Einstök sýning á yfir 300 refilsaumuðum veggmyndum verður opnuð í Tónlistarhúsinu Laugarborg í Eyjafjarðarsveit á laugardag. Meðal þeirra sem að sýningunni koma er dýrfirski rithöfundurinn Vilborg Davíðsdóttir. Sýningin sem ber yfirskriftina Scottish Diaspora Tapestry segir sögu Skota sem hafa flust til annarra landa í gegnum aldirnar og afrekum þeirra. Veggmyndirnar eru saumaðar af afkomendum skoskra innflytjenda í 33 löndum og hefur sýningin verið á ferð á milli þeirra sl. tvö ár. Við hana munu nú bætast fimm myndir frá Íslandi sem segja sögu systranna Þórunnar hyrnu og Auðar djúpúðgu Ketilsdætra sem komu hingað til lands með fjölskyldur sínar frá Skotlandi á níundu öld.

Íslenska verkefninu er stýrt af Bryndísi Símonardóttur fjölskylduþerapista og handverkskonu í Eyjafjarðarsveit. Bryndís teiknaði altarisdúk fyrir Hóladómkirkju og óf, teiknaði og saumaði altarisdúk í Saurbæjarkirkju. Myndirnar fimm eru teiknaðar af Kristínu Rögnu Gunnarsdóttur teiknara og rithöfundi sem hannaði og teiknaði Njálurefilinn, hannaði og stjórnaði teiknivinnu við Vatnsdælu á refli og leiddi refilverkefni um Darraðarljóð í Caithness á Skotlandi. Sögulegur ráðgjafi við hönnun veggmyndanna er Vilborg Davíðsdóttir þjóðfræðingur og rithöfundur sem skrifað hefur um líf landnámskonunnar Auðar djúpúðgu í tveimur skáldsögum, Auði og Vígroða, og vinnur nú að þeirri þriðju sem kemur út í haust.

Gestir á sýningunni í Laugarborg geta fengið að sjá hvernig saumaskapurinn fer fram. Allar veggmyndir Scottish Diaspora Tapestry eru saumaðar af fjölda fólks í hinum ýmsu löndum og munu fimm konur í Eyjafirði sauma landnámskvennamyndirnar. Að verki loknu bætast myndirnar af Þórunni og Auði við heildarsýninguna sem mun hafa fast aðsetur í sérsmíðuðu sýningarhúsnæði í bænum Prestonpans í Skotlandi en þar var háð söguleg orrusta í uppreisn Jakobíta gegn ensku konungsvaldi árið 1745.

Sýningin í Laugarborg stendur yfir alla daga 4.-26. febrúar, opið er daglega frá klukkan 14 til 18.

annska@bb.is

Stjórn Fræðslumiðstöðvar Vestfjarða hefur valið Elfu Svanhildi Hermannsdóttur úr hópi tólf umsækjenda í starf  forstöðumanns stofnunarinnar og stefnt er að því að ganga frá ráðningu hennar síðar í vikunni. Elfa Svanhildur er þjónustustjóri hjá Þjónustu- og þekkingarmiðstöð fyrir blinda, sjónskerta og daufblinda einstaklinga. Hún er með B.ed próf frá Kennaraháskóla Íslands, MPM meistaragráðu í verkefnastjórnun og diplómagráður í sérkennslufræðum blindra og sjónskertra nemenda og stjórnun menntastofnana.

Efla Svanhildur er fædd árið 1979. Hún er í sambúð með Frey Heiðari Guðmundssyni og eiga þau þrjár dætur, fæddar 2010, 2012 og 2016.

annska@bb.is

Fyrirtækin Skaginn, 3X Technology og Þorgeir & Ellert verða hér eftir kynnt undir einu sameiginlegu vörumerki, Skaginn 3X. Fyrirtækin, sem eru staðsett á Akranesi, Ísafirði og Reykjavík, hafa verið í miklum vexti á síðustu árum og verið áberandi með tækninýjungar á sviði matvælaiðnaðar, sérstaklega í sjávariðnaði.

„Þessar breytingar eru fyrst og fremst hugsaðar til þess að einfalda og sameina markaðsstarf fyrirtækjanna og auðvelda samskipti við viðskiptavini. Undir einu merki skapast sterkari vitund um starf okkar og þær vörur sem við framleiðum. Þannig getum við hagrætt í markaðsstarfi og gert það enn árangursríkara, ásamt því að styrkja stöðu og sérkenni starfsstöðvanna“ segir Ingólfur Árnason framkvæmdarstjóri Skaginn 3X í fréttatilkynningu.

Þær vörur sem Þorgeir og Ellert selur á erlendum mörkuðum hafa lengi verið markaðssettar undir nafni Skagans. Samstarf milli Skagans og 3X Technology efldist árið 2014 þegar eignarhald fyrirtækjanna sameinaðist að hluta.

„Samvinna okkar hefur gefist vel og við horfum björtum augum til framtíðar. Okkar bíða stór og spennandi verkefni á alþjóðavísu, mörg hver byltingarkennd fyrir markaðinn. Þó starfsemi fyrirtækjanna verði sameinuð undir einu merki, þá viljum við halda í sérþekkingu og einkenni hverrar starfstöðvar fyrir sig og fyrirtækin þrjú munu áfram starfa sem sjálfstæðar rekstrareiningar“ segir Karl Ásgeirsson, rekstrarstjóri Skaginn 3X á Ísafirði.

Í tilefni af sameinuðu merki félaganna, þá var ný sameiginleg heimasíða sett í loftið til að kynna betur vörur félaganna og auðvelda samskipti við markaðinn, http://skaginn3x.com/.

smari@bb.is

Gettu betur, spurningakeppni framhaldsskólanna hefst á Rás 2 í kvöld og er það lið Menntaskólans á Ísafirði sem ríður á vaðið í fyrstu viðureigninni þar sem lið skólans mætir liði Verkmenntaskóla Austurlands. Lið MÍ skipa þau Ína Guðrún Gísladóttir, Kolbeinn Sæmundur Hrólfsson og Veturliði Snær Gylfason. Útsending á Rás 2 hefst klukkan 19:25. Spyrill er Björn Bragi Arnarson, spurningahöfundar og dómarar eru þau Bryndís Björgvinsdóttir og Steinþór Helgi Arnsteinsson.

Þetta er í þrítugasta og annað sinn sem Gettu betur er haldin. Tuttugu og fimm skólar taka þátt að þessu sinni en átta lið fara áfram í lokakeppnina sem hefst í sjónvarpi þann 24.febrúar nk. Liði MÍ hefur aldrei gengið jafn vel í keppninni og á síðasta ári er það komst áfram í lokaumferðina í sjónvarpinu en lét það þar í minni pokann fyrir liði Menntaskólans við Hamrahlíð. Liðið í ár stefnir að sjálfsögðu að því marki að komast í lokaumferðina.

annska@bb.is

Samskotasjóðurinn Stöndum saman Vestfirðir hefur hleypt af stokkunum næstu söfnun sinni og í þetta sinn verður safnað fyrir þremur hjartastuðtækjum. Tækin fara í lögreglubíla á Vestfjörðum, eitt á Hólmavík, annað á Patreksfjörð og Ísafjörð. Á þeim stöðum eru tveir lögreglubílar á hverri stöð en aðeins er hjartastuðtæki í öðrum bílnum. Aðstandendur söfnunarinnar segja aukið öryggi skapast við að hafa alla bíla útbúna hjartastuðtækjum, sem nýtist Vestfirðingum öllum og gestum þeirra.

Þetta er þriðja söfnun sjóðsins, en fyrst var safnað fyrir tækjum fyrir HVEST á Ísafirði og svo safnað fyrir sjúkrarúmi fyrir HVEST á Patreksfirði. Minna aðstandendur á að margt smátt gerir eitt stórt og við höfum fulla trú á því að við getum þetta þegar við stöndum öll saman.

Fyrir áhugasama um að leggja söfnuninni lið eru reikningsupplýsingar félagsins eftirfarandi: Kt. 410216-0190 Banki 156-26-216

annska@bb.is

Kappinn Grettir í meðförum Elfars Loga Hannessonar leggst nú í víking að nýju, er einleikurinn verður sýndur á Hjaltlandseyjum um helgina. Þar á bæ fer fram um helgina málþing sem kallast Follow the Vikings. Það er Evrópuverkefni þar sem aðilar víðsvegar úr álfunni, sem eiga það sameiginlegt að vinna á einn eða annan hátt með víkingaarfinn, koma saman til að kynna sig og kynnast öðrum.

„Þegar svona spennandi boð eins og það að fá að fara til Hjaltlandseyja með list sina þá segir maður náttlega ekki nei – svo við leggjum bara í hann og hlökkum mikið til.“ Segir Elfar Logi, en með honum í för verður eiginkona hans Marsibil Kristjánsdóttir og verða þau bæði einnig með erindi á málþinginu. Elfar logi verður með erindi fyrir hönd Kómedíuleikhússins, þar sem hann segir frá því hvernig nýta má Íslendingasögurnar við listsköpun og þá einkum hvernig breyta má þeim í leikrit. Marsbil mun kynna Gíslasögu-verkefni þeirra hjóna er þau eru að vinna að í gamla félagsheimilinu í Haukadal, en fyrsti áfangi þess opnar í sumar.

Von er á um 50 manns á málþingið, þar á meðal eru nokkrir íslenskir ferðaþjónar. Elfar Logi segist spenntur fyrir ferðinni og þá sér í lagi því tengslaneti sem þátttaka í málþingi sem þessu kann að veita: „Það mikilvægasta er þetta mingl á milli manna svo úr verður samstarf millum víkinga og landa, við vonumst til að geta bæði stolið hugmyndum fyrir okkar verkefni sem og myndað góð tengsl við aðra, fara jafnvel í samstarf, allt getur gerst á eyjum eins og við vitum, og hvað þá þegar víkingar koma saman.“

Hér má lesa meira um Follow the Vikings.

annska@bb.is