flugfélög sem voru með áætlunarflug til landsins en í skýrslunni kemur fram að 25 flugfélög flugu til landsins í fyrra.

Á helstu áfangastöðum ferðamanna hefur álagið einnig aukist gífurlega og vinna þarf markvisst í því að álagið komi ekki niður á stöðunum. Vegakerfið víða um land er ekki tilbúið til að taka við þessari miklu aukningu og þjónusta á vegum er víða af skornum skammti, sérstaklega utan háannatíma.

Tækifæri felast í betra innanlandsflugi, jafnt tíðni ferða og tengingu innanlandsflugsins við millilandaflug og fleiri áfangastaði innanlands.

smari@bb.is

Arnarlax hefur fest kaup á nýjum fóðurpramma sem fyrirtækið fær afhent í vor. Í haust komu tveir nýir fóðurprammar til fyrirtækisins. „Þessi sem við fáum í vor er mun stærri og í takt við þá þróun sem er að verða í búnaði í laxeldi, þetta er allt að verða stærra og öflugra,“ segir Víkingur Gunnarsson, framkvæmdastjóri Arnarlax. Hann gerir ráð fyrir að nýi pramminn verði staðsettur í Tálknafirði. Prammarnir tveir sem fyrirtækið fékk í haust taka 320 tonn af fóðri en sá sem kemur í vor tekur tvöfalt meira. „Hann er mjög vel útbúinn. Það er hægt að láta mannskap búa um borð og hafa vaktaskipti, en við gerum það reyndar ekki. Honum verður stýrt úr landi. Þetta er fóðurprammi eins og þeir gerast bestir,“ segir Víkingur.

Prammarnir eru smíðir í Póllandi og keyptir af AKVA group í Noregi.

smari@bb.is

Eftir tæpa viku verða 40 ár frá því að fyrstu sundtökin voru tekin í sundlauginni í Bolungarvík – sem í seinni tíð og með seinni tíma uppfærslum hefur fengið viðurnefnið Musteri vatns og vellíðunar. Af því tilefni verður dagskrá í lauginni á laugardaginn næstkomandi. Ber þar helst útnefningu á íþróttamanni ársins í Bolungarvík. „Óhætt er að fullyrða að sundlaugin er glæsilegasta mannvirki sinnar tegundar á Vestfjörðum og þó víðar væri leitað,“ skrifaði Einar K. Guðfinnsson, þáverandi blaðamaður Vísis, í frétt blaðsins af vígslu laugarinnar fyrir 40 árum.

Fyrsta starfsár laugarinnar fór hver Bolvíkingur að meðaltali 26 sinnum í sund. Frá árinu 2007 fjölgar sundlaugarferðum mjög en þá hafði laugin fengið andlitslyftingu og í fyrra voru baðgestir 42..911 sem jafnast á við að hver íbúi hafi farið 47 sinnum í sund á árinu. Eftir að Bolungarvíkurgöng voru tekin í gagnið árið 2011 fjölgaði baðgestum verulega.

bryndis@bb.is

Samkvæmt rannsókn Pawels og Ewu Wasowicz og Harðar Kristinssonar hjá Náttúrufræðistofnun verður Ísland eitt viðkvæmasta vistkerfið þegar kemur að hlýnun jarðar, en spár gera ráð fyrir að loftslag hlýni hlutfallslega meira á norðurhveli á næstu áratugum og plöntur sem hafa aðlagast köldu loftslagi láti undan nýjum tegundum.  Frá þessu er greint í umfjöllun á RÚV.

Þá gætu tegundir eins og aðalbláberin sem Vestfirðingar hafa verið svo lánsamir að geta tínt í lítravís flest síðsumur verið í hættu að sögn Starra Heiðmarssonar, sviðsstjóri í grasafræði hjá Náttúrufræðistofnun, sem segir augljósu gróðurbreytingarnar vera aukinn vöxt. Ágengar plöntur eins og skógarkerfill, lúpína og hin alræmda bjarnarkló sæki í sig veðrið, og plöntur sem eru háðar því að vera huldar snjó allan vetur, eins og aðalbláber, gætu átt undir högg að sækja. „Og þetta eru breytingar sem við gætum séð öllu hraðar heldur en svona langvinnar breytingar sem taka lengri tíma,” segir hann.

Þá er aðfluttum plöntutegundum á Íslandi alltaf að fjölga, enda skilyrðin hér að breytast og ferðamönnum, sem koma óvart með fræ eða litla plöntuhluta, alltaf að fjölga.

Meira um málið má lesa hér, ásamt því sem þar má hlusta á viðtal við Starra.

annska@bb.is

Smátt og smátt er nýr vefur bb.is betrumbættur og aðlagaður að lesendum. Nú er komin flipi fyrir veður og samgöngur en ábendingar lesenda voru einróma á þann veg að við héldum þessum hluta inni.

Enn er vandamál að halda linkum á gamlar fréttir en það leysist innan tíðar.

Almennt hefur nýjum vef verið vel tekið og lesendum hans á farsíma fjölgar dag frá degi. Ábendingar um það sem betur má fara eru áfram vel þegnar.

bryndis@bb.is

Matreiðsluvín með áfengisstyrkleika allt að 40% má kaupa í verslunum Samkaupa á Ísafirði. Þar eru fjórar tegundir að finna í hálfs lítra flöskum: Koníak sem hefur áfengisstyrkleika 40%, púrtvín 20%, rauðvín og hvítvín sem er 11%. Matarvín er ólíkt áfengi sem nálgast má í verslunum ÁTVR að því leiti að búið er að krydda vínið og telst það því ekki drykkjarhæft.

Ingólfur Hallgrímsson, verslunarstjóri Samkaupa á Ísafirði, segir að kvartanir hafi ekki borist vegna sölu verslunarinnar á þessum varningi en hann fái þó reglulega spurningar um vínið. Þessar vörur hafa verið í sölu í 4 ár í yfir 20 verslunum Samkaupa víðsvegar um landið. Ingólfur segir almennt ekki mikla sölu á víninu, en það hafi þó vakið athygli að síðsumars á síðasta ári hafi salan rokið upp og segir hann það megi mögulega rekja til þess að erlendir ferðamenn hafi haldið að þarna væri um áfengi að ræða, en flöskunum svipar mikið til þeirra sem drykkjarhæft vín kemur í.

Ingólfur segir jafnframt að salan hafi dottið niður að nýju með haustinu og í desembermánuði hafi hún verið afar lítil. Það vekur þó athygli að minnst selst af rauðvíninu og hvítvíninu, jafnvel bara flaska á mánuði en mun meira af þeim tegundum sem hafa hærra áfengismagn, sem mun þó yfirleitt minna notað til matargerðar en léttvínin.

Talsvert var fjallað um sölu á áfengum matreiðsluvínum í fjölmiðlum árið 2014, en þá ákváðu lögregluyfirvöld á höfuðborgarsvæðinu að aðhafast ekkert í málinu, þar sem lögum samkvæmt teldist vínið ekki neysluhæf vara. Hlynur Snorrason, yfirlögregluþjónn á Ísafirði segir að til Lögreglunnar á Vestfjörðum hafi verið að berast ábendingar um að í matvöruverslun á Ísafirði sé vara til sölu sem hafi háan áfengisstyrkleika, hann segir að málið sé í skoðun, en svo virðist sem þessi vara flokkist undir matvöru en ekki áfengi.

annska@bb.is

Vinnumálastofnun/velferðarráðuneytið auglýsir styrki til atvinnumála kvenna árið 2017 lausa til umsóknar. Til að eiga kost á styrkveitingu þarf verkefni að vera í meirihluta eigu konu/kvenna (51%) og stjórnað af konu, það þarf að fela í sér nýnæmi eða nýsköpun af einhverju tagi og atvinnusköpun til frambúðar. Þá þarf viðskiptahugmynd að vera vel útfærð.

Veittir eru styrkir til gerðar viðskiptaáætlunar, til markaðssetningar og gerðar markaðsáætlunar, vöruþróunar, hönnunar og efniskostnaðar. Ennfremur geta konur sem hafa fullmótaða viðskiptaáætlun og hafa hug á því að stofna fyrirtæki á næstunni eða hafa stofnað fyrirtæki en ekki hafið rekstur, sótt um styrk til að hrinda henni í framkvæmd.

Heildarfjárhæð styrkja að þessu sinni eru kr. 35.000.000 og er hámarksstyrkur 4.000.000. Ekki eru veittir lægri styrkir en kr. 600.000. Umsóknarfrestur er frá 20.janúar til og með 20.febrúar og má sækja um rafrænt hér.

Á síðasta ári fengu tvö vestfirsk verkefni styrk úr sjóðnum; Skóbúðin á Ísafirði og verkefni Kristínar Hálfdánardóttur, Flateyri.

annska@bb.is