Karlalið Vestra í blaki mun keppa í Kjörísbikarnum um næstu helgi. Allir Vestfirðingar sem vettlingi geta valdið eru hvattir til að fjölmenna á leikinn sem verður í Laugardalshöllinni föstudaginn 7. apríl kl. 20. Þar mætir Vestri Aftureldingu í undanúrslitum og falli leikurinn okkur í hag er úrslitaleikur sunnudaginn 9. apríl kl. 14:00. Það má segja að liðið hafi komið, séð og sigrað í vetur og komu á dögunum heim með deildarbikarinn í 1. deild Íslandsmótsins þar sem sigur þeirra í deildinni var aldrei í hættu. Það getur því allt gerst á föstudaginn.

Þetta verður bikarhelgi hjá blaksambandinu þar sem spilaðir verða undanúrslitaleikir hjá bæði körlum og konum á föstudeginum og úrslitaleikirnir fara fram á sunnudeginum.

Blakdeild Vestra selur helgarpassa í forsölu fram til 4. apríl á kr. 4000 og rennur helmingurinn af upphæðinni til blakdeildarinnar.

Bryndís

Umboðsmaður Alþingis telur að vinnubrögð Matvælastofnunar við afhendingu bóluefnis til fiskeldisfyrirtækja orki tvímælis og undirbúa yfirdýralæknir og dýralæknir fisksjúkdóma nýtt ferli. Hingað til hefur dýralæknir fisksjúkdóma útvegað fiskeldisfyrirtækjum bóluefni og þegið fyrir það þóknun og þar með hugsanlega orðin vanhæfur til ráðgjafar vegna til dæmis umsókna um aukið eldi.

Forsaga málsins er sú Umboðsmanni Alþingis barst kvörtun frá Landssambandi veiðifélaga þar sem kvartað var yfir svari sjávarútvegs- og landbúnaðarráðherra við erindi félagsins sem fól í sér beiðni um að Ísafjarðardjúpi og Eyjafirði yrði lokað fyrir fyrir eldi á frjóum norskum eldislaxi. Kvörtunin laut m.a. að aðkomu dýralæknis fisksjúkdóma að svari ráðuneytisins en landssambandið taldi hann vanhæfan til að koma að málinu.

Viðbrögð Matvælastofnunar eru eins og áður sagði að breyta þessu vinnulagi og Gísli Jónsson, dýralæknir fisksjúkdóma hefur ákveðið að hætta að afhenda bóluefni til seiðaeldisstöðva.

Fjallað var um málið í fréttum Rúv í gærkvöldi og í kvöld mun kastljósinu vera beint að fiskeldi.

Bryndís

Fulltrúar Tónlistarskóla Ísafjarðar og Tónlistarskóla Bolungarvíkur stóðu sig með miklum sóma á lokahátíð Nótunnar í Eldborgarsal Hörpu í gær. Flutningur Mariann Rähni úr Tónlistarskóla Bolungarvíkur á vals í e-moll ef Frédéric Chopin var eitt tíu atriða sem fengu sérstaka viðurkenningu og verðlaunagrip fyrir framúrskarandi flutning á Nótunni. Dómnefnd Nótunnar verðlaunaði einnig söng Arons Ottós Jóhannssonar á Ol‘ Man River eftir Roger og Hammerstein en meðleikari hans var Pétur Ernir Svavarsson. Þeir hafa báðir numið við Tónlistarskóla Ísafjarðar.

Anya Hrund Shaddock vann aðalverðlaunin og telst handhafi Nótunnar 2017. Hún flutti píanóverkið Clair de lune eftir Claude Debussy. Anya er nemandi í Tónlistarskóla Fáskrúðsfjarðar og Stöðvarfjarðar.

Nótan er uppskeruhátið tónlistarskóla landsins og var nú haldin í sjötta sinn.

Veiði- og stangveiðifélög við Eyjafjörð, átta talsins, mótmæla harðlega áætlun Arnarlax ehf. á Bíldudal um framleiðslu á 10.000 tonnum af frjóum eldislaxi af norsku kyni í Eyjafirði, en Arnarlax gaf nýlega út drög tillögu að matsáætlun sjókvíaeldis í firðinum. Nái hún fram að ganga gætu orðið að jafnaði fimm milljónir frjórra laxa í sjókvíum í Eyjafirði. Augljós hætta stafar af slíku eldi fyrir veiðiár í Eyjafirði sem og náttúruna í heild, segir í tilkynningu félaganna. Þar segir jafnframt að viðurkennt sé að einn lax sleppi fyrir hvert tonn af laxi sem framleitt er. Samkvæmt því munu um 10.000 laxar sleppa úr kvíum Arnarlax í Eyjafirði á hverju ári sem er tíu til tuttugufalt fleiri laxar en ganga í Fnjóská á hverju ári. Líkurnar á því að laxastofninn í Fnjóská þoli slíkt álag frá framandi stofni eru engar. „Þá stefnir þetta eldi einnig öðrum ám í verulega hættu. Má þar nefna Laxá í Aðaldal, Skjálfandafljót, Fljótaá, Blöndu, Vatnsdalsá og Víðidalsá.“ Veiði- og stangveiðifélögin í Eyjafirði hvetja stjórnvöld til að hafna þessum áformum. Jafnframt hvetja þau sveitarfélög, veiðifélög, smábátasjómenn, veiðimenn og náttúruunnendur til að mótmæla þessum áformum á öllum stigum. „Fram undan er hörð barátta til verndar náttúrunni í Eyjafirði,“ segir í niðurlagi tilkynningarinnar.

Einn ökumaður var kærður í vikunni fyrir að aka undir áhrifum fíkniefna. Sá var í akstri á Patreksfirði um miðjan dag þann 29. mars. Þetta kemu fram í yfirliti lögreglunnar á Vestfjörðum um verkefni síðustu viku. Þrír ökumenn voru kærðir fyrir of hraðan akstur. Þeir voru allir í akstri í Strandasýslu.

Númeraplötur voru teknar af einu ökutæki á Ísafirði. En vanrækt hafði verið að færa það til reglulegrar skoðunar.

Fjórir ökumenn voru kærðir fyrir að nota farsíma meðan á akstri stóð, án þess að nota handfrjálsan búnað. Einn þessara ökumanna var ekki með öryggisbelti spennt. Þá voru aðrir tveir ökumenn kærðir fyrir að nota ekki öryggisbelti. Þessir ökumenn voru í akstri á Ísafirði, Bolungarvík og í Súðavík.

Lögreglan mun áfram gefa þessum öryggisþáttum sérstakan gaum. Ástæða er til að hvetja ökumenn til að einbeita sér að akstrinum og ef nota þarf farsíma meðan á akstri stendur, nota þá handfrjálsan búnað. Þá eru ökumenn og ekki síður farþegar hvattir til að nota öryggisbeltin eins og lög kveða á um.

Átján þingmenn úr fjórum flokkum, Sjálfstæðisflokknum, Pírötum, Framsóknarflokknum og Vinstri grænum, hafa lagt fram þingsályktunartillögu um framtíð Reykjavíkurflugvallar en staðsetning flugvallarins í Vatnsmýrinni hefur lengi verið umdeild.
Lagt er til að eftirfarandi spurning verði borin upp:

„Vilt þú að flugvöllur og miðstöð innanlands- og sjúkraflugs verði áfram í Vatnsmýrinni í Reykjavík?” og svarmöguleikar gefnir „já“ eða „nei“.

Þingsályktunartillagan er endurflutt frá síðasta löggjafarþingi en flutningsmenn voru þá Ögmundur Jónasson ásamt fleirum. Fjórir þingmenn Norðvesturkjördæmis eru meðal flutningsmanna tillögunnar nú, þau Lilja Rafney Magnúsdóttir, Haraldur Benediktsson, Gunnar Bragi Sveinsson og Ela Lára Arnardótttir.

Samkvæmt greinargerð með þingsályktunartillögunni er markmið hennar að þjóðin fái að hafa áhrif á staðsetningu miðstöðvar innanlands- og sjúkraflugs í náinni framtíð. Þar er einnig sagt ljóst að flugvöllurinn og staðsetning hans gegni mikilvægu öryggishlutverki fyrir almenning.

smari@bb.is