Byggðasafn Vestfjarða hefur sagt upp samningi við Ísafjarðarbæ um leigu á geymsluhúsnæði í Norðurtanganum á Ísafirði. „Það meðal annars vantar brunavarnarkerfi, það er enginn neyðarútgangur og þetta eru algjörar vanefndir á því sem talað var um og fullnægir því ekki kröfum safnsins,“ segir Jón Sigurpálsson, forstöðumaður Byggðasafnsins en einungis lítill hluti af eigum safnsins var kominn í geymslu í Norðurtanganum.

Sumarið 2015 gerði Ísafjarðarbær samkomulag við fyrirtækið,Hraðfrystihúsið Norðurtanga ehf. um 10 ára leigu á Norðurtanganum undir geymslur fyrir skjala- ljósmynda og listaverkasöfn bæjarins auk Byggðasafnsins.

Jóni er ekki kunnugt um hvort hin söfnin flytji inn í húsið.

Ákvörðun um 10 ára leigusamning Ísafjarðarbæjar við Hraðfrystihúsið Norðurtanga ehf. var tekin í miklum ágreiningi milli meiri- og minnihluta bæjarstjórnar, líkt og flestum er líklega í fersku minni.

smari@bb.is

Aron Ottó Jóhannsson nemandi við Menntaskólann á Ísafirði sigraði á sunnudag í miðstigsflokki í söngkeppninni Vox Domini líkt og greint var frá hér á vefnum í gær. Aron Ottó segist í sjöunda himni með sigurinn, hann segir þó byrjun síðustu umferðar í keppninni hafa verið eilítið taugatrekkjandi: „Ég var með fyrsta atriðið og steig fyrstur á svið í síðustu umferð keppninnar. það var frekar stressandi að vera fyrstur á svið. en ég hugsaði um það frekar eins og að rífa af sér plástur, betra að ljúka því sem fyrst af.“

Aron Ottó hefur náð gríðarlega góðum árangri í söngnum og þykir hann hafa einstaklega fallega bassarödd, en einungis er um eitt og hálft ár frá því er hann hóf söngnám við Tónlistarskóla Ísafjarðar. Vox Domini, var nú haldin í fyrsta sinn en það er FÍS, Félag íslenskra söngkennara sem fyrir henni stendur og er ætlunin að keppnin verði haldin árlega. Aron Ottó ber keppninni vel söguna: „Þátttakan í keppninni var skemmtileg upplifun. Þetta var eitthvað algjörlega nýtt fyrir mig, og ólíkt öllu því sem ég hef gert áður. Baksviðs var að finna allskonar frábæra söngvara frá öllum landshornum; bassa,  tenóra og sópran söngkonur, söngvara af öllu stærðum og gerðum.“

Aðspurður um hvað söngurinn geri fyrir hann stendur ekki á svari hjá bassasöngvaranum unga: „Ég myndi segja að söngur hafi gríðarlega góð áhrif á sálina, söngur er frelsandi.“

annska@bb.is

Fyrsta útskipun ársins fór fram í gær hjá Íslenska kalkþörungafélaginu á Bíldudal þegar fjögur þúsund tonnum af kalkþörunngum var skipað um borð í flutningaskipið Wilson Huelva. Héðan sigldi skipið áleiðis til hafnarborgarinnar Castletownbere á Írlandi þar sem hluta farmsins verður skipað á land, áður en skipið heldur áfram til Lorient í Bretáníu í Frakklandi þar sem restinni verður skipað upp.

smari@bb.is

Viðskiptaráð áréttar að skráður eigandi Hrafnseyrarkirkju sé samkvæmt fasteignaskrá Þjóðskrár Ríkissjóður Íslands. Hrafnseyrarnefnd er skráð sem umráðandi kirkjunnar en þinglýstur eigandi hennar er íslenska ríkið. Tilefni tilkynningar Viðskiptaráðs er yfirlýsing fyrrverandi og núverandi formanns sóknarnefndar Hrafneyrarkirkju um tillögu Viðskiptaráð um að ríkið selji tuttugu kirkjur, þar á meðal Hrafnseyrarkirkju. „Þetta verður að kalla brandara dagsins, því ríkissjóðurinn okkar á ekkert í Hrafnseyrarkirkju og hefur aldrei átt. Hvorki spýtu né nagla,“ segir í bréfi formannanna.

Á vef Viðskiptaráðs segir:

„Í tilkynningu formannanna er fullyrt að árið 1910 hafi sóknarpresturinn á Hrafnseyri afhent Hrafnseyrarsöfnuði kirkjuna til eignar og varðveislu. Þessari afhendingu hefur ekki ennþá verið þinglýst. Því má spyrja sig hvort hinn eiginlegi brandari sé sá að Hrafnseyrarsöfnuður hafi á 107 árum ekki haft tíma til að ganga frá þessari þinglýsingu.“

Í gær birtist frétt á bb.is um áramóta og þrettándagleði og því miður fór fréttamaður með fleipur sem er bæði rétt og skylt að leiðrétta. Í myndbrotinu af brennunni á Ísafirði sést þegar flugeldi springur í haffletinum og dró fréttamaður þá röngu ályktun að um mistök hefðu verið að ræða. Nú hafa forsvarsmenna Björgunarfélags Ísafjarðar sem sáu um flugeldasýninguna upplýst að um var að ræða flugelda sem skotið er meðfram haffleti og springa þar, svokallaðar vatnabombur.

bryndis@bb.is

Þrátt fyrir að álagningarprósenta fasteignaskatts sé í hæstu hæðum í Ísafjarðarbæ segir Gísli Halldór Halldórsson bæjarstjóri að þegar fasteignaskattar séu bornir saman, komi í ljós að Ísafjarðarbær er í 52. sæti þegar kemur að álagningu fasteignaskatts á hvern íbúa. Fasteignaskattur á hvern á íbúa Ísafjarðarbæjar er kr. 70.049 og er það innan við 50% af meðaltali allra sveitarfélaga landsins, en meðaltalið árið 2016 er kr. 152.322. Í þessum tölum eru allir fasteignaskattar taldir saman, þeir sem eru lagðir á íbúðarhúsnæði, opinbert húsnæði og atvinnuhúsnæði.

Fasteignaskattur er annar stærsti tekjustofn sveitarfélaganna og er lagður árlega á flestar fasteignir í landinu. A-skattur er lagður á íbúðarhúsnæði og getur verið allt að 0,5% af fasteignamati. B-skattur er lagður á ýmsar opinberar byggingar og er 1,32% af fasteignamati. C-skattur er lagður á atvinnuhúsnæði og annað húsnæði sem ekki fellur undir A- eða B-skatt og getur verið allt að 1,32% af fasteignamati.

Ísafjarðarbær innheimtir hæstu leyfilegu fasteignaskatta

Sveitarstjórnum er heimilt að hækka álagningu A- og C-skatta um allt 25%. Hámarksálagning A-skatts er þá 0,625% og C-skatts 1,65%. Bæjarstjórn Ísafjarðarbæjar hefur nýtt sér þessa heimild og innheimtir hæstu mögulegu fasteignaskatta og er eitt sjö sveitarfélaga á landinu sem innheimta hámarksskatta á íbúðarhúsnæði – auk Ísafjarðarbæjar er eitt annað sveitarfélag á Vestfjörðum með álagningarprósentuna í botni en það er Árneshreppur.

Fimmtungshækkun

Íbúum Ísafjarðarbæjar brá mörgum í brún er þeir fengu álagningarseðil fasteignagjalda þessa árs. Dæmi eru um að þau hækki um 20% milli ára.

„Mér er kunnugt um fólk sem býr við mikla hækkun fasteignaskatts á þessu ári, hjá sjálfum mér nemur þessi hækkun 19,7% og stafar eingöngu af hækkun fasteignamats. Fasteignaskattur hefur þann galla eins og eignarskattar almennt að þó að verðgildi eignar aukist þarf það ekki að þýða tekjuaukningu fyrir eigandann. Við fólk sem lendir í svona miklum hækkunum er ekkert hægt að segja annað en að eign þeirra hefur aukist að verðgildi á sama tíma. Það eru reyndar góðar fréttir fyrir framþróun sveitarfélagsins að fasteignamat hækki, en það hefur verið lengi verið of lágt til að hægt sé að byggja eða fá sannvirði fyrir eignir fólks,“ segir Gísli Halldór.

Segir margt vinna gegn lægri sköttum

Bænum er að sjálfsögðu frjálst að lækka álagningarprósentuna en Gísli Halldór segir ýmsa þætti vinna gegn því að prósentan sé lægri en raun ber vitni. Hann nefnir lægra fasteignamat í Ísafjarðarbæ en í mörgum sveitarfélögum og langt undir fasteignamati sem tíðkast á suðvesturhorninu. Lítið er um risavaxnar fasteignir og stórfyrirtæki sem borga mikla fasteignaskatta. Þá taki það verulega í að reka sveitarfélag þar sem íbúum fækkar líkt og reyndin hefur verið í Ísafjarðæ og enn er eftirspurn eftir aukinni þjónustu sveitarfélagsins – umfram þá sem nú er veitt. Þannig er t.d. mikill þrýstingur frá foreldrum ungra barna að veitt verði leikskólaþjónusta til barna frá 12 mánaða aldri.

Aðstöðumunur sveitarfélaga mikill

Gísli Halldór segir að aðstöðumunur sveitarfélaga sé afskaplega mikill þegar kemur að fasteignagjöldum og bendir á að Reykjavíkurborg fær 76% meiri fasteignaskatt per íbúa heldur en Ísafjarðarbær. Það skýrist það að stórum hluta af muni á fasteignamati, en einnig af af gríðarlegum umsvifum hins opinbera í Reykjavík sem og  höfuðstöðvum stórra fyrirtækja. En þegar einungis er borin saman fasteignaskattur sem er lagður á einstaklinga dekkist myndin fyrir Ísafjarðarbæ, en álagning fasteignaskatt á íbúðarhúsnæði er 27.918 kr. per íbúa í Reykjavík en 34.000 kr. í Ísafjarðarbæ.

Gísli Halldór setur stórt spurningarmerki við að fasteignaskattar séu yfirhöfuð burðarstoð í rekstri sveitarfélaga og bendir á sveitarfélög eins og Hvalfjarðarsveit, Skorradalshrepp og Fljótsdalshrepp sem eru „svo heppin að fá risavaxin hálfopinber verkefni inn í fámenn sveitarfélög.“

„Munurinn verður síðan enn svakalegri þegar maður skoðar sveitarfélög eins og Hvalfjarðarsveit, Skorradalshrepp og síðast en ekki síst Fljótsdalshrepp sem eru svo heppin að fá risavaxin hálfopinber verkefni inn í fámenn sveitarfélög. Það má þess vegna setja stórt spurningarmerki við það að þessi skattur sé yfirhöfuð burðarstoð í rekstri sveitarfélaga,“ segir Gísli Halldór. Fljótsdalshreppur innheimti 1,6 milljón kr. í fasteignaskatta per íbúa á síðasta ári og langstærsti hlutinn kemur vegna fasteignagjalda af Kárahnjúkavirkjun.

smari@bb.is

Keppnislið Menntaskólans á Ísafirði vann góðan sigur á liði Verkmenntaskólans á Austurlandi í fyrstu umferð Gettu Betur í gærkvöldi. Liðin tvö voru þau fyrstu sem mættust þetta árið og var MÍ með yfirhöndina allan tímann, en lokatölur voru 24-18. Lið MÍ skipa þau; Ína Guðrún Gísladóttir, Kolbeinn Sæmundur Hrólfsson og Veturliði Snær Gylfason og þjálfari liðsins er Ingunn Rós Kristjánsdóttir málfinnur skólans. Liðið er nú komið í síðari umferð  keppninnar á Rás 2, sem fer fram dagana 6. og 7.febrúar.

Spyrill Gettu betur er Björn Bragi Arnarson, spurningahöfundar og dómarar eru þau Bryndís Björgvinsdóttir og Steinþór Helgi Arnsteinsson og þeim til aðstoðar er Björn Teitsson.

annska@bb.is