Lífshlaupið, landskeppni í hreyfingu, sem er heilsu- og hvatningarverkefni Íþrótta- og Ólympíusambands Íslands, hófst á nýjan leik í dag, en þetta er í tíunda sinn sem landsmenn huga að hreyfingu fyrir tilstuðlan verkefnisins. Í Lífshlaupinu eru landsmenn hvattir til þess að huga að sinni daglegu hreyfingu og auka hana eins og kostur er þ.e. í frítíma, vinnu, í skóla og við val á ferðamáta. Stuðst er við ráðleggingar Embætti landlæknis um hreyfingu, þar sem börnum og unglingum ráðlagt að hreyfa sig í minnst 60 mínútur á dag og fullorðnum í minnst 30 mínútur á dag.

Lífhlaupið skiptist niður í vinnustaðakeppni, sem stendur yfir í þrjár vikur í febrúar, framhaldsskólakeppni 16 ára og eldri og grunnskólakeppni fyrir 15 ára og yngri sem standa í tvær vikur og einstaklingskeppni þar sem allir geta tekið þátt og skráð sína daglegu hreyfingu allt árið. Skrá má alla hreyfingu sem nær minnst 30 mínútum samtals á dag hjá fullorðnum og minnst 60 mínútum samtals á dag hjá börnum og unglingum. Tímanum má skipta upp í nokkur styttri tímabil yfir daginn s.s. 10 til 15 mín í senn.

Vinnustaðir, skólar og einstaklingar eru hvattir til að taka þátt og nota þannig tækifærið til að efla líkama og sál með því að hreyfa sig daglega. Hægt er að skrá sig til leiks á heimasíðu verkefnisins, lifshlaupid.is

annska@bb.is

Dagur kvenfélagskonunnar er í dag 1.febrúar, en þann dag árið 1930 var Kvenfélagasamband Íslands stofnað og var ætlun þess að vera samstarfsvettvangur kvenfélaganna í landinu en þau voru þá þegar orðin fjölmörg. Fyrsta kvenfélagið, Kvenfélag Rípurhrepps, var stofnað árið 1869. Með störfum sínum innan kvenfélaganna má segja að konur hafi tekið völdin í sínar hendur talsvert áður en þær fengu aðgengi að stjórnkerfinu með kjörgengi og kosningarétti. Frá því er Kvenfélag Rípurhrepps var stofnað hafa konur alls staðar á landinu stofnað hundruð kvenfélaga með það að markmiði að bæta samfélagið. Sér í lagi hafa kvenfélagskonur í gegnum tíðina verið öflugir bakhjarlar samfélaga sinna og þá sér lagi í málefnum barna og kvenna.

Mörgu væri á annan hátt farið ef konur hefðu ekki tekið höndum saman og fundið þann samtakamátt sem skapast er margir leggja saman hönd á plóg. Störf kvenfélagskvenna eru og hafa verið  samfélaginu öllu afar mikilvæg þó ekki hafi þau alltaf farið hátt eða mikið farið fyrir þeim í fjölmiðlum. Árið 2010 var ákveðið af Kvenfélagasambandi Íslands að gera kvenfélagskonunni og þeim störfum sem hún vinnur hátt undir höfði og var því ákveðið að útnefna stofndag sambandsins „Dag kvenfélagskonunnar.“ Hvetur Kvenfélagasambandið landsmenn alla til að heiðra kvenfélagskonur þennan dag.

Kvenfélögin í landinu telja nú um 5000 meðlimi og eru störf félaganna margþætt. Starfandi eru 18 héraðssambönd um land allt, þar á meðal Samband vestfirskra kvenna þar sem starfa um 320 konur i 13 félögum. Fjölmörg kvenfélög gera sér glaðan dag og munu kvenfélagskonur á norðanverðum Vestfjörðum koma saman á Hótel Ísafirði í kvöld og fagna deginum.

annska@bb.is

Hótel Reykjanes í Ísafjarðardjúpi stendur frammi fyrir því að geta misst allt neysluvatn vegna þess að eigandi jarðarinnar Reykjafjarðar hótar að skrúfa fyrir vatnslögnina. Reykjanes hefur um áratugaskeið fengið neysluvatn úr vatnsbóli í landi Reykjafjarðar. „Vegna þessa máls lítum við svo á að okkar rekstur sé uppnámi og geti fyrirvaralaust stöðvast. Stór hluti bókana fyrir sumarið 2017 hefur þegar átt sér stað og því óhugsandi að lenda í rekstrarstöðvun,“ segir í bréfi Jóns Heiðars Guðjónssonar, eiganda Ferðaþjónustunnar í Reykjanesi, til Ísafjarðarbæjar og Súðavíkurhrepps þar sem hann óskar eftir aðstoð sveitarfélaganna.

Í bréfi sínu til sveitarfélaganna lét Jón Heiðar fylgja með tvö bréf sem Salvar Hákonarson, eigandi Reykjafjarðar, sendi Ferðaþjónustunni í Reykjanesi. Salvar segir í bréfi frá því í síðasta mánuði að bann sem hann hafi sett í maí 2015 við framkvæmdum á vatnsverndarsvæðinu hafi ekki verið virt. Hann hafi því ákveðið að öllum utanaðkomandi aðilum séu óheimil vatnsafnot í landi Reykjarfjarðar og taki sú ákvörðun strax gildi.

„Því miður hefur Ferðaþjónustan Reykjanesi ehf. haft með höndum framkvæmdir og jarðrask á svæðinu sem hvorki hefur verið leyfi fyrir eða samþykki landeigenda,“ segir í bréfi Salvars og ennfremur að eigendur Reykjaness séu að færa sér í nyt eigur og landgæði annarra og valda óbætanlegu tjóni á viðkvæmu svæði.

Jón Heiðar hafnar því að hafa lagst í framkvæmdir í óleyfi.

Í erindi Jóns Heiðars kemur fram að þegar ríkið seldi Reykjanesskóla hafi honum verið sagt frá samkomulagi við föður Salvars, þáverandi eiganda Reykjafjarðar, um um gjaldfrjáls afnot af neysluvatninu gegn því að heimilisfólkið í Reykjarfirði fengi endurgjaldslaus afnot af heitum böðum og sundlaug í Reykjanesi.

smari@bb.is

Forsætisnefnd Alþingis leggur til að aukagreiðslur þingmanna vegna starfs- og ferðakostnaðar verði lækkaðar á móti þeim miklu launahækkunum sem þingmenn og aðrir kjörnir fulltrúar fengu á kjördag. Greiðslurnar sem lagt er til að verði lækkaðar hafa verið gagnrýndar í gegnum tíðina. Þær eru að hluta skattfrjálsar og þingmenn hafa fengið þær greiddar án þess að þurfa að sýna fram á nokkurn kostnað á móti.

Nefndin leggur til að skattfrjálsar ferðakostnaðargreiðslur verði lækkaðar um 54 þúsund krónur á mánuði og starfskostnaðargreiðslur um 50 þúsund krónur. Sé tekið tillit til skattlagningar jafngildir þetta 150 þúsund króna lækkun fyrir skatt samkvæmt útreikningum forsætisnefndar og greiðslur til þingmannna, þ.e. þingfararkaup og fastar mánaðarlegar greiðslur, eiga að vera innan þeirrar launaþróunar  sem orðið hefur frá því að kjararáð hóf að úrskurða um þingfararkaup árið 2006.

smari@bb.is

Á laugardaginn var fluttur á Rás 1 áhugaverður útvarpsþáttur Finnboga Hermannssonar um líf og starf Ragnars H. Ragnar tónlistarfrömuðs á Ísafiðri. Hann var fyrsti skólastjóri Tónlistarskóla Ísafjarðar 1948 og stjórnaði skólanum til ársins 1984. Skólinn varð strax þekktur undir hans stjórn og hann mótaði þær hefðir sem margar hverjar enn eru hafðar í heiðri og við skólann og frá honum er kominn sá mikli metnaður og hái standard sem jafnan ríkir í starfi skólans. Auk brots úr viðtali við Ragnar er í þættinum rætt við nokkra samferðamenn hans og einnig má heyra hann sjálfan leika eitt af sínum uppáhaldslögum í upphafi og lok þáttarins.

Þátturinn er aðgengilegur í Sarpi RÚV.

smari@bb.is